#محرم1446

تسلم يروح أمك
يالناصرت عـمك
مايــــنسي أسمك -- ياقاسمي
-----------------------------------------------------------
1= يبن أبـــوك المجتبى ماقصرت
تاج راس المرجله يبني صرت
من شفـــت عمك بغربه قررت
تفوت بيــها وبالزلم ما فكرت
** نشمي وأبن نشمي
أدلل صحـــت عمي
حزمتــــني أيد أمي -- ياقاسمي

2= عفت يوليدي العرس وأهل العرس
أمبين مقـــرر تــذلهم من أمس
يابو صوت العالـي ماتحجي همس
ياجمال عــيونك أحله من الشمس
** وجهك يهيمني
رمشك يعجبني
طولك يجـــنني -- ياقاسمي

3= طال يوليدي طريقك لـــو كصر
كالو العاشك يكمل لـــــــو عـثر
تباركولي من صرت جابـت كمر
بعيني تبقالك يجسامي صور
** ضحكاتك الحلوه
وعيونك التسوه
لقبتـــك السلوه -- ياقاسمي

4= باجر تـــــنومس تــراني بوكفتك
من تصــــيح الزهره عفيه الربتك
ندخـــــل أنه وياك ممشه الجنتك
هناك ونــــــسويها جـــاسم زفتك
** عــباس الينادي
ويزفـك الــهادي
يالعرسك مرادي -- ياقاسمي

5= أشكرك عالعشره والوقت الجميل
يالضحكتـك حلوه والهمي تشيل
والله مـا أنساك هالشي مستحيل
حتى لو جابوك ودمومك تسيل
** يانـســمة أيامي
تتـفرهد أحلامي
وبذبحتك ضامي -- ياقاسمي

#عبد #الجليل #المالكي

#محرم1446

بعـــرس دمــي كـتــبت أســـمي
أنه الــــــقاسم فــــــــده العمي
------------------------------------------------
1= أجـمل عـرس مر بالعـمر - لا شـمـعــه بــيه لا زفــه
بصدري المراجل هوست - ياهلا بشـــــيخ العــفه
زلمه وأبــــن زلمه الطلع - شايـــــل الـــرايه أبجفه
من تـــبرد الحومه تجي - تـكـــــض نار حيله وتدفه
---------------------------------------------------
أنـه الـــقـائـد -- وأبــن قــــائـد
ولا أرجـــــع -- أضل صامــــد

2= هيه الهلاهل مــو شرط -- بالـــزفه ما مـقــسومه
محلا الهلاهل بالحرب -- لـــو هالهلتها الحومه
مرات زلــمه بوكفــته -- يوكف يـــــزيح همومه
هــيه المواقـــف تنذكر-- وكلمن يـــموت بيومه
---------------------------------------------------
بــبو الــوكفه -- الــبرد يـــدفه
الحرب عـندي -- مـــــــثل زفه

3= كــل طـــــير لـــمـن يبتعـد -- أيــحــن ويــرد عــالديره
وأنه أعــــتبر عمي وطن -- ما عــــيش عمري بغيره
صرت الحسن وبن الحسن -- مــن شفـة عــــــمي بحيره
والمافـــــزع للحك ركض -- مو زلمه ناقـــــص غيره
-------------------------------------------------------
عـفت عـرسي فـــداه نفسي
وسط حــومه نكتب درسي

4= لمــــن تـلــكانــي السهم -- أستـقـبلـته وأنه أضحكله
مفـتوح صدري ماخفـت -- والصعــــبه صارت سهله
أنه أهلي أل المصطفى -- والسهم ياهـــــــــــم أهله
لو أريد أرجعه ويــنكسر -- وبكيــــــــفي أنه أسمحله
--------------------------------------------------------
رجــل كـــدها أوصل حــدهــا
تصل حــــدي العـــده شحدها

5= مافـــكــرت لــمن طحت -- بجروحي وأمسح دمـــي
تفكـــــيري صاير بالخيم -- مو بالعـــــرس يم أمي
يحملـــني عـــمي للخيم -- لا خاف أتعــــــب عمي
مارد عليه والله أستحي -- لمــــــــــن يصيح بأسمي
--------------------------------------------------------
طحــت دامــي بجـــــبد ضامي
صحت عـــذرا يصمــــــــصامي

#عبد #الجليل #المالكي

#محرم1446

منك ألك - يامـن خدمتك تـنحمد
أتـوسلك - عـن مجلسك ما أبتعـد
المحرمك - وفقـني يحسين أستعـد
-----------------------------------------------------------
1= شــمـحلانه أنه ومجلسك - بمسجــد دمعــنه أنقدسك - وعـــيونـك
تــراقـبنه وتـرشنه صدك - ياخالـــــق الحب والعشك - مـن لـونك
يمحلي وجهي بخـدمتـك - يــتـــباهه كلبي بصحبتك - وبـــــدونك
مدري شيروح من الكلب - يصير التنفس شي صعب - مجـــــنونك
-----------------------------------------------------------------
يابو الذبح -- ربيـــني محـــتاج الــربه
مثل الطفـل -- بحروفك أيـــدي أمجلبه
ما تـــنطفي -- جمراتـــــك تــضل لا هبه

