#خروج الضعن

حضرت روحي و رحتلة
أرد اروح اوياك گتلة
بابا بابا اشگد صـحتلة...خل اروح

اشعندي بوية اهنانة وحدي
و عگبك ايحل بيتي لحدي
ما يهظمك بوية فگدي؟...و ترضى انوح؟

عتابي اوية الزمن ليش
يبعدك عني يحسين
أخذني و طيّب الروح
ابوداعك تنعمي العين

يبدي انتحابي—يخلص دلالي
و ابقى ابعذابي—طول الليالي
عيني اعلة بابي—عگب الغوالي
♕♕♕♕♕♕♕♕♕♕♕♕♕♕
گلي يبنيتــي عليلة
و اليسر ما بيچ حيلة
أرتجي وما بيدي حيلة...و هو گام

و چلبت بثيابة و انحب
گتلة بوية گلبي شيب
و گمت احلفة ابعمتي زينب...و الخيام

ابفرد روحة تروحـــون
و لا واحد يظـــل ليش
أحيـر الوحدي يحسين
و انة اتصبر بعد بيش

تطفى شمعتي—عگبك يحيلي
و اتهل دمعتي—و شيخلصة ليلي
آآآآه يا غربتي—ينحب دليلـــي
♕♕♕♕♕♕♕♕♕♕♕♕♕♕
يصفة ظلمة اخلافة داري
و تحرگ ابدلالي ناري
يظلم ابعيـــــــني نهاري...عگب ابوي

المغربيـــة يعلى نوحي
و فرگتة اتهيج جروحي
و ابچي و اصرخ ها يروحي...راح اخوي

أون ليلية اون حيل
نهر يصفة اعلة الاخدود
و عگبهم حيلي ينباگ
عگبهم عِلتي اتزود

ساعة رحــــيلة—ساعة مماتي
دمعي أسيلة—حتى ابصلاتي
و ابقى اندعـــيلة—شمعة حياتي
♕♕♕♕♕♕♕♕♕♕♕♕♕♕
حضّر اضعونة او أجالي
و گلي يا ثمرة دلالي
اتحملي افراگ الغوالي...و الرحيل

گتلة اخذني و هو گلي
لا يبوية اهنانة ظلي
گتلة وحدي ابيتي شلي...لا تشيل

أعاين ممشة لضعون
و رسمت ابعيني عباس
طحت و الونة بالروح
و اهيل اترابي عالراس

صارت يتــــيمة—عگبة المدينة
وسفة و هظيمة—راح امن ادينة
والدنة خيمة—و عشنة ابحنينة
♕♕♕♕♕♕♕♕♕♕♕♕♕♕
گابــلت حزني و گعدنة
صدگ صارت و ابتعدنة
الذيچ الايام اشيردنة...گلبي صاح

حتى صعبة اصبر و اكابر
أدري مامش رجعة باچر
عمية من دمعي النواظر...حيلي راح

بعد يا علة لتهون
و دواي امغرب بعيد
بعد ما تشفى الاجروح
و بعد يا مدمع ايفيد

هاهية صارت—راحوا حسافة
دنيايــــة دارت—بية الوسافة
روحي آنه حارت—صعبة اتشافة
♕♕♕♕♕♕♕♕♕♕♕♕♕♕
حسين علي الزهيري

#خروج الضعن

شلون المسة ايحل علية
و ما يمي سكنة و رقية
يا هظمت الغاضرية...شيرد خواتي
گلبي انكسر من فگدهن
يم العليلة اشيردهن
مهظومة روحي و بعدهن...شلي ابحياتي

لو طش خبر...ردن خواتي ابهالمسة
أنسى المرض...و اجبر دليلي الما نسة
عشت العمر...بين الـلعلَّ و العسة

عسة ايرد ضعن ابوي الغرّب الدارة
يهلبت يرجع و تطفى الگلب نارة
المرض بية آنه يمشي و مالة كل چارة
أطيب ابرجعت العباس لديارة

بوية...بوية...ياما صحت بس ما سمع صوتي
بوية...بوية...والله ارحم امن اموادعك موتي
بوية...بوية...شوگ آنه ميتة و بيتي تابوتي
♕♕♕♕♕♕♕♕♕♕♕♕♕♕
يوم المشوا عني كلهم
دمعاتي چانت تگلهم
اخذوني و بقة ايعاينلهم...گلبي ابحسرتة
اوياهم يظن ابسفرهم
يمشي و يفارگ هجرهم
و لنّة ايتلگة عذرهم...و طاحت دمعتة

گالوا صعب...درب السبي و ما ينحمل
و انتي المرض...جمر ابدليلچ مشتعل
و آنه استمع...و ادموعي من عيني تهل

