באריכט פונעם מעמד אדיר "קשר מחזיקים" יערליכער דינער לטובת ישיבתינו הקדושה וואס שטייט תחת דגלו הטהור פונעם מנהיג העדה כ"ק מרן רבינו שליט"א:

בהתאסף ראשי עם יחד שבטי ישראל!

דעם פארגאנגענע דינסטאג נאכט - ליל ערב חנוכה האבן אנשי שלומינו פונעם עיר ואם בישראל בארא פארק ובראשם רבני ונכבדי העיר זיך אינאיינעם צאמגענומען תחת קורת גג אחד כולם נקבצו ובאו לך לשמוע את דבר השם למלאות רצון צדיק ולהתקשר בעץ החיים דורכ'ן אוועקשטעלן די ווייטערדיגע עקזיסטינץ פון ישיבתינו הקדושה בראות עינו וחמדת לבבו פון כבוד קדושת מרן רבינו שליט"א ביים יערליכע דינער לטובת ישיבתינו הקדושה - "קשר מחזיקים", די גרויסארטיגע מעמד איז פארגעקומען ברוב פאר והדר במקהלות עם רב אין די ליפשיץ זאלן.

צום באשטימטע צייט האט די באקאנטע מייסטערהאפטיגע יושב ראש הרה"ח ר' מאיר מרדכי בערקאוויטש געפענט די מעמד מיט פאסיגע דיבורים ארויס ברענגענדיג די געוואלדיגע זכיה פון אט די אידן וואס זיצן דא היינט נאכט וואס טוען זיך אנשליסן מיט סכומים הגונים לטובת הישיבה להחיות נפש צדיק צו פארגרינגערן דעם גרויסן עול הישיבה המוטל על צוארו.

בכבוד הראוי האט מען ענטפאנגען כ"ק מרן רבינו שליט"א וואס איז געקומען מפאר זיין בראש המעמד, ביים ערשיינען אין זאל האט זיך רבינו שליט"א באגריסט מיט די פולע אדמורים ורבנים אויפ'ן אויבנאן. 

דערנאך האט די מנהל הישיבה חדב"ן הרה"צ ר' אהרן זלמן יונגרייז שליט"א אויפגעטראטן מיט פלאם פייערדיגע ווערטער ברענגענדיג א לעבעדיגע גריס בין כותלי הישיבה מידי יום ביומו, ווי די קרוב צו צוויי הונדערט תלמידי הישיבה טוען שטייגן בתורה ויר"ש אויפן אמאליגע שטייגער, תחת נשיאתו והדרכתו פון הוד כ"ק מרן רבינו שליט"א וואס טוט משפיע זיין אויף די תלמידים הקרויים בנים.

דערנאך האט דער יו"ר ארויפגערופען הגה"צ אבד"ק דזשיבוי שליט"א, זייענדיג אליינס א טאטע פון א תלמיד הישיבה, ווי ער האט איבערגעגעבן א לעבעדיגע עדות סיי אלס טאטע און סיי אלס בוחן ווי ער האט פארהערט די בחורים, און איז ארויס פון התפעלות פון זייער אויסערגעווענליכע קענטשאפט אין די לימודים, אזוי אויך ארויסגעברענגט די אויסטערלישע זכי' וואס דער סערדאהעלי ישיבה פארמאגט צו האבן אלס ריש מתיבא קדישא דעם גדול בישראל פונעם פריענדיגע דור ווי די בחורים זענען זוכה צו מקבל זיין תורה והדרכה אויף א פערזענליכע פארנעם. צום לעצט האט די דזשיבוי רב ארומגערעדט דברי זכרון והערכה אויף הרבני הנכבד ר' אברהם משה לאווי ע"ה שטייענדיג אין די יאר לפטירתו, וואס די דינער איז געווען מוקדש לעילוי נשמתו.

דערנאך האט אויפגעטראטן דעם געטרייע מנכ"ל הרה"ח ר' יהושע יואל קריינדלער וואס האט איבערגעבן א דעטאלירטע באריכט מטעם הנהלת הישיבה מיט די ווייטערדיגע פלענער פון הרחבת גבולי הקדושה, און צום לעצט די אומגעהויערע באדזשעט וואס מ'האט אריינגעטרויטן אין שנת תשפ"ה, און דערביי אפאלירט צום עולם צו קעגן קומען מיט גרעסערע סכומים להחזקת הישיבה.

דערנאך האט אויפגעטראטן די נואם הכבוד דעם וועלט בארימטע מגיד מישרים הרה"ג ר' אלעזר ניסן רובין שליט"א וואס האט געהאלטן די עולם געשפאנט מיט א העכסטע אינטערסאנטע דרשה בעניני ניטול (וואס איז געווען יענע נאכט), און איבער די שייכות פון ניטל צו נתינת צדקה ובפרט להחזקת התורה.

צום הויכפונקט פונעם מעמד האט מען געהאט די זכיה צו הערן דברי אלוקים חיים פון הוד כ"ק מרן אדמו"ר שליט"א וואס האט משמיע געווען קורצע דברות קודש, שטייענדיג אין ניטל האט רבינו שליט"א געזאגט אז מן שמים איז נסתבב געווארן אז היינט נאכט איז ניטל וואס מ'קען נישט לערנען, זאל מען כאטש מחזיק זיין תורה וואס האט אויך די חשיבות אזוי ווי לימוד התורה, דערביי האט רבינו שליט"א ארומגערעדט איבער די גרויסע עול וואס ליגט אויף אים זאגענדיג אז ס'איז קשה מנשוא, און מ'דארף צוקומען צו די ווארימע אידן וואס פארשטייען די חשיבות פון שטיצן אזא הייליגע מקום תורה ווי די תלמידים לערנען תורה בקדושה ובטהרה, און צוגעענדיגט מיט ברכות הקודש פאר די אלע תומכים ומסייעים.

דערנאך האבן די נגידי ותומכי המוסדות זיך געשלענגעלט אין די שורות א לענגערע צייט איבער צו געבן די שטר שותפות קשר מחזיקים מיט די סכומים אדירים ווי רבינו שליט"א האט יעדעם געוואונטשען ברכת קדשו במאור פניו און פארטיילט א מתנת קודש כאות הוקרה, א הערליכע לעדערנע זמירות של שבת.

די מעמד האט זיך געשלאסן מיט א געואלדיגע הצלחה אריין ברענגענדיג אסטראנאמישע סכומים לטובת ישיבתינו הקדושה.
עץ חיים הוא למחזיקים בה ותומכיה מאושר!

מעמד אדיר "קשר מחזיקים" דינער השנתי לטובת ישיבתינו הק'
צילום: אייזיק י.