#kun_ruhiyati

Bir kuzatuvchimiz ajoyib surat yuboribdi. Ob-havo farazlarini ko‘rsatadigan dastur bugun sharros qor yog‘ayotganini qayd etyapti. Holbuki qor pag‘alab, gupillab yog‘adi. Yomg‘ir sharros quyadi.

Odatda bunday dasturlar o‘zbekchalashtirilgan bo‘lsa-da, til va jonli so‘zlashuvga xos nozikliklarni ifodalab berolmaydi.

Bir gal shunga o‘xshash dasturda yosh oy degan jumlaga ko‘zim tushgan. Bu o‘rinda oyning yangi, hilol ekani nazarda tutilgan.
Demak, xulosa chiqaramiz:

❌ Sharros qor
✅ Pag‘a-pag‘a qor

❌ Sharros qor
✅ Sharros yomg‘ir

@tahrir_uz

#амалиёт

Ҳудудларда, айниқса, Тошкент шаҳрида кўп қаватли уйлар атрофида ноқонуний автомобиллар учун тўхташ жойлари қилиб, “блокатор”лар ўрнатиш авж олмоқда.

Юқоридаги матн давлат раҳбари иштирокидаги йиғилишни ёритган нуфузли ОАВ хабаридан олинган. Аслида бундай бўлиши керак:

✅ Ҳудудларда, айниқса, Тошкент шаҳрида кўп қаватли уйлар атрофида автомобиллар учун ноқонуний тўхташ жойлари қилиб, “блокатор”лар ўрнатиш авж олмоқда.

@tahrir_uz

#ustaxona

Тошкентда 13 йил аввал бирга яшаб келган аёлини ўлдирган эркакка суд ҳукми ўқилди.

Бу интернетда тарқалган навбатдаги хабар сарлавҳаси.
Бундан қандай маъно тушундингиз?

Масалан, мен бир одам 13 йил олдин бирга яшаган аёлининг жонига шу кунларда қасд қилган, деган маъно уқдим.

Аслида айбланувчи 13 йил олдин қотилликка қўл уриб, шунча пайт қочқинликда юрган. Демак:

❌ Тошкентда 13 йил аввал бирга яшаб келган аёлини ўлдирган эркакка суд ҳукми ўқилди.

✅ Тошкентда бирга яшаб келган аёлини 13 йил аввал ўлдирган эркакка суд ҳукми ўқилди.

@tahrir_uz

#кўзгу

ОАВни, интернетни кузатиб ўтириб, сўз қўллаш билан боғлиқ бир хил сценарийли хатоларга кўп дуч келади одам.

Мана, масалан, ёзишларича, Ўзбекистонда миллий ҳаво сифати стандартлари ишлаб чиқиларкан.
Биродарлар, миллий тил, қадрият, таом, либос, тарбия ва ҳоказо бўлиши мумкин, лекин миллий ҳаво деган тушунча йўқ. Ҳаво табиатнинг кўплаб неъматлари сингари умумники.

Бу сарлавҳани қўйганлар ҳам ҳавога миллий мақомини беришни мақсад қилмагани аниқ. Бироқ сўзларнинг шунчаки ўрин алмашгани ўқувчини чалғитиши мумкин.

Гапнинг қисқаси:

❌ Ўзбекистонда миллий ҳаво сифати стандартлари ишлаб чиқилади.

✅ Ўзбекистонда ҳаво сифатининг миллий стандартлари ишлаб чиқилади.

@tahrir_uz

Сарҳисоб

Ҳамма каналлар йил сарҳисоби билан ўртоқлашяпти. Бизнинг ҳам қатордан четда қолгимиз келмади. Мухтасар маълумот инфографикада акс этган.

Бунга қўшимча сифатида бу йил ҳам сафимизга мамлакатнинг кўзга кўринган зиёлилари қўшилганини айтиш мумкин.

Фаолиятимизга бефарқ бўлмаган, интилишларимизни қўллаб-қувватлаган барча кузатувчиларимиздан миннатдормиз.

Ҳурмат ва эҳтиром билан

@tahrir_uz

#кўзгу

Таржимонлар, диққат қилинг!
Ҳозир аксар таржималар гугл таржимон дастурида қилинганга ўхшайди. Оддий таржималарни тўғрилаш мумкин, лекин меъёрий-ҳуқуқий ҳужжатлардаги мужмал таржима, ғализ ифода қимматга тушади.

