#الامام_السجاد_ع

يا منهال ... لو شفت ذيچ المصيبة
يا منهال ...  عالهزل  عمتي  سليبة
يا منهال ... ابلا ولي  ظلت  غريبة
~~~~~~يالردت تسأل علية اشلوني من ذاك السفر
گمنة نفتر ديرة ديرة   من محرم حد صفر
وماكو واحد يفزعلنة اولا گلب النة انكسر
والرسول اموصي بينة  من  علي  للمنتظر

بينة اشگال ... إي رسول الله وحبيبة
يا منهال ......  عالهزل  عمتي  سليبة
يا منهال ....... ابلا ولي  ظلت  غريبة
~~~~~~~
[كيفَ  أمسَيتُم]  تِگلي   يامسية  گلي  تقصد
وهية مو وحدة المصايب بالله يامنهال شنّعد
نملك احنة الدنية كلها  وبالخرابة صرنة نگعد
وليزيد انروح أسرى  بروس اهلنا انروح ونرد

بگيد احبال ... رحنة للطاغي  عجيبة
يا منهال ......  عالهزل  عمتي  سليبة
يا منهال ....... ابلا ولي  ظلت  غريبة
                  ~~~~~~~
تدري  يا منهال  تدري   بسلسلة  شدو إدية
وكل خواتي چتفوهن  بالحبل سكنة ورُقية
وزينب ام كُلثوم يمها    گيدو  چفهن سوية
وعفنة كل الأهل صرعة والجثث كلهن رمية

فوگ ارمال ... جثةت احسيني تريبة
يا منهال ......  عالهزل  عمتي  سليبة
يا منهال ....... ابلا ولي  ظلت  غريبة
~~~~~~~
جدنة هوة النبي الخاتم والعرب مفتخرة بينة
و تفتخر  منهم  مُحمد     أهل  مكة  والمدينة
ما رعو حق  اهل بيتة   وللسبي  چتفو  إدينة
قَتّلّوّنّة   او شَرّدّوّنّة    وراس  ابونة  امعلگّينّة

برمحة انشال ... وشيبتّة ابّدَمّة خضيبة
يا منهال .......   عالهزل   عمتي   سليبة
يا منهال ........  ابلا  ولي  ظلت  غريبة
~~~~~~~~
چم مسية البيها مَيّت دهري ماخذ كلشي مني
ومّنَّهّد ذيچ المصيبة ظهري بعدة لهسة محني
الشيب ماهو  لكبر عمري   هالمصايب  شّيّبَنّي
عمري طف اوشام خَلَّص    هنّة  ذني  التعبَنّي

