Қазақ тілінің өз заңдылығы бар.
Сіз бен бізге аталмыш төл құрылымды ескеру қажет. Сонымен:

1. “Іздеп бастадым” емес - Іздей бастадым.
2. “Жазып бастапты” емес - Жаза бастапты.
3. “Атқа шаптым” емес - Атпен шаптым.
4. “Үлкен рақмет” емес - Көп рақмет.
5. “Мынауың қате ғо” емес - “мынауың қателік қой”. Қате - жазуда, қателік - адамда болады.
6. “Немқұрайлы” емес - Немқұрайды
7. “Технологиялар” емес - технология

P.S. Менің студенттерім мұндай олқылықтары жетесіне жеткізе талдайды. Бірсырыпасын осында бөліскен де артық емес шығар.

Сыртқы сұлу сауытымызға сыяр дүние көп. Көшеге қара. Әні бір адам астаң-кестеңі шыққан әлемін ішінде бұғып бара жатыр. Оң жағыңдағы сүйкімді жан ше? Күлкісін-ай… Жүрегіңді жылытатын әсерлі жымиыс.

Ішіне барлық мұң-сырын көрбілтелеп, сыртқа сырын білдірмей күлетіндерге, өз басым, таңым бар. Олар, асылында, нағыз жанкештілер.

Жаны жылап тұрса да, жарқын күлкісін тыймау - мықтылық.

Ішкі жансарайыңды тілгілеп, көңіл көкірегіңді тоңазытар торығуды тасу бар пендеге тән мехнат азабы шығар. Ақтарылу да айып емес...

Айып - мұңың мен сырыңды, биіктеуің мен құлдырауыңды мойындамау.

Барыңмен бөлісуге, болғаныңмен байласуға, өткеніңмен кетісуге, күткеніңмен табысуға енжанлық.

Барыңмен бай бол, бар бол, досым. Соныңмен ерекше екеніңді ұмытпа.

Бәрін нөлден бастармын дерсің. Нөлден қайта бәрін бастау мүмкін емес. Бәрін тәжірибелі қалпыңмен қайта бастауың мүмкін. Бірақ бұрынғыдай боп-бос қалпыңмен емес.

Мұны да еңсерерсің. Білем... Сенем…
Құрметпен:

(с) Дастан

https://t.me/dasten_kastay

Ол кім? Бұл не?

Балалық шақтағы ой қамба, сөз көмбемді байытқан кітаптарды бүгін тағы бір парақтадым.

Қой бағып жүргенмін. Ауылда түс ауа жаңбыр жауып кетті. Қойды қалың қарағаштың бауырына иіріп, үйге кірдім. Төргі үйдегі кітап сөресіне тақап, бір сапқа тізілген кітаптарды ақтара бастадым. Балалық шаққа саяхат жасағым келді.

Қолыма менің ескі достарым - “Ол кім? Бұл не?” - түсті.

Мен кішкенеден сөз құрастырып ойнадым. Менің ойыншықтарым лего емес, сөз болды. Оларды ойша бір-бірімен құрастырып, бірлестіріп, ажыратып ойнайтынмын.

Сөзге бала кезден әуес едім.

Осы энциклопедиялағы сөз тізбектерін ой жіптігінде өріп, зерде ілмегімен тоқитынмын.

Есею жылдарының өзінде осы жинақтардан қаншама құнды дерекке қанықтым.

Әкем мен анам осы кітаптарды бізге алып беру арқылы көп дүниеге ұластырды. Біздің бойымызда құндылық қалыптастырды.

Мен де кейін өз балаларымның бітіміне құндылық қыртысын сызғым келеді.

Мұндай ұшан-теңіз білімге сахип кітаптарды келер ұрпағыма мирас етіп, әкеден балаға табыстағым келеді.

Сендерге көп рақмет, менің бала кездегі адал достарым! Менің сөз құрастырғыш ойыншықтарымның алтын сандығы!

