Забт этгани камдай кундузим
Қора совуқ кезар тушда ҳам.
Заҳҳок бошин сапчадек узиб
Қачон келар баҳор - хушхабар.

Туркий шаҳар бедарвозами,
Мум ютганми ёхуд туркийлар?
Ярим бўлган сабр косани
Тўлдирмоққа ошиқар бийлар.

Аммо тўлмас, қилт этмас савил,
Бечоралар ғафлат чоҳида.
Замонага мадҳия айтиб,
Дўзах тилар ўлган шоҳига...

Мен ўткинчи, излаганим йўл,
Илҳом, ҳайрат, муҳаббат завқи.
Ҳолдан тойди юрагим - Ғиркўк,
Қанча йўл бор толега, тақвим?!

✍ Нурмуҳаммад АЗИЗ

https://t.me/zarif_gussa/1

ИМЛО ЛУҒАТИДАГИ ХАТО

Қумрилар қиқирлаб ўйнаса - Хаёл,
Шоирлар ёруғ кун кўрмаса - Ҳаёт,
Руҳингда ёғдулар ўрласа - Хаёл,
Султонлар суягин хўрласа - Ҳаёт.

Ҳамон Хаёл гўзал, Ҳазрати Чўлпон,
Юлдузни етаклаб келади ерга.
Хоҳласанг, денгизлар ортига йўл бор,
Хоҳласанг, севгилинг қошига элтар.

Кўҳна томошадан чарчамас Ҳаёт -
Жўмард юракларни янчгани янчган...
Ўша кун боладай едингми таёқ,
Ва ё катталардай сотилдинг ганжга?

Қалтис лаҳзаларда чалғитди кимлар,
Ё сиёсат қилиб қўрқитдими шоҳ?
Сен кимнинг умрини яшадинг, Имло,
Хаёл қаттиқ, Ҳаёт негадир юмшоқ.

✍ Нурмуҳаммад АЗИЗ

https://t.me/zarif_gussa/1

Руҳимда бир Иблисми, Илоҳ
Маҳв этади курашсиз, жангсиз.
Яшай десам, ҳаёт бежило,
Кетай десам, ўлим ҳам рангсиз.

Шундай кечар фасл ҳам, йил ҳам,
Бешафқатдир дераза орти.
Мен ям-яшил боғларга илҳақ
Жиним суймас қорани ортиқ.

Бир муштипар мусича бўзлар:
"Ёзмайсан-а ўлим ҳақида?"
О, бу кўзлар, дилафгор кўзлар
Мунг кезади туб-туби қадар.

Жон-жонимдан ўтганда аёз,
Қайта-қайта чиқиб йўлимдан
Шу илтижо таъқиб қилар боз,
Шу илтижо асрар ўлимдан:

"Ёзмайсан-а ўлим ҳақида?"

✍ Нурмуҳаммад АЗИЗ

https://t.me/zarif_gussa/1

1. ХУЛОСА

Топганимни йўлга харж қиламан мен,
Онам дийдорини важ қиламан мен.
Каъба тавофидир она дийдори,
Бир йилда ўн марта ҳаж қиламан мен.

СЕВГИ

Кўкка сиғди,
ерга сиғди,
бир уйга сиғди,
бир сатр,
бир чизги,
бир куйга сиғди,
бир қатра,
бир қадаҳ,
кўзага сиғди,
жуссага,
ғуссага,
бўсага сиғди,
бир лаҳзага сиғди,
минг йилга сиғди,
кўзга сиғди,
кўнгилга сиғди,
бир инжа киприкда қалқиб турди у,
шунда ҳам эсини йиғмади:
ақлга сиғмади,
ақлга сиғмади.

Мансур Жумаев

Инна лиллаҳи ва инна илайҳи рожиъун.

Аллоҳнинг тақдири, нима ҳам деймиз. Яхшиларни чақириб олиши ҳақида айтишарди.

Истеъдод, Инсон, Севикли ёр, Яхши ота, Яхши дўст...

Бунчалик яхши бўлманг эди, Мансур...

Бу на аруз, на-да бармоқ,
Вале ёзмоққа чоғландим.
Туроқлар тентираб тарқоқ,
Ҳижолар ҳам ҳижолатдир... 

Талпинарман туну тонгда,
Йўлим поёнига етмас.
Ҳар лаҳза минг ўлиб ёнсам,
Ўлим поёнига етмас.

Қаршимда у, кўзим юмсам,
Кўзим очсам Аршда гўё.
Бул ҳажрдан битай "Хамса",
Шудир сўзнинг гашти гўё.

Бу бахмал қош...
Буюк Наққош
бисотим бунчалар ночор.
Хасаддан ҳасрати яққол
Хилол лов-лов ёнар ночор.

Фалак, раҳм этгил андак,
Байтлар юбор олмос-олмос.
Эҳ-ҳ-ҳ, Навоий эмасман-да,
Шаҳаншоҳ ҳам Бoйқаромас.

✍ Нурмуҳаммад АЗИЗ

https://t.me/zarif_gussa/1

✍ Nurmuhammad AZIZ
? Firdavs Shokirzoda

Yaxshiyam Firdavs bor,
yaxshiyam shu she'rim bor.

https://t.me/zarif_gussa/1

БАХТ

Димоғимда қизғалдоқ иси,
Руҳим қанот қоқар самода.
Йўқламасин Ҳазрати Хизр
Мен шундоғам бадавлат одам.

Воҳ-ей-воҳ-ей, шоирман тағин,
Мадх этгали ҳайрату ҳолим.
Юрагимга йўламас яқин
Бахтиқаро  ғуллар замони.

Ким оламни олган жахонгир?
Унга тенгман,
Йўқ, ундан баланд.
Бағримдаги митти баҳорнинг
Қошларини сийпалаган пайт.

Бу лахза минг севишга арзир,
Димоғимда қизғалдоқ иси.
Қизғонади ўғлим - йўлбарсим,
Ачом қилиб ухлайди қизим.

✍ Нурмуҳаммад АЗИЗ

https://t.me/zarif_gussa/1

Камалакни кафти билан ушлаганлар,
Сояси ҳам тавозени хушлаганлар,

Жиғилдондан бўлак жавҳар лоф аларга,
Ақча бўлсин, балчиқда ҳам соф аларга,

Ҳар хатосин шароб ила ювган қавм,
Шоир бўлсанг шаккок дея қувган қавм,

Маишатга дуру гавҳар сарфлаганлар,
Овлоқларда Ватанни ҳам нархлаганлар,

Ҳақиқатнинг ҳассос тилин суғургандир,
Ой қароли, шамоллар ҳам югурдакдир,

Кўз олдингда кўз ўйнатиб, кўз ўярлар,
Мажнун бўлсанг мозорингга ўт қўярлар.

✍ Нурмуҳаммад АЗИЗ

https://t.me/zarif_gussa/1

Ичимда бир бургут,
ичимда бир ғул,
ичимда бир турку,
ичимда бир хун,
ичимда бир ҳадис,
ичимда минг шарҳ,
ичимда бир жадид,
ичимда бир шайх,
ичимда бир нолиш,
ичимда бир ҳамд,
ичимда бир золим
найранг билан банд,
ичимда бир қарғиш,
ичимда бир oҳ,
ичимда бир дарвеш,
ичимда бир шоҳ,
ичимда бир жоно,
ичимда бир ҳирс,
ичимда бир Раҳмон,
ичимда Иблис,
ичимда бир ҳаёт -
манглайимдай талх,
ичимда бир мамот -
ичимда минг завқ.

✍ Нурмуҳаммад АЗИЗ

https://t.me/zarif_gussa/1