اعذرني دونك سيدي اعذرني
ياخذني ذنبي وبيدك اتردني
يالتارس اعيوني وادي
صاحب فضل تبقى علي
چي احبك انة الوادم اتحبني
—————

عشگتك وادري بيك اطيب الخاطر
انة الخليت عشگ اهل العشگ حاير
انة الكل يوم اگولن جيتك باجر
انت بكل جمال الدنية شو حاضر

ياحالي هذا وتعرف بحالي
يومية اشوفن جيته ابالي
بس اسمك يسويلي ضي
صاحب فضل تبقى علي
چي احبك انة الوادم تحبني
————

يگلبي الي تحبه اذنوبك اتذبحة
اذا حبك صدگ چا المن اتجرحه
هم تبچي عليه اعيونك الوكحة
يمتى لهذا وضعك ياگلب تصحة

ما تنفعك يا گلبي دمعاتك
كونك تبطل هسه نزواتك
يگصدله شجرة النيته فيء
صاحب فضل تبقى علي
چي احبك انة الوادم تحبني
————-

اضحك اني ليش ودمعتك تجري
اذا الگاك باچر تقبل بعذري
غفلت اهواي عنك يابعد عمري
وانت امي هذيچ الميزت عطري

عنك غفلت وملتهي بروحي
وتدعيلي ربي يطيب اجروحي
الضيعك ما يلگة شيء
صاحب فضل تبقى علي
چي احبك انة الوادم اتحبني
————

شسولف واني كل اسوالفي بدونك
اني الما بعتها الخاطر اعيونك
انة الشبعان منه وبعته ماعونك
ورغم هذا تجيني بكلمة العونك

ادركني بيدك سيدي ادركني
لو ما تجيني اذنوبي تذبحني
اسمك لبستاني ري
صاحب فضل تبقى علي
چي آحبك آنة الوادم تحبني
————-

يمهدي وهذا ذنبي وينغفر ذنبي
اشلون الغير شخصك ينفتح گلبي
بيدك انت غربل غايتي وحبي
من اليوم وبعد يامحلة الك تعبي

صفيلي نيتي انت صفيها
جدمي اعلة دربك تربي خليها
وياك احس بروحي حي
صاحب فضل تبقى علي
چي آحبك آنة الوادم تحبني

خادم الزهراء كرار جوي

تمنيتي المنية وگلبچ ايريد
حنينة وياخذچ طارينة لبعيد
كلشي نشوفه باجر لقاء اهل المقابر
—————

نموت بهل لقاء بشبگة يازينب
نتحاضن لما لوح الچتف يتعب
ونحركه الجمر خلي الجمر يلهب
القاء بلا حرارة ما اضن ينحب

نذل الماي يختي گولي اشلون
نتگابل نطيحه من العيون
يعملة يوم عاشر لقاء اهل المقابر
————

السوالف تحلى يا خيتي بتواليهة
من يبد الزمن بيده يحل بيهة
حلاة الملتقة من الفرگة تنسيهة
احباب التلتقي اتضيع محاچيهة

جميل بهل لقاء بلا مواعيد
بلاية اهلال اول مرة هل عيد
دمع الفرح حاضر لقاء اهل المقابر
————

نگعد اني وانتي بضل ابو فاضل
مو مبتور زنده اهنا ترة كامل
تشوفچ عينه ما بيها السهم خاتل
يروح اعلة النهر ويردلچ الكافل

يردلج والنهر ماياخذ اخوان
نهر الجنة هذا نهر الاحنان
يفيض من المشاعر لقاء اهل المقابر
————-

نسولف كل عشكنة الما يفارگنة
الذبح والخيل يختي مايغيرنة
يضل شخصچ عزيز شما غبت عنه
شما جرحچ كبر بچفوفي اروفنة

اروفلچ جرح ماطايب اسنين
من جاچ الخبر مسحوگ الحسين
عهد مايبقى حافر لقاء اهل المقابر
————

تشوفيني يزينب طابت اجروحي
وبطلت الونين وصرختي ونوحي
بحبل هذا القاء اتعلگت روحي
يوردت بيتنة يلة بعطر فوحي

