يارقيه
مشتاكه لحسين

مولاتي رقيه عليها السلام
القصيدة : مشتاكه لحسين

▪️▫️▪️▫️▪️▫️

رقيـــ يارقيه ـــــ يارقيه ــــــ يارقيه ــــــه
ــــــــــــــــــــــــــــــــــــــــــــــــــــــــــــــــ
مشتاكه لحسين ودرب عاثوره
من مشيج مبينه تره مكسوره
فوك الحزن فوك الالم مقهوره
لاوالــــــي ضلج لا ابـــو مبتوره

رقيـــ يارقيه ـــــ يارقيه ــــــ يارقيه ــــــه
ــــــــــــــــــــــــــــــــــــــــــــــــــــــــــــــــ
من نبرتج كلشي اختلف بيامج
جلمة يبويه اتزود اهيه اللامج
وشوفت عزيزج يارقيه احلامج
امكيده ورأس الابـــو كدامـــج

رقيـــ يارقيه ـــــ يارقيه ــــــ يارقيه ــــــه
ــــــــــــــــــــــــــــــــــــــــــــــــــــــــــــــــ
عصبوها عينج لاتشوف الضامي
وانتي وحيده ابين عسكر شامي
ابهـــاي الخرايــب يارقيـــه نامـي
لحسين مذبوح اوخضيب ودامي

رقيـــ يارقيه ـــــ يارقيه ــــــ يارقيه ــــــه
ــــــــــــــــــــــــــــــــــــــــــــــــــــــــــــــــ
وحــدج بقيتي وهــاي عمتج يمج
اشكي هضم كلبج يطفله وهمج
الحبل ملتف واصل الحد عظمج
متغير اهــواي الشكل مو رسمج

رقيـــ يارقيه ـــــ يارقيه ــــــ يارقيه ــــــه
ــــــــــــــــــــــــــــــــــــــــــــــــــــــــــــــــ
شلــون بيج وانتي فـــوك الناكـــه
مشتاكه لحسين وصدك مشتاكه
الدمعـــــه تنزل عالوجن حراكـــه
يصعب عليج الغالي اهوه افراكه

رقيـــ يارقيه ـــــ يارقيه ــــــ يارقيه ــــــه
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري

يامولاتي يارقيه
القصيدة : حلم طفله
▫️▫️▪️▫️▪️▫️

حلـــــم طفله رقيــــه اتريّد الحسين
وخلص درب السبي ابهاهات الونين
ــــــــــــــــــــــــــــــــــــــــــــــــــــــــــــــــ
حلم طفلة تناشق بالبجي على الراح
تريد الغالي بــس الغالي فوك ارماح
وكلهـــا مكيده ودايرها بــس اصياح

اشيضل بيها البجت حتى فصوص العين
حلـــــم طفله رقيـــــه اتريد الحسين
ــــــــــــــــــــــــــــــــــــــــــــــــــــــــــــــــ
من طف كربله صـــار الدرب ملعون
نهش بيها واخـــذ منها نظر العيون
بحيث الليل تساوه ويه الصبح باللون

كــل خطــوه تكلّ الـ زينب احنه وين
حلـــــم طفله رقيــــه اتريد الحسين
ــــــــــــــــــــــــــــــــــــــــــــــــــــــــــــــــ
تنـــادي على العقيله والقلب مفتوت
خذوها للطشت وبسرعه راح الصوت
وبنّت قمة حلمها على الطشت بالموت

على الشافته مايفرق بعد هالبين
حلـــم طفله رقيــه تريد الحسين
ــــــــــــــــــــــــــــــــــــــــــــــــــــــــــــــــ
اخر لحظة شافت مصحف الله اجروح
اجلاده مخضب وكـــل ايه بـــيه اتنوح
مـــن البسمله بكطع النحـــر مذبوح

اثر طبره على شفته وجوه عينه ثنين
حلــــــم طفله رقيـــــه اتريّد الحسين
ــــــــــــــــــــــــــــــــــــــــــــــــــــــــــــــــ
وفاها الاجل من صرخت ابحسره
يابويـــه وحبيبـي ياضـــوه الزهـــره
اهنانــه بينت اشكدها تره الكسره

وعمتهـــا العقيلـه ضلـــت ابنارين
حلـــــم طفله رقيــــه اتريّد الحسين
ــــــــــــــــــــــــــــــــــــــــــــــــــــــــــــــــ
ملخص قُصة الطفلة ونبين الصار
بحرك صيوان اهلها ركضت من النار
وضلت خايفه وضل الكلب محتار