Мана, ана шундай қўпол таржималардан бири:

... Биринчи хатбоши қуйидаги таҳрирда баён этилсин:
«1. 2021/2022 ўқув йилидан бошлаб республикадаги барча олий, ўрта махсус ва профессионал таълим ташкилотлари бакалавр ҳамда магистратуранинг кундузги, сиртқи ва кечки таълим шаклида тўлов-контракт асосида таҳсил олиш учун таълим кредити ажратишнинг янги тизими йўлга қўйилсин».

Кундузги, сиртқи ва кечки таълим шакли фақат бакалавриатда, магистратурада эмас. Бир таржимоннинг эътиборсизлиги туфайли қарорни таълимни тушунмайдиган одамлар ёзганга ўхшаб қолган.

(Русчаси:
«1. Внедрить начиная с 2021/2022 учебного года новую систему выделения образовательных кредитов для обучения по дневной, заочной и вечерней форме образования в бакалавриате и магистратуре во всех высших, средних специальных и профессиональных образовательных организациях республики на платно-контрактной основе»).

@tahrir_uz

#билиб_олинг

Ёзишларича, «Сурхон» давлат қўриқхонасида ўрнатилган фотоқопқон тузоғига бўрилар тушди.

Бу ерда тузоқ сўзи ортиқча. Чунки фотоқопқон сўзининг ўзи исталган маънони билдиряпти. Келинг, синаб кўрамиз:

«Сурхон» давлат қўриқхонасида ўрнатилган фотоқопқонга бўрилар тушди.

Менимча, маънога путур етгани йўқ.

@tahrir_uz

#билиб_олинг

Ижтимоий тармоқларда бир хабар тарқалди: Отлар подаси юриб кетаётган жойида музлаб қолибди.

Оғайнилар, тилимизда ҳамма нарсанинг номи бор. Отлар тўдасига нисбатан уюр сўзи қўлланади. Пода деб қорамоллар тўдасига айтилади. Демак:

✅ От уюри юриб кетаётган жойида музлаб қолибди.

@tahrir_uz

#ustaxona

Йўловчи... ечилган

Бир сайтнинг хабар беришича, Нью-Йоркдан Тошкентга учган самолёт Санкт-Петербургга фавқулодда қўнди...
Бортдаги муаммо ҳақида радиоалоқа орқали хабар берилган ва 1991 йилда туғилган Ўзбекистон фуқароси полиция ходимлари томонидан рейсдан ечилган.

Бу ерда ечмоқ феъли тўғри келмайди. Унинг ўрнига олиб қолинмоқ, тўхтатиб қолинмоқ феълини қўллаган ўринли ва тушунарли. Демак:

✅ Нью-Йоркдан Тошкентга учган самолёт Санкт-Петербургга фавқулодда қўнди... Бортдаги муаммо ҳақида радиоалоқа орқали хабар берилган ва 1991 йилда туғилган Ўзбекистон фуқароси полиция ходимлари томонидан рейсдан олиб қолинган.

@tahrir_uz

#билиб_олинг

Худо билан ҳудо икки сўз

Бир журнал Жулқунбой (Абдулла Қодирий)нинг 1923 йили "Муштум"да босилган мақоласини чоп этибди. Мақола ёзувчининг "Ассалому ала маниттабаъл-худо" хитоби билан якунланган.

Арабча сўзларнинг кириллча транскрипциясида ўта жиддий ва қўпол хатолар кетиши ҳақида илгари ҳам ёзилган эди. Бу гал ҳам ҳолат шунга яқин.

Борлиқни яратган, ибодатга муносиб зотга нисбатан Худо сўзи ишлатилади ва бу сўзнинг арабчага мутлақо алоқаси йўқ. Лекин ҳидоят маъносини билдирувчи ҳудо/ҳуда сўзи бор ҳамда доим қўлланади.

Ёзувчи "Ассалому ала маниттабаал ҳудо" хитоби билан "Ҳидоятга эргашганларга тинчлик, саломатлик, эминлик бўлсин", демоқчи.

Хулоса:

❌ Ассалому ала маниттабаъл-худо

✅ Ассалому ала ман иттабаал ҳудо (ҳуда)

@tahrir_uz