​​Ayolga gul bering

Ayolga gul bering, shunday gullarki,
Erkak yuragidan ungan gullarni.
Ayolga gul bering, shunday gullarki,
Erkakning mehridan ungan gullarni.

Azizam, onam deng, e’zozga o‘rang,
Ko‘zingizga surtib etaklarini.
Mana shu hazrati ayol ulg‘aytgan,
Dunyoning hazrati erkaklarini.

Baloi ishq dashti biyobonida
Bag‘ri tilinmagan ayol bormikin?
Taqdirning beshafqat toshbo‘ronida
Yuragi sinmagan ayol bormikin?

Ayolga gul bering, shunday gullarki,
Erkak bardoshidan ungan gullarni,
Ayolga gul bering, shunday gullarki,
Erkak ko‘z yoshidan ungan gullarni.

Har bitta erkakning umr yo‘lida
Balodan qutqarib qolgan ayol bor.
Ajdarning og‘zidan, jar yoqasidan,
Sochi-la, sug‘irib olgan ayol bor.

Ayolga gul bering, shunday gullarki,
Erkak quvonchidan ungan gullarni.
Ayolga gul bering, mard epkaklarning,
Rashkidan, qizg‘onchidan ungan gullarni.

Ayolni, vatanni sevgan nasllar,
Asrlar qa’ridan etadi ogoh,
Ayolni aldamoq, onani sotmoq,
Vatanni sotmoqdek eng og‘ir gunoh.

Ayolga gul bering, shunday gullarki,
Erkak nafasidan ungan gullarni.
Hayqiriq, baqiriq, chaqrig‘imas,
Shiviridan, sasidan ungan gullarni.  

U sizni kechirar munisu mushtoq,
U sizni oqlaydi, siz oppoq, oppoq.
Evaziga esa sizdan kutgani,
Tushunmoq, tushunmoq, tushunmoq.

Ayolga gul bering, shunday gullarki,
Erkak yuragidan ungan gullarni.

Zulfiya Mo‘minova, O‘zbekiston Yozuvchilar uyushmasi a’zosi, shoira

"QASHQADARYO AXBOROTI"

Xotin-qizlar salomatligini muhofazalashga davlatimiz tomonidan alohida eʼtibor qaratilmoqda

https://t.me/qashoilavaxotinqizlar

Hamjihatlik oilani mustahkamlaydi, birgalikda ovqatlanish doim shirin!

https://t.me/qashoilavaxotinqizlar