وصاحت عمه شيشوف الكلب بعدين
حلـــــم طفله رقيــــه اتريّد الحسين
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري

ياحسين
القصيدة : كلنه مشايه

▪️▫️▪️▫️▪️▫️

رفت الرايه .. رفت الرايه
ابيا علي الكرار .. كلنه مشايه
ــــــــــــــــــــــــــــــــــــــــــــــــــــــــــــــــ
هاي السنه بيها المشي يحله
بحرورة الجو ننجوي سهله
حسين غالي من الكلب اغله
كل عام عدنه هالمشي رحله

رحله .. بيها السهر بيها التعب يحله
رحله .. بيها اتفق كلب الوفي وعقله
ابعيد الدرب بس الحسين اقرب
زاير يكل للثاني ما نتعب .. سهله

رفت الرايه .. رفت الرايه
ابيا علي الكرار .. كلنه مشايه
ــــــــــــــــــــــــــــــــــــــــــــــــــــــــــــــــ
الخطوه محسوبه الك عُمره
اكصد اله ابدمعاتك وحسره
هذا الدرب ارجوك لا لتخسره
ويه الخدم لحسين نطلع سفره

الى الله .. سفره الى الله
حسيناه .. بدمنه حسيناه
مشيناه .. دربك مشيناه .. الى الله

القارات السبعه ظجت
والكربلاء حسين حجت .. الى الله

رفت الرايه .. رفت الرايه
ابيا علي الكرار .. كلنه مشايه
ــــــــــــــــــــــــــــــــــــــــــــــــــــــــــــــــ
حسين عالمنه ورزق النه
الراحه من نتعب تعودنه
وهذا الطريق بعشكه خبلنه
جنون بينه الكربله كلنه

مجانينه .. مجانينه
يلايم بالله خلينه

رفت الرايه .. رفت الرايه
ابيا علي الكرار .. كلنه مشايه
ــــــــــــــــــــــــــــــــــــــــــــــــــــــــــــــــ
الكافل التارس سمه نوره
من نوصل الطف كربله نزوره
بطول الدرب هالروح منذوره
اسمه انكتب كلمن وصل دوره

الحسين يسوه التعب
وتراب جدمك ذهب
والراح اسمه انكتب .. زاير العباس

رفت الرايه .. رفت الرايه
ابيا علي الكرار .. كلنه مشايه
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري

لـ علي الاكبر ع
على لحن ( حنا خوالو )

القصيدة : اصل الشجاعه
محرم الحرام 1446 هــ

▪️▫️▪️▫️▪️▫️

نبع الشهامــه تره من خيمة المفخره
من ابن الحسين اصل الشجاعه
ــــــــــــــــــــــــــــــــــــــــــــــــــــــــــــــــ
طبها صنديد علي يصيد يصيب ابخزرتـــه
حجر سجيل رجـــاجيل تخــــوف صيحته
شهم ماهاب والاركــاب دنـــت يم ضربته
خنس الكون علي ايكون مثاله وشمرتـــه

جنه علــي الاولي ماكو فتى بس علي
صكــــــار الانذال شهم ابطباعــه
من ابن الحسين اصل الشجاعه
ــــــــــــــــــــــــــــــــــــــــــــــــــــــــــــــــ
لاطــم السيل نــزل ويـــل يحطم كل قوي
فـارس ايصول والفحـــول يهزهـــا وتنلوي
خزرته الموت اذا يفـــوت يطَويهـم طـــوي
الينقل احداث بالابحـــاث شجاعــه ينروي

منه يخاف العـدو ابن الحُسين وكفو
من نحــره للدين لبـه الاطـــاعـــه
من ابن الحسين اصل الشجاعه
ــــــــــــــــــــــــــــــــــــــــــــــــــــــــــــــــ
مثل الاعصــار غضب ثـــار نزل لارض الحرب
محد ايحـوس والانفـــوس تدخــن بالرعــب
شاهر السيف على الكيف يهد يصلب صلب
طبهـا جيدوم والعلــــــوم تبرد هـــل كلب