ركضت الوالدي و حاچيتة بدموعي
يبوية حسين ماريدنهن اضلوعي
نذر للخيل بس لا تنطفي اشموعي
أخذني و خلة يهدة ابروحتي روعي

بوية...بوية...مو طبعك اتردني و تبچيني
بوية...بوية...بالزهرة احلفك لا تخليني
بوية...بوية...اوياكم أريدن تنگضي اسنيني
♕♕♕♕♕♕♕♕♕♕♕♕♕♕
ابممشة الضعن روحي ونت
و الرجعت اخواني حنت
ابشوفت عبد ما تهنت...اعيون العلية
ليهسة اهز مهدة بيدي
و مرة آنه اگللهة هيدي
يا دمعتي و مرة زيدي...وي كل مسية

و ابكل فرض...أدعي العزيزات الضعن
ابصوت الدمع...يا ربي صحت و گلبي حن
ردهن ألي...خاف ابخيمهن ينچون

هذني امدللات ام الحسن صعبة
غرايب عالهزيلة الديرت الغربة
يروحن و اليسر ما ينحمل دربة
و عزيز الزهرة بالبر و انكسر گلبة

بوية...بوية...صحت اشكثر رد بوية بضعونك
بوية...بوية...ابطف كربلة الوادم يسلبونك
بوية...بوية...خل انذبح بس لا يذبحونك
♕♕♕♕♕♕♕♕♕♕♕♕♕♕
عفية اعلة گلبي اعلة حيلة
اتحمل وداع العقيلة
و هاي آنه عود العليلة...عافوني وحدي
ياهو اليداريني حيرة
معلولة روحي و زغيرة
الصوب النجف صرت اديرة...وجهي اعلة جدي

و اشكي الهظم...الحيدرنة و ادموعي اتهلي
و يا رب صحت...رجعهم الخاطر علي
باچر خدر...بت الهواشم ينولي

عگب چف الكفالة الغربة تحديهة
و وكتهة ابنص خرايبهم يوديهة
و تدور عالكفلهة ايرد يحاميهة
وحدهة ابلاية اخو و ماكو اليشكّيهة

بوية...بوية...اتصيح اعلة حيدر ها يبو الشيمة
بوية...بوية...حرگوا على ابنياتك الخيمة
بوية...بوية...ما ظلي حيل ابركضت الهيمة
♕♕♕♕♕♕♕♕♕♕♕♕♕♕
حسين علي الزهيري

#خروج الضعن

طلع ضعن ابني و آنه أمشي وياه
مشة اوليدي اليحبني و اسمع الآه
من بتة العليلة الظلت اتنوح
البقت تبچي تصب دم اعلة فرگاه

وية الضعينة امشيت
ايردون الي اتمنيت
راح الضعن للموت
ظل خالي عگبة البيت

گاصد لموتة حسين و بناتة
للحومة راح اوية امدللاتة
و داري اصبح اظلم چان اشحلاتة

آآه...يوليدي يغالي
بيتك أمسة خالي...و ادموعي تلالي
آآه...يرباية و حلالي
عگبك يا دلالي...تهظمني الليالي

حسين...آآه يبني حسين...آآه يبني
♕♕♕♕♕♕♕♕♕♕♕♕♕♕
أخاف امن السهام و ذيچ الاسيوف
أخافن و الله يا ناس امن الاطفوف
ابصحاري كربلة ايظل وحدة يا حيف
و الاصعب باچر ايرد ضعنة مچتوف

و ما يرحم الذباح
ايدوس الولد لو طاح
و منهو اليحامي ام عون
لو كافل اختة راح

تبقى الضعينة ابلاية حماية
هم و متاعب ضيم و رزاية
و تمشي العقيلة وية السباية

آآه...تركب عالهزيلة
من عگبة العقيلة...و الفرگة طـــويلة
آآه...و الهظمة الثگيلة
اتصير اهية الكفيلة...و منهو التشتكيلة

حسين...آآه يبني حسين...آآه يبني
♕♕♕♕♕♕♕♕♕♕♕♕♕♕
أموت و لا أشوفة ايغرب ابعيد
و ضمة و حافر وراه و گطعت اوريد
غريب ابنص غرب يصفة و علة الگاع
يطيح اوليدي ما بين الهواديد

شيردهة ذيچ الخيل
و لوليدي ميظل حيل
و حلفوا علة ابني حسين
ايسحگونة بالطف حيل

الخيالة بالطف كلهة تطوفة
اتدوسة الحوافر و اختة تشوفة
و لا بيهة تمشيلة و لا تعوفة

آآه...يعلة ابني ونينة
و همة امحاوطينة...و حيل امعطشينة
آآه...حيلة ما يعينة
مگطوعات ادينة...و الخيماتة عيـنة

