Яке боғу яке саҳро писандад.
Яке соҳил дигар дарё писандад.

Ҳама осудагӣ хоҳанд, аммо,
Ду се ноодаме ғавғо писандад.

Иборат даҳр аз Фарҳоду Қайс аст,
Яке Ширин дигар Лайло писандад,

Тазоди зиндагӣ дар Шарқу Ғарб аст:
Яке гунгу дигар гӯё писандад.

Гунаҳ ҳар вақт дар ҳар ҷо гуноҳ аст,
Чӣ Аврупо, чӣ Амрико писандад.

Вале инсон чунон, коре намояд,
Ки ӯро Холиқи якто писандад.
✍️Зикруллоҳ Китобӣ

https://t.me/Daftari_del

Алҳамдулиллоҳ😍

НОМАЕ АЗ РӮДАКӢ
Манам, оре, ҳамон Пири Хуросон,
Манам он Рӯдакии номдоре,
Ки рӯзе зиндагӣ дар коми ман буд,
Набуд андар дили ман ранҷу боре.

Ба нӯги хомаи сеҳрофари хеш
Дарию форсиро зинда кардам.
Каломи тоҷикиро дар замона
Басо машҳуру ҳам арзанда кардам.

Ба ман дар ҷодаи эҷод илҳом,
Бубахшад бӯйи ҷӯйи Мӯлиёнам.
Ҳама соат каломи ҳақ ҳамегуфт,
Шуда якранг бо дил ин забонам.

Зи сози уди ман андар Бухоро,
Ҳама дар осмон парвоз мекард.
Зи овозам шуда ором булбул,
Ба бишнидан маро оғоз мекард.

Суханро бо мусиқӣ карда пайваст,
Яқинан ман бар ӯ ҷон офаридам.
Агар шеър аст ганҷи бебаҳое,
Варо бо нури чашмонам харидам.

Кашида мил бар ин дидагонам.
Намудам кӯр охир хасми бадкор
Вале танҳо ду чашмам кӯр бинмуд
Дили ман ки ҳама дам буд бедор.

Дар охир бар сари ман бор гардид,
Тамоми мушкилоти зиндагонӣ.
Намудам ман "Шикоятҳо зи пирӣ"
Ба ёди рӯзҳои навҷавонӣ.

Аё эй мардуми озодаи ман,
Шумо эй ворисони шеъри нобам.
Агарчи чашми манро кӯр карданд.
Ба чашми дил шуморо ман бикобам

Набигзоред ҳамчун дидаи ман.
Касе шавқи шуморо кӯр созад.
Набигзоред к-андар роҳи тақдир,
Зи асли худ шуморо дур созад.

Суханҳои маро ҳар лаҳза, ёрон,
Ба мисли ҳалқае дар гӯш доред.
Агар заҳре диҳад дунё, алайҳаш,
Ҳама абёти манро нӯш доред.

Шумо эй ворисони ман ба ин роҳ,
Равонам то қиёмат шод созед.
Намоед ар амал бар гуфтаи ман.
Ҷаҳонро чун дилам обод созед.
✍Зикруллои Зубайдулло

Ташаккур ба бонувони сухан - Шаҳло Аҳророва ва Дилрабо Назарова