صاكر زلمهم صكر وكباله بس اليفر
اليدنـــه الحــدود يلـــوي ذراعـــه
من ابن الحسين اصل الشجاعه
ــــــــــــــــــــــــــــــــــــــــــــــــــــــــــــــــ
الاكبر وصاح والارمــــاح تطيــــح وتنكسر
كل الفحـــول للخيـــول يسويهـــم جســر
ماهو بالريش على الجيش سيـــول وتنحدر
تخلخل الخوف بالصفــوف تولاهــم شطـــر

متروعه منــه زلم جده علي والنعم
سفن الميـــادين تمشي بشراعه
من ابن الحسين اصل الشجاعه
ــــــــــــــــــــــــــــــــــــــــــــــــــــــــــــــــ
صكر مهيوب والحـــروب ضروســه وللزلم
صفوف الارجال بالفعـــــال يطشرهــا اويلم
علي معـــروف عمه الشوف يطبها اويبتسم
الطكه مألـــوم وله يكــــوم يسويهـــا الشهم

من سيفه هذا الهوه كل عشره يطبك سوه
بالحومه هالجيش يعني ضياعــــه
من ابن الحسين اصل الشجاعه
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري

#المشايه
القصيدة : انفتحت ابواب السماوات
محرم الحرام 1446 هــ

▫️▪️▫️▪️▫️▪️

كـل الكواكـــب تستعد تمشي
صوب النحر من البحر كلشي
افـــلاك وانجوم ومجرات حُسينيه
انفتحت ابواب السماوات حُسينيه
ــــــــــــــــــــــــــــــــــــــــــــــــــــــــــــــــ
من كوكب الكوكب للحب سره المركب ويرتل اسم حسين
كلب الارض ينبض غير المحب يرفض بعشكه قرير العين

كلشي بحياة الكـــون جدد عهد واسلم
رايـــح يزور حسين وبهل فضـل ينعم
فضـــل الزياره جبير للنيته دمعه وخير
بالحضره سرب اطيور مو بشر من تلتم

رايـــة شجاعـــه اترفــــرف ابكبه
كــــــل زايـــر ايدندن لحن حبـه
اندندن اللحــان ومقامات حُسينيه
انفتحت ابواب السماوات حُسينيه
ــــــــــــــــــــــــــــــــــــــــــــــــــــــــــــــــ
درب العشك كلبه شايل ورد حبـــه تارس شليله الخير
اتشوفه كعبة حُب وبصدق روحك طب اتلاكي حته الطير

من الشجر والمــــاي من الهوه اوغيره
من السمـــه والغيـم من الثره الـ خيره
كلها تعــــوف الدار تكصد ديار الشـوك
بس كربلاء احسين اجمل واحــن ديره

كل خطوه تنعد ابالف حُجه
والرافك ايامك مشه الحجه
يامحله مشهدها المنارات حُسينيه
انفتحت ابواب السماوات حُسينيه
ــــــــــــــــــــــــــــــــــــــــــــــــــــــــــــــــ
بيه التعب يحله اجمل درب رحله من توصل الحضره
كل خطوه تخطيها دمعة الم بيها وتحفظك الزهره

كل الارض تنشاف موكب حُسيني اليوم
التارس شليله اهموم يرجع بلايه هموم
ثمرة تعبها ايصير ملكــه ويه اهــل النور
ابدرب الحُسين الناس راحته تخدم دوم

درب العشك واهسنه بالدمعه
كلب المحب لأجمل محب ينعه
هذا الدرب كله صلاوات حُسينيه
انفتحت ابواب السماوات حُسينيه
ــــــــــــــــــــــــــــــــــــــــــــــــــــــــــــــــ
اعظم رزق النه نغذي ملامحنه من عنده يبدي الشوك
اصدق عشك بينه فطري وتلاكينه بأجمل بشر معشوك

من عنده نبض الروح من اسمه وعيونه
هنيالـــه كلمن صـــار بيه منعجن لونـــه
منـــه النسيم ايصير ونشمـه لحساســـه
الحــب صـــدك مجنون يتباهه بجنونـــه

نوصل حضرته واحنـــه خطاره
نلكــه الحسين استقبل الزاره
دربك يصير ابهل ملاكات حُسينيه
انفتحت ابواب السماوات حُسينيه
ــــــــــــــــــــــــــــــــــــــــــــــــــــــــــــــــ
نهر الزلم يجري بالعاجل اليدوي تارس محنته الكون
صلى العشك بيهم ولمن تلاكيهم حبهم بالجنون

