فدوه ألعمر كون أفدي
بخدمة حبيب ألزهره ..

خادم وأضل طول ألعمر  أتباها..
الخدمة المقامك سيدي  محلاها..
هالروح ألك رب ألعرش  خلاها..

نخدم نضل حد الموت
نلطم و نبجي بعبره

من المجالس  ربي  لا  تحرمنه..
وبخدمة آل ألمصطفى توفقنه..
و أبدفترك  نتمنى  أتسجلنه..

دنيا الخذت منه حسين
من عدها خل نتبره

أليلطم بصدره لا تضن يعوفه..
وأليخدم بأخلاص والله يشوفه..
ألسبح بأسمه ويلهج بأحروفه..

بيوم ألحشر لا ميحير..
باجر حسين يحضره..

بالگبر لو سألوك يحظر گبرك
يانس وحدك وبوجوده يصبرك
لتخاف يالبالخدمه خلص عمرك

ما ينسى خدامه بيوم
كل محب يوصل گبره

فوگ السراط أدريك تحظر وياي..
بالشده  للخادم  أعرفك  تجاي..
فضلك علينه من أعدنه هواي..

وأدريك للخادم عون  ..
الخادم يهمك أمره ..

كل  ألخدم  باجر أمرهم  يمك..
تتباهه بيك وتحمل هناك اسمك..
هنيال كلمن مخلص من يخدمك..

لجنة وياه يروح ..
بيده ألحسين يعبره..

__!!!

عامر ألحمداني..