2= تـلوك الجروحــك دمعــتي -- حــبك صــفاء النــــيــتي -- هــــنيالي
يا قاءم بفـــــرض الذبح -- مـــــاراح مولاي الرمح -- عــن بالي
مات العطش وأنت عـدل -- وبخـــيمتك كلـــــبي نزل -- يالـــــغالي
وزعــــــني العيالك ورد -- مــــــا خالفك عـــندك عبد -- مــــــابالي
--------------------------------------------------------------------
وبموتـــتي -- أللطم وأردن أنـــــولد
وبحفـــرتي -- ينزرع من الله الورد
مـن الملك -- خافـن يمولاي أنحسد
3= صاحب عزه صاحب ألم -- وبمشيـــتي أتـــبيـــن خـــيم -- وبعـــيني
ركضت يتيمه وتــندفع -- عالــــــــــنار توكع عالضلع -- يحـسيني
اليموت باللسانه الحجي -- يحسيــــــــن يتطشر بجي -- بجـــــيني
الما يبجي الجروحك كـفر-- الما يعشك عــــيونك خسر -- يا ديـــني
------------------------------------------------------------------
كلبي نشف -- بللني بــــرماد الخـيم
أتـــــنفسك -- ياعشكي يا أجـمل ألم
يا قـــائدي -- بالخدمه رافعــلك علم

4= عـطشان وأنت التـــنشرب -- ياوطن عـد وادم غـرب -- ياروحي
مذبوح بس تـــضحك هلا -- طولك فــــرات أتخيله -- وبـنوحي
بالمجلس أتـــمر عالنضر -- ويغـــوش بعيني البصر -- وجروحي
عـــــطشان حد ما محترك -- خربت حـلاتك بالسحك -- مـــذبوحي
-----------------------------------------------------------------
أنت الحـــياه -- وعيونك هــلال السمه
أنت الصلاه -- وتوضت شفافك ضمه
ما نفــــترق -- غير أحنه شريان ودمه

5= يوجعني جرحك بس حلو -- يفزعلي من أبرد دفــو -- وخيامك
جن والــد نحسها وعلي -- شما تخله بالحب تنملي -- بخـدامك
مشكور يالصدرك وطن -- يالمضحي للدين بضعـن -- ويـتامك
يالـــيوجع أسمك بالكلب -- ريت أنـه واكع عالترب -- كـــدامك
--------------------------------------------------------------
ما نختـلف -- أنه ودمعتي وكربله
وبكل سنه -- طفـــك جديد أتخيله
أنت العـمر -- أرجوك حزني أتقبله

#عبد #الجليل #المالكي

#محرم1446

ياقــابل الحر تايب أقبلني -- وبرحمتــــك ياسيدي شملني
حسين وخدمتك أفضل عمالي
---------------------------
1= حنانك غــــاية الله والفــكد مثلك تـلزمه الـــنار من أيده وعلي ويهلك
أريدن كـون وأنه مغــمض أندلك وأكضي سنين عمري بنوح من أجلك
---------------------------------------------------------------------
رايد عــيوني تبجي يوميه ** والله البواجي أعليك زينيه
للغالي كالو يــرخص الغالي
حسين وخدمتك أفضل عمالي

2= أريد بسيرتي الذاتيه بس أنته عــبد وأسمي الربـاعي وياك سجلته
أذا أحلم وغـيرك بالحلم شفته الحلم مرفوض تـلكه عيوني طاردته
--------------------------------------------------------------------
ماريد غيرك يدخل عيوني ** شكد حلوه مجنونك يسموني
دلالي لو بي أنته لو خـــــالي
حسين وخدمتك أفضل عـمالي

3= حقيقي أنته أشوفك والعطش جذبه كل ضامي يجي ومن مايك تشربه
يا أسرع ســفينه أنته شكبر كلبه والترضه عليه يـــرضه عليه ربه
--------------------------------------------------------------------
أدخل يعبدي الجنتي يكله ** قصرك العالي هناك تندله
يالعالي حبك ربــــــك العالي
حسين وخدمتك أفضل عمالي

4= عتبرني شنهي اليعجبك حرف نقطه بذبحك روحي ماطلعت صدك غلطه
يالمروي الــــبشر كلها بعسل شطه أخذني بدفوا عطفك رايد أتـغطه
----------------------------------------------------------------------
يارحمة الله الواسعه دخيلك ** خليني نايم صاحي أبجيلك
ماعندي غـــيرك عاين الحالي
حسين وخدمتك أفـضل عمالي

