هي كلها المعاي زي ٧٥٠ الف .. داسيها تحت الهدوم في آخر الشنطة .. وابوي زول حساس اصلا ماسالني من قروش .. ولاقال لي شغلك الفات ده قروشك وين .. بمشي يشتغل في ورشة الحدادة .. ويجيب المقسومة..
لكن طبعا شغله مازي شغلي بحكم السن .. لابقدر عاى اللحام ولا القعدة الطويلة .. بس مكافح ..
قلت ليهو يا ابوي انا من بكرة داير انزل الورشه ..
قال لي اقعد هنا في البيت ده ماتطلع ماداير لي منك شغل .. يعني خايف علي يشوفوني شغال ويجو يسوقوني.
قلت ليهو طيب انا بريحك من القلق ده .. باكر الصباح مشيت المدينة أطلبت تأمين لقريتنا من النهب .. قلت لناس قيادة الدعm. قريتنا اتعرضت للنهب في الشهر الفات تلات مرات داير قوة مسلحة معاي نامن القرية .. طوالي فوضوني اشوف معاي أربعة افراد نعمل تأمين..
ولا فتشت لناس معاي ولا دايرهم رجعت اشتغلت عادي والتفويض معاي .. تاني ماعندي مشكلة
جيت كراس وقلم وكتبت الحصل ده ..
بعداك نزلته في شكل رسايل ..في الفيس ورسلتو ليك تنشره للناس..
واوعدك ح اكتب الجزء التاني بعد نهاية الحرب وارسلو ليك تنشره ..
اتمنى ان تصل قصتي لكل الشعب السوداني ويكون وعى لحجم المؤامرة .. وفهم الحاصل من جوه الميدان .. وعلينا تمليك الحقايق ..
والشكر لكل من تابع وفهم ونشر تحياتي اخوكم ضوء البيت الرزيقي.
كتبها طارق اللبيب
نوفمبر ٢٠٢٤

قلت ليها اي اي ياهن اليهود ..
قالت لي واحدين يقولو بتحاربو في الجيش واحدين يقولو بتحاربو في الفيلول .. بس انا الجيش انا بعرفو لكن الفيلول ديل شنو ماعرفتهم ..
قلت ليها ماتشغلي بالك يانوال..حتي اخوانك الفي الميدان ماعارفين الفلول ده شنو..
قالت الشي العارفاهو .. وانت لمن تمشي الحلة بتعرفو
الفيلول كملو عيالنا عيال الرزيقات والمسيرية .. ماخلو فوقنا شاب ..
الحلة كلها بقت عوين وشيياب .. وشفع..
قلت ليها هسي انا ملاحظ في شوارع الضعين دي الشباب قلو شديد .. لكن ديل مشو يحاربو وجايين
. قالت هو يا المسكين والله كلهم ماتو .. وفرشو عليهم ديل موضوعها انتهى ..
وهسي الناس العاقلين كلهم رسلو جابو اولادهم ..
بس المشكلة لاهسع العمد والنظار شغالين يفوجو في الشباب ويشحنو فيهم بالبطاحات ...والدعامه بسوقو اولاد المواطنين غصبا عنهم .. والله كانو دايرين يسوقو احمد اخوي العمره ١٣ سنة الهسع معاي الا انا وامي ادردقنا ليهم في الوطه..
والله ياضو البيت الناس هنا كارهنكم كراهيه شديدة ..وقالو الدعامة كملو أولادنا .. والأولاد بقو يهربو لمن يسمعو بالتاتشرات داخلات حلة ..عشان بسوقو الاولاد بالقوة للحرب ..
اها ياجماعة ده التقرير الاول من ام قرون نوال بت السرف النمشي الحلة شوق شديد ل ابوي وامي ..
ودعت نوال وقلت يلا انا ماشي الحلة خلصي حاجاتك نتلاقى في الحلة ..
ركبت العربات البتمشي الحلة وصلت الحلة الحمد لله الوالدة استقبلتني بالزغاريد .. قلت ليها يا يمه الزغاريد للزول البجيب الغنايم والعربات .. قالت الغنايم يطيرن الحمد لله ربنا جابك لي طيب ..
ومشيت سلمت على ابوي لقيتو مهموم يشرب ليهو في شاي .. وكت شافني الهم الفوقو كله نزل ..
وقعدت اتونس معاهو ..
فتحت خشمو .. قال لي الناس المشيتو تحاربو فيهم
دواسهم شين يا ضو البيت .. والله كملو الغوالي..
نفس كلام نوال ..
وواصل ابوي قال لي والله نحن كان جانا موت مانلقى شباب يشيلو الجنازة للمقابر..
البمشي الخرطوم كلو تاني مابجي راجع والله انت معجزة جابتك .. الشاحنات تشيل وتودي والأولاد يموتو هناك .. قالو الاولاد بسوقن حميدتي ويحارب بيهم هناك وماعندو قدرة على عساكر جيش اولاد البحر .. الناس ديل معروف دواسهم شين .. بضربو بالطيارات والله طيارتهم لغاية هنا بجن يضربن ويرجعن .. والله الضربة تكون في الضعين نحن هنا نحس بالهزة لامن عدة الفضية تكركب ..
والله اي زول عندو ولد سافر للحرب قنع منه .. انت هسعع تحتاج لكرامة والله..
قلت ليهو تسلم يا ابوي والله .. بس كدي هسي وريني المات منو من الشباب باكر من الصباح اقوم امشي اعزي .. وقعد يعد لي في الناس الماتو من الحلة الصغيرة حقتنا دي .. قريب ال٧٥ شاب وقال لي نحن أولادنا الماتو .. اقلا من الشباب الماتو في الحلال التانية دي ..
