АВТОБИОГРАФИЯ

У эртароқ туғилди,
Хаёли эди дўсти.
Чала битган ишдайин,
Озгина нимжон ўсди.

Ўй суриб, кечалари,
Ухлолмасди унча кўп.
Тенгдошлари билан ҳеч,
Ўйнамасди ҳатто тўп.

Танимаган одам сал,
Ғалати, жинни дерди.
Буни сезарди ақлан,
Тоқат тошини ерди.

Кимдир уриб қочарди,
Бошқаси туртган пайтда.
Ўшанда ҳам осмонда,
Ой шуълалар сочарди.

Гўзал туйғулар неъмат,
Худо қалбига солган.
Ҳайратидан тақдир ҳам,
Ичини кенгроқ олган.

Энг тоза сирларини,
Шум шамоллар совурди.
Кучли ўтда қизиган,
Ёғларда кўп қовурди.

Пойгада кечроқ чиққан,
Иштирокчи у, асли.
Ёзда туғилган, шунга,
Қисмати ҳосил фасли.

Уйдагилар учун ҳам,
Муҳим эмасди унча.
Қанча юрса индамай,
Яхши бўларди шунча.

Аввал сингли ўқиди,
Буни онаси истаб.
Алам қилди, барибир,
Юборди кимдир қистаб.

Чидади, илож қанча,
Топмади бошқа имкон.
Ҳаёт синдирмас экан,
Айнимаса гар инсон.

Сўнг укаси чиққанди,
Худди кучли ботирдай.
Четдан қаралса, унга,
Бир керакли шотирдай.

Отаси оддий одам,
Кўп нарсани билмайди.
Жаҳли оловдан ёмон,
Чиқса, шафқат қилмайди.

Бу орада кичкина,
Синглиси ҳам ўқиди.
Унинг йиғган-терганин,
Ўрдаклар хўп чўқиди.

Кўп нарсалар ёзилмай,
Қолди, барибир яна.
Ҳозир тўртта болали,
Шоирдир ўзи, мана.

17.02.2025 й.
Барака ХАЙРУЛЛОҲhttps://t.me/baraka_xayrulloh

*МУТАНОСИБЛИК

Шаҳар одамлари қишдайин совуқ,
Ҳатто қўшнисини танимас булар.
Кенглик туйғулари эмасдир ёвуқ,
Афсуски, ҳозирги улфатим шулар.

Менинг қишлоғимдан қашшоқдир Тошкент,
Чунки, тиламчилар учрайди кўплаб.
Нотаси номаълум машшоқдир Тошкент,
Айнан, оҳангларин ололмас тўплаб.

Тишларим шунчаки синмаган ўзи,
Унинг нонидаги тошлар қаттиқдир.
Кўрмаса оғирдир ақлингнинг кўзи,
Бўлиниб кетмаган бошлар қаттиқдир.

14.02.2025 й.
Барака ХАЙРУЛЛОҲ*https://t.me/baraka_xayrulloh

*ХОНАҚОҲ

Ялпизлар қуриди ариқ бўйида,
Чунки, туйғулардан йироқ юрасан.
Ёмғирлар ёғгандек баҳор кўйида,
Баъзан хаёлимдан ўтиб турасан.

Урушда отилган дайди ўқдайин,
Ичимизга бир қурт оралайверди.
Бошқа қиладиган иши йўқдайин,
Тақдир ҳам бизларни қоралайверди.

Дунё — елканлари ситилган кема,
Тўфонлар ҳақида ўйлайман узоқ.
Фақатгина айбим нимайди, дема,
Сенинг онгингдадир қўйилган тузоқ.

11.02.2025 й.
Барака ХАЙРУЛЛОҲ*https://t.me/baraka_xayrulloh

ХАТАР

Ҳамон тинчимади ғўр сингилларим,
Тақдиридан оғир тушаяпти кеч.
Шундай пешонаси шўр сингилларим,
Бахтнинг нелигини англолмади ҳеч.

Учинчи синфда ўқийди қизим,
Зимдан қараб қўяр аммаларига.
Ўзича нимадир тўқийди қизим,
Худо инсоф берсин ҳаммаларига.

Инсон жараёнлар қулидир, аслан,
Сидрага Пайғамбар етган, афсуски.
Кўнгил чакалакзор гулидир, аслан,
Туйғулар дарбадар кетган, афсуски.

