اليوم حابة خبركم انو القناة حتوقف نشر.
بس طبعاً حتضل موجودة اذا بحثتوا عنها.
الرسالة المثبتة فيها كتير شغلات، وتقريباً نظّمت كل شي كل شي بالقناة بحيث تلاقوها بسرعة بالرسالة المثبتة..
عسى تكون هالقناة فادت ولو شخص واحد ودعالنا. :")
بلشت الفكرة تقريباً من سنة، حاولت فصّل فيها كتير شغلات ساويتها لتسّهل عالجايين وقت وسؤال، وشكراً كتير لكل حدا ساعد وشارك تجربته.
تقريباً فيها الأشياء الأساسية لكل حدا جاية جديد :")
حاولوا تبحثوا فيها عن أي شي قبل ماتتعذبوا وتسألوا، عسى يكون موجود ويختصر عليكم وقت وتعب وضياع.

وطبعاً اي شي بلاقيه بالمستقبل بخصّ اي موضوع، حعدل على شي سابق مشابه وضيفه✨

كل التوفيق للكل وكل حدا يارب يحقق يلي بيتمناه واذكرونا بدعائكم
وتذكروا بهل رحلة الطويلة، خيرُ الناس أنفعهم للناس🙏🏻✨

#ملفات

مرة شفت بوست من زمان لزميل عالفيس يجزيه الخير.

كان للناس يلي بتعاني ضعف نطق الكلمات، وبدها لما تدرس من ملف الكتروني تتأكد اذا عم تنطق صح او لا، وتسمع اللفظ
البرنامج المُستخدم هو :
Adobe Acrobat
والطريقة بالصور

وبتقدروا تغيروا اللغة من إشارة الكرة الأرضية تحت 🙏🏻✨

#نت_مطار

بما أنو الأغلب هلأ عم يسافر عن طريق مطار الاردن، حابة قلكم انو في نت مجاني بالمطار بتقدروا تفتحوه من اول ماتفوتوا عالمطار.
"يمكن ما الكل يعرف هالمعلومة"

من الأفكار يلي كانت تنقال انو الواحد يجيب خط من البلد يلي بدو يسافر منها، ويفعّل فيها باقة، مشان يقدر يستخدمها قبل ماسافر ويطمن أهله.
بس كنصيحة، بأي مطار بدك تنزل فيه اسأل أول عن نت المطار
مثلاً بالقاهرة كمان في نت بالمطار، بس هون مثلاً بدك تفعله على خطك لما تفوت عالمطار..
ببرلين بس تنزل كمان من الطيارة في نت بالمطار
وهيك.

قبل ما تتكلف على أي شي، اسأل عن الخيارات المُتاحة للكل🙏🏻✨

#كورسات
مشاركة من زميل يجزيه الخير??✨

✅ كيف الواحد بلاقي كورس b2 قريب منو

https://web.arbeitsagentur.de/sprachfoerderung/suche/berufssprachkurse
هاد رابط من موقع الاغنتور للكورسات الممولة منهم
ممكن يفيد الي عم يدور ع كورسات قريبة من سكنه

#تمويل_كورس
مشاركة من زميل يجزيه الخير✨

تجربة تمويل كورس Berufssprachkurs b2 ?

