گتلي من تعطش ترويك الجفوف
وهذا انا العطشان وين اجفوفك ؟
وگتلي من تستاحش ابروحي تطوف
شو عليًّ شحيت حتى اطيوفك
وگتلي لو عينك طفت .. بعيوني شوف
وشفت كل الناس بس ما شوفك
وگتلي أمن لا يجي ابالك الخوف
وماعرفت الخوف الا بخوفك
وگتلي برموشي جرح گلبك يروف
شو كبر جرحي وزغر معروفك
وانه ادري ارموشك امضه من السيوف
اشجاب گلبي وطاح بين اسيوفك
أوف من حبك الف مليون أوف
وآنه مدري اشگاضني وماعوفك
مثل غرگان ويدور عالجروف
حظه ابموته .. وماحظه بجروفك
وصار ملگانه اسطوانه اعله الرفوف
وحبنه مات استشهد اعله اجفوفك

وآنة شمضَيعني غير عيونَك الما تدري عَني
شمتَعبني غير ظنوني إذا باچر عفتني .

مدفون وانت عدل
يا موت منة تخاف؟

صحيح جفوف گلبي جلبت بيك
لگن من تريد تعَوفك تعَوف

سولف گول الك واهس تضل وياي
واذا ما الك واهس گول لا تخجل
ما اقبل احبك وانت ما مرتاح
وما ارتاح احبك وانت ما تقبل

بعدت طيوف حبك
من الاطياف
وشلت لمسات شعرك
من الچفوف
شأضمن بيك سري
وانتَ شفاف
وشأچلب بيك
وانتَ الرايد تعوف

عَود دَلوك الدَربْ!
بَس ضَيعوك و إخَذو التَمرات
و إنطُوگ النِوة
و أنتَ عَطشان و أَبَد ما شَربوك
يا سَراب إللي شَرب مِنه إرتَوه ؟
أنه رَدت انَساگ بَس شُوگك چِبير
رِدت اگلك رُوح و الفَضها تَعال
أنه جَنحك لو رِحَت بيَمن تطير ؟
لَيش بجَناحك تحَط بَعدك
شگال هَاي نَزوه و تَنتهِي
و باچِر تحَير
أسَمعني مَرة و إصَفن لهَذا المِثَال
أنتَ يَم عِيونهم مَا وچِدوك !
فَلها گورة مَغزلك شوف شطَوىٰ ؟
بَس يَراوك الچَرف ما عَبروك
هُمه صح شِراع،
بَس انه الهوى

جنت انطرد وارجع مو بديه
جنت مابيه خير وهسه بيه
جانو حالهم حال الهوى الهاب
صارو حالهم حال البقيه
ماقصرت وياهم ولا يوم
سويت العليهم والعليه
وماتدرون صرت بموقف اسود
ماصاير قبل بأمه محمد
والله تفاجئت من سدو الباب
مالحكت اكلهم ليش وانسد
بس ضليت واكف تشهد الناس
واذا ما تشهد الناس الله يشهد