ألزهراء ع تخاطب ولدها الحسين ع

آنه بألطف جيت ألك يوليدي يحسين
مطشر على ألگاع جسمك شافته ألعين

يامظلوم _ يا مظلوم
يا مظلوم _ يامظلوم
~~~
(1)
آنه لطف أعتنيتك والگلب شاب
تذكرت ضلعي ييمه وذاك ألمصاب
ضلع واحد ما حملته بدفعة الباب

صدرك وصل مگفاك من سحكته ألخيل
وفوگ التراب دماك من نحرك تسيل

فوگ صدرك من صعد ويحز وريدك
شفت الآخر بيده شايل خنصر أيدك

يامظلوم _يا مظلوم
يامظلوم _يا مظلوم
___
(2)
عألرمل خدك ييمه والرمل حار
وألجسد ينزف دمه من كل الأكتار
وعينه لخيام العقيله حسين تندار

من طاح أجته أعداه وتحشدت ليه
هذا اليسلبه وذاك بألحجر يرميه

طلعت أخته من ألمخيم شاهدوها
برأس أخوها حسين صاحوا عذبوها

يا مظلوم _ يامظلوم
يامظلوم _ يامظلوم
____
(3)
الحوافر رضت ضلوعك شفتها
تمددت آنه على جثتك گابلتها
وبالحزن لمصاب زينب شاركتها

شفتك على ألتربان سابح بدمك
يوليدي يألمذبوح خليني أشمك

يمه وأبنيتك شفتها تركض عليك
جابت ألماي وأجتك بلكي ترويك

يامظلوم _ يا مظلوم
يامظلوم _ يامظلوم
__
(4)
و شاهدت كل الجره بألغاضريه
أطفال مرعوبه وحرم راحت سبيه
وحافية بين ألخيم ترگض رقيه

لهبت عبي النسوان من حرگ الخيام
ولزينب ينادون كل هاي ألأيتام

عمه زينب هم يرد لخيمنه عباس
لو توذر جسمه وبحافرهم أنداس

يا مظلوم _ يا مظلوم
يا مظلوم _ يامظلوم
__
(5)
زينب بنص العده حارت بالأيتام
واليتامى من العطش ما تكدر تنام
لا حسين ولا أبو فاضل رد للخيام

من شفت زينب ليك ركضت يعباس
عألوجه شفت بسوط ضربوها الأرجاس

طفت عين اختك ييمه من ضربوها
وألهضيمه فوگ جثتك شتموها

يامظلوم _يا مظلوم
يامظلوم _يامظلوم
__
(6)
جتفوها گبالي زينب والنساويين
عالرمح ويعاين الهن راس الحسين
والرمح من نحره واصل حد الجبين

يألشلت رأس حسين نزله أرد أحاجي
ماتت ابنيته عليه من البواجي

نزل الراس ألحضن أمه ألزجية
خلي أودع وليدي هاي آخر مسية

يا مظلوم _ يا مظلوم
يا مظلوم _ يامظلوم
__
(7)
حضروا نوگ الهزل للهاشميات
الطريق طويل وبعيده المسافات
ما يرد الراح زينب يمه هيهات

بعدوا الروس الگوم عن ضعن الحسين
ويتشاورون الناس هالقافله منين

حافيات ويمشن و مجتوفه أديهن
و الدمه أمن أمتونهن بلل عبيهن

___
عامر ألحمداني

نزلة حماسية

يا لثارات ألحسين..
يا لثارات ألحسين..
(1)______
عألخيم ملتمه كل أنصاره
كلمن تحظر وكض بتاره
ألكافل على ألعده تلهب ناره
وآل أمية بصولته محتاره

شافته أعداه و تغير لونهم
گله يا مولاي خل أفنيهم

يا لثارات ألحسين..
يا لثارات ألحسين..
(2)____
تحزم گباله حبيب بشيبته
حمل سيفه وألعساكر هابته
يم أبو الأكبر أصحابه تعنته
محزمه وكلمن محظر لامته

أرخصنا يا مولاي كلهم گالوا
أحنا ما ردناها هم ألعالوا

يا لثارات ألحسين..
يا لثارات ألحسين..
(3)____

تسرفن حسين و دخل گدامهم
وأبو فاضل هم خطف بياناتهم
عابس وجون وحبيب أحزامهم
وعلي ألأكبر يسحل بقاداتهم

جاسم بنصهم يصول بهمه
من ألگمر عباس ماخذ عزمه

يا لثارات ألحسين..
يالثارات ألحسين..
(4)____

أنملت روس الطف من القاده
وأبد ما قصروا زلم الساده
طشروا جيش ألكفر بأعداده
و آل أمية الغدر الهم عاده

صفوا على النهر گطعوا مايه..
وخلوا بكل كتر بي رمايه.

يا لثارات ألحسين..
يا لثارات ألحسين..
(5)___

حمل سيفه ألكافل و رد للقتال
جربته بظهره ويفكر بالعيال
للخيم عباس ما يرجع محال
گال أصفي ألعلگمي من الرجال

شال نهر ألعلگمي وعاين له زين
ما أشربك كله أبد دون ألحسين

يا لثارات ألحسين..
يا لثارات ألحسين..

(6)____
شال ماي النهر بيده وعافه
رجع نهر ألعلگمي على جتافه
من العطش ذابل أخيه شافه
ما شرب و مفطرات شفافه

ألتموا عليه ألعده من كل مكان
تبسم العباس يعرف موته حان

يا لثارات ألحسين..
يا لثارات ألحسين..
(7)____

أبد ما هاب ألعده وإعدادها
معركة صفين بيهم عادها
رجف زلام ألكفر وأسيادها
دون أخيه الشهاده رادها

وگع عباس وركض ليه الحسين
طاحن جفوفه وسهم طفاله عين

يا لثارات ألحسين..
يا لثارات ألحسين..
(8)____

أبو الأكبر شاف أخيه عألترب
صال بيهم أبن قتال ألعرب
گطع روس الزلم وأشتد ألحرب
مات وگفه الما لحگ منه هرب

يالثارات ألكفيل ينادي صوت
الما يموت بسيفه بخوفه يموت

يألثارات ألحسين..
يالثارات ألحسين..
_______

عامر ألحمداني