يوردة بيا عطر كونچ تفوحين
عطر زينب اريدنچ تجيبين
ربچ يختي قادر لقاء اهل المقابر

خادم الزهراء كرار جوي

مو جديد الموت روحي اليوم متي
انتي چم وگفة اعلة باب الهم وگفتي
تنتظرينهم عين حسين وولد الحسين
——————

چم موتة متي من قبل يم البنين الحرة
تغيب روحي وية الشمس لو ما يجي الانتضره
وعدال چم موتة ترة لمن انام بحصرة
لمن انام ودمعتي فوگ المحاجر جمرة

بعد حسين شاف الويل عمري
يوصلني الدمع لحواف گبري
واصيحن وين ما وين حسين وولد الحسين
—————

اني وعليلتهم صرت لب الجرح وجروفه
لو ردنة نلتم المسة يفز الجرح من خوفه
وتسيل ذكرات الاهل كل واحد اعلة اطيوفه
والنوم ما يوصل ترة العين بدمع مخسوفة

انام اشلون واني الغاب خلي
عين الناس تغمض عيني هلي
صحت بگفة الماشين حسين ووالد الحسين
————-

كل مغربية اشعل شمع وبروحي نار الفرگة
ودخان الدموع الطلع جابه النفس بالشهگة
المفارگ يخنگه الهوة شيجيب عطر الملگة
الچفوف تذبل ياخلگ ماي الچفوف الشبگة

ادوره اشلون هذا الما يجيني
اذا يغفة الجرح يگعد حنيني
الگلب مطلوبلك دين حسين وولد الحسين
———-

اصفن واباوع للدرب واتوهم اني بجيتك
واصرخ هلا وكل الهلا وتركض علية ابنيتك
وادموعنة يطحن سوة من ما تجي قافلتك
اتنام اعلة شذرة محبسك بنيتك تضن حاضنتك

بامل ترجع عشنة ايام وليالي
هذا حال الي يودع شخص غالي
اعد ايامي مرتين حسين وولد الحسين
————-

انفز اعلة مدمعنة الفجر واذان جرحي يكبر
والفاتحة نقراها الك بلكي اعلة هجرك نصبر
يكسرنة ليلك من يجي والصبح نگعد نجبر
لو ما بچينة الغيبتك الليل چا ما يعبر

هم ترد يحسين وينور وكتنة
خافن يفوت الوقت وكون متنة
نحبك واحنة ميتين حسين وولد الحسين

خادم الزهراء كرار جوي

جابر اول زاير گلبي اول حاير
حار اعلة جسمك بالثرة
يابن الزچية الطاهرة

—————-

بليله ما بيها گمر فك القفص وجناحه
من عندي طار وهودت توني نمت مرتاحة
ليلية افز اعلة النعي ساكت ويدوي اصياحه
حيرني طار بيا شكل چا مو ثگيلة اجراحه

رايح يدور حبيب مرمي عالغبرة سليب
من السيوف
صدره مخسوف
مرمي عالغبرة سليب

يعين روحه بروحه طار وثگيله اجروحه
بدمك اجناحه عفره
يابن الزچية الطاهرة

——————
اشلون يندل الدرب راح ووصل للصحرة
اشلون ما خاف ورجف وشاف الحوافر حمرة
يم جسمه حار وماعبر هذا الجسد ما اعبره
حتى يتاكد من وگف شم الجسد من نحره

ياگلب ام البنين انت يم جسم الحسين
من الخيام
صوت الالام
انت يم جسم الحسين

تصور انت بحالي وگلبي شاف الغالي
ما اگول گلبي شاخرة
يابن الزچية الطاهرة

—————

بيا عين شافك منذبح ما عمة گلبي اعيونه
ماوكف نبضه من نووا عالخنصر يگطعونه
ما لايگ بچفهم ترة والمحبس يلبسونه
اخذوا المحابس والهدم وحسين لا اتاذونه

عجب من شافك قتيل اشلون ماذاب الدليل
حتى الاحلام
بيهن اسهام
اشلون ماذاب الدليل

يمه يمر ذباحه ينگط ادموم اسلاحه
گلبي جبل واني المرة
يابن الزچية الطاهرة
—————

ما صاح بالخيل الاجت بطلن سحگ بحسيني
كل حافر الفوگ الصدر حسيته ساحگ عيني
اطلبينة ثار بيا عذر ياخيل بس فهميني
وباچر اعتاب ام الحسن ما تفيدچ العذريني