اللي عم يوصل جديد على ألمانيا و بيحب ياخد كورس b2 و يدرسه بهدوء، بيقدر يحصل على تمويل للكورس، بس رح تكون مدته طويلة متل أي كورس ممول (5 او 6 شهور تقريبا)
قبل ما اكتب الخطوات رح جاوب على الأسئلة المهمة اللي ممكن تنطرح.
1. هل الكورس مفيد؟ الفائدة من اي كورس بترجع حسب الشخص نفسه بالدرجة الأولى و حسب المعهد و المدرس، بس برأيي الكورس بيكون مفيد بتقوية مهارة السماعي و المحادثة أكثر من الدراسة المنفردة.
2. نوع الكورس الممول؟ كورسات ال b2 الممولة بتكون Berufssprachkurs و بتركز ع الجانب المهني أكثر، فيها مصطلحات زيادة للمهن المختلفة، حسب أغلب التجارب سمعت انه الكورس مفيد لسا كورسي ما بدأ لحتى أعطي رأي واضح فيه بس هون حبيت اشرح الخطوات و القرار بيرجع للشخص نفسه.
3. ممكن الشخص يستغل الكورس بأنه يقدم ع الإقامة اذا ملدن بغير ولايته الأصلية؟ اكيد هالشي بيرجع للموظف بمكتب الأجانب، بس طالما حصلت على التمويل و سجلت بالكورس ف غالبا رح يقبل الموظف فيه.
4. كل طلاب الكورس أطباء؟لا ما بالضرورة.
5. هل ممكن إني اترك الكورس اذا حصلت على B2 و ما كمل بالحضور؟ هالشي ممكن بس مانه أكيد لأن المعهد ما رح يقبل انك تترك، بس الجهة اللي مولتك غالبا توافق على هالشي فبتقدر تترك، لهالسبب حاول تناقش هالأمر مع موظفك اللي رح يعطيك التمويل.
6. انا معي شهادة b2 بقدر أخذ الكورس؟غالبا بتقدر بدك تسأل الموظف
7. اذا أخذت تمويل كورس b2 بيأثر على تمويل كورس c1 ؟ لا طبعا

خطوات التمويل:
بتقدر تقدم طلب عن طريق ال bamf بس هالشي بطيء جدا و غير عملي، و ما بنصح حدا يتواصل مع البامف أبدا لهالغرض.
بعد الملدنة بتحجز موعد بال Agentur für Arbeit ،بتفتح الموقع تبعهم حسب مدينتك و بتطلب موعد.
وقت الموعد، بتاخد معك Lebenslauf و ورقة الملدنة وشهادة اللغة وجواز السفر، هاد الموعد رح يكون عبارة عن تسجيل بيانات، و بتقول للموظف انه بدك تسجل ب كورس Berufssprachkurs b2.
بعد يوم او يومين ممكن يتواصلو معك تسجل حالتك الوظيفة،
اذا كنت عم تشتغل ميني جوب يمكن ما كتير يأثر(ماني متأكد).
و بعد يوم يومين بيتواصلو معك و يقولولك تفضل استلم ورقة اسمها Berichtigungschein
عن طريق هي الورقة بتقدر تسجل بالمعهد اللي بيقدم هاد النوع من الكورسات.

ملاحظة 1: ال Berechtigungsschein نوعين، نوع بيكون مكتوب فيه انك بحاجة 500 وحدة درسية و نوع 400 وحدة درسية. و هدول كورسين مختلفين، الأول أطول من التاني، غالبا للأطباء بيعطو 500 ساعة.

ملاحظة 2: يفضل انك تعمل بحث عن المعاهد قبل تاخد التمويل، مانه شي ضروري بس مشان تعرف توقيت الكورس و توقيت التسجيل فيه، و تاخد قرار اذا بيناسبك ولا لا، مشان ما تضيع وقت بالإجراءات.

ملاحظة مهمة: الخطوات و سير العملية ممكن تختلف من موظف للتاني، و من أغنتور للتاني.

بالتوفيق للجميع

بعتذر الفيديو جداً بسيط بس بوصّل الفكرة كتير منيح بإذن الله
ان شاء الله تستفيدوا منه ??✨

#فاخ
من الشغلات المفيدة جداً يلي انذكرت كتير وحابة ارجع ذكّر فيها للتحضير للفاخ وللناس يلي ماعندها حدا تعمل معه تدريب، هو ال ChatGPT
بإمكانك تبعتله البريف يلي كاتبه وتكتبله قبله انو بدك تعمل Simulation معه.
وبتبدأ محادثة صوتية وحرفياً بغطّيلك كل شي معلومات كاتبها!
فيك تكتب قبل البريف قبل ماتبعته
Ich möchte mit Ihnen diese Informationen simulieren
بكل بساطة.
بعدين بيكتب هو رؤوس اقلام وبتبلش معه
اذا مو واضح بقدر اعمل فيديو صغير اشرحلكم فيه كيف تبدا معه ??

بس كتير شي مفيد عنجد✨