والله ياولدي الحربه دي اصلو ما كنتو تبدوها وكت ماعندكم ليها استعداد .. قلت ليهو يا ابوي ده حميدتي داير يبقى الرئيس باي طريقة .. لقى الدع& السريع بقى كتير وعجبتو القصة .. وقام على الجيش قال يهزم الجيش .. وماقدر ..
قال هسع الناس بتكلمو هنا قالو حميدتي مات زمان وانتو غاشينكم ناس عبد الرحيم التليفه ده وبتحاربو بلا سبب ..
قلت ليهو والله ماشاء الله يا ابوي ثقافتك بقت فل ..
قال لي يازول نحن هنا في مجالسنا ماعندنا ونسة غير الحرب والحاصل فيها .. في حاجات كتيره انا ماكنت فاهمها بالونسه والنقاش عرفنا اي ..
مجالسنا البقولا ليك دي فراشات البكا
. والله اولاد زي الفهود ماتو ماتو .. الحمدلله على كل شي الدنيا زايلي ونعيمها زايل ..
اها يا ضو البيت هسي انت جيت اجازة راجع تاني ولا خلاص جيت نهائي .. قلت ليهو والله يا ابوي جيت نهائي وتاني ماراجع للحرب دي خالص.. بحكي ليك الأمور الخلتني اغير رأي..
قال لي بس مابخلوك .. بجو هنا حايمين بالتاتشرات
يسوقو الشباب بالغصب .. مابخلوك .. الناس ديل ماخلو شاب حايم والله في شباب اهلهم هربوهم الشماليه.. قلت ليهو انا ابشر يا ابوي انا بتصرف ماتشيل هم ..
قال اها بتعمل شنو يعني؟ وريني عشان اكون مطمن ..
قلت ليهو بس داير لي عصايتين حقات الناس المعوقين .. وكت يجو بقول ليهم ..انا كنت في الحرب ومصاب وبطاقتي بتاعة الدعm السريع معاي .. بقول ليهم انا لمت اتصبتا القايد فلان في المحور الفلاني عمل لي أجواء..براهم بفهمو وتاني ما بجوني....حتى ابوي اطمن ..
اها بصراحة ياجماعة انا جيت لقيت ناس البيت وضعهم المادي صعب .. لكن أبيت اديهم من القروش المعاي .. والله انا متأكد انو القروش الشايلا معاي دي حرام .. انا اكلت من الحرام طيلة الشهور الفاتت دي .. لكن نفسي ماطاوعتني اطعم امي وابوي واخواني الصغار منها ..

رواية الجنجويد
بقلم طارق اللبيب
الحلقة 22
والاخيرة
طبعا انا ركبت مع الجماعه الاثنين ديل في العربيه بتاعتهم السنتافي . هم الاثنين ركبوا قدام واحد سايق والثاني جنبو وانا ركبت في الكنبه الورا .. العربية مليانة عفش وبضاعة وشاشات وكمبيوترات حاجات غاليه جدا وكثيره..
المهم فجوها لي ركبت جنبها ..وطلعنا بطرق ك عجيبه كده.. بيعرفوها براهم ..هم الظاهر انهم سافروا كثير.. ورجعوا ديل من النوعيه البيجو و يغنمو ويمشو.. ويرجعوا يشيلوا ويمشوا ويجوا تاني..
وهكذا ودواليك ..
نقلوا البلد كلها لدارفور ..خلوا بيوت المواطنين فاضيه ربنا يعوضهم..
ماشين لغاية الليل دومس علينا.. اتعرفت عليهم و اتعرفو علي ..وبدينا نتونس ونحكي في العجائب الحاصلة في الحرب ..
وبضحكو ويتمسخرو على المواطنين الهربو وخلو بيوتهم.. وكل ثمرات حياتهم وتعبهم وشقاهم .. وجرو دنقااااس خايفين من الموت..
وانا طبعا من جواي مغيوظ من الكلام.. لكن ماقادر ارد ليهم .. يقولو ده فلولي .. والبعملوهو ماتتوقعه اصلا.. يعني لو. لو بقو اولاد حلال .ممكن يوقفو العربية وينزلوني منها .. بس بدو يحكو في الجرايم العملوها في المواطنين.. والحاجات السرقوها وشالوها ..والمواقف الحصلت معاهم .. والعرفتو هم الاتنين ماحصل دخلو في اشتباك مع الجيش..
بس بجو يغنمو ويرجعو بس دي شغلتهم .. وللعلم في الااااف زي ديل ..وزول بسالهم مافي.. اكبر عملية نهب حصلت في تاريخ الكون ..حصلت للسودانين
المهم ماعايز احكي ليكم المخازي العملوها الناس ديل .. بعد رحلة طويلة ومملة ..
وصلنا الضعين .. ونزلت منهم هناك .. ودعتهم.. قالو لي مالك جاي بيديك كدا .. ماشايل معاك غنيمة.. قلت ليهم والله بس دي سفرية مستعجلة وبرجع تاني ان شاءالله..
مدينة الضعين تحت سيطرة الدعm السريع.. بالكامل..بس سبحان الله .. مافيهم أمن ولاسلام وتشعر بالخوف والتوتر ..في كل حتة في المدينة.. والجنجا حايمين في الشوارع.. عطالة لاشغل ولا مشكلة اكلهم وشرابهم والبنقو ده كله من جيب المواطن .. نهب وقلع ..مع انو ٩٠ في الميه من المواطنين موالين ليهم .. بس في مواطنين ضدهم.. لكن ماعندهم صوت.. ولاشجاعة انو يعترضو ..