كل الطرق لحسين للحضره والشباج
من الدمع والعين والحد دعا المحتاج
كل الطرق لحسين مـــن اخـــر الدنيا
من موسم المشاي حد موسم الحجاج

كل شيعته من فاضل الطينه
درب الصدك ينبض عشك بينه
واسمـــه يعني الا نهايـــات حُسينيه
انفتحت ابواب السماوات حُسينيه
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري

ياعقيلة الكمر
القصيدة : عنوان حزن القافله
محرم الحرام 1446 هــ

▪️▫️▪️▫️▪️▫️

عنوان حزن القافله جم مصيبه ومعظله
لخصتها بالدمــــــع _ شيبتني كربله
ــــــــــــــــــــــــــــــــــــــــــــــــــــــــــــــــ
هذا كل الصار وسياط اعله متني
ميته اخوتـــي وفاركتها وفاركتني
غير حرك اخيامي والجمره العمتني
عكب كفالي الشمر سبني وضربني

والله صعبه المسئله طاحو احيود ابفله
لخصتها بالدمـــــــــع _ شيبتني كربله
ــــــــــــــــــــــــــــــــــــــــــــــــــــــــــــــــ
عكب سحك الخيل وسياط الشفتها
طفله من نار الخيم تركض جبتها
من دمه الترجيه والله انه عرفتها
اللمتني وعالنهـــــــــــر عيني درتها

شفت انـــــــواع البله بالدمـــوع النازله
لخصتها بالدمـــــــــع _ شيبتني كربله
ــــــــــــــــــــــــــــــــــــــــــــــــــــــــــــــــ
من طحت ياخويه وانته بخيل مسحوك
يعني معناها انسبينه وندخل السوك
الدرب عثره ومن مشينه هزل النوك
يادرب نحمل اذيتـــه ومتني مطكوك

الظعن منكـــــم خله وناكه هزله ومايله
لخصتها بالدمـــــــــع _ شيبتني كربله
ــــــــــــــــــــــــــــــــــــــــــــــــــــــــــــــــ
مجاني بعيون الكمر يشهد زماني
منين اجه هذا السهم وياخذ مجاني
صاب عينه اعله النهر لاجن عماني
عكبه وبسوطه زجـــر وليه ولانـــي

جروحي كلها مرتله وماشفت جلمة هله
لخصها بالدمــــــع _ شيبتني كربله
ــــــــــــــــــــــــــــــــــــــــــــــــــــــــــــــــ
كلشي متغير عكب اهلي واخوتـــي
راحو اشموس ابفله وادنـــه موتـــي
صوتي من الون يخوتي راح صوتـــي
هسه انخامن منو اليسمع نخوتـــي

وبالدموع الهامله وجم مصيبه حامله
لخصتها بالدمـــع _ شيبتني كربله
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري

علي روح حسين

الامام السجاد عليه السلام

القصيدة : علي روح حسين
محرم الحرام 1446 هــ

▪️▫️▪️▫️▪️▫️

علي روح حسين نار تچوي العين
بالدمــــــــع والاه ويلــــي واويلاه
ــــــــــــــــــــــــــــــــــــــــــــــــــــــــــــــــ
زين العبـــاد جـــرح حـــاد لجم كلبــه ونـزف
حاير اهـواي بلا مــــــاي يبس ريجه ونشف
من الطفوف عمه الشوف حزن روحه اختلف
ريــــح الالام هـــاليـــــام على اظعونه عصف

ماخـذ الدمعـات ظعنـه والاهات
والهضـــم ويـــاه ويلــــي واويلاه
ــــــــــــــــــــــــــــــــــــــــــــــــــــــــــــــــ
كلبه موجوع والدمـــوع على الخد هامله
ماخذه الليل على الويل مصايـــب نـــازله
جفـه مكيـود اخو الزود اجـــه مـن كربله
شافت العين بالحسـين سهــام الـ حرمله

بجرحهَ الملجوم وكلبـــهَ المالوم
بالحـــــزن ملكاه ويلــــي واويلاه
ــــــــــــــــــــــــــــــــــــــــــــــــــــــــــــــــ
صارت الناس والارجاس تشَتــم بالظعن
غربه والظيم حزن غيم تشوفه بلا وطن
ينزف ادموم والهمـــوم خذته على المحن
شايل هــات مصابـــات بالدروب التقن