حسين...آآه يبني حسين...آآه يبني
♕♕♕♕♕♕♕♕♕♕♕♕♕♕
تعالي يم حسن ظل وحدة لحسين
تعالي يم حسن شوفي النساوين
عزيزچ عالثرة و يشكي امن الاخيول
و عزيزت گلبچ ابنص الدواوين

اوليدچ بگة ابلا راس
و زينب مشت وي ناس
غربة و تصيح ابصوت
يا خوية يا عباس

شافوهة خوية المحد لمحهة
زينب تريدك تشفي جرحهة
و آثاري عگبك محد مسحهة

آآه...موش ابخير اختكم
هلي يا ما صحتكم...اتفزعولي ردتكم
آآه...روحي امناطرتكم
اتفرفح لو شفتكم...ابخرابة امتانيتكم

حسين...آآه يبني حسين...آآه يبني
♕♕♕♕♕♕♕♕♕♕♕♕♕♕
حسين علي الزهيري

بسم الله الرحمن الرحيم
الدعاء المومن لاخيه المومن مستجاب بظهر الغيب
نلتمس منكم الدعاء للمريض علي ابن احمد بالشفاء وذلك لتعرضه لوعكه صحيه نسال الله الشفاء العاجل لجميع المرضى ببركة الصلاه على محمد وال محمد
١٠ صلوات محمديه و ٧مرات سوره الفاتحة بنية الشفاء

**رساله .. ودّو الحبيبي
رساله .. ابدمعي ونحيبي
بعد التحيه والسلام
گلوله شخبار الخيام
رساله
ــــــــــــــــــــــــــــــــــــــ
مساكم الله بالخير
عدكم طفل مثل الطير
چان اشحلاته

ما ادري بخبار الراح
مرتاح لوما مرتاح
اشصار بحياته

شو جاي اشم ريحة نار
گلولي بالطف اشصار
استر هلي ياستار
ورجع الغايب للدار

اتاني .. منهم بشاره
اتاني .. بس ابحراره
ماتحمل اسكينه الظلام
گلوله شخبار الخيام
رساله
ــــــــــــــــــــــــــــــــــــــ
مساكم الله بالماي
يالعطشيتوني اهواي
بس ابقه احبكم

يوميه اشم عطر ارماد
مثل الهوه رايح راد
يمشي ابدربكم

من رحتو راح اچم حيل
وما نعست عيني ابليل
يوصلني يم باب الدار
ترس الاذن صوت الخيل

لچمني .. صوت الحوافر
لچمني .. هـل من مناصر
معقوله ظل وحده الامام
گلوله شخبار الخيام
رساله
ــــــــــــــــــــــــــــــــــــــ
مابين الاربع حيطان
ساجني وانته السجان
واقيودي دمعه

الحضنك يبويه اشتاگيت
حكّتني أذاني وحنيت
صوتك اسمعه

نذراً عليّ يالعطشان
لو موعد ارجوعك حان
كل يوم اثوبلك ماي
واطلع واحني البيبان

تجيني .. كون ابسلامه
تجيني .. بس بابتسامه
وابحضنك اتلم الحمام
گلوله شخبار الخيام
رساله
ــــــــــــــــــــــــــــــــــــــ
الليله الگمر مابي نور
بس لا بو فاضل مطبور
طمنوني عنه

اتمنه هسه العبّاس
بچفوفه يمسح عالراس
بس ابمحنّه

من عمي جيبولي امراد
الليله الالم بيه أزداد
ايطيبني بس شي واحد
رجعولي اخوي السجاد

عليله .. وانتم شفائي
عليله .. وهذا بلائي
جيبولي زينب خل انام
گلوله شخبار الخيام
رساله
ــــــــــــــــــــــــــــــــــــــ
سلمولي عالعلويات
گلولهن مشكورات
عفتني وحدي

ماقصّر اوياي احسين
عالناگه اصعد مرتين
وايگلي ردي

حادي الضعن يمشي ابساع
والطفله مومال اوداع
طيّحني رجّاف الخوف
گطرة مطر فوگ الگاع

وحيده .. والوحده صعبه
وحيده .. والدنيه غربه
وادموعي عالخد ازدحام
گلوله شخبار الخيام
رساله
ــــــــــــــــــــــــــــــــــــــ
وحده الحسين بعاشور
وحس بگلبهه المكسور
من فارگوهه

يقره ابرسالتهه ابشوگ
محروگ حن المحروگ
ابنيه وابوهه

يركض اجه عالخيمات
والتمّن العلويات
كَلهن عليلتنه اتگول
بيتي انترس ملايات

نواعي .. يوميه عندي
نواعي .. امن الغبشه تبدي
ياريحة اهلي والعمام
گلوله شخبار الخيام
رساله

