МАРД ҲАМ ГИРЯ МЕКУНАД ГОҲЕ

Гоҳ андар ситамгаҳи тақдир
Мешавад мард хаставу дилгир,
Гашта аз ҷони хеш ҳатто сер
Чун наёбад барои худ роҳе,
Мард ҳам гиря мекунад гоҳе.

Аз ғами бепуливу бемолӣ,
Пайкарашро гирифта беҳолӣ,
Гар натонад дилаш кунад холӣ,
Хӯрад гиреҳ чу дар гулӯ оҳе,
Мард ҳам гиря мекунад гоҳе.

Гоҳ аз дарди ишқи бепаймон,
Мехӯрад ғуссаҳои бепоён,
Дар дилаш зарра мешавад кайҳон,
Кӯҳ гардида дар назар коҳе
Мард ҳам гиря мекунад гоҳе.

Гоҳ беашк гиря дорад мард,
Гоҳ ашкаш бурун намояд дард,
Гаҳ: "Даромад ба чашм" - гӯяд- "гард".
Лек дар назди як дилогоҳе,
Мард ҳам гиря мекунад гоҳе.
✍️Зикруллои Зубайдулло

Ташаккур ба бонувони сухан - Шаҳло Аҳророва ва Дилрабо Назарова

Он ки худ баҳри ҳама шӯълафикан месозад,
Нур мепошаду олам чу чаман месозад.

Лек дигар ҳама чизе ки биёбад зи ҷаҳон,
Фикр нанмудаву ворид ба даҳан месозад.

Тангчашмон ки шуда боиси вайронии даҳр,
Даҳр охир ҳама бе гӯру кафан месозад.

Ҳамчу кохест ки аз рег қад афрохтааст,
Аҳду паймон ки варо аҳдшикан месозад.

Ин ҷаҳоне ки садоқат ба бузургон накунад,
Фикр дорӣ ки вафо бар туву ман месозад?

Нест дар олами мо адл, бубин Зикруллоҳ:
Дард ҳам дар дили бишкаста ватан месозад
✍️Зикруллои Зубайдулло

https://t.me/Daftari_del

Ишқ ояд тарсро аз сина берун меканад.
Марди ошиқ кӯҳро бо зарби нохун меканад.

Мешавад омодаи ҳар кор ошиқ баҳри ёр,
Моҳро ҳатто бар ӯ аз сақфи нилгун меканад.

Баҳри ин дарвозаи дил ишқ ҳамчун лангар аст,
Ёр вақти рафтанаш бингар варо чун меканад.

Дар нигоҳи ишқ тартиб нест, зеро дар назар,
Бесутунро гӯиё бо теша Маҷнун меканад.

Одамиро нафс бар ҳар роҳ андозад яқин,
Ёбад ар ҳатто дар ин раҳ гӯри Қорун меканад.
✍️Зикруллои Зубайдулло

https://t.me/Daftari_del

Бо сарояндаи маҳбуб Афзалшо Шодиев дар ш. САМАРҚАНД. 04.04.2024

ОЗОДӢ МУБОРАК!!!
Азизам зулму истибдод кардӣ,
Умедамро ҳама барбод кардӣ.
Дили бечораам вайрон намуда,
Дили сангини худро шод кардӣ.
Агар баҳри ту ишқам чун қафас буд,
Раҳондӣ хешро, озод кардӣ.

Ба ту хурсандиву шодӣ муборак,
Азизам бе ман озодӣ муборак!

Маро ту бохтӣ, афсӯс, афсӯс,
Дилам нашнохтӣ, афсӯс афсӯс,
Маро чун Юсуф андар чоҳи ғамҳо,
Яқин андохтӣ, афсӯс, афсӯс.
Ба сӯят ҳар қадар ки раҳ кушодам,
Ту садде сохтӣ, афсӯс, афсӯс,

Кунун ин гуна "ободӣ" муборак,
Азизам бе ман озодӣ муборак!

Дилат доим чу инак шод бошад,
Туро бас хуб пешафтод бошад.
Рабудӣ бахти ман, ҳарчанд, бахтат,
Дуо гӯям қавибунёд бошад,
Ту гарчӣ хонавайронам намудӣ,
Илоҳо хонаат обод бошад.

Бароят хонаободӣ муборак,
Азизам бе ман озодӣ муборак!

✍️Зикруллои Зубайдулло

ҶОНИ МАН
Субҳ ба хайр эй гули хандони ман,
Сабзтарин хӯшаи имони ман,
Бар ҳамаи дард ту дармони ман,
Эй ба лиқо шеди дурахшони ман,
Ҷони ман, эй ҷони ман, эй ҷони ман.

Маънии ҳастии манӣ дар ҷаҳон,
Бе ту саҳар тор шавад ончунон,
Бо ту шабам рӯз шавад бегумон.
Шомфурӯз, эй маҳи тобони ман,
Ҷони ман, эй ҷони ман, эй ҷони ман.

Ҳар гаҳе ошӯб кунад дуриат,
Сар зада мағлуб кунад дуриат,
Кӯр чу Яъқуб кунад дуриат.
Чашмкушо, Юсуфи Канъони ман,
Ҷони ман, эй ҷони ман, эй ҷони ман.

Номи ту ширин кунад ин коми ман,
Номи ту шуд манбаи илҳоми ман,
Номи ту чун ҳаст, бувад номи ман,
Аввали ман ҳастиву поёни ман,
Ҷони ман, эй ҷони ман, эй ҷони ман.
✍️Зикруллои Зубайдулло

https://t.me/Daftari_del