يزعلك و يضايقك و يحرق دمك و بالأخير يقولك امزح واذا زعلت يقولك اصلاً انت تدور فرصه و استغليتها لااا ياشيخ !

يوم الجمعه صليت الظهر كنت افكر فيه وادعي ان الله يشفيه وبعد كم ساعه قعدت اهوجس وحسيت انه اليوم بسمع خبر سيء ووالله العظيم اني اهوجس قاعده اشوف مثل التلفزيون قدام عيوني مشهد اني بروح عزاه واعزي صديقتي بوالدها وفجاه حصل عندي مشوار وأمر من مسجد كان يصلون على ميت وانهمرت عيوني بالدموع وانا اجهل الشخص اللي يصلون عليه فجاه اطالع بجوالي الا احصل صديقتي منزله ان والدها توفى وان المسجد اللي مريت من عنده كانوا يصلون على والدها فعلاً الدنيا صغيره لاحول ولا قوة الا بالله الله يصبر قلب صديقتي انتصر السرطان على والدها الله يجعل ما اصابه تكفيرًا لذنوبه

مولعه الحطب وقاعده اهوجس وجاء بنفسي رغم هالنار الكبيره والشراره الا ان اقسم بمن احل القسم هذي النار مقارنةً بالنار إللي تاكلني من داخلي ولاشي واهخخخخ فعلًا لما تشوف نفسك عاجز والأمور طلعت عن السيطره هذي داهيه والادهى والامر منها لمًا تمر بظروف تخليك تشفق على نفسك مافيه اسوء وانا ابصم على العشره مافيه اسوء من كذا ولما تتساءل معقوله استاهل كل هالخساره؟
طيب وش ذنبي؟ ترجع يا غلبان تجدد الامل بروحك وهذا اللازم لأن كل شي بيد الله والعوض بالجاي الله سبحانه وتعالى ما يرضى يشوف عبده حزين او فيه شي مضايقه مهما يأست ومهما حسيت روحك شبعت من الابتلاءات اصبر الجاي بيخليك تنسى كل شي اللهم لك الحمد على ما انا عليه ولك الحمد على ما سأكون عليه .

يا أهلاً عُدنا والعود أحمدُ
مرت اربع شهور مُحال انسى الاحداث خسرت شخص الله يرحمه أمر الله لكن مو مستوعبه وما زلت ليومك هذا كل ما اتذكر الحادثه اقسم لكم بالله كأن الحدث توه صاير لكن الحمدلله على ما صار امر الله ولا نعترض على امره سبحانه وتعالى ادعوا الله يجبر بقلوبنا يارب٫ ماتوقف الأمر لا الادهى والامر اني خسرت نفسي واني قاعده اتهرب من حزني انا سَرَّه إللي كنت اواجهه حزني بكل لحظاته عشان ينتهي لا أتهرب واطلع على اساس انسى ارجع لمكاني ووالله انه مثل المضيف وانا الضيف يستقبلني حزني وارجع لنقطه البدايه هذا كله كل يوم ينعاد الحمدلله على ما انا عليه وعلى ما سأكون عليه .

يااااا اهلاً وسهلاً غبت غيبه طويله٫ هالفتره اللي غبت فيها ما كانت كويسه و لكن الحمدلله على كل حال "تنويه" قبل اقولكم ايش صار ( كل شخص تجربته بالحياه تختلف وقدرتنا تختلف عن بعض ) تعلمت بهذي الفتره ان الواحد المفروض ما يعبر لشخص إللي يحبه كثيييير لا تعبر الشي اذا زاد عن حده والله ينقلب ضدك للأسف أحيانًا من كثر الحب وكثر الفرص الشخص اللي تحبه ممكن يغلط ويعرف انه غلط ولكن عارف هو انك تحبه ف بتسامحه على طول وبترجع المياه لمجاريها ولكن لو رجعت مارح تكون صالحه لشرب ٫حبوا بعضكم ولكن لا تعبرون بالنسبه لي انا وعاد اعيد واكرر تجربتي تختلف وقدرتي تختلف عن كل واحد يقرأ .

وجود شخص تحبه ويحبك ويكون حولك بالحلوه و المُره هذا اعظم شي ويحسسك كل شي بيعدي ويهون والله يا جماعه مهما الحياه قاسيه عليك لكن هالشخص حولك ويطبطب عليك ويحاول يونسك عشان تنسى وتغير جو ويسولف ويهونها عليك هذي نعمه عظيمه الله يديم الاشخاص اللي كذا.

اسوء شي توصل لمرحلة اليأس اسال الله عز وجل ان لا يجعل احد يمر بالمرحله هذي لانك مارح تمر فيها الا وانك فعلاً جربت مره وكانت اخر مره مُحال يكون فيه محاوله اخرى الا اذا الله كتب هالشي كان عندك امل كبير ورافع كنت سقف توقعاتك كان فوق وللأسف يا غلبان طاح عليك السقف واكلتها و يأست تمامًا وخايف من التجربه تهوجس تحس مارح تضبط معك يأست بشكل مخيف كان الله بعونك يا غلبان اليأس يشهد الله عمره ما كان سهل اسأل ان يحيي ما بداخلكم بأمل وتحقيق رغباتي ورغباتكم لاتنسون ربي قادر على كل شي ثق بالله واطمئن.

قاعده اصلي الوتر كنت ابكي وادعي ربي يوفقني بالشي اللي ابيه ومصيري بيتحدد منه
الا والله العظيم الراديو مفتوح وتجي اية
﴿وَمَنْ يَتَّقِ اللَّهَ يَجْعَلْ لَهُ مَخْرَجًا * وَيَرْزُقْهُ مِنْ حَيْثُ لَا يَحْتَسِبُ وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا﴾ صدق الله العظيم ٫اقسم بجلال الله وانا اصلي وتر وابكي لله مرت هذي الايه علي واني بكيت وقلت يارب اجعلها إشاره لي وعسى يارب يارب تكون اشاره لي.

ياحلو رسايلكم في بعض الرسايل مقدرت احولها لكم صدقوني يا اخواني في الله
العناء والمشاكل مارح تدوم مهما طالت المده مهما مرت السنوات وانت او انتي تعانون من مرض من مشاكل من فقدان من زعل من حزن من إي شي بالحياه هذي صدقوني والله ثم والله مارح يدوم يقول الله سبحانه و تعالى ﴿ادْعُونِي أَسْتَجِبْ لَكُمْ﴾ هل ربي قال كذا عبث لا طبعًا لكن ادعوا الله مارح تتحقق دامك مو واثقه بالله٫ بالله عليكم خلوني اقولكم لو فيه شخص ماتوثق فيه تمام وتبي من خدمه وهو عارف انك ماتوثق فيه هل بيسوي لك هالخدمة ؟ الاجابه عندكم لذلك ادعوا ربي ولأ تيأسوا من رحمة الله سبحانه ربي عظيم يا اخوان والله عظيم وجبار وقادر على كل شي ماتحققت دعوتك يعني راح تعبك وصلاة الوتر هباء منثورا ؟ لا طبعًا مافي شي عند الله هباء منثورا٫ دعواتك التي لم تتحقق تحولت لك لحسنات يوم القيامه عشان كذا بالحالتين احنا مو خسرانين لو دعينا ويقولك لو عرضت الاقدار على بني ادم كان بيختار نفس القدر اللي ربي اختاره له لذلك خليكم واثقين من الله .