محمد الجماسي**#اللهم_عجل_لوليك_الفرج

تدنت صوب ابوهه او جذبت الونه
عله نعی الولد تتطلب اذن منه

رخصهه او هوت یم جسم ابنهه احسین
تشمه ابمنحرا او تهمل ادموع العین
یلمحزوز راسک گلی راسک وین
او گامت من دماه السال تتحنه

تگله اهنا یروح الروح یاسباح
گلبی او یاضوا بلعین امک لاح
یبنی ماتگلی وین راسک راح
آیحسین یومک بیش اوصفنه

مانی امک وارید الیوم حگ اربای
یامای البصر یلماشربت المای
انه الکسرو ظلعهه گوم واحچی اویای
ولهانه اعله صوتک وارد اسمعنه

اشکثر یبنی اتعبت بارباک انه او لالیت
یاشمعة اعیونی او یاعمود البیت
یبنی امن المدینه الکربله اتعنیت
دسولفلی علیک اشصار یمچنه

یبنی شوف جدک گاعد اگبالک
ینادی احسین یبنی اشصایر ابحالک
یبنی من گطع یمناک واشمالک
او صدرک لیش یبنی الخیل رضنه

یبنی ابیا ذنب ذبحوك هل عدوان
او صدرک لیش صار الخیلهم میدان
یم شط الفرات او تنذبح عطشان
سولفلی علیمن تنحرم منه

اجینه الیوم یبنی انشوفک ابیا حال
او یاهو الیباری الحرم والاطفال
او حمل زینب دگلی اعله الجمل لو مال
یاهو‌الی یعدله او لیه یتدنه

وسفه صار تالی اعله الترب نومک
او ویلادک واخوتک یمک او گومک
مر یومک فلا انساه مر یومک
لمن للشچایه الثوب انشرنه

للمرحوم الخطیب الکبیر الشیخ محمد سعید المنصوري رحمة الله علیه

يتم نشر قصائد ولاده السلطان انيس النفوس المدفون بارض طوس ابو الحسن علي ابن موسى الرضا ع على هذا الرابط

https://t.me/yaaliimdd2023

خدمتكم شرفا لنا

مسموم. الصادق هلمسيه ويجذب الونه
مسموم. اولاده ايوادعونه ايسو منه
شنهي السكوت. بويه حاجيني
بعدك اموت. لا تخليني
يا مولاي. يا مولاي
يا مولاي. يا مولاي
❥❥❥❥ـــــــــــــ❁❁ـــــــــــــ❥❥❥❥
بويه. ليش ابهل عجاله اتروح من ايدي
بويه. يا خيمه التلمني وفرختي وعيدي
بويه. من شفتك تلوج اتكطع اوريدي
فوك التراب. حالك اشلونه
بعمر الشباب. من يدفنونه
يا مولاي. يا مولاي
يا مولاي. يا مولاي
❥❥❥❥ـــــــــــــ❁❁ـــــــــــــ❥❥❥❥
وينك. ادري ابروحتك ما ترجع اعليه
وينك. اوياك اتفاركيت وما الك جيه
وينك. من ليلت وداعك عيني معميه
عيني انعمت. بويه يلغالي
بيه اسعرت. جمر دلالي
يا مولاي. يا مولاي
يا مولاي. يا مولاي
❥❥❥❥ـــــــــــــ❁❁ـــــــــــــ❥❥❥❥
اشتاگيت. ليامك يبويه و ذيجه عشرتنه
اشتاگيت. ليش الدنيه هيجي اطفي شمعتنه
اشتاگيت. شيردهه اليالي وترجع اتلمنه
مشتاك اجيك. روحي محزونه
ابنك عليك. تهمل اعيونه
يا مولاي. يا مولاي
يا مولاي. يا مولاي
❥❥❥❥ـــــــــــــ❁❁ـــــــــــــ❥❥❥❥
يا حيف. المثلك يا حسافه انشيعه ابسكته
يا حيف. احس من ودعيتك حيلي هدمته
يا حيف. لحكتك ولنعش بدموعي عاتبته
وياك اريد. واندفن يمك
نوحي اشيفيد. علرمل جسمك
يا مولاي. يا مولاي
يا مولاي. يا مولاي
يا مولاي. يا مولاي
❥❥❥❥ـــــــــــــ❁❁ـــــــــــــ❥❥❥❥
تمت بقلم خادمة اهل البيت ع
#الشاعرة_فاطمة_الساعدي
غير مبري الذمه من يمحي الاسم