يخاصمچ طه الرسول تعاتبچ ست البتول
يوم الحساب
حضري الجواب
تعاتبچ ست البتول

بكثر سحگ الحافر بيك الهوة ماعاثر
كل قطعة بيك موذرة
يابن الزچية الطاهرة
—————-

اشلون مامات وشهد زينب اجت محنية
بس ارد اعرفنة شبچة من ونت العلوية
من سولفتله علة الحرگ و الركضة بالبرية
يا گلبي موت بسكتتك زينب ترد مسبية

زينب وياها العليل ينگطع بيها السبيل
وية الايتام
تدخل الشام
ينگطع بيها السبيل

من اجاني العاشر گلبي صبح طاير
راح الحبيبي ومنحرة
يابن الزچية الطاهرة

خادم الزهراء كرار جوي

انهدمت اركان المدينة ماتت الزهرة الحزينة
————-

يعين گلبك ياعلي بجية الخبر
علة الرسول انجرح عالزهرة انكسر
مثل سيف النار وبريجك عبر
انت عطشان الدفن بيده النهر

هذا للباري بچينة ماتت الزهرة الحزينة
—————

من وصلت البيتك وشفت الحصل
لو جبل هم طايح انشوف الجبل
صحت صبراً ياعلي خير العمل
هاي دنية وتنتهي بجية الاجل

حيدر المحد يعينه ماتت الزهرة الحزينة
————-

اشلون چفنت الزچية وغسلت
واگف اشلون اعلة طولك مامتت
اچم كسر بيها لگيت ودنگت
غصن شجرة وعلى الشجرة حنبت

هذا امر الله شبدينة ماتت الزهرة الحزينة
—————-

شيعت من بيتك ودمعك جرة
وين رجعت بيك بوية الذاكرة
شسولفت وي روحك وگلبك قرة
وشنعيت ام الحسن قبل الثرة

غرگة بعينك سفينة ماتت الزهرة الحزينة
—————

اوصل لدفنتها وارجع منكسر
اني والقافية وااوزان الشعر
اشلون مشهد ينكتب شنهو العذر
اشلون اوصفك ياعلي بلاية صبر

الفاتحة لصبرك قرينة ماتت الزهرة الحزينة
———-

من رجعت لبيتك اسنينك مشن
جنح نورس حاجبك يابا الحسن
التفن عليك المصايب وانچفن
انت وحدك ياعلي دافن وطن

كاتب بدمعك لگينة ماتت الزهرة الحزينة

خادم الزهراء كرار جوي

لو سأل طه النبي شنهو عذره الناصبي
شنهو ذنب ام الحسن يامجرمين
لان حيدر عدها امير المؤمنين
——————
ضلع من الزچية انتم كسرتوا ليش
اذا عدها علي اول تغثكم بيش
بنت المصطفى وضدها تجيش جيش
لان تدري علي فكرة بعقلها تعيش

عدها سلطان وولي بالفكر يبقى علي
اكسرتوا ضلع ام الحسن يامبغضين
لان حيدر عدها امير المؤمنين
————-

سؤال وللسؤال اني اريد اجواب
اجيتوا محزمين انتم حرگتوا الباب
فزعتوا لليهود وندري انتو ارهاب
اذاً هذا سكوتك هم نفس الاسباب

تقدسه انت وترتضي لان يذبح رافضي
احرگتوا باب ام الحسن متقصدين
لان حيدر عدها امير المؤمنين
—————

يجرحني اليبريهم وجاب اعذار
اشلون وينحسب من شيعة الكرار
الما مقتنع گلي ابقصة البسمار
اگله احجز مكانك خالداً بالنار

انت وشرايد بعد اواية مروية بسند
انتوا بس الهاي جيتوا محزمين
لان حيدر عدها آمير المؤمنين
———-

بكتبهم واجدة ماتت على الشيخين
البراء اجيبها انت يصاح منين
توجد بالبخاري اباب خمس الدين
وبالصفحة الرقم بعد اربعين اثنين