بذاك الحال ... ينسمع گلبي نحيبة
يا منهال ...  عالهزل  عمتي سليبة
يا منهال ... ابلا ولي  ظلت  غريبة
~~~~~~~
أحمد عباس الحساني
(الامام السجاد ع)

يالحادي   بهونك ريضلي
خليني  اتوادع  وي اهلي
لحظة اتنطر
كَلبي  اتفطر
خليني اتوادع وي اهلي

خليني   اودعهم     على     الناكَه
تدري شكد لاخويه حسين مشتاكَه
متعودة   عليه   كل   لحظة نتلاكَه
ابن  أمي  صعب  مو  هيّن  افراكَه
ما  فاركته  كل  اسنيني
من صباي وساكن عيني
لو   تتأخر
كلبي اتفطر
خليني اتوادع وي اهلي

دنّي ناكَتي يم جسم اخوي احسين
هذا روحي  هذا اليسوى ماي  العين
آخر  نظره   عالتل  والعده   صوبين
من  كثر  الفزع  ما وجدت بيه  زين
يالحادي    نزلني       بكتره
عله السحكته خيول العشره
جسمه اتطشر
كلبي    اتفطر
خليني اتوادع وي اهلي

وي  حسين  اريد  احجيله هلجلمة
بريلي   ذمتك   وأنت   بري   الذمة
اخاف   اليوم   زعلتك   يبو   اليمة
بيد  اجناب  ضعنك  ينحدي  هظمه
بيد   الارجاس اليحدونه
مابيهم شيمة ولا    عونه
تبجي الخدر
كلبي  اتفطر
خليني اتوادع وي اهلي

وصوب العلكمي مر بينه خل نشوف
بطل عدنه العلامة بلا نظر و جفوف
وشوفه منطفي وراسه بعمد مخسوف
كمرنه  هاذ   اخونه   بخوته   معروف
خلي  نودعه  ونمر   يمه
بلكي نخفف حزنه وهمه
من هل منظر
كلبي    اتفطر

كفيلي  ورخصه  اطلب  آنا  من عنده
واقبل  جفه  ذاك  اللي الما بقه  بزنده
وخل  يشوف   ممشه  هالضعن  بعده
بلا   كافل   ولا   حامي  سرى  وحده
شمر  وخولي  اليحدوهن
من  بلده  لبلده يمشوهن
تمشي بهالبر
كلبي اتفطر

ابو ريحانة زهير الحساني١٤٤٦

صار الليل ومحد يمي
لا كفالي ولا إبن أمي?

السلام على الغريبة الصابرة

رجع من الدفن وحدة
أبوه اموسدة  ابلحدة   
يويلي ودمعتة ابخدة       يَعّمَة    
يا دَّفان احسين..وين ادفنتة وين..يَعّمَة..يَعّمَة
~~~~~~~عمة إگعد  اگبالي   وكلشي  سولف  واشرح
دمعك يجري بعيونك   خلة  عمة  لا  تمسح
سولفلي علة احسيني نحرة شلونة بالمذبح
ابگبرة شلون وسدتة    اخاف اتأذة واتجرَح

أوصِف   خلني  أتصور
إبوك الباقي بس منحر
ابشَّمس  العاشر  اتغيَر      يَعّمَة 
تبچي اوياك العين..وين ادفنتة وين..يَعّمَة..يَعّمَة
~~~~~~~~
بالله سولف الحالة  شلت اشلون ابو اليمة
ومن ودعنة  والينة   متوذر   بقة   جسمة
من كثر الجروح البي ابجسمة مابقت لزمة
ابحصيرة شلتة أتوقع   وحدك ياعلي اتلمة

أشوفك  بالحزن  راجع
بلحيتك شو رمل طابع
لگيت الخنصر  الضايع        يَعّمَة
الضاع ابهاليومين..وين ادفنتة وين..يَعّمَة..يَعّمَة
~~~~~~~~
رحت صوب النهر گلي  عمك كافلي شفتة
يم العلگمي اتوَّذر   شلون احملتة وادفنتة
لا  يسرة  ولا  يمنة   بيا حالة شفت جثتة
بس گلي يبعد ابني   ما گتلة ابوضع إختة

ما گتلة  اشّجّرة اعليَّة
بحبل أخذوني مسبية
وَلَو بس  جثة  مرمية        يَعّمَة
وأّدّة الواجب زين..وين ادفنتة وين..يَعّمَة..يَعّمَة
~~~~~~~~
يعمة  گلي  سولفلي  بعبدالله الطفل سولف
نشف نحر الطفل دّمّة   لو بعدة النحر ينزف
لگيتة نايم ومرتاح     لو مِنّ العطش يرجف
اعلضلوع الابو ادفنتة گلبي بهالوضع يعرِف

چانت    نبلتّة    ابكُبرة
اشلعتها النبلة من نحرة
لو ظلت  واهو   ابگبرة        يَعّمَة
المات بسهم البين..وين ادفنتة وين..يَعّمَة..يَعّمَة
~~~~~~~~
يعمة يا علي السجاد  كلامي أعرف ايلچمك
وانت امن الدفن رديت   ولسة غارگ ابهمك
بعد گلي علة القاسم    دفنتة وين ابن عمك
اوّين الأكبر ادفنتة    إخوك اولحمك اودمك

ادفنت الأكبر وجاسم
وگلبك لسة ظل سالم
بس حزنك يظل دائم         يَعّمَة
بگلبك يبقة اونين..وين ادفنتة وين..يَعّمَة..يَعّمَة
~~~~~~~~
  أحمد عباس الحساني
(دفن الاجساد الطاهرة)

گلبي  چان ابلوعة  مفتوت
استوقفوني الغربة والموت
ورافقَت خدري السلامة
وروس اخوتي واليتامة
~~~~~~~~~
من  جزينة  كربلة  فتنة  اعلة  ديرة
أسمع امهامس وانا  ابدرب المسيرة
اثنين   گلولي   يمن   مالچ  عشيرة
الغربة والموت احنة يالچنتي أميرة

امدللة  چنتي  يأم  عون
وهسة شو ذبلانة العيون
بكل جفن صارت علامة
وروس اخوتي واليتامة
~~~~~~~~
الغربة سألتني  اكتفيتي يالغريبة
لو بعد  لسة الگلب  عايز  مصيبة
خاف  لسة  ما أخذ  كامل نصيبة
ابلااخوتچ هساصار اسمچ سليبة

الغربة چانت تمشي وياي
وتدري  بية ابلاية  حماي
ظل  اخوي  ابلا  عِمامة
وروس اخوتي واليتامة
~~~~~~~~~~
الموت  مستغرب  سألني اعلة الرزية
وگلي  لسة  عدلة  من  ذيچ  المسية
وبعد   ليلة    منچ   آخذهة    رُقية
موش بس احسين جثتة اتظل رمية

الموت يلچم بية كلساع
يگلي عفتيمن علة الگاع
ويجرح  ابگلبي ابكلامة
وروس اخوتي واليتامة
~~~~~~~~~
الغربة  گالت راح اظل وياكم  امشي
اوما اتهدني حتة من يحملني نعشي
مثل  دمعة امچلبة ابأطراف  رمشي
لا  تزيح  امن  الحزن  لا  تنفع  بشي

اعلة الرمح گلبي والحسين
اثنينة   ابهاللحظة  ميتين
وماتت ابثغري  ابتسامة
وروس اخوتي واليتامة
~~~~~~~~
الموت رد يحسب عدد المفارگتهم
گتلة    آنة  فارگت   خواني  كلهم
ونعمالله اعلة المرض خلالي منهم
هالعليل  الباقي  بي ريحة  شملهم

اتأكدت من  دهري خوان
الموت  ما  خلالي  خوان
دهري ما تخلص سهامة
وروس اخوتي واليتامة
~~~~~~~~
أحمد عباس الحساني
( السيدة زينب ع)

هد عجيد المرجلة ونوماسها
هذا  بن  حيدر  علي  عباسها
ابوفاضل               ابوفاضل
~~~~~~~
هد خسف  گاع الحرب  لَمّن إجة
اثگيل   چَفّة  والرؤوس  امبعّجة
الينزل السيف اعلة راسة ما نجة

اعليهم  انسد  الهوة      من نزل راعي اللوة     
الجيش يم رجلينة دنگ باسها
هذا  بن  حيدر   علي  عباسها
ابوفاضل               ابوفاضل
~~~~~~~
استبسل العباس  بالحومة أسد
چنة حيدر طلب من حيدر مدد
المات مات اگبالة  واليگدر شرد

وضاگت الوسعة ترة     رجع  ليهم  حيدرة
أخنَس اليَّس بيهَس اوجساسها
هذا   بن  حيدر   علي  عباسها
ابوفاضل               ابوفاضل
~~~~~~~
رسم خط اعلة الارض محد عبَر
والعبر   فوگة  يّطّرَة  والله  طَر
هذا سبع  الگنطرة  وسبع  النهَر

هذا عرناس الجبل      شامخ وهيبة وفحل
ويا قزم يگدر يطخ عرناسها
هذا   بن حيدر  علي عباسها
ابوفاضل               ابوفاضل
~~~~~~~
طب  عليهم سكتت  السبعين  ألف
وكلف والله اصواب ابوفاضل كلف
المگفة  من   اوجوهم  ما   ينعرِف

ومن حمل صوب النهر     داس ع الروس اوعبر    
اومَّرّغ اخشوم آل امية وداسها
هذا   بن  حيدر   علي   عباسها
ابوفاضل                ابوفاضل
~~~~~~~
امصوفرة اوجوه العساكر چن قمح
ابّچَفة   طشرهم  مثل  صَّمّ  الملح
بِسم ابو فاضل  فقط يكفي الشرح

ومنهو أشبه بالگمر       طولة غيمة وچم نهر
حبسَت أبطال الحرب أنفاسها
هذا  بن  حيدر   علي  عباسها
ابوفاضل               ابوفاضل
~~~~~~~
گصتة عرگت راسة دَّخَّن من غضب
بيدة   لمهم  بيدة   طشرهم   حطب
غيرة  دمدم  چنة  ضمضم  ما  تعب

ابراسة دخان ولهب       حيلة ما يعرف تعب
وزاد باعقول  العدة  وهواسها
هذا  بن  حيدر   علي  عباسها
ابوفاضل               ابوفاضل
~~~~~~~
أحمد عباس الحساني
(نزال ابوفاضل)

يابوية ... أحلم  بيك  وثغرك ضامي
              ومسلوب ومذبوح ودامي
              من عيني انباگت أحلامي ... ياحبيبي
~~~~~~~
حلمي المبيوگ امن اعيوني
                    ومن أحلم بي حيل اتألم
چن   بالطيف   المر   اعلية
                    والد  روحي غارگ بالدم
حتة   بحلمي   يعثر   گلبي
                    وچن تخنگني نار امخيم
الغايب  خِلِة  يحلم  يرجع
                    الميت خِلِة اعليمن يحلم

مرعوبة ... اگعد من نومي بكل ليلة
               ومحد يمي حتى اشكيلة
               ابحالي الما اعرف تحليلة ... ياحبيبي
~~~~~~~~~~
هو  الكلمن    انت   تحبة
             اتظل تحلم بي اكثر واكثر
حلمي الثاني انباگ ابغفلة
              چان  اهواي  اعلّي  يتكرر
حلم اتمّلكني امن الخوفة
              واقع   چنة   ذاك  المنظر
چن احسين ابذيچ الصحرة
              مرمي اوّاحد  حز المنحر

وبطيفي ... ذبحو گلبي گبال اعيوني
                 وللدمعة  وللهم  عافوني
                 حتة ابحلمي ما أخذوني ... ياحبيبي
~~~~~~~~~
يمتة ايردلي الماخذ روحي
             ويمتة ايردلي الشاغل بالي
وچم يمتة  المحد  جاوبهة
             وچم حسبة بحسبة بدلالي
الميت موش التطلع روحة
              الميت  واحد  فاگد  غالي
الميت يشبه  گلبي بكلشي
              الما فاگد ما يدري ابحالي

أحلامي ... واقع  لكن  ماني  امصدگة
                الفاگد أهلة اتكتلة الشهگة
                كون ايموت  ابأقرب فرگة ... ياحبيبي
~~~~~~~~~
البايگ  حلمي موتك  بوية
            وروحي ابهجرك تكسر خاطر
بس ردت اسأل بوية وگلي
             وفسر  حلمي  بليل  العاشر
ليش الخيل ايعبرن فوگك
            وليش اضلوعك جوة الحافر
وليش بچفك إصبع ناقص
            وانت ابرمحك گلي اشصاير

بس گلي ... گلبك وينة الچان ايحبني
                 أسأل بس  محد  جاوبني
                 فگدك بوية اشگد دولبني ... ياحبيبي
~~~~~~~~~~
تبقة  اعيوني  ابّابي  اتّاني
             متعلگة ب إي  هلبت يرجع
هوة  الراح  اشلون  ايردلي
             ومن  گبرة  الميت  مايطلع    
بس  تشتاگ الروح  الأهلي 
             ولو   أندلهم     بيهم   أتبع
مشتاگة   الوجهك  يا بوية
             وبوسة  اعلة   خدك  أطبع

مشتاگة ... لذاك الوجه البي حنية
                أفتح بابي  ابكل ليلية
                هلبت بوية عندك جية ... ياحبيبي
~~~~~~~
أحمد عباس الحساني
[العليلة ع]