5= يرزق المعتلي خير البدي خيرك بشر مسكين أنه وما ألي غيرك
أشكرك بيش والله هواي تقديرك يعــش العافيه الراحم كلب طيرك
----------------------------------------------------------------------
علمني أسلم لله تسليمك ** قيمني حيل أحتاج تقيــيمك
ماريد غــــيرك يدخل أبالي
حسين وخدمتك أفضل عمالي

6= أيابي يصير يمك باجر دخيلك وحسابي هــم عليك وأنه أبجيلك
وين أمشي حبيبي غـير أمشيلك أخافن من جهنم وأركض أشكيلك
------------------------------------------------------------------
أشفعلي يالشافع ذنب فطرس ** يامن ضواك يرجف الهندس
متعلقه بسمك كــــلها أمالي
حسين وخدمتك أفضل عمالي

#عبد #الجليل #المالكي

#محرم1446

جربه سوه المشرعه وشالاها
وعالحرس لمن زعــل بداها
------------------------------
1= هاكـــثر طــــول خلك وياهم بالبدايه أخلو النــهر ناداهم
رفضوا وعالمسطره مشاهم حدر جدمينه أرض سواهم
--------------------------------------------------------
أجو ممشه بس زحف رداها
عالحرس لمن زعـــــل بداها

2= بطرف عينه من خزرهم طاحو دخيل زينب يابو فاضل صاحو
فص ملح وبماي كلـــهم راحو كلهم الخاطرها ساعه رتــاحو
-------------------------------------------------------------
فرصه رادو والكفيل أطاها
عالحرس لمن زعــل بداها

3= نعــقــد وياك أتــــفاق بكيفك تريد نترس جـربتك رد سيفك
بكل الأحوال أنته ماخذ حيفك أمهلنه ساعـه وأرجع التكليفك
----------------------------------------------------------
زلم تترجه الذبح خلاها
عالحرس لمن زعل بداها

4= مغزل وفرها الشريعه بصبعه كلشي ساكت بس قراره نسمعه
مايسامح ضالـــم أخته بطبعه نشمي والباعوا أخوه مو ربعه
--------------------------------------------------------------
رايته بعلـــو النجم علاها
عالحرس لمن زعل بداها

5= من ندس مهره بو فاضل يكوه كلها صاحت شوف سيفه شسوه
دكهم وجــــــنه يدكله بكهوه طفت كلها وبس جــــــينه ضوه
----------------------------------------------------------------
ماشرب بس جربته رواها
عالحرس لمن زعــل بداها

6= شربك الروس وأمرهم يمه حار راسه وفار سيفه ودمه
صاح مابيكم يـــوادم زلمه * ما أعطله بساع ياخذ سهمه
---------------------------------------------------------
نسر بجناحه الحرب غطاها
عالحرس لمن زعــل بداها

#عبد #الجليل #المالكي

عالمسجون واويلاه عالمسجون واويلاه
؛:::::؛؛؛؛؛؛؛)؛
بينه يومك جنه عاشر نلطم ابحركه والم
سابع الكافل نحسه من وكع راعي العلم
بينه حركه يابو طلبه جنها جمرات الخيم
كربله ردت علينه وضلع الحسين انهشم

عالمسجون واويلاه عالمسجون واويلاه
؛؛:::::::::::::
بالسجن عمرك تخلصه يابو طلبه بالحزن
كربلا ابالك ذكرها والسبي وهم الضعن
ياامام الرافضيه شسوه بالعتره الزمن
ياوطن باكو وطنهم غربه صرتو بالوطن

عالمسجون واويلاه عالمسجون واويلاه
؛::::::::::::::
الجمعه تنتضرك تجيها الشيعه كلها اعله الجسر
لاحت اجنازت وليها مسلسله بكيد القدر
من كثر كيد السلاسل بين ابجفه الاثر
ويلي واويلي اعله موسى ضهر الاسلام انكسر

عالمسجون واويلاه عالمسجون واويلاه
؛؛؛:::::::::
المهدي حاضر بالمواكب عزب ابدمع اليصب
صحنه خدام بخدمتك مايهم بينه التعب
رايت العباس عدنا ترفرف بطول الدرب
العده حاجه تكضي يمه بالصحن لمن يطب

عالمسجون واويلاه عالمسجون واويلاه
:::؛:::::::
تبجي حيطان التسجنك وانت ساجد للشكر
تحجي وي رب الجلاله تكله للموت انتظر
حيلي خلص يا الاهي كلبي بالهم ينعصر
روحي طلعت من جسدها شلي بيام العمر

عالمسجون واويلاه. عالمسجون واويلاه
.........
هاشم الدراجي