ياتيها بيها نعفت
بيا طور ادور  تجي
والنيه صحرة محب
بذنوب عشگه انحبس

اندله مجره العطش
بس عيني عالعلگمي
من لاح جف الگمر
جم مره گاطع نفس

يالكامل الما نقص
من منظرك بالسهم
قمة جمال الزلم
بينته من انغرس

يالبيك روح القدس
وزع صفاتك شعر
بذن اليخدمك صدگ
كل مره دعبل همس

تايه واخذني الوكت
والبيه ما ينحجي
لا جمعه ناسي الفرج
ولا ذنبي يوم السبت

تايه واخذني الوكت
يالكاشف ليوشعك
وجه السكينه وعصا
الثعبان بيدك شلت

عينك على اليلتفت
الدنيه تركض ركض
وانه بميول الرمح
ميل العگارب ملت

يا ابا الفضل دورت
بالصدفه مالك اثر
كلشي اجتهاد وعلم
محد مثيلك درس

كلشي عله بالي اجه
الماي يعكس صور
بس انته عالمشرعه
گابلته حيدر عكس

محلاها لذة الحبس
والضايع منالعمر
لو عشگي جان السبب
هنياله گلبي انحبس

ضايع واريد الوصل
سلمان بيه انولد
شته بربيعه وعبر
كل صيف يندل فصل

ناطر رسول السهم
للمثلي ينزل گمر
يقره ايه عالمشرعه
ويزيح بيه الحمل

تسمحلي ياابا الفضل
انته وجنود العشگ
لا تعبر الضيعك
مو ثوبي وادي النمل

هيثم جعفر

دخيلك يا موسى ابن جعفر (عليه السلام)

ما برد جفي على اللطم
ابقه انهضم لهاي المصايب استمع
جرح الهواشم مستمر
كلما يمر في بالي بيهم انفجع

موسى الكاظم عاش الغربه وغربته شجون
يتئسى بضعن الرايلحه ويهمل عيون
باقي الوحده وضعنه تغرب ضل بالسجون

اهمل دمعتي دمعي جاري
البس سوادي وانكساري
الكاظم أمامي والمصابة
للمهدي لهفة انتظاري

ذريه حسين وطبعهم غرام
صار الغريب وعايش بضلام

سابع امام ومن نسل امام
موسى ابن جعفر سيدي السلام
—————————
في لوح امهم فاطمه
العالمه مذكور اسم سابع حجج
نوراً على نور نفتق
منه استبق مولود والصادق بهج

موسى الكاظم باب الرحمه رحيم العباد
عاصر امة جهلت حقه جان الهة رشاد
لا يم اهلة ولا يم ناسه غريب البلاد

غربة هواشم بغربته
من غربته ويواسي عمته
وبسجنه يتذكر مصايب
وعلى الذبح طاحت دمعته

مسجون من الجامعة جريح
وتهون عليه كلمة الذيبح
سابع امام ومن نسل امام
موسى ابن جعفر سيدي السلام
—————————
حزني بده من العهد
بالذر وعد الطم وابچي الفاجعة
سم وذبح لا مو هين
گلبي يون من السبي والجامعة

موسى الكاظم بيده گيوده وينزف جروح
ما راحم سجانه بحاله بغربته ينوح
ليش بنص سجنه يسمونه وتطلعله روح

الكاظم وحيد وموته محنه
وين الهواشم التدفنه
ضل عالجسر وبموته غربه
من نعشه محد يتدنه

الكاظم شهيد وعالجسر طريح
أسوه بحسين العلترب ذبيح

سابع امام ومن نسل امام
موسى ابن جعفر سيدي السلام
—————————
هاشم وعادتها القتل
عهد وصل من الله هاي المكرمه
والقتل حب الواصلة
ويضحي اله دين الله هيجي افهمه

موسى الكاظم ضحة بروحه كريم الوصال
وغربة ضعنه الذيج الغربه الفگدت دلال
هاشم يا هاشم غربتها تهد الجبال

هاشم جرح منتظره قائم
وتتكسر اغماد الصوارم
منتظرة مهدي ياخذ الثار
بهاي الارض وجه الله دائم

