أسلوب جميل لتعاتب شريكك بطريقة ذكية عاطفياً ..

بطريقة اسمها (XYZ)

رح نفصّل
X لما عملت كذا
Y خليتني حس بهالشعور
Z  كنت بتمنى لو عملت كذا

وهيك بهالترتيب ببلش الحوار ..
مثلا مثلا..
بدل ما يقلا لحبيبتو: عفكرة آخر فترة كتير متغيرة وصايرة وحدة أنانية ما بتفكري إلا بحالك وبطلعاتك

أحسن يقول: لما ما رديتي عليي(x) ، قلقت و عصبت. (y) ، تمنيت لو لما شفتي اتصالي بعتيلي رسالة طمنتيني ٱنك وصلتي (z)

وباختصار .. حاول قدر الإمكان تجنب هذه الأخطاء :
توجيه الشتائم
الإهانات
الاتهامات
التنمر
التبرير لنفي المسؤولية
توجيه النقد
التهديد

سيكون التعاطف الموقف القوي الذي سيمنع حدوث النزاع والصراع، وسيساعدك ما يلي:

احترم وجهة النظر الأخرى
تحمل المسؤولية
اعتذر
قدّر شريكك
امدحه

بقلنا دانييل آخر شي أن الموضوع بحاجة تدريب بدءاً بمواقف صغيرة خفيفة لحتى نقدر نسيطر عردات فعلنا بالمواقف المشحونة الساخنة 💁🏻‍♀️☕

خبركن بسر؟!
هالأسلوب بحاول أتعامل فيه حتى مع أهلي و أخواتي (الموضوع صعب لأنن أكتر عالم متعوين نحكم عليهن ونظلمن) بس عظيم لتفادي المشاحنات و تحقيق الهدف المرجو من خلق خلاف ما 👀♥️

ماذا عن الأفكار ؟!

"هذه أفكارك لكنها ليست بالضرورة الحقيقة"

"لا تصدق أفكارك دوماً"

في شي اسمو "الأفكار المسمومة"

أفكار بتجي من طريقة تفكيرنا بشكل أساسي و الي بتحدد اتجاه هالأفكار .. يا تشاؤمية يا تفاؤلية

شوفو هالمثال الجميل من "الذكاء العاطفي" الي بوضّح الفرق بين التنين :

المثال عن تفكير زوجة بزوجها بعد خلاف ما:

الموقف 1 :
"شو أنو حدا أناني ما بفكر إلا بحالو ، ولا بيتذكر أني موجودة وعندي مشاعر ، رح يضل هيك وبعمرو ما حيتغير"

الموقف 2 :
" صحيح انو نسيني هالمرة بس الله يعينو خصوصا آخر فترة انضغط بالشغل كتير ، بالنهاية ما بنكر مبادراتو اللطيفة تجاهي من قبل"

هي مو مجرد أفكار و بتروح..  إذا علقت هي الفكرة رح تأثر على نظرتك و حكمك على شريكك أو الشخص الي معك

لذلك انتبه من الاول كيف عم تفكر؟ كيف عم تقارب الامور؟
هل يا ترى عم تنسى كتير شغلات منيحة و تركز بس عالسيء ؟
هل عم تفسر أمور عكيفك؟

بقلنا دانييل بما معناه :

"الموقف 2" لن يقلل من قيمة الزوج أو من قيمة المؤسسة الزوجية..

**بل على العكس..
هذا الموقف يُرجع الخلاف إلى ظروف مؤقتة يمر بها الزوجان ويمكن أن تتغير..

فنرى في الموقف الأول: تشاؤم ينتج عنه ضيق مستمر**

أما الثاني فهو موقف مخفف 💆🏻‍♀️❤️

اضرب او اهرب ..

بنقاشك مع شريكك
صرنا نعرف انو ما بصير ننفعل ونعصب و نصرخ

بس في شي أقسى من هيك.. بتعرف شو هو؟

هو الهروب او تجميد النقاش و إغلاقه بدون ما نوصل لحلول

انسحابك من النقاش بيعطي شعور بالنفور وبالتباعد وبالتعالي على شريكك
وكأنك بنيت حاجز بينك وبينو وما عد بدك تتواصل معو

ومع الوقت رح تتدمر العلاقة بالتدريج بسبب كمية الخلافات الي ما تم حلها و الي عم تتراكم

بقول دانييل: وهكذا يصبح التعبير الجاف رد فعل ثابت يؤدي إلى تدمير العلاقة بين الطرفين إذ يقضي تماماً على كل إمكانية لحل الخلاف بينهما ☹️

لذلك قال اتفقوا عأسلوب معين تناقشوا فيه كل مشكلة بيناتكن وكلو بينحل ❤️

مبارح جارتنا تركت بنتا الصغيرة عنا

من دون ما انتبه عليها هي مسكت علبة الكحول وبدها ترش منها و شكلا كتير حابة تبخ عإيديها

قام أنا فورا سحبتا من إيدا قلتلا: لا هي ممنوع

هي طبعا زعلت و عصبت و نزلت راسا عالأرض
فتذكرت طبق متل ما قال دانييل أنو أفضل طريقة لتتعامل مع مشاعر الأطفال وغيرن هي:
✨انو تعرفن عمشاعرن و تسميهن لحتى هو يفهم انو هاد شعورو

✨وبعدا تحاول تلاقيلو سبب يقنعو أو تلهيه بشي تاني بعيد عن سبب غضبه

فسألتا : عصبتي مني لأني أخدتا ما؟
قالتلي: اي (و هي عابسة)