ملعون الي يعذرهم رواية امثبته عدهم

الحقد وبدمكم يضل ياغاصبين
لان حيدر عدها آمير المؤمنين
————-

يجي المهدي بحسامه ويكشف المستور
والتاريخ الأظلم بالحقيقة اينور
يسولف شنهو صار وكلشي چان يدور
ويعيد الحادثة باب وضلع مكسور

و تضحك اعيون البچن هذا يوم ابن الحسن

تبقى هي السيدة عالعالمين
لان حيدر عدها آمير المؤمنين

خادم الزهراء كرار جوي

صحوة ضمير هذا المسير
وي زينب الحرة من بيتك الگبره
هذا المسير
————-

انتبه وياك اجة ضعن السباية
كن وقور ومحتشم بالمشية هاية
بفضل هاي الخطوة خل عندك دراية
سيروا فالارضِ ترة گالت الاية

ليس قليل امرُ الجليل
هو العمر مرة من بيتك الگبره
هذا المسير ____
بيه ضيم وهل اجت هاي الحبيبة
عيش وياها بدمع جو المصيبة
لا تعيد الشام بفعال المريبة
لا تحسس زينب بارضك غريبة

ريت الشباب اهل المصاب
كون الدمع سفرة من بيتك الگبره
هذا المسير
————

ليلة تنظرلك ترة اتشوف ابشبابك
تذكر الاكبر علي باهيئة نصابك
زحمة من اتشوف مو اسود ثيابك
للعتاب اهناك شو حضر جوابك

يوم الحساب حضر جواب
ابن ادم ترةعمره من بيتك الگبره
هذا المسير
———-

سكنة تنظر للصباية بعين حمرة
كوني بالسم للجراح وصيري حرة
هاي مجزرة الدمع مو هي سفرة
من الخيام بگلبچ اتخلين جمرة

من الخيام ابدن سلام
وبروحك الخضرة من بيتك الگبره
هذا المسير
————-

بر ابوك بمشيك اتفرح اليتامة
خله طوگ برگبتك نصحه وكلامه
للسلامة صير يازاير حمامة
اخلاقك اتميزك ترة بيوم القيامة

تبقى فخور يوم النشور
يامحلى هل صحرة من بيتك الگبرة
هذا المسير

خادم الزهراء كرار جوي

اني لو اسولف يخوية شما جرن
يبچن احجارات گبرك يالحسن
———-

ابدي من كسرة حسين اعلة الگمر
وحيرته من الخيمة رايح للنهر
وخوة العباس من عدها شذكر
وهنة كل اسوالفه ما ينسن
———

يا ابو محمد شفت خوية العجب
مگطعين الاكبر وثوبه انسلب
والحسين بهاي ما ادري اشندب
ضنه يمكن صاح يايمة بشجن
————

لو على القاسم اسولف حيرتي
يوم صاح بصوت اسمعن كلمتي
بدم وريدي اليوم اعجنن حنتي
على ابن امي وعترته جار الزمن
————-

طفل اخوك البالمهد خوية انذبح
وراسه خوية ايميل وي ميل الرمح
شتنزف الوردة يخوية من الجرح
وظل اخونة اهناك مرمي بلا چفن
———-

وهسه راح احچي السبي وذاك اليسر
واحچي خوية اشلون يضربني الشمر
اشلون يشتم فاطمة بذاك الظهر
صعبة ياخوية الليالي الي مضن
————

بينة طب السوگ ياخوية النذل
وعلة كيف النوگ ما تمشي الهزل
ومن شتمنة الناس ابدن ما تمل
ذني كل اسوالفي وكل الجرن

خادم الزهراء كرار جوي

يمشاي الك هاي جنانك تستعد
يحيون يسهلون ينشرولك ورد
السماء السابعة مشيك المصرعة
يمشاي يمشاي
جنانك تستعد
———-

يطلع منك عطر الجنة وجدمك ينباس
انت التقبل لمن تقبل يتلگاك العباس
بيك الدنية وسكان الدنية اتعلي الراس
ظلمة گلوب العالم وانت اگليبك نبراس

الك نور بالگبور طفت يمه الشمس
بالجدام على الهام سحگ فوگ الرجس
گمر من مطلعه مشيك المصرعه
يمشاي يمشاي
جنانك تستعد
——————