يابوية ياحسين يابوية
               ~~~~
تبقة اعيوني عالباب يمتة الغالي يرجع
بالي  يم  الاحباب  روحي  حگهة تطلع
ويبچي بهذا لمصاب  كلمن  بية  يسمع

آنة   العليلة    والأهل   عافوني
ابهاي   الديار  الموحشة  خلوني
ايسليني بس هذا الدمع بعيوني

صاير سلوتي النوح
و الدلال   مجروح
حگهة  تطلع الروح
وادموعي جرية

يابوية ياحسين يابوية
                 ~~~~~~~
آنة  اودمعة  العين  قصتنة  عجيبة
سلوَت روحي لونين وبگلبي مصيبة
ومشتاگة  للحسين والراح اشيجيبة

بوية مشتاگة  لحنان اچفوفك
اتعلگَت عيني اعلباب اطيوفك
مر علة ابنيتك  تريد  اتشوفك

يمتة   يرجع   الراح
بوجهة تشفة لجراح
عيني بعينة  وارتاح
لو يرجع إلية

يابوية ياحسين يابوية
           ~~~~~
أأهلي  لو   يرجعون   واتلگاهم   آنة
أنثر   دمع    العيون   للخالي   مكانة
ويرجع كافل ام عون مشتاگة لحنانة

الذكرة من عبدالله مهدة الخالي
امناغة  اخوي  الَهَسة  يتراوالي
لسة  وجهة  بعدة  تارس   بّالي

اللحظة اتعادل اسنين
يمتة  ايردلي  لحسين
السكنة اشتاگت العين
ولإختي رُقية

يابوية ياحسين يابوية
                 ~~~~~~~
حزني ابروحي مفضوح ويفيض اعلَّعَيني
الله   ايساعد    الروح   ماظّنَك   تجيني
بالي    يمك    ايروح   ويسافر   حنيني

وألگة روحي  ابكربلة  بأحلامي
احسين عالرمضة سليب ودامي
حيرة  مدري لو  صدگ  أوهامي

گلبي بحزنة مهضوم
وأشعر متني ملچوم
وآخذ خيرة كل يوم
چن إختي سبية

يابوية ياحسين يابوية
                         ~~~~
أحمد عباس الحساني
  (العليلة)

يالخدام شدو الحيل عينوني اعلة دمعاتي
آنة  زينب   ابهالليل   محترگات   خيماتي
~~~~~~~~~
يا خدام اخوي احسين آنة ام الحزن زينب
عينوني علااهمومي شهر احزاني هل گرّب
امحرم هل اجة اعلينة ولسة اخيامنة تلهب

شما اندار .. ألگة النار .. شَبَّت ويلي باخيامي
وبيا حال .. هالأطفال .. كلها  تركض ايتامي

وأصوات الهضم بإذني  ويتباچن  يتيماتي
يالخدام شدو الحيل عينوني اعلة دمعاتي
~~~~~~~~~
عينو  گلبي  المكسور  شدو حيلي واسوني
تعبانة  وحگ   احسين    يالخدام   عينوني
إي والله امنَهّد عاشور  مانامت ترة اعيوني

صار اسنين .. بالچفين .. مشدود الحبل بيهن
عندي ابنات .. وين اتبات .. بس آنة الأباريهن

وبچفوفي  الحبل لليوم  ماتخلص مُعاناتي
يالخدام شدو الحيل عينوني اعلة دمعاتي
~~~~~~~~~
گلبي  يوگف   ابعاشور  كلما   يمر  طارية
بهلالة الحزن  والموت كلهة  التمت  اعلية
لهسة  چني  ع الناگة  لهذا  اليوم  مسبية

شفت الموت..مو تابوت..شفته بالسبي وضيمة
درب الشام .. والآلام ... ايتيمة  اتلوذ  بايتيمة

لموتي  ظلت اللوعات دفنو يمي  حسراتي
يالخدام شدو الحيل عينوني اعلة دمعاتي
~~~~~~~~~
اهمومي كلها دفنوها وبگبري اندفن حزني
وياي اندفن  كلشي حتى السوط  اللبمتني
حتى  الحبل  باچفوفي  لحد  هسة  يأذَنّي

ابلا خوان .. بس احزان .. مدفونة ابغرب وحدي
ضيم ونوح .. بس اجروح .. كل  هذا نزل لحدي

ولفوني  بچفن  اسود  ميتة  وآنة  باعباتي
يالخدام شدو الحيل عينوني اعلة دمعاتي
~~~~~~~~~
كل  مِحنة  الأسولفها   كلهة  عاشت   ابالي
شكراً يالخدمتو احسين ما عفتوني  للتالي
وكل دمعة التجي منكم والله اتغَيّر احوالي

وبكل عام .... يالخدام ..... بحزني ما تركتوني
انشد الحيل ..بيكم حيل.. بيكم نشفت اعيوني

شكراً  وبحجم  حزني  ما  عفتو  مواساتي
يالخدام شدو الحيل عينوني اعلة دمعاتي
~~~~~~~~~
احمد عباس الحساني
(السيدة زينب ع)

احسين    مولانة    سفينة    للنجاة
احسين موش الماي سر هاي الحياة
             ~~~~~~~~~~
أبتدي وألقي السلام اعلة السلام
يم مقامك  سيدي  يحير  الكلام
يا  وريث    الأنبيا   خير   الأنام

كون   أمشي  بدربك  وأبقة   بثبات
احسين    مولانة    سفينة    للنجاة
احسين موش الماي سر هاي الحياة
             ~~~~~~~~~
انت  صاحب  هالأرض مانك غريب
وانت  سر الكون  يحسين  الحبيب
دوم   خليني   أظل    يمك   قريب

هلبت  اتخليني   يم  جدمك  فرات
احسين    مولانة    سفينة    للنجاة
احسين موش الماي سر هاي الحياة
               ~~~~~~~
عَلّي  شاني خادم  احسبني  زغير
الينحسب خادم إلك  بَختَة  چبير
بهالخدامة  العايش  ابجالك  أمير

الما  يخدمك سيدي ابحالةت سُبات
احسين    مولانة    سفينة    للنجاة
احسين موش الماي سر هاي الحياة
                ~~~~~~~~
بهالعمر   واعصي  بعد  يمتة   أتوب
وصار  أسود  گلبي  من  گد الذنوب
احسين انقذني العمر شمعة ويذوب

وخاف   ما لَحگ    تغافلني   المماة
احسين    مولانة    سفينة    للنجاة
احسين موش الماي سر هاي الحياة
              ~~~~~~~~~
إرتقي   بية   أصير   انسان  اريد
إلك    قربني    إذا   أصبح   بعيد
وکظني من إيدي لوّن عنك أحيد

و ردني   يمك   لو  تهت   بالنايبات
احسين    مولانة    سفينة    للنجاة
احسين موش الماي سر هاي الحياة
             ~~~~~~~~~~
يا هدوء  العالم   ابّنص  الضجيج
يشفة يمك كل گلب جرحة غميج
انت   كعبة   واليحبونك   حجيج

وحاطِتَك  هالناس  من كل  الجهات
احسين    مولانة    سفينة    للنجاة
احسين موش الماي سر هاي الحياة
              ~~~~~~~~~
الدنية روج وانت بس بحرك أمان
اليغرگ  ابحبك يظل يلگة  الحنان
اتضيع يمك  كل  أعاجيب  الزمان

و بيك  مجتمعة   المزاية  والصفات
احسين    مولانة    سفينة    للنجاة
احسين موش الماي سر هاي الحياة
~~~~~~~~
أحمد عباس الحساني