مستاحش وحسرتي بالروح مكتوبة
وبروحي ركظة طفل مايندل أدروبة

يامن يمرني بهلي
واشكيلهم من گلب غرگان بذنوبة

اشكيلهم حسرتي وشوگي
وعذاب الگلب لو هجر محبوبة

طايح أبين الغُرب
ومابين نار وذبح جنحاني مصيوبة

متعوبة روحي بهجر
والكاظمية الدوة العلة المتعوبة

ياباب ادگة جرح
وبوجهي ماينفتح
ودار اهلي كل ما امر متفتحة بوبة

شكد رجعولي نِعم
جانت بأيد الزمن من ايدي مسلوبة

ماتهدة روحي بشعر
لاتهدة روحي بصور
شتهيد روحي اذا بالشوك مصيوبة

للراية مشتاگ اصد
واشكي الهجر والبعد
وتصير عيني جنح
تسافر بحضرة ملك بالرحمة مرهوبة

غرگان واشتم هوى
من الكاظمية يجي
بي عطر ماينوصف كل نسمة بأعجوبة

يا هلي روحي تضل بالشوگ مصلوبه ؟!

يعرضلي اسمي واحن
لن يحرس اسمي اسم يحذي الگلب صوبة

شيفيد بيه العمر
لو صار عمر النسر
كل ساعة اذا مو عشگ خسران محسوبة

وهاي الخسارة ذنب
مايندل التوبة

كلبي اذا ينطفي
وتشتعل بي غربتة ويتمادة بعيوبة

اتبره منة عمر
يكتب شعورة لجن مو لهلة مكتوبة

احساسة بيكم يقل
وعايش مشاعر وهم بالجذب مغلوبة

يهلي وشسوي بگلب
ماينجوي بحسرتة من يعبر أغروبة

خايف تزل تنطفي
توهمك الناس الغرب واتعثرك الحوبة

بيك ارد اشوف الدرب
من أنوي اجي بحسرتي وعيوني معصوبة

نارين شوگك يشب
مر للجواد بدمع
وللكاظم امشي بجمر سولف المضمومة

انه اعلى گلبي ألم
ماينفهم بالحجي ومسومره غيومة

وسيدي يفهمة دمع
مربيني بيدة طفل
يعرف اسرار الگلب ويميز همومه

الشوگ هز مهجتي والروح مهزومة

من أبعيد جفي انرفع
سَلم وشوگي طفح والعين مهضومة

الأل جعفر عشگ
ماتنمحي أرسومة

من الكاظمية جرح
للقاسم وغربتة واسرارة واعلومة

لقم گلبي يرسم درب
ويعيش بأرسومة

ولمشهد بحسرتة
لذاك الجمال العذب حسراته مكتومة

للمثلي للماحضة
بممشة لجمال العشگ

لاحضة بقم وانتشه
وعاش لجلال الرضا بأنفاس مالومه

خل يهد دمعة بصحن
شايل جمال الرضا ورحمة المعصومة

للكاظم بجمرتة يتعنة اية عشگ
والروح لو زارتة من الله مرحومة

وداعت الله
آه يالمحملين وعيوني بحملكم

أزغار أدي وانتم عشيرة
وماكفاني وداعي لمن ودعتكم

خطوة خطوة النوگ يهلي عذبتني
وخيلهم دگت حوافرها وجزتني

آه يهلنا
خاف سفرتكم طويلة ابلايه ردة
انه اريد اعتذر منكم

أعتذر لني عليلة وتعبتكم

راح اعيش بهالجفة كل التجارب

انه أول طفلة مأسورة بأنين
صار عمري بگد اهلنا الرايحين
وانه أول وحدة تنعى العايشين

وكبر بجروحي النعي بحُب الحسين

تانيت اهلنة بجفن ناطور
وبمچان ابوي معلگة الابخور
خلافة المدينة صايرة گبور

شمخلي بعيوني رحيلة

گلبي نغزني بممشة الضعون
وچن ضعن اهلنة موش مامون
بس كون بالراية يردون

ويرد ابو فاضل چفيلة

خاوي الجفن والسالفة تريد
وزتيتهم حيد بضهر حيد
وشضال بعيون المگاريد

الراحو هلة ينفت دليلة

يامعودني نعيتك لحد مابللت ردني
اسكت وتقرة بسكوتي
هيج طبعك عودتني

ساكتة وبية حچي بگد مابچيتك

مو أطباعك
تدري بيه بروحي ممشة وماخذتني

گمت امر اعلى الهوادج
رحت يم هودج خواتي وبالبواجي اتعذرني

عاينت بعيون عمتي بمششة أبد ما أملني

للرباب بچفي أومي
وياج أروح وخلي عبد الله اعلى متني

بچت حالي وماخذتني

سيرت لامچان الاكبر
أمروتك خوية ويا أخيتك

مو غريبة
خوية هذا الضعن ضعني

حومرت عينة بزعلها من سمعني

انه اختكم
انه بتكم
يالاحنان انه من اهلكم

ما أعيش ولا اريد العيشة يهلي من بعدكم
گلبي مأسور بجرحكم

غير گبل الممشة وتعلموني أتاني
غير كون ادري انه راح ابقى بمكاني ..ولله چا ماعاتبتكم

عَمة الجرح ماينحجي من عبرت الناكة
توكم نويتو اعلى السفر بس انه مشتاگة
الغربة ماترحم گلب والفرگة حراگة

الطفلة من تشتاگ ماتعرف تكابر
عمة ذبحن عمري جويات المشاعر
عيني تربة ضعونكم بس كلبي حاير
دَگتة مَشية نوگكم ياكلبي صاير

عمة عمة ..شو هذا الوادع جن ساعة الموت
عمة عمة ..لمتانة جناز والغربة تابوت
-----------------------
حد ماجزة عيوني الضعن مانزلن چفوفي
وچل لليلي وانه لوحدي أتعثر بخوفي
عَيني أعلى هودج عَمتي وأتساير بشوفي

منين ما أندار عَمة الدار غربة
والغريب الذكريات تبوگ گلبة
ياضعنكم بللت بعيوني دربة
الموت هين ياهلي الفركة صعبة

ليلي ليلي ..أحسب مسافات هسة الضعن وين؟
ليلي ليلي ..أكضي ضمة وشوگ لعيون الحسين
-------------------------------------
مابَين أتاني والصبر وموادع ضعوني
من گد المتانة الشمس ماخلت بلوني
أتخيل بضعني أصعدت وتصدگ عيوني

ومن افز اللكة الخيال يدور بيه
عَمة وَحدي والحزن ملتم علية
بلهفة ياعمة أكوم افتح أدية
وأشبك أمجان اليلم خولة وصفية

ويلي ويلي ..ياعمة والشوگ يندل الاحنان
ويلي ويلي ..للغربة والموت مفتوحة بيبان
-----------------------------
صارت مسافات الدرب ياگلبي وصوابة
كتالة لعيون اليحب لو فارگ احبابة
ترسملي رد ذاك الضعن والرسمة جذابة

ناگة ناگة الدنيا لمن غربتني
اخ كل ناگة جرحها مايهدني
من سرن ياعمة گلبي ضاع مني
عالهوادج يهلي ضل مكتوب حزني

روحي روحي ..من طلعن النوگ طلعت وراهن
روحي روحي ..ماتحمل أفراك عيلة وحماهن
......................
وَحدنة انه اوحشتي من ياهي أبديهن
هنة الثگال الي جرن ما أكدر احچيهن
جلمات ابوي بوحشتي بدموعي اباريهن

ودعتهم كلهم وهاي المصيبة
گاعدة بدار اهلي بس انه غريبة
والصبر ياعمة باللة منين اجيبة
بية مسرة النوگ خضر شيبة شيبة

عيني عيني ..تتنطر ضعون والملكة ماصار
عيني عني ..بيها الحزن بان من شوفة الدار
.....................
مصطفى علي الموسوي

لِعَلِي بن موسى الرِّضَا أبِي الجَوَادْ
لِعَلِي بن موسى الرِّضَا حَنَّ الفُؤَادْ
_

بَاقٍ وَزَالَتْ سَيَّدِي شَمْسُ الغُرُوْبْ
ارْحَمْ ذَلِيْلًا بالهَوَى حُزْنًا يَذُوبْ
وَالقَلْبُ فِي أبْوَابِ مَنْ يَهْوَى يَتُوبْ

أيَا ِرضَا القُلُوْبْ

سِرْ بِي لِمَجْدٍ قُرْبُكُمْ أبْوَابَه
مَنْ تَحْتَويهِ طَهُرَتْ أصْلابَه
يَا ضَامِنَ الرِّيْمِ وَمَا يَنْتَابَـه
اضْمِنْ وجُوْدِي إنّني فِي غَابَة

لِعَلِي بن مُوْسَى الرضا هذا الوِدَادْ
لِعَلِي بن مُوْسَى الرضا أبِي الجَوَادْ
----------------------
مِنْ بَعْدِ مَا ادْرَكْتُ بِالحُبِّ الصَّوَابْ
أيْنَ السَّبِيْلُ لَوْ طَغَى هٰذَا العَذَابْ
يدنو المُطيعُ سيدي من أي باب

إذَا الهوى أغتراب

أضحى قتيلاً قلبي ياسلطاني
فَلمست قلبي كَفِك أحياني
قتلت عشقاً والجفا أدماني
يا مَن تُأمن غربةُ ألأوطاني

لعلي أبن موسى الرضا قلبي يُقاد
لعلي ابن موسى الرضا أبِي الجواد
------------------
هذا أشتياقي والأمَانِي سَيَّدي
جُرحاً أسِيراً والسّجُونُ مَعْبَدِي
أرْجُوكَ سُلْطَاني إلِيكَ خُذْ يَدي

هواكَ مَرْقَدي

بَين يَديكَ وَاضِعٌ أحَلامِي
أدِمْ عَلَى خِدْمَتِكُمْ أيَّامي
فالجُرحُ فيكَ أجْملُ آلامِ
احْرِسْ ثَبَاتِي مِن هَوَى الأوْهَـامِ

لعلي ابن موسى الرِضا يُحيى الرُقاد
لعلي ابن موسى الرضا أبِي الجواد
-------------------------
يَا شَمْسَ طُوْسٍ يَا غَرِيْبَ الأوْلِيَاءْ
فَاقْبَلْهُ مِنّي سَيّدي هذا الوَلاءْ
حُزناً عَليكَ قد بَكتْ عَينُ السَّمَاءْ

والأرْضُ فِي عَزَاءْ

إنْ جَفَّ دَمْعِي ارتَجِي سُقْيَاكا
مُذ كُنتُ طِفْلاً سيدي أهْوَاكا
وفي شُعوري مُؤْنِسًا ألْقَاكا
حُباً سَقَتني في العُلا عَيْنَاكا

لعلي بن موسى الرِضا مأْوَى العِبَادْ
لعلي ابن موسى الرضا أبِي الجَوَاد
-------------------
مصطفى علي الموسوي

خطوات وألم مفضوح
معصومة بگلب مجروح
درب وبحُب انيس الروح..كل خطوة بأمل

عشگها المايحدة الحد
وجرحها المابرد مشهد
قتيله بشوگها اليشتد ..من الحُب ماقتل

الشوگ وعذبات الدرب
لعين الرضا ماخذها حب
بالحسرة خطوات الدمع
تمشيها مكسورة گلب

مولاتي معصومة
من الخوة محرومة
شگد للرضا أشتاگت
وماشافت أرسومة

ياغريبة الرِضا
----------------------
معصومة بكلب لهفان
گصدت رحمة السلطان
جرِحها بغربة الوديان .. ملهوفة بعشگ

يمر ليل الطريق ألام
بدمعها ترسم الاحلام
توصلة بگلب محتام ..للملگة يدگ

تحسب ليالي وتنتضر
لملگة الرضا شوغة وصبر
بحسرتها ماتت بالدرب
بشوگة الگلب ضل منكسر

بالمسرة وأشواگة
ماتت بلا ملاگة
وماشافت عيونة
دفنوها مشتاگة

ياغريبة الرِضا
--------------
بعذاب الممشة منتضرة
بگلبها اللهفة متحسرة
ماي المحترگ نضرة ..تطفي مهجتة

لهب ملگة الگلب صاير
وغريبة بحُب المهاجر
بدمع كل خطوة وتناطر ..بس ماشافتة

بحسرتها ماتت فاطمة
ماخذها للخوة الضمة
عطشانة لعيون الرضا
وبفگد اهلها ميتمة

ماتت أمانيها
ودمعة بواچيها
بعد العذاب المر
عاش الجرح بيها

ياغريبة الرِضا
-----------------
مأسوره بعشگ جارح
الحنين البالگلب واضح
بدمع شوگ الجفن سارح..ودربها ماگضه

قتيلة بحُب علي الضامن
وگلبها برحمتة آمن
بمراسيل العشگ ثامن ..مولاي الرضا

بجرح الوصال أتعذبت
اختة اعلهَ حبة استشهدت
ممشاها كل خطوة بجرح
بقم رحلة الشوگ انتهت

ياجمرة أهاتي
معصومة مولاتي
تكرمني بدموعي
ورحلتها حسراتي

يا غريبة الرِضا
----------------+-
جرحها المنتشي بعشگة
أسير وجمرته تحرگة
بسفرها الماوراه ملكة ..مذبوح العمر

مسافات العشگ تحكم
على گلب اليمر بقم
يضل بهجس حنان الأم..لسلطانك تمر

مر بجرح عشگي ألة
وگلة الكريمة الكافلة
تستقبل الزاير مطر
بماي المحبة تبللة

صارت الك بابك
تستقبل أحبابك
تعطف على الزاير
وترحلة ل اعتابك

يا غريبة الرِضا
----------------

عالم الحب الاهي يبدي من حب فاطمة
الينسگي بماي الطهارة مايمر گلبة الضمة
محصنين بفيٌ عطفها الزهرة متكفلة الحمة

برحمتها والعطف
حب يبدي يختلف ..نحيا بيا زهراء

ضعنة بجرح ضمة
ورزقتنا فاطمة ...حسين نعيش وياه

أباب العزاء تكعد غريبة الزهرة
تسمع نعي حسين وتعيش الكسرة
آآ يالولد شمسوية بيك الغبرة

آآ يازهراء
--------------------------
من عبايتها بدينا نعرف أرسوم الستر
گلنا يازهراء وشفنة الغيرة ضلت تزدهر
فاطمة ولو ما رحمتج ولله ماعشنة العمر

بالحب بدة الزمن
من نظرة ام حسن ..معطف هذا الكون

هوة الجرح رزق
وتنالة بالصدق ..تشوف أبلاية عيون

هذا العطاء والرحمة سرهن كلمه
يافاطمة وعيش بملاذ الخدمة
فك عين گلبك بيها شوف الرحمة

آآ يازهراء
-------------------------
من ضياع الدنيا لاجئ للوجود الهاشمي
من بعد عطف الزجية عشت عالم فاطمي
عيشتني الدنيا خادم عد حبيبي وراحمي

كاع الله والسمة
للزهرة خادمة ...تسجد يمها ارواح

قديسة والفضل
تعطف على المضل..تحتل گلبة اجراح

يافاطمة والحب صنيع الطافج
البي جرح مايگضي يومة خلافج
والگلبة حي سر الخليقة شافج

آآ يازهراء
-----------
رحمة الرب الچبيرة والامان البالگلب
بس لليقدس اسمها ولجرحها ينتحب
اليقر بالكاسر ضلعها وعايش الثار الصعب

قصة كسر ضلع
بالغيرة تنسمع ..وتعيشلها الثار

البي غيرة مايصح
يجامل علة الجرح ..حرمة وشبت نار

الطاهر نسب مايخفي فعل الضالم
بكلبة لهب كون لمصيبة فاطم
مو بس ضلع مثلوم شي من هاشم

آآ يازهراء
-------------

دعاء الغريق. التمسّك بفاطمة
أيـاب الطريق. وشفاعتها بالسمه
وتَد ديني
وجرح عيني
فاطمة
________

الـ اللهم شگد إنذكرت.وشگد طلبت بيها الناس
لكشف الضر لفكّ الحسرة وطرد إبليس أويه الوهواس
بس من تطلب بيها الزهرة. تعيش الجنات بإحساس

اللهم ارزقني النظرة من الزهرة لحزن الزهرة
اللهم جروح أترسني. وكون ألمسني. صاير جمرة
اللهم وهاي جروحي. تصير لروحي. مراية فطرة

دموع الوصول تصفيلك الگلب
الدعاء بالبتول. مواعيده كلها حب
سِمه ونيني
وجرح عيني
فاطمة
________

من حال لـ حال الله يغير گلب بنادم كون أيشاء
واحد يجحد واحد يعبد الرحمة بسراء وضـراء
وأعظم شيء لمن يتغيّر. گلـب الجاحد للزهراء

أنوي وسلّم گلبـك هايـم وأشكر فاطم تخدم فاطم
من أقصى فراگ اتعناها عيش وياهـا الحزن الدايم
ياغارگ أگرّب وبهـمـه. توضحك خدمة ابين الوادم

غريق الجمال ، يعاند سواحله
يعيش إرتحال وخدمته التدللـه
دفو طيني
وجرح عيني
فاطمة
________

كلها تطالب ثبّت گـلبي وتريد إرضاء الرحمـٰن
كلمن يتوسلّـه أبدينـه خاطر يعجل منّه أنسان
واليطلبهن بـ أسم الزهره. يثبَت گلبه وفوگاه شان

من عمق الـ آه المبحوبه الردته تلوحه النشمي بنوحه
الراد إيطهّر گلبه ويثبت موقف ينبَت بحزن أم روحه
أسرار الزهراء لا تُدرَك الينكر أشرَك. وچذبه جروحه

اليريد الـ إلٰه على الزهره يتّجه
تجرده هـواه. ويروح أبيض الوجه
الوصل بيني
وجرح عيني
فاطمة
________

مو تقييد الدين أيسيّـرك. باليرضي الله أحكام الدين
بين المبغض والّي أيدافع شفنه الوادم من سنين
حريـة ذات وحب شيمة. نلگاها بدين أم حسين

بالباب الرايد يعتقنـه ذنبه يعتـقه وجرحه ينطقه
ما بي للرق أي حچايه. للحب آيه. دين الرقّـه
أطلب دمعة تنوّر دربك. دمعة لگلبك بيها أتنقّه

مصير الجموع. يلاگوهه بالحشر
البغضها جزوع. بعمق ناره ينغمر
بچي سنيني
وجرح عيني
فاطمة
________

مساوم وتغر هاي الدنيا. تندل من يا غفلة تجيس
تريد أقنع بالباب أمعمّر. وأغمض عيني من التدليس
كل إنكار و راوي أيحرّف. ذنبه يصير امضه من ابليس

لحد هسه الباب وعطابه بوجه أحبابه. وذاك نگابه
لحد هسه إيناطر ثاراتـه.المهدي آهاته الباب مصابه
باچر يصلِبهم كل فاعل. جاهل جاهل. ثار أصوابـه

يرونه بعـيد وانشوفه عن كَثَب
قيامة يريد. لثاراته زوده هـب
الّي تحويني
وجرح عيني
فاطمة
________

حسين جبار

يَا جَمَالَ الحُبِّ يَا خَطَّ الرُّجُوع
سَيَّدي فالقلْبُ مِحْرَابُ الدُّمُوع

آسري وحبك جذبني
والدمع رحلة جنانك

غربتني من الخليقة
ووطتني بفيّ حنانك

قبل در أمي بلبنها
راضع بحبك أمانك

الكون طافك وأنتَ واگف
تشعل خيام لزمانك

أحتويني الناس كتالة ..وگلبي بحبك وشالة
بشوگك قيّد النابض..الگلب حريتة بأغلاله

ضگت حبك جرح يحدي الزمن فطرة
وعرفت المجلس بحب فاطمة الزهرة
ودريت بعالم الرحمة العطف نضرة
____
ياوِعَاءً يَملأُ العُشَّاقَ نُور
وبِأعتَابِ الدُّجَى شَمْسُ النُّحُور