10.12.2024 й.
Барака ХАЙРУЛЛОҲhttps://t.me/baraka_xayrulloh

*АРОСАТ

Дунё деганлари бировнинг уйи,
Унда яшолмайсан бундай очилиб.
Чалиниб қолганда ногаҳон куйи,
Ҳосилинг қоқилмай кетар сочилиб.

Бунга ижаранинг алоқаси йўқ,
Пулини тўласанг, байрам уёғи.
Совуқ нигоҳлардан отилмайди ўқ,
Кўзга ташланмайди, афсус, буёғи.

Зиндонбанд қилади хавотир гоҳи,
Ўтиб бўлмагандек кўнгилни четлаб.
Шунчалар хатарли шеъримнинг чоҳи,
Биргина ўзингга келасан бетлаб.

5.12.2024 й.
Барака ХАЙРУЛЛОҲ*https://t.me/baraka_xayrulloh

*РАҲМАТ

Тирикман ҳали ҳам, мана, ўлмадим,
Айбимни тан олдим, нохос тўлмадим.
Яқинда бир дўстим айтгани каби,
Ҳеч қандай ҳолатда сохта бўлмадим.

1.12.2024 й.
Барака ХАЙРУЛЛОҲ*https://t.me/baraka_xayrulloh

*ТАНАЛАР

Навбатдаги куз тугади бугун,
Мен Боқий тахаллусига нуқта қўйганимдек.
Аммо, хотиралар тирик қолди,
Ризқи тугамаган одамдек худди.

Навбатдаги куз тугади бугун,
Катта амакимнинг куни битганидек.
Лекин, ҳали миллий камчиликлар кўп,
Бола бебошлик қилгани каби.

Навбатдаги куз тугади бугун,
Оғир касал топгандек шифо.
Бироқ, ҳеч нарса ўзгармади деярли,
Қўрс феълим мисол.

30.11.2024 й.
Барака ХАЙРУЛЛОҲ*https://t.me/baraka_xayrulloh

Ҳурматли кузатувчилар! Яқинда ижоднинг қалам билан боғлиқ бошқа бир йўналишида бир нарсалар ёздим. Нашр этиладиган бўлса янгилик нима ҳақидалигини эълон қиламан. Дуо қилиб қўйинг, меҳнатим зое кетмасин!

*ШИША

Ҳаками ғирром бўлган
Улоқлардан чарчадим,
Ўзини тиниқ деган
Булоқлардан чарчадим...
Дўстини сотган анов
Қулоқлардан чарчадим,
Ёраб, бу дунёсида,
Яшамоқлик жасорат.
Энг ёмони қалбингни
Емиради асорат.

Куйлайди билмай тиним,
Муҳаббати ёлғонлар,
Синов келган чоғида,
Иккиланиб қолғонлар.
Ўлган ота қарзини,
Боласидан олғонлар,
Ёраб, бу дунёсида,
Яшамоқлик жасорат.
Энг ёмони қалбингни
Емиради асорат.

Лой кўчадан боради,
Мактабга болаларим,
Тезак ёқиб кексайди,
Қишлоқда холаларим.
Етармикан Тангримга,
Айнан шу нолаларим,
Ёраб, бу дунёсида,
Яшамоқлик жасорат.
Энг ёмони қалбингни,
Емиради асорат.

19.11.2024 й.
Барака ХАЙРУЛЛОҲ*https://t.me/baraka_xayrulloh

*БОТҚОҚ

Инкор этолмасдан оши шўрларни,
Дунё қувватлайди доим зўрларни.
Зимдан туғаяпсан онги кўрларни,
Кимдир қарғаганми, бизларни, Халқим?

Гуручнинг кўрмаги кўпайиб кетган,
Улкан тақдирингга путурлар етган,
Сирингни зоғчалар ошкора этган,
Кимдир қарғаганми, бизларни, Халқим?

Фитрат бузилгандек туюляпти гоҳ,
Атай тузилгандек туюляпти гоҳ,
Илдиз узилгандек туюляпти гоҳ,
Кимдир қарғаганми, бизларни Халқим?

16.11.2024 й.
Барака ХАЙРУЛЛОҲ*https://t.me/baraka_xayrulloh