Маркетинг ва реклама соҳасига оид янгиликларни ёзиб борувчи PR.uz нашри фаолиятини тўхтатди.

Бу ҳақда сайт расмий саҳифаларида маълум қилинган. Хабарда бутун жамоа муддатсиз таътил олгани ҳақида айтилади.

Нашр 2019 йилдан бери фаолият юритиб келаётганди. Ихтисослашган йўналишда қизиқарли мақолалари билан ўз ўқувчиларини топишга ҳам улгурган.

Хусусий ОАВ даромад манбаларини топа олмаётгани ачинарли ҳолат, албатта. Ҳозир ўзбек медиаси реклама имкониятлари жуда чекланган даврни бошдан кечиряпти.

Ҳамкасбларимизга кейинги фаолиятида омад тилайман. Балки қачондир сайтни тиклаш имконияти туғилар. Нима бўлганда ҳам, мустақил нашрлар яшаши керак.

@humoyun

Брендлар учун матн ёзганда доставка сўзининг ўзбекча муқобилини тополмай қийналаман. Филолог Шаҳноза Соатова етказма сўзини таклиф қилмоқда. Менга ёқди. Сабабини тушунтираман.

Сўнгги йилларда етказиб бериш хизмати ривожланиши ортидан доставка сўзи оммалашиб кетди. Аслида аксарият тилшунослар бу сўзнинг таржимаси сифатида жўнатма сўзини илгари суради.

Лекин жўнатмоқ феъли доставканинг маъносини тўла очиб беролмайди. Яъни бунда маҳсулот фақат жўнатилади, иккинчи томонга етказишни назарда тутмайди. Шу сабабли етказма варианти маъқул деб ўйлайман ва энди матн ёзишда шу сўздан фойдаланаман.

Фанлар академиясида бўлиб ўтган учрашувда, бундан ташқари, яна бир нечта сўзларга муқобил топиш ва қўллаш масаласи муҳокама қилинган. Унга кўра, ходунок учун юрмачоқ, аванс учун бўнак, скрепка учун қистирги ва неустойка учун айбона вариантлари илгари сурилган.

@humoyun

Байрам олди уйга қайтаётгандим. Самарқанддан поездга ҳиндистонлик йигит чиқди ва ёнимдаги ўриндиққа ўтирди. Уни вокзалда ўзбек қизи кузатиб қўйгани этиборимни тортди. Кейин ўртада суҳбат бошланиб кетди, инглиз тилида узуқ-юлуқ гапириб, фикрларимни тушунтирдим.

Aйтиши бўйича самарқанддаги тиббиёт олийгоҳини тугатган. Аёли билан ҳам шу ерда танишган. Ҳозир хусусий шифохонада ўзи шифокор, аёли эса унга таржимон бўлиб ишларкан. Бу ерда меҳнатнинг қадрига етишади, даромадим анча яхши дейди.

Шу ҳолатдаги уч жиҳат этиборга лойиқ деб биламан. Биринчидан, биздаги хусусий сектор умидли ва малакали мутахассисларни, у чет эллик бўлса ҳам, ортиқча тўсиқларсиз ишга оляпти. Бу ҳам компания, ҳам ходим ривожланиши учун катта туртки ҳисобланади.

Иккинчи эътиборли жиҳат — йигит ва қизнинг дини, ирқи, миллати бошқа-бошқа бўлишига қарамай, бирга оила қургани. Бунга тоқатли ота-оналар борлиги одамни хурсанд қилади. Ёшларнинг ҳаёти фақат ўзининг қўлида эканини тушунишаётгани қувонарли ҳолат.

Учинчидан, Ўзбекистонда нафақат қора меҳнатда, балки юқори классификация талаб қилинадиган соҳаларда ҳам чет эллик кадрлар ишга жойлашаётгани яхши кутилмаларга етаклайди. Энг камида бу ҳолат бизнинг ҳам ишчи кучи етиштирувчи эмас, иш берувчи мамлакатлар қаторига қўшилишга бироз ёрдам беради.

Шунақа гаплар.

@humoyun

Бугун ҳамма футбол ҳақида ёзяпти. Мен эса Конста ҳақида ёзмоқчиман. Унинг Тошкентдаги охирги концертига тушгандим, қониқарли деган баҳо қўйдим.

Сабабини тушунтираман. Мен муаллифнинг қўшиқларини 10 йилдан бери эшитаман. Шум ёшлигимиз унинг қаторлари билан қизиқарлироқ бўлган. Максимализм юқори эди ўшанда.

Лекин концертда фақат охирги 2 йилликдаги қўшиқлар ижро этилди. Янги альбом премьера қилинди. Бу Конста — халқчил, умуммиллий ғояни илгари сура бошлаган ижодкор. Ўзи ҳозирги пост бу ҳақда эмас.

Умуман олганда, Шариф Абдуллаев исми вақти келиб мусиқа дарсликларига киритилишига ишонаман. У Янги Ўзбекистон тарихидаги энг ёрқин персоналардан бирига айланиб бормоқда. Гап унинг қаторлари ҳаммага ёқишида ҳам эмас.

Констанинг ижод уммони шу қадар кенгки, у бир нечта авлодларни бирлаштира олади. У муаммоларга эътибор қарата олади. У мухлисларни зериктирмайди, у шоу уюштиради. Агар бу хонандамизни ҳам бирор расмий лавозимга бериб қўймасак, ҳали кўп йиллар шедевр асарлардан баҳраманд бўламиз.

@humoyun