البحسو بيهو ساي اتكلم كلمة في الدعm باكر اهلو مابلقوه ..
وفي المدينة عصابات بتاعة نهب وسلب بتنشط بالليل .. وفي ضواحي المدينة والطرق المقطوعية والوعرة .. وكتير من الناس نزحو .. لأنك لا بتكون عايش في امان لبيتك ولا حريمك ولانفسك ذاتو .. مع انو حالات الاغتصاب نادرة او غير معلنة
والملاحظ كثرة البضائع المنهوبة من الخرطوم في الأسواق.. والأسعار في الأرض.. حتى الفول والقمح والفاصوليا جات من الخرطوم مفروشة في الضعين .. وقالو نيالا وزالنجا نفس الموضوع ..
انا طبعا بحكي ليكم عن الشي الشفتو بعيني .. اما نيالا وزالنجى ديل ماعارف الحاصل فيها ..
سمعت بس صراحة .. لكن أسواق دقلو في الضعين شي لايصدق ..
والتجار دعاااامة فارشين في شارع الله..
بس الصادم ياجماعة في المدينة والقرى والحلال .. الشباب بقو شبه عدم..
الناس الحايمين غالبيتهم من الشيياب الكبار والأطفال والحريم حاجة ملاحظة .. او الدعامة .. الحايمين ديل ..
يعني الشباب المواطنين العاديين نسبة بسيطة جدا .. بعضهم تلقاهم في ميادين الكورة ..وبعضهم في النوادي.. الناس ديل بقو شوية شديد ..
انا طبعا كنت مفتكر انو الشباب كلهم سافرو يحاربو الكيزان والفلول ..لكن الاتضح لي شي تاني خالص ..
نحن وصلنا الضعين زي الساعة اتنين ونص ظهرا ..
اكلت في السوق .. واخدت لي حوامة .. شايل شنطتي
وكلاشي اصلا ما فارقتو..
حايم في السوق زول عارفني انا منو ولا جاي من وين مافي ..
في حوامتي ديل لاقيت بت من حلتنا اسمها نوال بت السرف .. هي الشافتني اول حاجة جات ماشة علي انا ما منتبه ليها .. قال لي ضو البيت؟؟
اتلفت عليها قلت اهلا وسهلا نوووال .. كيف حالك مالك حايمة هنا؟؟
.. نحن طبعا ياجماعة حلتنا في ضواحي المدينة كدا من الأحياء الطرفية شديد ..
اها نوال قالت لي والله جيت اشتري حاجات لاختي مدينة عرسها بعد شهر .. قلت ليها المعاك منو قالت لي معاي اخوي احمد ..
قلت ليها كيف الصافي؟ ده اخوها الكبير قدرنا كدي ..
قالت والله استشهد في الخرطوم .. هو وعبدالله ود خالتي ود دعمي الكان جاي يخطبني هسع قالو راقد بين الحياة والموت كرعيهو الاتنين مقطعات ..الموت كتير ياضو البيت .. انت ذاتك نحن قطعنا منك العشم ..كم وكم شاب كدا من الحلة استشهدوا في الحربه حقت الخرطوم ياضو البيت .. قالو كتلوهم الفيلو..
والله يا ضو البيت حمدلله على سلامتك لكن الحرب كملت الشباب .. نحن حلتنا ياضو البيت ٧ شهور صيوانات العزا ماوقفت .. كل يوم يضربو لينا تلفون يقولو فلان استشهد.. قبال مانرفع فراشنا يجينا خبر واحد تاني .. انتو ياضو البيت الناس البتحاربو فيهم ديل جنسهم شنو؟.. ياهن اليهود ذاتهم ولا ناسا اخرين ؟

قالوا ليها خلاص ما في مشكله ..
وبدو يتعازموا ..المهم في اثنين قالوا نحن اتنازلنا.. المراه كوركت لبناتها.. قالت لهن تعالن طالعات ..خلاص شروطكم اتقبلت ..
البنات جن طالعات الثلاثه كل واحده اشرت علي واحد من الثلاثه القاعدين..
الاثنين اللي تنازلوا ديك اصلا وقفوا بعيد..
المراه قالت لهم.. بس خلاص تجونا بعدين الساعه 9:00 بالليل..
انا بكون جهزت لكم البنات وعطرتهم.. وما في اي مشكله.. بس الموضوع ده يكون سري.. ولمان تجوا الجيران ما يشعروا بيكم..
اها يازول اتفقوا بالتراضي ومشو ..
بس يا زول الساعه 9:00 بالليل جات .. والجماعه والجماعة وصلو .. دقوا الباب خشوا..
المراه عندها ثلاثه غرف كل غرفه ختت فيها واحده من البنات ..
ولما الجماعه دخلوا في الصاله ..المراه الكبيره قالت ماقصرتو يا اولادي .. وفيتو بالوعد ..خلوا الاسلحه هنا بره عشان البنات ما يخافن ويتوترن ..اخذوا راحتكم لو دايرين تبيتوا.. ما عندنا مانع بس تصرفونا نحن محتاجين.. قالوا ليها ما عندي اي مشكله يا حجه
جابت لهم عصير شربوا.. ودخلوا على البنات ..
المهم
حتى قالو في واحد منهم اتصل على أصحابه هنا في الارتكاز قال ليهم شربنا العصير وداخلين على العروسات.
اها يا زول الحصل بعد داك الناس ديل تاني ماجو راجعين الارتكاز ..
والقائد ماعندو خبر.. وماعارف الناس ديل مشو وين ..
رفاقتهم هنا منتظرينهم ..لغايه تاني يوم الصباح الناس ديل ماجو.. الظهريه ماجو ..العصريه ماجو ..
لما جات الساعه 6:00 مع المغرب كدي ..
طوال اربعه كده الشباب مشوا اتنين مع الاثنين اللي كانوا امبارح معاهم..
وصلو بيت المراة ..دقوا الباب ما في زول فتح لهم.. لزو الباب.. فتح معاهم.. يعني لقو الباب مفتوح
..ما مقفول من جوة
دخلو جوة مالقو زول .. والحتة صاااانه ..لمن دخلو الغرف ..كل غرفة فيها واحد من الجماعة مقتول .. والدم ده مدفق لمن ناشف..ولاقروشهم ولاتلفوناتم ولا ولا اسلحتهم.. ميتين ومنهوبين..
والمرأة وبناتها مافي .. والحصل شنو مافي زول عارف لغاية اللحظة .. بس الشباب هنا قالو كل بت من البنات
باغتت الزول المعاها بسكين .. واتخارجن هن وامهن واخوهن في الليل داك .. وفي ناس قالو البنات جابن رجال من اهلهن غايتو الحصل شنو الله اعلم .. المهم الجماعة ماتو موت الكلاب .. والبنات مرقن سلامة.
إلى اللقاء

رواية الجنجويد
بقلم طارق اللبيب
الحلقة 18
الحقيقة .. هسي في الأشهر الأخيرة دي.. بعد الهزايم المتكررة .. على الاشاوس وتراجع الدعm وتقدم الجيش الامارات بقت مازي زمان .. يعني هسي المرتبات وقفت .. والوجبات وقفت .. بس السلاح شغال صراحة .. لسع بجينا التشوين والشحنات بالبطاحات والحاويات ..
اما من ناحية الصرف على الجنود .. الداعمين بقو يقولو .. اصلا الدعامة مايحتاجون مرتبات .. لأنهم مامقصرين في السرقة .. نهبو كل شي في السودان .. فما يحتاجون لشوية القروش البستلموها بالشهر ..
والحقيقة .. انو الشفشفة دي في الأيام الأخيرة بقت برضو فيها تمييز .. يعني القادة وخصوصا بني رزيق .. هم الخمو المليارات .. والله في دعامة مالاقين حق الاكل .. ديل الفلنقايات .. والافارقة زي اللواء ستاير .. كل يوم يبكي في الميديا من الفلس وبالجد الزيو كتير.. واخيرا ..اذا انت فلنقاي ما من الأسرة الحاكمة.. ومشيت سفشفت حاجة كويسة القايد يمسكك يحاسب واحتمال يعتقلك .. يقول ليك انتو الجايبين لينا السمعة .. ويقلع منك المنهوبات لنفسه ..
او يتوزعوها القاعدة ..
وبرضو لمن تجي تشتكي يقولو ليك امشي اتصرف يعني امشي انهب.. اي والله
الدعامة لمن عملو احتجاج من انقاع المرتبات .. القيادة هي القالت ليهم اتصرفو.. أي زول يدبر احواله .. طبعا دي كلها معناها القلع والشفشفة ..
مرة كنت حاضر لي حادثه مؤسفه.. في نفس الموضوع .. في واحد دعامي مسكين كدا.. جاء للقائد في الرتكاز جيعان ومفلس وحالتو بالبلاء .. قاليو داير قروش ..القايد قاليهو اتصرف زي مابتصرفو اخوانك .. ده كلام القياده.. قالو تتصرفو.. قاليهو يعني امشي اسرق بيوت الناس .. قال ليهو ياتو ناس ؟؟ ديل أعداء .. ودي غمايم العدو..
الدعامي نزل السلاح من كتفه.. وقال ليهو انا ماني داير اداوس تاني .. طوالي اعتقلوه .. هسي مصيرو شنو ماامعروف ..
يعني زي مافي دعامه بعتدو على البيوت وحرماتها.. برضو في ناس نزيهين جايين قايلين الحرب دي حرب شريفة.. واغلبيتهم ديل مخدوعين بحميدتي ..وشايفينو رجل صادق ومنقذ للأمة .. ودايرين يساعدوه .. ويقيفو معاهو باي طريقة .. وديل غالبيتهم لمن يشوفو تصرفات الدعامة وانو الحرب دي حرب دمار للبلد وظلم وانتهاك للمواطنين العزل .. بفوتو..
اما الناس البمشو ينهبو البيوت ديل ..ديل ناس ماعندهم اخلاق ولادين .. مافي حاجة بتردعهم من انتهاك اي حرمة .. لكن في النهاية ربنا اقوى من كل ظالم ..
مرات البيوت دي يكون فيها أجلهم.. كتير كتلوهم المواطنين في البيوت دي .. يكون راجل غيور .. يحاولو الدعامة يعتدو على عرضو. يعمل ليهم مفاجأة يركبهم سكين .. يقتل منهم البقدر عليه.. وفي النهاية بموت شهيد.. احسن من يشوف الانتهاك ويعيش ذليل طول عمره..
بالجد السودانيين ديل قلبهم حار .. ومابرضو الحقارة حتى الحريم والله نحن شفنا العجب ...