صرخه ينادي وبگلب حزين
لبيك ثار الله يا حسين

سابع امام ومن نسل امام
موسى ابن جعفر سيدي السلام

سيد سجاد الحيدري

ال موسى ابن جعفر

طامع بحبكم سادتي
يا ال موسى ابن جعفر
كل ما ذبل گلبي الضمي
ابنظرة وحده گلبي يزهر

عايش برحمتكم عبد
واستجدي منكم كرامه
غير انتو آل المصطفى
عطف وسلامة وشهامه

جوهر أمامه بعد امام .. بأبوابهم الگة السلام
باسمائهم گلبي ينطق
عند العبد طاعه ولاء .. ولذت انه باكناف الرجاء
سلمت تسليمي مطلق

ديني الامامي عز وفخر
زينة ولاية واجمل صور
الخله واحد يمكم شرك
دين الله لولاكم ما ظهر

شيعي ولائي حيدري
شيعي وديني جعفري
—————————
كاظم الغيظ برحمتة
يعفي على عبده ذنوبه
وإبنه الرضا منه الرضا
رئفه وأنيس بهبوبة

والقاسم إيمانه ظهر
طبع العطاء عاده عنده
معصومتة الكلهة كرم
فاطمه المعصومة بعده

ابوابهم باب السماء .. وباسمائهم يحلة الدعاء
واعتابهم موطن الي
والحيرة المن اتجه .. اليا باب يلتف الوجه
بكل خطوة اگولن يا علي

اكضي طريقي شوگ ومحن
واللهفة كلهة بگبه وصحن
ساداتي ديني وحرزي ويقين
بيتي وملاذي واجمل وطن

شيعي ولائي حيدري
شيعي وديني جعفري
—————————
يالذاتكم فوق البشر
ذاتي عبد كل حياتي
ابوابكم رحمة ولطف
انتم وسيلة نجاتي

اسمائكم قول وفعل
كلمن صفاته ومقامه
واتمسكت بيكم لان
انتم اصل هالأمامة

وبصحن اسد بغداد اطوف .. معصومه لو يم الرؤف
القاسم جميل بأثرهم
والزارهم مره بعمر .. يزورونه همة بالگبر
حي اليموت على حبهم

والما اجاكم كلش بعيد
وجهت وجهي ويمكم اريد
اطمع قربكم طول العمر
المات على حبكم ميت شهيد
—————————
يا ألبيت المصطفى
يا بني هاشم يساده
يا رحمة الله على البشر
يا سر عطاءه وداده

فتحت بيكم ناظري
واعمل بنية وبصيرة
انتم تحبون العبد
وهاذا اني روحي أسيره

حبل الله همة والوصال .. الهم اشد أيدي بحبال
وكل خطوه اخطي بدربهم
الگة الدرب كله حنين .. كل خطوه الگاهة حسين
وبأسمه عشگي وكل عشكهم

ساده وهواشهم واصل الولاء
وكل خطوه تاخذني الكربلاء
كل صرخه هتفت بأسم الحسين
من كل زياره وبكل عزاء

سيد سجاد الحيدري

يمه بساع اخرتك شعجب ما طولت
انه للخوه ذاخرتك وبساعه رحت
يمحسن يمه ما شفتك
عفتني لو انه العفتك
الوكت يا يمه مو وكتك
ليش الباب سالفتك عصارك ومتت

هاذ الوكت يا يمه سلاب
لا عشت دينا ولا طعم طاب
خله امك معصبه وتبچيك
موش بمهد خلاني اهز باب
——-
يمه مو وكت موتك حياتك ما بدت
يمه وحيلي من قوتك وشمعاتك طفت
يالمالحكت خوتك
بعد ما هيست صوتك
منين انجيب تابوتك
گرب موتي بسبب بموتك ومن يمهة انتهت

تابوت گدك ماكو تابوت
ياهو اليشعيك ياهو زاتوت
مكسور ضلعي وموتك هواي
يا حال ابوك بموتك يموت
—————————
يمه ومن رحت مني مليت العمر
غيور و دافعت عني من صار العصر
طحنه وانته شابگني
فراگك حيل يوجعني
تشابه حزنك و حزني
يمه وموتك الهزني ما طاقه الصبر