يصلي بس مجروح حزنه عل مذبوح
كلشي ضـل ينعـــاه ويلــــي واويلاه
ــــــــــــــــــــــــــــــــــــــــــــــــــــــــــــــــ
رايـح الشــام باليتـــام ظعن اهله انكسر
شايف النـوح والجروح ترس روحـه القهر
بـدرب الونين دمه العين تصب امن الخطر
جايــــب الليل على الحيل صـــور من النحر

علي اتغير حيل ورافكه الياويل
موقف اشينساه ويلــــي واويلاه
ــــــــــــــــــــــــــــــــــــــــــــــــــــــــــــــــ
اتغير الحـــــال كلب شـــال ألـــم يتبع ألـــم
امصاب الاطياب والاسبــاب ظلع بيها انهشم
زيـــــن العبـــاد والاجســـاد بـلا روس وخيم
طاحـــت اسباع على الكـاع وكــع يمها العلم

كلشي ظل مكسور وماطفى هل نـــور
بروحه ضــل ذكراه ويلــــي واويلاه
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري

يامولاتي يازينب
القصيده على لحن ( الاطياب ) للرادود حيدر الفريجي
القصيدة : اعيد افعال حيدر
محرم الحرام 1446 هــ

▫️▪️▫️▪️▫️▪️

وحدي جني وكفيله وانه اسمي العقيله
وحدي وبلايه خوان هايــه رحله وطويله
ــــــــــــــــــــــــــــــــــــــــــــــــــــــــــــــــ
اجيت ابدرب الارمـاح
وحيده وحيلي ماطاح
اهـــز الحرك والصاح
واكلهم انـــه ( زينب )

اصيرن حيدره ايصــول
واشل كل هاي العقول
اسوي الصعــب معقول
حطــب والنـــار تلهب

من اصيح ياحُسين جفي يلوي الثجيله
ما اطيـــح وبيه حيل وانه اسمي العقيله

وحدي جني وكفيله
وانه اسمي العقيله
وحدي وبلايه خوان
هايــه رحله وطويله
ــــــــــــــــــــــــــــــــــــــــــــــــــــــــــــــــ
اسحـك رؤس يدرون
غيوره وانه ام عـــون
ابوي المنه يبجـــون
اعيد افعـــال حيــدر

اطيح الكَوفــه جواي
واهز الشـــام ويــاي
واثوب لهلي هالماي
واحط لفعالي مصدر

من اصول يعني موت حدي ياهو اليجيله
المــايصير خل يصير وانه اسمي العقيله

وحدي جني وكفيله
وانه اسمي العقيله
وحدي وبلايه خوان
هايــه رحله وطويله
ــــــــــــــــــــــــــــــــــــــــــــــــــــــــــــــــ
اشيل ابكلبي عبـــاس
واروحن رافعه الراس
اذل الجيش والنــاس
الشمت ويه الملامـــه

العلي بعيونـــي خزره
البطل كدامي اشطره
الوصل يم حدي يقره
على روحه السلامـــه

فعلي هاذ وجفي هاذ الكثره يمي قليله
ما اعــوف ثار اخــوي وانه اسمي العقيله

وحدي جني وكفيله
وانه اسمي العقيله
وحدي وبلايه خوان
هايــه رحله وطويله
ــــــــــــــــــــــــــــــــــــــــــــــــــــــــــــــــ
انه بنت القلع بـــاب
اليلقبونه ابو اتـراب
احط اليوم الاسباب
واخلي الدنيا تحتر

اهز اعروش الانذال
وابد مو جلمه تنكال
هلي ربات الافعـــال
واخلي الروس تفتر

كلها هاي الدنيا دوم تكضي ليله عله ليله
من اشوف الغربه نــار وانه اسمي العقيله

وحدي جني وكفيله
وانه اسمي العقيله
وحدي وبلايه خوان
هايــه رحله وطويله
ــــــــــــــــــــــــــــــــــــــــــــــــــــــــــــــــ
اغير الدنيـــا والريــح
جبل يم عتبتي ايطيح
اسكت كلمن ايصيح
يمي الصـــار والحــل

اطـــب ديـــوان لبــوه
واصير ابفعلي قــدوه
وخطابي اليوم يســوه
عرشهم يمـــــه ينذل

كلشـي دار وحملي جان جف اخوي اليشيله
دهري جار وليلي نـــار وانه اسمي العقيله

وحدي جني وكفيله
وانه اسمي العقيله
وحدي وبلايه خوان
هايــه رحله وطويله
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري