ما سرّها صمتي ولا غرّها اللي جرى
خليلة القاف ما جابت بعيد الخبر

لو باحت بسدّها جيب الحليم أنفرى
في ليلها سكّة النسيان ولا الصبر

لكن لا مرّت، الجرح القديم أنبرى
عبيرها ينتشر في كل موضع شبر

يلوذ فيها شقيٍ في هجوسه سرى
من بعد ما ضاق من وجه الزمان الغبر

يا نسايم من روابي العف مري
وأكرمي مثوى المتيّم في زمانه

وفي محاديب المحاني أستقري
لين يسحر كل عابر في بيانه

منك نفعي لا وصلتي ومنك ضري
لا هجرتي بعد ربي جل شانه

من وراك القاف وأحساسي وسرّي
وقلب صادق مارضى فيك المهانه

الوله يهتك ستر ليل ويعرّي
الوجيه اللي لها قدر ومكانه

في دجاه يشادي الجفن ويسرّي
بال، متعبْه الهجوس وعنفوانه

كل ما أونسته في ليلي زال شرّي
كيف عاد أن جادت الليله حنانه

لو أشوفه قلت لعيوني أقرّي
فالجبين الضوح والعود وليانه

وإن شكى قديم جرحي لا يطرّي
شاعرٍ لا ذا زمانه وْلا مكانه

كل ما ريح الهبوب داعبت غصن الورق
طاح قافٍ شاعره عارف دروب الحياة

وكل مامرّت طيوفٍ من اللهفة شرق
شرقةٍ من دمعته بيّحت باقي خفاه

السهر في باب سود الليالي كم طرق
يحتري شمس الصباح ان تبيّن في ضياه

والسحاب اللي يزمجّر وبرّاقه برق
يوم جيته كذّب برعده وبرقه وماه

قالوا سنينك مع من تحبّه تنسرق
شرهة سنيني على اللي ما جوّد بالوصاة

من يعيش العمر كله يخاف من الغرق
ما درى ان الموت احيان في طوق النجاة

يغيض الشيح والنسرين ويغار التوت والتفاح
في عودٍ غض فارق لونه وصفّة عناقيده

على متنه دجى ليلٍ كليحٍ ما بعدْه اكلاح
يهيمه شاعرٍ كل ما سراه ألفت شواريده

وشذى العطر الفريد النادر اللي من نسيمه فاح
على قاعٍ وسوم الغيث فيها من جراهيده

ملاذ المتعب ومنوة عيونٍ دمعها لا طاح
تحاشى الصبح في نوره وتهاب الليل من كيده

يحايلها هجوسٍ في القوافي دايمٍ جمّاح
ولا يرد إلاّ من عوص القوافي ماخذٍ صيده

على الوجنة حيا دايم يناقض ثغرها اللماح
وعلى قلبي غرامٍ جرّه الموت الحمر بإيده

تهب ريح المنايا من عيونٍ رمشها ذباح
من يشوف التسلهامة يطيح في حسنها سيده

حين فقد الأديب غابرييل ماركيز الذاكرة في آخر حياته، قال لصاحبه وهو يجلس بجانبه :
أنا لا أعرفك
‏ولكني أعرف أني أحبك..

من قدم ضي البدر والخود متباهي
ومن حقك أنك تباهى لا زمى جيدك

لا مرّك المنتبه يصير بك ساهي
وأن رحت منه ، على خياله يعيدك

انا ضحيّة جمالٍ ماهو يضاهي
إلا سحايبْك لا بلّت عناقيدك

في عيونك الواسعة ملامي الواهي
وفي عودك الغض قافٍ دايم يشيدك

وش ماتبي عد نفسك آمر وناهي
لو اسلم من الحسن ماسلمْت من كيدك

كان الهوى يعطي إن حذفت له جاهي
يعتق رقبة المحبة من قسى ايدك

مايروي السحاب وبله والمدى كله جفاف
‏وايامنا على الهوى متشارقه متغاربه

‏راحت مقادير المحبة في تشابه واختلاف
‏دروبنا متباعده وجروحنا متقاربه

"يالله ليا زاد حزني في مجاديبه
أمطرني برحمتك بالنافع الصيّب"

ما ودّي ازعْل لا خلاّني ولا ربعي
ومن غاليٍ لا درى ابكاني وابكيته

"خليت مبدى التغاضي سلمي وطبعي
حتى الحزن كل ما جاني تغاضيته"