АКВЕДУК РЕКОНСТРУКЦИЯСИ ЖАДАЛЛАШМОҚДА

   «Сурхондарёсувқурилишинвест» давлат муассасаси бош мутахассислари вилоятнинг бир неча манзилида ирригация ва мелиорация объектларида қурилиш -монтаж ишларини амалга ошираётган пудратчи корхоналар вакиллари иштирокида Термиз туманида «Сурхондарё дарёси устидан ўтувчи «Ғалаба» каналининг ПК96+00 қисмида акведукни реконструкция қилиш объекти»да семинар ташкил қилишди. Семинар жараёнида назоратчилар томонидан аниқланган камчиликларни бартараф этиш тавсия қилинди. Ушбу акведук ишга туширилиши натижасида Термиз туманининг 4895 гектар экин майдонлари, аҳоли томорқалари, шунингдек, Термиз шаҳрининг кўкпламзорлаштириладиган майдонлари сув таъминоти яхшиланади. Реконструкция ишларини бажараётган «Эшназар Инвест» МЧЖ қурувчиларига объектдаги ишларни сифатли уддалаш ва белгиланган муддатда фойдаланишга топшириш топшириғи берилди. Объектда 20 га яқин техника ва 50 нафар қурувчилар меҳнат қилаётгани учун аллақачон белгиланган ишларнинг ярми адо этилгани эътироф этилиб, бошқа пудрат ташкилотлари раҳбарларига ҳам ишни шундай намунали ташкил қилиш таклифи берилди.

Аму-Сурхон ИТҲБ матбуот хизмати

СУВЧИЛАРГА ҒАМХЎРЛИК ВА РАҒБАТ  «Сув зар, сувчи заргар» деган мақол бор. Элимиз азал-азалдан мироб ва моҳир сувчиларни эъзозлаган, уларнинг баракали меҳнатини ҳамиша қадрлаган. Аслида Саратоннинг жазирама иссиғида далалардаги экинлар тақдирини ўйлаб меҳнат қилаётган сувчилар, канал бошлиқлари, тажрибали мироблар ва сув назоратчилари ҳар қандай мақтовларга лойиқ. Чунки улар деҳқонларнинг меҳнатини рўёбга чиқарувчилардир. Негаки, сув бўлмаса, зироатлар қониб сув ичмаса, барча меҳнат зоя кетади.
              Вилоятимизнинг навқирон -Бандихон тумани деҳқонлари жорий йилги давлатга ғалла сотиш режасини илғорлар сафида уддалашди. Бу ютуқда туманнинг кўп сонли сувчилари, ирригаторлари ва мелиораторларининг ҳам ҳиссаси каттадир. Шу муносабат билан туман раҳбарияти «Бандихон» канали бўйидаги гидроучасткада тумандаги барча фермер хўжаликлари ва кластер ташкилоти далалари, боғ-роғларида самарали меҳнат қилаётган сувчиларни тўплаб тантанали тадбир ўтказди.
            Тадбир жараёнида барча сувчилар ва миробларга резина этик, кетмон, белкурак, фонар ва ишкоржомаси топширилди. Бундан ташқари, сувчилар ва мироблар, канал бошлиқлари, сув назоратчиларига бир миллион сўмдан мукофот тарқатилди.
            -Ғалла етиштириш ва давлат режасини бажаришда катта улушларинг бор,-деди сувчиларга қарата Бандихон тумани ҳокими Абдумалик Алламуродов.-Ҳозирда 3692 гектар майдонда ўстирилаётган ғўза тақдири ҳам сизларнинг қўлларингизда. Шу кеча-кундузда ғўзаларни чанқатмаслик ва мўл ҳосил етиштириш кўп жиҳатдан сизларнинг самарали меҳнатларингга боғлиқ. Насиб бўлса пахтамиз мўл бўлса, сувчилару ирригаторларимизни яна мукофотлар билан тақдирлайииз.
          Тадбир якунида туман ҳокими, Аму-Сурхон ИТҲБ бошлиғи Ботир Алимов, «Тўпаланг»-«Қоратоғ» ирригация тизим бошқармаси раҳбари Фахриддин Умаровлар Мусулмон Янгибоев, Бекпўлат Маматмуродов, Маҳмуд Оқсоқолов, Дилмурод Қобилов, Фахриддин Чориев, Алишер Самадов каби сувчи ва миробларга велосипед туҳфа қилишди. Серфайз дастурхон атрофида сувчи ва ирригаторлар билан дилдан суҳбат уюштирилди.
           -Анча йилдан буён «Дўстлик» каналида мироб бўлиб ишлаб келяпман,-дейди Фахриддин Чориев.-Уйим ва ишхона билан канал ораси анча масофа.Узоқ вақтдан бери «бир велосипед олсам, узоғим яқин бўларди», деб орзу қилардим. Бугун орзуимга эришдим. Туман ҳокимлиги ва туман «Сув етказиб бериш хизмати»ДМ раҳбарияти ғамғўрлиги ва эътиборидан мен каби барча сувчиларимиз мукофотли бўлишди. Шубҳасиз, бу каби рағбат ва мукофот ҳамда меҳнатимиз қадрланиши барча ирригаторларни янада баракали меҳнат қилишга руҳлантириши аниқ.