(Әсіресе, журфакта дәріс беретін ұстаз үшін таптырмас құнды жинақтар!)

Тұтас буынды тәрбиелеген бұл кітаптар кімнің үйінде әлі бар? @актуальное

Дәл осы энциклопедияларды Ұлттық сана, заманалы ажарға сай қайтара түлетіп, жаңадан басып шығару керек-ақ...

Ол кім? Бұл не?

Албырттық аптаған кезеңнің ең үлкен алданышы - келер күннің кереметін ғана көру.

Соқыр сезімнің санаға біткен соры да сол: біржақты болбыр. Керемет күндер картинасы.

Бір дүниенің сырын біл. Сенің бекзада болмысыңа келер күндері ешкім иіле кетпейді, досым.

Алар еншің - егеспен.
Келер күнің - күреспен.

Қанша жерден сыйды біл. Түбі - сыйсыз қылық көрсеткенге сүрінерсің.

Қанша жерден құрмет таныт. Түбі - жомарт жаныңды өзгенің жамандығы мұздатар.

Сүй. Наздан. Өкпеле. Егес. Қуан. Жұбан. Сырт айнал. Сағын.
Мұның бәрінде келер күннің өз есебі бар.

Сондықтан өмір реңін біржақты создықтатуға асықпа.

Кейде бәрін ысырып қойып жай ғана өмір сүруді таңдауға тура келеді. Өйткені өмір сүруде мың сан түрлі бояу бар.

https://t.me/dasten_kastay

Қазақ тіліне жұлдызы қарсы футболшы - Нұралы Әліп.

Футболшы Нұралы Әліп қазақ тілінде сауал қойған әріптесімізге жауығып, “хайп қудың” деп айыптады.

Журналистің міндеті - ақпарат беру.

Біздің елде қазақша сөйлейтін, оқитын, жазатын үлкен ақпарат кеңістігі бар. Бұл кеңістіктің қажетін өтеу жолында қоғамдық-саяси, спорт, мәдениет, экономика, руханият т.с.с. хабарлар мен контенттердің, БАҚ өнімдерінің қазақ тілінде тарауы, тууы, туындауы - заңды.

Қазақ тілі - елдің тұтас мәдени-ақпараттық кеңістігінің тілі, ұлттық ойлаудың негізі, аса ауқымды аудиториясының бір-бірімен байланысу жолы.

Қазақ тіліне қарсы шығу арқылы Нұралы Әліп қазақы әлеуметті сыйламай отыр. Кейіннен қазақша сауалдан бас тарту - елдік мүддеге қарсылық таныту.

Мемлекеттік тілді менсінбеу - шектен шығудың ең сорақысы.

Нұралы Әліп мырза, доп тебу дегенің домалақ жүн-жұрқаны тебу деген мағынаға келетін шығар... Бірақ туған халқыңның тілін тобықтан тебу деген ұғымға еш сай келмейді!

Қазақ тілі сендер сыртқа қарай тебетін доп емес!

Спорт журналисі Аслан Каженов ағамыз істің жөнін айтып отыр. Сілтеме: https://www.facebook.com/share/p/onLLhxzWm3XcCY9E/?

“Үйіме асықтым...”

Үй тек салтанатты сарай емес, көкзеңгір ғимарат емес, досым.
Сүйген жанның асық болар өз мекені бар.

Сүйген жанның ғажайып үйі -
Әзиз жүрегін мәңгілікке қондырғысы келген сүйіктісінің жылы құшағы.
Тұнық жанары.
Мөлдір махаббаты.

Ұмытпа!..
Махаббат мекеніне тасынған әрбір адамның өз тұрағы бар.
Мекенжай: Сүйіктісінің саясы.

Мына ғапыл дүниеде ең қиыны - алыпұшпа жүрегіңнің орнығар қалыбы, барар бағыты, байланар ұясының болмауы шығар.