توصل يم محبوبك انت روح بلا روح
اليگللك بلة شجابك گله النحر المذبوح
يحرم عشگ العالم كله وعشگك مسموح
شمحلاها وتوصل يمه وجدمك مجروح

الالام متلام الحبيبك تنهدي
وهب عين للحسين ابن حيدر علي
ورود المشرعة مشيك المصرعه
يمشاي يمشاي
جنانك تستعد
——————-

توصل يامحلاك وتوصل تبدي بهاي
بخيمة زينب تلگة ام زينب بيه توزع ماي
عبد الله ولازم جربة عمه ورايح جاي
والقاسم واچفوفه يرفن هلا بالمشاي

يوزعون بالعيون بصيرة وتبتصر
يفهموك يخلوك اتعرف هذا الشمر
تشوف الفاجعة مشيك المصرعه
يمشاي يمشاي
جنانك تستعد
—————-

حيدر يم الباب يهلي ويصيح بصوت
هلا بالگاصد لبني الغالي وماهاب الموت
مو يالحضرة بنص اگليبي اليوم اتفوت
ما تصعب حيدر طلع من بطن الحوت

يضلون يشفعون الى اخر نفس
يصيحون بالعيون ولا كلمة همس
يطهرك مدمعه مشيك المصرعه
يمشاي يمشاي
جنانك تستعد
——————-

طه اهناك بسفرة ربه يعزب للخطار
بيده يوكلهم ويشربهم بيده ازغار اكبار
يامحلاك وتوصل يمه وتگعد يم الدار
يم ربك منزلة عظمى منزلة الابرار

هل ايام بالاختام اجة هذا المَلك
يختمون يوقعون وهب جنة الك
تلوحك منفعة مشيك المصرعه
يمشاي يمشاي
جنانك تستعد

خادم الزهراء كرار جوي

لمن باچر تهيمن بناتي
مرن للجسد واخذن عباتي
تحمي بوية المتون ضرب الما يرحمون
———-

تهيمن بالبراري من بعد عيني
بناتي هل امر واجب فرض ديني
لون بيدي فديت الركضة بسنيني
صلف سهم المنية وما يخليني
صحت للخيمة من النار اعذريني
طفوهة الخيمة بس ياهو اليطفيني

تطفة دياركم والتبقة ناري
جمرة بخافقي والدمة الساري
يعمي كون العيون ضرب الما يرحمون
—————

عباتي من السياط التوجع احماية
حرز بوية قريت اعلة الخيم اية
دريت بذبحتي من طاحت الراية
من جود الكفيل اتبرة من ماية
اذاً تمشن يبوية وية العدة اسباية
انة شبيدي القدر كاتب علي هاية

مرات الزمن يمض بثواني
ونبچي انگول محد ودعاني
اشلون الما يودعون ضرب الما يرحمون
————-

مثل نار الخيم لو مثلت ناري
حترگ گلبي عليچن من قبل داري
عليچن بالمسة شجابتلي افكاري
گلت عطشن گلت هامن بالبراري
يرديت الشمس لمهن يكراري
بحوافر للخيم وصلتكم اخباري

خيل وتسحگ اعلية وتجيكم
ترد وجايبة وياها حچيكم
تگلي اشلون تبچون ضرب الما يرحمون
————

السهم بِيدَ حركتي وكثر اصوابي
المثلث حرمني شوفة احبابي
ردت انهض واگوم ووصل اعتابي
اجة واحد خبيث وشگگ اثيابي
صحتن ادري بوية وما اجة جوابي
احبال الصوت جمدن بوية بترابي

اكتبها ويغطيها الرسالة
رمال الصحرة مايترك دلالة
اطفالي ما يحملون ضرب المايرحمون
—————

راسي وية العقيلة من مشة بلوعي
قسم ذاك الدرب هل رسمته دموعي
عليچن تلطم بذاك الفنة اضلوعي
ريح ولليل بوية شيبقة بشموعي
دمعتي اعليچن وكل هذا موضوعي
الحجاب بخير گتله اسكت يمفجوعي

وداع هل وداع اختم حياتي
حلوة عالشرف صاير مماتي
عايش باليموتون ضرب الما يرحمون

خادم الزهراء كرار جوي