مريود كبرك يمه مريود
روحتك يمه تفت الچبود
ليش العمر من وكت ملاك
وبيا ذنب عالباب ممرود
—————————
امك والبزر غالي وتنتضرك هلك
يمه ومهدك الخالي محضرته الك
يالكاسرلي دلالي
اشوفگ توگع گبالي
رسمك شاغل اخيالي
شبهك المن ابالي حيره واسئلك

الهدوم ما لابسهة الهدوم
ثيابك بقن والمهد مهدوم
حزنك چبير بگلبي مدفون
لليوم انوحك يمه لليوم

سجاد الحيدري

انه ما رايد بعد اي كلمه خادمك تكفيني
شكد احبك وانته المدللني وخيرك مغطيني
وحته لو اطلب بعد من ايدك تنطيني تنطيني
عدم بس انته ردتني وشائت ادمي اتسويني
وداعه امك انه ما استاهل اخدم تخليني

ابنظره الحب باوعت لعيوني وممنونك ممنونك
انه ياهو وحته توكع عيني بعيونك بعيونك
خير ما بيه وترست جفوفي وخير اليحبونك
لون ما عندي ورحمتك فزعت من لونك من لونك
اعمى ماشوف وفتحت عيوني اعله ضعونك

يابس مصوفر سكيت جروحي وعيالك بعازه
كبرتني وصرت زلمه بخيرك فضلك ما يتجازه
فضلك اعله العالم مولايه من راسه الحد جازه
الماي صبيته اعله كلبي وانته جنت اكثر معتازه
وكفتني بطولي كل عمري وجنت امشي بعكازه

وجنت من ابجي ثوابك رايد بس هسه لا والله
ما عفتني دخيلك يا ضامي وانه بعز الغفله
مخليني بعيونك وعيونك بيها ترابك صله
وما جرحت احساسي بحجايه ومجروح بعبد الله
لملمتني جفوفك حنيه ونايم فوك الرمله

علي لو فات من الباب يتئذه
يذكرر المصيبه وزايد الحركه
لو يدخل الداره ينلجم كلبه
علي ميت علي حته الهوة يخنكه

نعة نفسه علي
فاطم ردي الي
فراكج كاسرني حيل

تعالي يم حسن
تعبني الزمن
مر بدونج هالليل

اول مره باهاته
يتعثر بجلماته
ما جنه علي

ما جنه القلع خيبر
علا فركاهة ما يكدر
راحت من ادي

هتكو حرمه الله وما رعو حرمه
وعصرو باب عالزهراء والبسمار
ذبح سر الله كله وطشر المحسن
شهيدين انطه حيدر من هجوم الدار

فاجعة المصاب
شهيدين علا باب
حيدر يتمنه الموت

المحسن منولد
ما شاف المهد
ما سامع لبنه صوت

واكف عالكبر ينعه
وغركت عينه بالدمعه
يناغي وماكو رد

من حيل الله ذرعانه
يتجه علا حيطانه
ما يكدر بعد

علي الضيم البكلبه محد يعرفه
بس البير جان ويعرف اسراره
هسة الوادم تشيع خبر يوجع
علي الكسرو ضلع مرته وصبر ثاره

علي حيل انضلم
علي حيل انهضم
المن حاله يشكي

لا يمه الرسول
لا يمه البتول
ياهو الي يواسي

اليعرف بالسمه وربه
جا المن يدك كلبه
من نهد الكسر

اليعلم بالصبر هوه
ما يكدر بعد كوه
بعد راح العمر

علي باقي وحيد ويكسر الخاطر
اول تالي هيج العشرة تطشر
علي تيتم عجيبهة وزينب تكابر
خذت دور الزجيه وصارت ام حيدر

علي صار اليتيم
الهايم من يهيم
لو فاكد خله يموت

كل ليش بعلي
ليش الفركه الي
مقسومه وفات الفوت

علي حاير يعيش المن
كلشي بحيدر التمن
من كل وجع باب

تكسر خاطر ايامه
يتيم يناغي بايتامه
يا كبر المصاب

تعالي وشوفي حال البيت من رحتي
حسن وحسين مثل الثكلى بفراكج
وزينب تنعه يا يمه غريبه انه
غربتي لو غربتج بدت بمصابج