قلتلا زعلانة مني؟
رجعت عبست وهزت براسا

إجيت قعدت شرحتلا ليش أخدتو منها :
(ما لازم ترشي عإيديكي لأنو بينزع الإيدين، ليكي كيف صارو ايديي أنا منو خشنين ، أما انتي ايديكي نعومين و حلوين فمشان ما تنزعيهن)

هون هي تطلعت عايديها وصارت تلمسن و انبسطت فيهن
قال وصارت تجاكرني أنها أحلى

وضحكت فضحكتلا (ع مبدأ التوافق تبع دانييل الي منأكد فيه على شعور الطفل😅)

رجعت سألتا لساتك زعلانة مني؟
قالتلي لا 😌

على ما ييدو it works ..
أو صدفة زبطت معي؟ 🤷🏻‍♀️😅

✨ نحن ننقل المشاعر لبعضنا البعض كما لو أنها فيروسات اجتماعية..

الانفعالات تنتقل سريعاً بالعدوى ..

هذا التبادل الشعوري العاطفي يحدث من دون أن ندركه حسياً سواء تركَنا بحالةٍ سيئة مسمومة أم بحالة جيدة منعشة للنفس .. (تذكر شعورك جيداً حين قال لك مشرفك أحسنت عملاً ، و تذكره حين لم يجب على سؤالك في الاجتماع) 💁🏻‍♀️

دانييل غولمان ❤️

نحنا تم تعليمنا من أهالينا أنو ما نعبر عن مشاعرنا متل ما هي بكل الظروف (وغالباً رح ننقلو لأطفالنا)

وهالشي تبعاً للمواقف والأحداث الي بتصير قدامنا ..

فعلمونا مثلاً بمواقف نخفي شعورنا أو نعبر عنّو بشكل أقل، متل لما جدك يحكي شي فكرة أو يقرر شي وما يعجبكن انت وولاد عمك، تعلّمتو أنو لازم تحترمو كل شي بقولو وتخفو شعور الضيق و الانزعاج ..
(بالمختصر إذا كان شعورك بيجرح الآخر حاول اخفيه أو خفف منو )

في مواقف بالعكس..  تعلّمنا انو نبالغ بالتعبير عن مشاعرنا، متل لمّا تجي أمِّك بدها تعبرلِك عن انزعاجا من مياعتِك بالقعدة بتصير تقلدِك بشكل مبالغ جداً

كمان.. في مواقف تعلّمنا أنو نظهر عكس الشعور ، مثلا بالبلاد الآسيوية اذا كان الجواب "لا" على سؤال معين بدل على عدم تهذيب ، بجاوبو "نعم" و مع تأكيد، متل لما حدا يسألك، أكيد مبسوط بشغلك صح؟ بتقلو "اي كتير" بينما انت كرهان حالك، وهو غالباً رح يفهم عليك
لأنو .. ( ارجع اقرأ أول سطر) 💁🏻‍♀️

✨على سبيل الذكاء العاطفي ✨

التعاطف يتطلب قدراً كافياً من الهدوء والتقبّل لكي تصل الإشارة الذكية المُرسَلة من الشخص الآخر .. فيحاكيها المخ العاطفي للشخص المتلقي ..

هذا يعني أنّ المخ العاطفي الخاص بك في حال قادك إلى الغضب، سيغدو لديك قليلاً أو قد لا يتوفّر أبداً القدر الكافي من التعاطف 💁🏻‍♀️

دانييل غولمان ❤️❤️

العيلة الصغيرة الكيوت بالسيارة

الأب عم يسوق و الأم بالمقعد الأمامي و ابنهن جود (ذو الأربع سنوات) واقف ورا و مقرب بحيث يكون بين أمو و أبوه و أختو الكبيرة شام قاعدة جنبو

شام (معصبة): شو هالعالم التافهة

جود بيصفن شوي وبقول لأبوه : بابا هي شام حكت كلام مو حلو ، قالت "تافهة"

الأب برد ع ابنو: اي بابا لأنو هي أختك تافهة

هون جود برد بكل براءة: لا بابا.. شام مو هيك .. هي بس قالت كلمة 🥺

الطفل جود قدر يعرف أول شي أنو أختو غلطت وتاني شي التعاطف الي عندو خلاه يحس أنو أختو انظلمت ويدافع عنها ❤️❤️

ونحن هنا نتحدث عن:
#التعاطف_عند_الأطفال 💁🏻‍♀️

صباح التفاؤل ☀️

تعالو لخبركن الخلطة السحرية للمتفائلين بالحياة:

حين يفشل هؤلاء الأشخاص المتفائلون، يرجعون فشلهم إلى شيء أو عادة أو عامل يمكن تغييره
فتراهم يطلبون المساعدة
يطلبون نصيحة
يبحثون عن المشكلة ويسعون لحلها
وهذا يمنحهم النجاح في المرة القادمة..

أما الأشخاص العاجزون عن التفاؤل
فتراهم يرجعون أسباب فشلهم إلى صفات فيهم لا يمكن تغييرها
يلومون أنفسهم عليها
"أنا فاشل.. لن أستطيع بعد.."
وهذا ما يولد عندهم الشعور بالعجز والشعور بالإخفاق الدائم

برأي العالم السيكولوجي (سليجمان) أنو اختبارات القبول بالجامعات والكليات بتحدد الموهبة و القدرات الذهنية للطالب فقط.. أما المقابلات الشخصية فهي الي بتكشف مين الي بيستسلم، و مين الي عندو القدرة ليستمر رغم كل الإحباط (يعني المتفائل)
فهو بشوف أنو المهارتين سوا هنن الي بحددو الإنجاز الفعلي
وبس??‍♀️ ☕️