(с) Дастан

Белескер Әбиба Әбужақынова, ақын Танагөз Толқынқызы, былғары қолғаппен беркінген Назым Қызайбай, прокурор Айжан Аймағанова, жазушы Аягүл Мантай (марқұм болса да…), журналист Әйгерім Тілеужан сынды аруларымыз - Қазақтың ары мен ұяты!

Бәрінің өз бағасын толық алатын уақыт келеді әлі.

Айтқандай, тұлпардың нөміріне ықыласым ауды. Шабысқа - шабыс, шабытқа - шабыт қоссын! Құтты, игілікті болсын!

Көңіл өсіруге көтерме, Алтын еншілеуге серпін деп сезінейік.

Ресей Париж Олимпиадасынан сырт қалып, көп елдің бағы жанды. Әсіресе, су спорты мен синхронды спорт түрлеріне келгенде Қытай мен шығыс елдерінің Құдайы жарылқады.

Ресейді қанша жамандасақ та, гимнастика, суда жүзу һәм билеу, сұңғат өнер мен мұз бетінде сырғанау мектептері мықты.

Бір апта болды. Тұтас Әлем Қытай қыздарының синхронды жүзу өнеріне аузын ашып жатыр.

Ресей мектебі одан да мықты.

Әттең, Ресей мамандарының бір жақсысы да, бір жаманы да, сыртқа сыр ашпайды. Көп дүниесін бізге сіңіру керек еді. Олар айтпайды. Біз суыртпақтауға ынталы емеспіз.

Кезінде көркем гимнастшы Әлия Юсупованы да Ирина Винер (РФ көркем гимнастика федерациясының басшысы, ұлты - еврей)жетер жеріне жеткізбей шалағай дайындап жібергенін білеміз.

Себебі Әлия - мықты потенциалды, ерекше жарын иесі еді. Өз қыздары Әлиямыздың жанында жіп есе алмайтынын білмеді емес, Ирина жақсы білді. Сондықтан толық қабілетін көрсетуге жол ашпады (Бәрібір бәсекелес қой…).

Биылғы бекзала спорт түрлерінде топ жарған Қытай қыздары төл тарихын айшықтайтын композицияны спортпен тұтастырыпты.

Әттең, біздің федерация да көшпелілердің бояуымен, философиясымен үлкен композиция дайындап шыққанда ғой дейсің. Демек, ізденіс жоқ.

Бірнеше жыл бұрын синхронды жүзумен айналысатын бір орыс қызымен сөйлестім.

- Театрмен, хареографтармен, жүзгіштермен бірлесе жұмыс істейтінбіз. Бізде комбинаторика. Тренировка таңғы алтыдан басталады, - дегені есімде қалыпты.

Көшпелілер салтынан, номадтық көне сарыннан, ұлттық колориттен тұратын композицияны, өршіл жауынгерлік іс-қимылдармен астасқан би қимылдарын, асқақ әуенге жатық билеген қазақ қыздарын су ажарынан көретін күнге жетер ме екенбіз?

P.S. Бір айта кетерлігі, Ресей тренерлерінің басым көбінде фашистік-шовинистік ұстаным байқалады. Демек, бекзада өнерде айдынында да қаскүнемдер өріп жүр. Мәселе - асылы мен жасығын ажыратуда. Дарыны мен жеке ұстанымын бөлек қарастыруда…

Бізге өзге тілді, өзге жүзді, өзге дүниетанымдының не орыстілді, орыспиғылдының алтын әпергенінен гөрі Әбибаның сағы сынбағаны маңызды. Әбиба мен Назымның ерекшелігі - қазақы ойлау өресінде.

Осы орайда барлық нәрсесің тренерге байланысты екеніне тағы бір мәрте көз жетті. Енді мен де мықты журналистерді тәрбиелеп шығаруға күш еселеймін деп шештім.

Еркін ойлы!
Жағымпаз емес!
Шығармашыл!
Энциклопедист!
Демократ журналистерді.

Ұлттық-демократтар өсіретін өз мектебімді қалыптастырамын.