خدمتك والحب جزائي
ومسكني بفيّ المنابر

استشعرت حبك وجودي
ومجلسك قلعة مشاعر

تملك الاشياء رحمتك
كلشي مابي أنت عابر

هذا ديني الي أعتنقتة
مو مجرد صوت شاعر

بخلودك سرحت أفكاري...وضماك يرخص الجاري
أقرب مني لعيوني ..حبيبي وتعرف أسراري

كبر جرحي ولگيتك علة أحزاني
وأنس حزنك أحب الغربة خلاني
همت وحدي الدمع والرحمة أوطاني
____
نفخةٌ في لُجِّ قلبي المُستميت
راجيًا فـي قِعرِ نيراني أبيـت

أتنفست جرحك صفنتي
وهيمن بروحي إغترابي

الترَف من غيرك متاعِب
وترف من عندك عذابي

بذرة تسگيها بـ غرامك
ودعِت بإيدك شبابي

بيك أريد لگلبك أوصل
يا فرحتي ويا مصابـي

مُرديك بيك يدنالك..ذاري أتعفره بخيالك
طَموح عيونك تجرني..وأزكَي چفوفي بحبالك

صرح بدموعي الوحك وأبچي واعيتك
لـ صلاة الروح بالخدمة توضيتك
سبيل العين مرهونة لأهل بيتك
____

يَا سَفينًا لو مَضَى كُلٌّ غَريق
أنتَ في الوَحدةِ أفنار ُالطريق

حائك إحتلت حياتـي
وما أقابلها بـ صمودي

وسينك السِتر المثالي
.الصفِّدت نفسي وحدودي

يائك إيجـاد المشـاعر.
يا أهم خطـوة بوجودي

ونونـك إكسيـر النواعـي
. النعـي يترجملي خلودي

أموات الدمع بيه ..انحيتلك بال حسينية
الفرح مو گدي قمصانه..البشر ستره أبواچـيه

أصل الدمعة أسم يحكم منابعها
وتنقاد بشغف طيرة لـ مواجعها
حروفك مسكن جروحي ومِرابعها
____
يا هيَامَ الشَّمْسِ يا شمسَ القِباب
وقت أن أُحكيكَ يُمليني الرِضاب

من عذاب الغربة أجيلك
وألگه بفيايك مَواطن

حسين من تنگـال تحظن
تخلّي حتى المُذنب آمن

كلشي يتحرّك بـ حزنك
نلگـه بس الذنب ساكن

الما بچاك وما صرخلك
گباله أموت وما أهادن

خليلي اليصبح إنسانك..وينثـر عمره قربانك
يجنحلك گلب خيمة..وترسمه برغبة ألوانك

خليلي الـ بلجوارح كلها يبچيلك
ويدگ أيـامه مديـون لـ مداليلك
اليلم روحه بحُسين أدخيلك دخيلك
____