Аму-Сурхон ИТҲБ матбуот хизмати

«ДАШНОБОД» НАСОС СТАНЦИЯСИДА ЁШЛАРГА ҒАМХЎРЛИКНИ КУЧАЙТИРИШ ТАВСИЯ ҚИЛИНДИ Сариосиё туманидаги «Дашнобод» насос станцияси 1974 йил қурилган , «Тўпаланг» дарёсидан сув бериладиган «Дамариқ» каналидан битта 350Д90 ва иккита 300Д90 насос агрегатлари ёрдамида сув тортиб чиқариб, 426 гектар экин майдонлари ҳамда аҳоли томорқаларини обиҳаёт билан таъминлашга хизмат қилади. Насос станциялари ва энергетика бошқармаси бош мутахассислари жамоа аъзолари иштирокида семинар ўтказишди.
         Семинарда жамоа аъзоларига лимит бўйича ажратилаётган электр энергиясидан самарали фойдаланиш ва иқтисод қилиш тартиблари  батафсил тушунтирилди. Кейинги йилларда жамоага бир неча ёш кадрлар ишга қабул қилинганини маълум қилган насос станцияси бошлиғи А.Маҳмудов станцияси атрофидаги бўш ерларни уларга бўлиб бериб, қишлоқ хўжалик маҳсулотлари етиштириш ва ўзларини қўшимча маблағ билан таъминлашга амалий кўмак берилаётганини билдирди. Семинар ташкилотчилари раҳбариятга  ёшларга ғамхўрликни янада кучайтириш,насос станциясидаги айрим камчиликларни бартараф этишни таклиф қилдилар.

Аму-Сурхон ИТҲБ матбуот хизмати

«БОБОТОҒ» НАСОС СТАНЦИЯСИДА ЎТКАЗИЛГАН СЕМИНАРДА ЭНЕРГИЯНИ ТЕЖАШ ҲАМДА ИНШООТНИ ХАВФСИЗ ИШЛАТИШ МАСАЛАСИ МУҲОКАМА ҚИЛИНДИ Жарқўрғон тумани ҳудудидан ўтувчи «Аму-Занг» каналининг ПК243+38 пикетида жойлашган «Боботоғ» насос станциясининг биринчи навбати 1976 йили, иккинчи навбати 1982 йили қурилиб фойдаланишга топширилган. «Аму-Занг» каналидан 8 та DV-L1400/900 русумли насос агрегатлари ёрдамида сув тортиб, диаметри 2840 миллиметрли 1250 метр узунликдаги темир қувурлар орқали 79 метр баландликдаги каналга сув ташлаб беради. Ушбу насос агрегатлари ёрдамида Жарқўрғон ва Қумқўрғон туманлари  экинзорларининг асосий қисми обиҳаёт билан таъминланади.
        Бундан ташқари, «Жанубий Сурхон» сув омборини сув билан тўлдиришда асосий манбаларидан етарлича обиҳаёт келмай қолган йиллари  «Боботоғ» насос станцияси  Амударёдан келадиган сувни каналлар орқали сув омборига ташлашга ҳам хизмат қилади.
          «Сувхўжаликназорат» инспекцияси Сурхондарё вилояти бошқармаси мутахассислари насос станциялари ва энергетика бошқармаси ходимлари билан ҳамкорликда «Боботоғ»  насос станциясида семинар ташкиллаштиришди. Семинарда насос станциясининг барча мутахассислари иштирок этди ва уларга лимит бўйича ажратилаётган электр энергиясидан самарали фойдаланиш ва иқтисод қилиш тартиблари тушунтирилди. Шундан кейин объектда тежамкор қурилмаларни ўрнатилиши, кузги-қишки таъмирлашдан сўнг асбоб-анжомлар, насос агрегатлари ҳамда двигателлар ҳолати, станцияда бўлиши мажбурий журналларнинг тўғри юритилиши ва ишчиларнинг техника хавфсизлиги қоидаларидан қай даражада хабардорлиги ҳолати ўрганилди. Шунингдек, насос станцияси ва бу ердаги барча иншоотларнинг хавфсиз, ишончли ҳамда техник соз ҳолатда ишлатиш қоидаларига амал қилиш, иншоотлардан самарали фойдаланиш, сувдан фойдаланишда  гидротехник иншоотларни бошқариш аҳволи билан танишилди, жамоа аъзоларига йўл қўйилган камчиликларни бартараф этиш юзасидан тавсия ва таклифлар берилди.
        Семинар ташкилотчилари жамоа аъзоларининг ёрдамчи хўжаликни намунали ташкил этганини эътироф этиб, атрофда экилган дов-дарахтлар парваришига эътиборни кучайтириш топшириғи берилди.

Аму-Сурхон ИТҲБ матбуот хизмати