فزاعية للامام العباس ع

بأرض ألطف طب عباس
يطگ بيهم رأس برأس
يا أبو فاضل يا أبو فاضل
(1)_________

عباس من طب للحرب هز ألكفر بجفوفه
جنه علي لمن برز حط بالعساكر خوفه
من بعيد يشبه حيدرا ألگوم كام يشوفه
عباس هذا لو علي بألطف صبح سالوفه

إليوصل ليه ما رد دوم
أرعب بجفوفه ألگوم

بيمنه دگ رأس برأس...
(2)_________

زينب تنخت بالگمر من سمع سرفن ردنه
كالت يكافل لو رحت ألماي جيبه السكنه
تحزم أخوها وأنتفظ وألزلم هابت منه
يجيب ألنهر وسط الخيم لو بت علي تتمنه

زينب وتريد ألماي
طلبت من الوفاي

بجفوفه نشف ريگ الشط...
(3)_________

سرفن أردانه وعالنهر شاف ألعده نادوله
هاي ألجيوش بأمرتك ويانه ضل گالوله
أترك أخوك لوحده وأمرة ألجيش أهدوله
هيهات ناده للعده وفدوه انه اروح لطوله

لازم أفدي بألعين
وجربه وراية وجفين

دخن راسه وأحتر ألطف...

(4)____

مگابل دخل للمشرعه وألجربه فوگ متونه
عباس سبع ألگنطره و قادتهم يعرفونه
ما توگف گباله الزلم تنكث شرار عيونه
جا غير أبن حيدر علي من خزرته يهابومه

أحتاروا بي من لاگوا
باشط سيفه يعرفوا

حز روس القاده عباس
(5)_____

ذب الجفوف على النهر والجربه ما ذباها
والراية شدها على المتن عباس ما عافاها
زينب نخت عالماي أبد للحره ما خلاها
ضحه بجفوفه وهامته بس لا يقصر وياها

صاحت نعم الوفاي
ما قصر دوم وياي

ما قصر من تنخيته ...
(6)____

عألنهر خورسها الزلم محد وصل لخيامه
گطعوا جفوفه من وگع عباس فوگ الهامه
مصيوب وبعينة السهم ويفكر بأيتامه
من شافه أخيه عألترب للحرب شد حزامه

حسين وهد يطلب ثار
خله العسكر طشار

تتراجف رجلين أعدائه ..
____

عامر ألحمداني

فزاعية للامام القاسم ع

برز جسام بألحومه _ تحزم ياخذ بثاره
(1)
گعد يم خيمة المظلوم
گله أرخصني أرد ألگوم
وصية والدي ألمسموم

أوكف وكفت أنصاره

برز جسام بألحومه _ تحزم ياخذ بثاره
(2)_____
يصد ليه الحسن جنه
ترك عرسه واله تعنه
بدمه الليله يتحنه

بوصيته المجتبى أختاره...

برز جسام بألحومه _ تحزم ياخذ بثاره
(3)_____

رد ثار الجفوف أرگاب
گالوا هذا داحي الباب..
ألجيش بكبره منه يهاب..

تلهب عالعده ناره..

برز جسام بألحومه _ تحزم ياخذ بثاره
(4)_____
يرد اليوصله بلا راس
جاسم هذا لو عباس
ما يتواجه و ينجاس

أيحصد بألروس بتاره

برز جسام بألحومه _ تحزم ياخذ بثاره

(5)____
زلمه وما يهاب الموت
گاصد للمناية يفوت
خورسهم ولا ضل صوت

خله أعداه محتاره..

برز جسام بألحومه _ تحزم ياخذ بثاره

(6)____
عليه ألگوم ملتمين
صابوا هامته نصين
بعد ما واصل العشرين

و أمه مناطره أخباره..

برز جسام بألحومه _ تحزم ياخذ بثاره

(7)___
شاله و للخيم رده
الأكبر نايم بسده
گباله تمددوا ولده

و دمع حسين يتجاره

برز جسام بألحومه _ تحزم ياخذ بثاره
(8)_____
رمله تعاين بحسره
ألقاسم شمته بنحره
خلافك گلبي شيصبره

لأمك شوفلك جاره

برز جسام بألحومه _ تحزم ياخذ بثاره
___________

عامر ألحمداني

فزاعية للأمام علي الأكبر ع

الأكبر من دخل ليهم _خلاها الزلم طشار
(1)___
يشبه حيدرا من بعيد.
يرد ثار الكفيل يريد..
وصل للمشرعه الصنديد..

ألطف بكبره ضل محتار..

الأكبر من دخل ليهم _خلاها الزلم طشار
(2)___
هز عسركهم بكبره..
بسيفه اليوصل يطبره..
يشبه حيدرا بصغره..

فر الطف يمين يسار..

الأكبر من دخل ليهم _خلاها الزلم طشار
(3)___
شايل غيرة العباس
خله بجيشهم وهواس
دگ بيمنه راس براس

صب عالآل أمية النار...

الأكبر من دخل ليهم _خلاها الزلم طشار
(4)___

رجع يتعثر بممشاه
يصد لوالده تلگاه
آخر ليله هاي وياه

شافه للشهاده أختار

الأكبر من دخل ليهم _خلاها الزلم طشار
(5)____
وصل عطشان لخيامه
يجر يا وسفه بجدامه
حسين وشافه گدامه

يشبه جده المختار...

الأكبر من دخل ليهم _خلاها الزلم طشار
(6)___
مگابل ما يگدرونه
تذلهم خزرة عيونه
من أبعيد ويهابونه

صاح الگوم ياستار...

الأكبر من دخل ليهم _خلاها الزلم طشار
(7)___

شافه حسين من صابوا
شهم بس العده غدروا
وگع وبخيلهم داسوا

ولخيام ألحسين أندار..

الأكبر من دخل ليهم _خلاها الزلم طشار
(8)____

شاله و للخيم رد بيه
أنكسر ظهر الحسين عليه
جسمه موذر يصد ليه

كون البيك الي يندار..

الأكبر من دخل ليهم _خلاها الزلم طشار
______

عامر ألحمداني