حسين جبار
مصطفى علي الموسوي

لاجئ ذنب من ذاتي لجمالك
دمع حب وجمر عشت ارتحالك

خطوات الدرب مذبوح مذبوح
واجيتك ردت تذبحني بدلالك

اتهدة بمشيتي من الذنب خوف
وتعرض ركضة الحر من اجالك

وابدي استشعر العايشهن وياك

غريب أستوطنت دنيا بحلالك
يضامي وروجة النهران جالك
يالمغير الحال ويرثى حالك

أوسع من خيال اليطلب مراد
وأكبر من عزاء رحلة وصالك

غريبة عيون كلمن ينحب اعليك
وغريبة عيون كلمن مابچالك

معيشني الطفولة جروح بجروح
أمن صياري وكبر بيدك شتالك

طفل ماعرف ناعيك شني شيگول
واعيش ادموع اليحب لو قرالك

تفر الروح طيرة أمن ايد صياد
وتدخل خايفة برحمة جلالك

شي ثاني ويه حبك رافضة الروح
يالمحتل گلب أُنسي أحتلالك

أريد أوصل لعگد الساني وياك
واعوف الناس مشتبه بخيالك

أسكت يا لُغة كل اليحبون
وما أسمع حجي بس الحچالك

جرحك ابلغ من القيل والقال
أعيشك والتهي برحمة غلالك

وَحدة أسمك حبيبي مأمن الخوف
أنيس وغير حزنك ماحلالك

ماخذني الجمال دموع وألام
وعيتك والگلب مدري شنعالك

أذا واعي الحجر والبوم مولاي
طريد النار گلب الماوعالك

غريب المايعرف يشوف بالروح
شمس ويعلگ شموع أبدالك

وهج وتزورهن سرداب سرداب
وتضوي بسراديب المادنالك

يالمحتار بين الموت والموت
مشدوهه وباليحبون بالك

ياحبيبي :أنه وانت وجرح المصاب الصعب
ياحبيبي :مات گلبي وطيحتك رادت گلب

لو طيح لو أوصل الك اه يلولد ضاع الراي
لو گبل موتك مرتوي شيصير لو شارب ماي
ولو جيت شيردني بعد أله انت الادگوم وياي

بوداعك ودعت أمالي
مذبوح وذبحك كتالي
يالاكبر ياشمع خيامي
ميتمني ويتمت أعيالي

أه يالماخذ عيوني بوداعك
يالموتك ضياعي مو ضياعك

عطشيت شچم نهر
روحتك عافت أثر .....أه يالاكبر
------------------------
هية غربة : وچملتها بموتك وصارت ذبح
هية غربة :الدنية صارت ضلمة يالوجهك صبح

بالموت مايرضة الگلب ..چن طير مكسور جناح
كون اسمع الدنية انگضت ..ولا اسمع الاكبر راح
بالكوة جدمي ادنة الك...يبني الگلب يمك طاح

يالاكبر شو ردت خيلك
محنية وتمشي وتبچيلك
چا من كون إكدر أوصلك
وأكعد يمك واشكيلك

يأكبر ياگلب ليلى برحيلك
ومن الجيش ماتگدر تجيلك

يالحنيت شجم ضهر
روحتك عافت أثر ..أه يالاكبر
-------------------------------
هاي ليلى :وبحزنها أدور لفگدك عذر
هاي ليلى:گلي شيصبر گلبها الينتضر

بين المخيم والعطش..تاخذها حسبات الموت
تعبر يبوية لخيمتك وتصيحلك بعلى الصوت
يوليدي ردتك للنعش يوليدي ردتك زاتوت

يالمذبوح وريجك ضامي
يالاكبر ياحزن أخيامي
يالحاسب أيامي عيونك
ذبحوك وطفو أيامي

يأكبر يالصرت لوعة خيامي
هذا الموت ضامي وينعى ضامي

يأكبر وجرحي كبر
روحتك عافت أثر ..اه يالاكبر
-------------------------
يادلالي :بين موتك والعطش نهر الدمع
يادلالي :تسكت الدنية وعذابك ينسمع

غرگان صوتي بطيحتك ..ياصوت يلتم بالماي
يوليدي مذبوح الصبر ..بلل شفافك مبچاي
عالدنيا من صحت العفى بس گلبك يفسر هاي

اه يالضوت روحي أرسومك
انت الكاتل گلبي بيومك
من جرحك ماشلت أجدامي
روحي تلمك مدري تلومك

يبني العذبت گلبي بمماتك
يرايح باچر تفگدك صلاتك

رايح وكلشي انكسر
روحتك عافت أثر ...اه يالاكبر
---------------------------
انت رايح :وانه من حزنك ثكل گلبي الم
انت رايح:ها يالاكبر بيش أردن للخيم

يبني المسافة من الخيم ..ليك شكثر بيها سنين
أذكرهن بخطوة درب .. ودموعهن تعمي العين
يمك يالاكبر حدبت ..ماچني يوليدي حسين

يامرخصها الدنية خلافك
ومعطشات الدنية شفافك
ذباحك ما رفت روحة
جاهلبت حن گلبة وعافك

جرحي يسولفك يالتعبتني
وبرحلة خلودك ضيعتني

كلشي بوداعك خسر
روحتك عافت أثر ..اه يالاكبر
---------------------