..حصلت قصه قبل فتره ..يعني يمكن مع الشهور الاولى بتاعة الحرب.. زي ما حكوا علي الشباب الموجودين معاي الان ديل .. طوالي هم بتذكرو القصة دي ..
قالوا كانت في مراه .. ساكنة في حي الوابورات .. في بحري ..وما قدرت تنزح مع النازحين.. نسبه لانه ظروفها الماديه ما مساعداها..
وعندها ثلاثه بنات وولد صغير ..
فقاموا الدعامه جوها في البيت..
زي خمسه افراد كدا.. وقالوا ليها وين راجل البيت؟ قالت لهم الله ولدي الكبير في السعوديه.. ليهو خمس سنين ماعارفين عنه حاجة ..
وابونا راجل كبير ايام في البلد عيان بالسرطان ..موجودين نحن بس انا وبناتي وولدي الصغير ده ..قالو ليها جيبي الدهب.. قالت ليهم دهب شنو يا اولادي انا من عرست ما لبست لي دهبه.
عاينو للبنات كدا البنات قامن دخلن ..
قالوا ليها نحن دارين البنات ديل ..
المراه دي سكتت مسافه.....
وقالت لهم هي لكين .. الكلام ده ما عيب..
قالوا ليها يا حجه انت من زمن العيب؟؟
ما تكثري معانا الكلام.. يا اما برضاك او بغير رضاك..
قالت لهم خلاص انتوا اقعدوا انا اشاور البنات واجيكم ..
قعدوا في الصاله بره لابسين الكاكي وشايلين السلاح ومنتظرين المراه تجيهم بالنتيجه ..
اخذت ليها حكايه بتاعه عشرة دقايق ..
وجاتهم طالعه قالت لهم ان شاء الله ما اكون تاخرت عليكم ..
قالوا ليها ما مشكله لو البنات رضيانات.. انجزي..
و لو ما رضيانات عشان نحن نتصرف...
قالت لهم لا لا خلاص .. رضيانات. تب ومبسوطات .
لكن عندهن شروط.. لو وافقتو عليهم بجنكم راضيانات ويسعدنكم ..
قالن شروطهن .. كل واحده قالت تختار لها واحد بس منكم..مافي حاجة اسمها اشتراك.
يعني في اثنين ما عندهم معانا حاجه..
تشوفوا ثلاثه منكم ..ناخذ معاهم المواعيد يجونا بالليل.. لكن بالنهار كدي ده.. نحن بنخاف من كلام الناس..

المهم المعلومة الداير اوصلها ليكم انو حميدتي مافي في الحرب دي..
الا عبر الفيديوهات المسجلة واي زول يقول ليك حميدتي في الميدان بين جنوده ده زول كضاب ..
بصراحة الحرب دي ماقايدها حميدتي ولاشي الحرب دي قايداها الامارات العربية المتحدة .. تشتري المقاتلين..
والله انا لاقوني في الحرب دي مقاتلين تشاديين .. ونيجيرين وليبيين . وحبش وكينين. وماليين .. وسوريين .. وجنوبيين .. واسبان.. وفرنسيين ..
ديل كلهم مرتزقة بقروش الامارات .. وترسل السلاح بمختلف انواعه..والشعب السوداني كله عارف انو الطائرات الإماراتية تنزل في مطار ام جرس بمساعدة الحكومة التشادية.. وتحت علمها ومباركتها .. ويدخل السلاح بمعبر ادري وام دافوق وغيرها من المنافذ..والامارات تدفع للجنود والقادة الفي الميدان بسخاء .. وتوزع الوجبات الجاهزة وتعالج المصابين .. أي والله في ناس دعامة بشيلوهم يعالجوهم خارج السودان على نفقة الامارات ..لكن صراحة بتعالج الرزيقات الماهرية بس.. يعني لو أي مسيري او فلاتي او سلامات بني هلبة غيرو .. اتصاب مهما كان حجم الإصابة.. يشوفو ليهو أي مركز صحي فيهو دكتور مجبور على العمل.. ومهدد بالسلاح.. يعالجو علاج ماعليك منو .. وبركز دايما على البتر .. يازول احكي ليك شنو واخلي شنو ..
ومن القصص المشهورة في تورط الامارات قالو مرة جو خواجات من الأمم المتحدة .. دايرين يشوفو الحاصل بعيونهم .. قابلو ضباط اماراتيين داخل الحدود السودانية ..تقريبا في ضواحي نيالا
قامو الخواجات يسألو من الاماراتيين .. قالو الجابهم هنا شنو؟
الاماراتيين لمن حسو بالخطر.. وانو ممكن تترفع فيهم تقارير عالمية ..
حاولو يساومو الخواجات بملايين الدولارات .. قايلين الخواجات عادي ممكن تشتريهم بالقروش زي العرب والافارقة ..
بس الخواجة الكان رئيس الوفد غضب غضب شديد .. واعتبرها إهانة من الامارتتين.. انهم دايرين يرشوهم عشان يسكتو .. ديل هم ذاتهم الفضحو الامارات انها مشتركة في حرب السودان..
والاماراتيين تقريبا اتضربو بطيران الجيش ..
بصراحة ..انا مابقول ليك الامارات مشتركة في حرب السودان.. الامارات هي المدورة الحرب دي .. حميدتي الان بره الصورة تماما ..
إلى اللقاء.

برضو اعتقلوهم .. طبعا ديل كلهم ماتو قدامنا .. مافي اي عناية طبية ..الا حاجة بسيطة .. لانو هنا ماحريصين على سلامتك اصلا ..عندهم احسن تموت عشان تفضي حتة لي غيرك من الناس اليجيبوهم معتقلين ..
معنا ناس ..مواطنين... وتجار وعمال ودكاترة ومهندسين
وضباط جيش وبوليس .. واكتر شي المعاشيين..
بناكل وجبة واحدة بس في اليوم ..وجبة معروفة رز بي عدس.. تاني مافي شي.. مرة مرة بجيبو لينا سكر ..
الناس دي ٩٠ في المية منهم عندهم انيميا وفقر دم وأمراض غير معروفة .. وكلهم بقو زي الجنايز من الهزال والضعف الجسماني..
نحن كل يوم بموتو مناا ١٢ نفر او ١٣ يووووميا .. ومرات يصلو عشرين ..
طبعا السجن كبير .واقسام وعنابر .. وكلو مليان
ومزحوم عديل .. وميزانية الأكل ذاتها .. مكرهاهم ودارين يتخارجو مننا .. بس القادة الكبار دايرين السحن ده يكون مليان ليه ماعارف ...
طبعا العذاب والجلد.. مازال شغال وعادي بتدقه بالسبب بلا سبب .. ممكن عسكري يعاين ليك كدا ماتعجبو .. يجي يدقك لمن يفتر .ويمشي ..
ومرات بجو بفشو فينا غلهم .. يعني يوم يكون في اشتباك.. والجيش منتصر عليهم .. زي ما بلاهم الجيش يجو يبلونا .. ياخ اليوم ده بجو يدقو في الناس دق انتقام.. والله نحن هنا ..عايشين عيشة اصلو ماتخطر على بال بشر..
مستحيل تلقى ليك زول من المعتقلين ديل سليم والله ٥٠ في المية من الناس جنت وبقت تتكلم غلط ..
من المآسي والتخويف ومن الضرب الفي الراس.. عادي الزول بموت اثناء الضرب ده.. بنزيف في المخ ولا عاهة مستديمة..
بعض العساكر المعتقلين.. من المرافيد او معاشيين.. ديل بطبقو معاهم خطة صعبة شديد .. بدخلوهم في خانة بتاعة عذاب لايحتمل .. وبقولو ليهم اختارو احسن ليكن المعتقل ولا احسن .. تشيلو سلاح تحاربو مع الجاهزية؟.. طبعا في ناس كتيرين بلقو نفسهم مضطرين يقبلو..
الواحد يقول لك امشي احتمال ربنا يفرجها علي وياسروني ناس الجيش..
لانو الناس هنا بتحكي انو أسرى الجيش محترمينهم.. على الاقل بعاملوهم ك بني ادمين ..
نحن هنا والله بعاملونا .. كأننا حيوانات مؤذية المفروض تعذبها قبل ماتكتلها .. والله اي زول هنا بتمنى الموت .
المهم انا ياجماعة جاني احباط من كلام المواطن المعتقل ده .. قلت ليه امشي خلاص وقمت انا مشيت ..
والله ياجماعة ما اخفيكم سر ..انا كلام الزول المعتقل ده ..والشي الشفتو بي عيني..
طمم بطني من حاجة اسمها جاهزية..
بس ماقادر اطلع ماعارف ليه .. التقول عاملين لي عمل. جواي خوف وتردد ماطبيعي ..
وداير اكون جاهزية بي جانب.. وداير اتخارج بجانب ..
بمناسبة العمل والسحر دي احكي ليكم حاحات والله موش مبالغة .. شفتها بعيني ماقول قالو ..
نحن معانا شيوخ بروبو الموية .. وبلعبو مع الافاعي والعقارب.. بكتبو حجابات للاشاوس ضد السلاح.. بصراحة مرات بتنجح ومرات بتفشل .. بس نا جواي ايمان.. لمن يومك يتم .. موش لو لابس حجاب .بتنجغم بتنجغم.
والله شاهدت لما الاشاوس ينزلو في ارتكاز..
عندنا شيخ كارب اسمو شيخ موسى السوني.. بنادوهو يعمل حركات كدا في الارتكاز .. والله شوف عيني.. الطيارة تجي تضرب في الحتة الفاضي..ة وهم بس ينزعجو من الغبار والدخان..
لكن الحبة ما بتجيهم. ياخي مرات يجي هجوم من الجيش علينا ..نعاين ليك لعساكر الجيش يضربو في الحيط ..ونحن قدامهم وهم ماشايفننا ..
نقعد نعاين ليهم ونضحك .. وفي النهاية نبلهم كلهم .. والبل يسع الجميع..
الجماعة ناس الجيش لما كشفو قصة السحر دي .. بقينا لمن نهجم عليهم.. يقعدو يأذنو بلا وقت صلاة .. الحتة الفيها اذان .. بضربونا ضرب العيش..
والحتة الفيها اذان تلقى رصاصهم كله مشتت عشوائي..
غايتو الحرب دي أخبث حرب انا سمعت بيها في حياتي ..
ولسع ح احكي لكم العجب العجاب..
إلى اللقاء..

رواية الجنجويد
بقلم طارق اللبيب .
الحلقة 13
واحده من المهمات الحساسه ال كلفني بيها عيسى.. انه انا اشيل ملفات.. وامشي بيها سوبا.. هناك في سجن سوبا ..
في ناس معتقلين..و الناس دي ن محروسين بقوه ما ساهله..
فشنو القايد عيسى أداني ملفات وكدا ..
وقال لي تمشي توديها تسلمها لي القايد .علي صافي النور في السجن .. ده المسؤول عن سجن سوبا. زول فقر وشوم .. ومابتفاهم .. والحقد والمراهية تتفجر من عيونه .. المهم شلت الملفات ودورت عربيتي.. معاي نفرين..
وطوالي بي كوبري المك نمر ..
وصلت هناك.. حراسة مشدة.. وناس مخيفة وكىيبة ووضع غريب.. ومعتقلين كمية من الناس محبوسة في عنابر كبيرة ..قريب الاربعين عنبر العنبر فيهو ما أقل من ١٢٠ معتقل..
سلمت الضابط مسؤول السجن صافي النور.
الملفات وقعدنا معاهم.. فطرنا بي لحمة ..كميه شكلهم ضابحين .. لانو لحمتهم كتيرة المهم فطرنا وشربنا الشاي ..
وقعدت اتونس مع العساكر .. وكلهم لم عرفوني انا الضراع اليمين بتاع عيسى بقو يتكبكبو. ..
قلت ليهم ممكن القي نظرة على المعتقلين.. قال لي جدا ..
بقيت حايم من عنبر لعنبر ..
بعاين في الناس دي .. الناس دي اشكال والوان من البشر ..
عددهم فوق الأربعة الف.. من عمر ١٦ سنه لغاية ٧٠ سنة بتلفاهو .. الشمالي والجنوبي والغرابي والحلبي والادروبي والحبشي مافي صنف من البشر الا هو موجود هنا ..
ناديت واحد من المعتقلين .. قلت ليهو اقعد اتفضل كان خايف ومرعوب يرجف .. وجسمو هزيل .. زي ناس المجاعة .. عضامو ديل تعدهم بي يدك .. بكون ورنه ٣٥ كيلو لا اكتر. المهم قعد وبقيت بسأل فيهو قلت تعال اقعد هنا .. اولا ماتعتبرني انا دعامي زي ديل ..اعتبرني اخوك.. جاي يطمن عليك .. وعليك امان الله يدي مابمدها ليك .. والكلام البينا .ندفنو فب محلو ده .. سبحان الله الزول ده وثق فيني ..وشكلو اطمن لي جدا ..
قال لي والله انت شكلك ذاتو بختلف من الناس ديل .. ياخي الناس ديل .. ضقونا طعم الموت ومامتنا.
والله ٩٠ في المية من الناس الهنا بتمنو الموت يوميا .. لانو خلاص الموت بقى سبيل النجاة الوحيد من الحاصل علينا هنا ده .
قلت ليهو .انت مقبوض في شنو .. قال لي انا اسمي نصر الدين ساكن الرميلة .. شغال في محل بتاع صيانة رقشات.. ماعندي اي علاقة بالحرب والسياسة .. بس جوني في البيت قالو لي انت تبع الاستخبارات ..
قلت ليهم ابدا انا مواطن شغال كدا كدا .. ضربوني لمن غمرت .. ودقوني دق شديد.. قلت ليهم انا مواطن شغال بي رزق اليوم باليوم..
والله ضربوني ضرب.. بلا رحمة وكتفو لي يديني بيورا.. وبقو يكفتو فيني وشي .. وجزء بونيه .. وشلاليت وضرب بالدبشك.. اللهو مؤخرة السلاح .. ضرب في راسي ووشي ..
يازول اعترف.. يازول اعترف.. بضربو فيني قريب الخمسه ساعات لابفترو ولابملو . والبمشي لغرض.. ببدله واحد تاني.. يواصل معاي في العذاب ده .. ولعلمك البضرب ده ما واحد..
اتخيل ٥ عساكر شايلين عصي وعكاكيز.. ومطارق والله ياجنابو انا في يوم الاعتقال بس..بكون اغمي علي ٨ مرات ..
بس ما موته الحمدلله .. انا لمن تعبت
قلت في نفسي الناس ديل.. انا بقول ليهم مواطن.. وهم بعملو كدا.. لو قلت ليهم انا استخبارات بقتلوني.. بس والله الموت ارحم من البعملو لي فيهو ..
ياخي الناس كتفوني من يديني بورا ضهري وكتفو رجلي ..ورموني في الشمس ..وبضربو فيني ضرب بلارحمة.. والله راميني في الارض وبعفصو فيني .. زي البطانية البغسلو فيها ..
وبضربو السلاح جنب اضاني في الارض..
في النهاية اضطريت قلت ليهو ياجنابو خلاص ماتضرب انا عايز اعترف ..
المهم اتوكلت على الله وقلت ليهو .. انا استخبارات قال لي شغال وين؟
قلت ليهو تابع لوحدة بحري ..
وانا بصراحة لابعرف استخبارات ولابعرف وحدة بحري ..بس كلمة جاتني في راسي وقلتها ..
حتى بعداك ربطولي عيوني وجدعوني في التاتشر زي الخروف ..
ودورو العربية مشت وين ماعارف ..بعد خمسة يوم اكتشفت انو انا معتقل في الرياض ..
وهناك سلموني لاستخبارات الدعم السريع . ودخلوني المعتقل .. وبقيت معتقل رسمي بدون نقاش..
والله انا لمن دخلوني المعتقل وارتحت من الضرب حسيت بالمعتقل ده زي الجنة ..
من العذاب الكان فوقي. المهم عديت هناك شهرين وتاني نقلونا هنا ..
هنا والله ياجنابو.. انت شايف بنفسك اسوء عيشة ..
نحن محشورين هنا في العنبر ده..
كمية البشر الشايفا دي..
بياكلو هنا وبشربو هنا وبنومو هنا .. والله نحن مرات شهرين مانشوف الشمس ..في ناس عمو وفقدو بصرهم .. وناس جاتهم امراض ما انزل الله بها من سلطان .. معانا ناس كبار .. مرضى بالسكري والضغط
والله معنا ناس اكتشفنا انهم عندهم سرطان .. واحدين عندهم فشل وبغسلو كلى..

الفلول الكذابين قالو حررنا الاذاعة .. انا الان في الاذاعة .. ياتو اذاعة اتو الحررتوها..؟
بس الناس جاها احباط .وفقدو الثقة .. يومين تلاتة والقوات كبست والطيران امطر مطر ..في الاذاعة ٣٠ عربية حرقت والاشاوس .. وبقال عرد والله محلو ما اتعرف.. بس فعلا المرة دي للاسف الاذاعة اتحررت .. وضاعت من يدنا وجعتنا وجع شديد ..
اها نطلق اشاعة المطار اتحرر .. عوك الموضوع ينتشر في المديا ..وهم ذاتهم البساعدو في النشر... بالفرحة المزيفة ..
ياخ نحن نشرنا المصفاة اتحررت ٢٩ مرة وكل مرة الناس بفرحو وينططو .. وتطلع كذب .. بلابسة مهابيل.. مابفهمو كلو كلو ..
المهم شايف الجيش ده لمن هاج في امدرمان القديمة .. حرر البلد كل..وحرر مستسفى الولادة
وماوقف من التقدم لمن التحم مع المهندسين ..
ونحن عرفنا انو الجيش ده خلاص شوكتو قوت.
وبقى تاني ماااابتحبس ..
لانو بقى مجموع من القوات زي ماوريتكم..
نرجع للقايد عيسى بشارة مسؤال الاستخبارات
والرئيس الفعلي لولاية الخرطوم .. وقصتي معاهو والمنحنى في القصة الغير حياتي ١٨٠ درجة ..
في يوم من ذات الايام ..
واحد من القوة الانا فيها في محلية بحري ..
نحن طبعا في المنطقة .. الاملاك محلية بحري .. فندق قصر الصداقة ..
اها في واحد من القوة دي .. قال لي .. عيسى بشارة ذكرك بالاسم وقال تبلغ عنده ..
قلت ليهو هو وين؟.. قال لي العصرية بكون في الصافية بحري .. وصف لي البيت ..
قلت ليهو مابعرف وصف انا.. تجي بعدين العصر تمشي معاي..
الزول ده اسمو ابو منصور الهامل..
ااها يازول مشيت البيت ده زي العصر كدا لقيت فيهو قادة كمية دبابير تلمع ..جت رزيقات ماهرية .. نضيفين وسمحين .. اها يازول اتعرفو بي وعرفو انا رزيقي ..
عيسى قال لي سمعنا عنك كل خير .. وعن اخلاقك وتصرفاتك .. ونحن محتاجين لناس زيك في بعض المهمات الحساسة اكتب تلفوني . واديني رقمك ..قلت ليهو حاضر سعدتك..
وقعدت معاهم واتونسو وهم برسمو في الخطط وانا ساكت بعاين شربتا الشاي واستاذنت رح
جعت للقوة.. المهم باختصار يا جماعة بقدرة قادر ..
انا اتعرفت على عيسى بشارة ..وبقيت مقرب منه جدا .. ووزعو لي شريطين كدا.. الشريط فيهو نجمتين.. وقالو لي انت بقيت ملازم اول..
يازول مية مية.. اول انا طاقني فيها حجر الدغش؟جاتني باردة .. وهسي كان مارزيقي نجمة واحدة مابشوفها .. وعيسى قال لي الشهر الجاي .. بنرقيك .. وبقيت عندي تاتشر عديل سايقها وعملوني قايد لمجموعة من ٢٠ فرد
تطور وماتطور ..
وبمرور الايام بقيت مقرب من القادة الكبار .. والدولار ده وفي يدي زي الجنيهات.. ماعندو اي قيمة.. ولو في زول عندو مشكلة انا البحلها ليهو ..والمشاكل اغلبيتها .. زول عندو عربية داير يمرقها .. زول عندو زول معتقل يفكوهو. ليهو ..
انا بتوسط ليهو .. لكن بصراحه المعتقلين اكتر حاجة حساسة .. مستحيل تقدر تفك زول الا باذن من عيسى شخصيا ..
لكن العربات ممكن نطلع العربية بمليار مليار ونص
نطلعها ليك خارج نطاق سيطرة الدعم السريع ..
وفي ناس بتواصلو مع افراد من الجاهزيه.. وبتفقو معاهم .. على سعر معين يطلعو ليهم العربية للمكان الفلاني.الجاهزية . بشيلو منهم القروش ..ومابطلعو ليهم العربية .. بالجد ماعندهم اخلاق ولاعهد ولاضمير.. يعني عشان مافي زول بتخاف منه .. ماخايف من ربنا ومن ظلمك لعباده..
ابدا والله ..
الناس ديل بصراحة الظلم ده في قاموسهم كانو واجب ..
وانا والله قربت انسلخ من الجاهزية ..
وارجع اهلي لكن القايد عيسى بشارة خلاني مقيد تاني مابقدر افارق الزول وثق فيني .. وقال داير يوكل لي مهمات حساسة ..
واول مهمة بكرة الصباح امشي ليهو في مكتب الاستخبارات
إلى اللقاء

✳️الظهرت معاه الحلقات للحلقه السادسه يجدع قلب هنا