حسين بلا ثياب
باجر عالتراب
وتكسر ضلوعه الخيل

زينب والزمن
مصايب والمحن
بلا خيمه تضل بليل

مصايبهم بدت هسة
حرك باب واثر رفسة
ونارك تعتلي

من الباب لخيامك
كضت بمصاب ايامك
يا ضيمك علي

سجاد الحيدري

يا ابا عبد الله الحسين

يعلى نداء الاربعين .. يا ابا عبد الله الحسين
نتعنه نمشي زائرين .. يا ابا عبد الله الحسين
رد الضعن كله ونين .. يا ابا عبد الله الحسين
نتلاگه وي ضعن الحسين .. يا ابا عبد الله الحسين

يا ابا عبد الله الحسين
—————————
من البحر حد النحر .. يا ابا عبد الله الحسين
تلكه الدرب كله صور .. يا ابا عبد الله الحسين
شوگ وحزن هاذ السفر .. يا ابا عبد الله الحسين
موعدنا عشرين بصفر .. يا ابا عبد الله الحسين

يا ابا عبد الله الحسين
—————————
كل خطوه نمشيهة بتعب .. يا ابا عبد الله الحسين
ومنبدل الخطوه بذهب .. يا ابا عبد الله الحسين
وبكربلاء نشوف العجب .. يا ابا عبد الله الحسين
رد الضعن بس انسلب.. يا ابا عبد الله الحسين

يا ابا عبد الله الحسين
—————————
نتئسه من نمشي الدرب .. يا ابا عبد الله الحسين
نمشي ولاكن مو غرب .. يا ابا عبد الله الحسين
ما ننحرم من الشرب .. يا ابا عبد الله الحسين
اه الضعن كسرة گلب .. يا ابا عبد الله الحسين

يا ابا عبد الله الحسين
—————————
ناده المنادي لو وصل .. يا ابا عبد الله الحسين
بكربلاء ضعن الله حل.. يا ابا عبد الله الحسين
ونصيح يارب العجل .. يا ابا عبد الله الحسين
ألطالب الثار الامل .. يا ابا عبد الله الحسين

يا ابا عبد الله الحسين
—————————

سجاد الحيدري

اعتنقتك والگلب غاوي
وامد ايدي الك ناوي
وحبگ من ملك گلبي
صرتلك شاعر وراوي

نويت
خادم وعبد
كلمة ما ارد .. بالحجي مريد

نويت
واطمع بقرب
وانفتح درب .. شكد چنت بعيد

جنت انه غافل واجيتك
كل دمعة نزلت لگيتك
هيج انته حبك يراوي
كل ما اريدك بچيتك
—————————
اجيتك والگلب حاير
شقدم شنطي للعاشر
اجيتك كلشي ما بيدي
اجيتك بالحزن عابر

اريد
احضر الطفوف
وانجرح واشوف .. جرحي بالغرام

اريد
جمرة بين ادي
وتحترك علي .. خيمة مو خيام

حرگ المخيم هضيمة
خيمه تشب على خيمه
وضعنك ركض بالبراري
وبالرگضه تاهت يتيمه
—————————
فقير وحبي عالفطره
احب وبالگلب جمره
يبو الاكبر دخيل اسمك
بذكرك روحي مستعره

جروح
احجي بالجروح
ابچي الك وانوح .. گلبي ما يهيد

جروح
ما هدة الگلب
ابچي عالغرب .. الطيحك وحيد

خليني اطوف بطفوفك
اتمنه اوصل واشوفك
هل من مناصر ندائك
هاي اني روحي بجفوفك
—————————
حزنك بالگلب هايم
وجرحك للزمن دايم
ويلچم بالجرح نومك
هضيمة على الترب نايم

حرام
نايم بتراب
وانفتح عذاب .. تصهر الشمس

حرام
داستك خيول
والسحگ يطول .. خانگ النفس

نومك مصيبه ومخاطر
بروحك شغلت الحوافر
عينك تصد الخيامك
شيجبره كسر الخواطر
—————————
انوح وعايش مصابك
وارمل دمعي بترابك
دموعي من نده العاشر
واجيت اطلبهة من بابك

اموت
اجزع واموت
وانفجعلي صوت .. ناصر ومعين

اموت
انه بين اديك
لهفتي عليك .. جرحي يا حسين

غربني ضعنك تغرب
جردني ضعنك تسلب
واكسرلي جنحي الغربتك
گلبي بمصابك تعذب

سجاد الحيدري

@sajad_amer_110