فرحانه فرحانه .. الزهره فرحانه
نهني علي الكرار بحسين مولانه
ورد ورد .. طشينه العيون
عشك عشك .. ما مثله بالكون

جبريل نازل للمهد ويهزه بجناحه
الليله يفرح كل گلب مولود سباحه
شعبان هل بهالفرح يا محله افراحه
كل العشك ضيم وتعب بس عشكه بي راحه

حبيته حبيته .. من زغري حبيته
گلبي بهوه المعشوك .. مجنونه سميته
الك الك .. سموني مجنون
عشك عشك .. ما مثله بالكون

نازل على خدوده النده ومكحله عيونه
مرايه وجها لحيدره لون الضوه بلونه
مزدحمه املاك السمه بمهده يهزونه
وفطرس مسح جنحه ورجع خيعونه خيعونه

رداله رداله .. الجناح رداله
جان الجنح مكسور .. رداله هنياله
وعد وعد .. عليه اليسلمون
عشك عشك .. ما مثله بالكون

سبحان رب الخالقه والتمم رسومه
الليله من وجها ضوه وتغازله نجومه
حك اليذوب بهالعشك ياناس مالومه
الشيعه ذابت بالعشك وبعشكه مفطومه

حبينه حبينه .. حسين والينه
من المهد للموت .. صرنه مجانينه
نبض نبض .. كلب اليحبون
عشك عشك .. ما مثله بالكون

يا ناس فطره هالعشك بيه الكلب ذايب
من عالم الذر ياخلك اصبح فرض واجب
عوف الملامه اللامتك ويامن تعاتب
هذا العشك لو بي ذنب من عنده ما تايب

مجنونه مجنونه .. يا ناس مجنونه
ما يغفه جفني بليل .. عكس اليعشكونه
فرح فرح .. عند اليعشكون
عشك عشك .. ما مثله بالكون

تمت
احمد الخفاجي

لدمعج يم عون .. ينراد عيون
يا غريبه .. ياغريبه .. ياغريبه

وين تنطين الوجه والدنيه ليل
والسلاسل تهدل بمتن العليل
شلون شفتي اعلى الرمح راس الكفيل
لغربتج يم الخدر ينراد حيل

بالفروكه شلون .. ينراد عيون
يا غريبه .. ياغريبه .. ياغريبه

شيبت راسج يزينب نينوى
وانتي من ذاك الضلام بلا ضوى
وين عنج راح شيال اللوى
تنتخين وضايع اعليج الهوى

عنج يمشون .. ينراد عيون
يا غريبه .. ياغريبه .. ياغريبه

يا وكت تمشين وي جتال اخوج
وزينب بحرك الخيم وليه ولوج
جنتي عطشانه وحزن بالطف روّوج
ومن عكب عباس يازينب سبوج

بين اليسبون .. ينراد عيون
يا غريبه .. ياغريبه .. ياغريبه

رحتي اسيره والحزن كاسر كفاج
ياغريبه وسوطهم كاطع هواج
بالحبل تمشين ودموعج وراج
الكطع نحر حسين مسبيه خذاج

بصبرج يدرون .. ينراد عيون
يا غريبه .. ياغريبه .. ياغريبه

عفتي كاع الطف تخضر بالدمع
مشيتج مذبوح راسه بلا كطع
جانوا يحلمون صوتج ينسمع
كَبل وين وهسه صرتي بيا وضع

مهدوله متون .. ينراد عيون
يا غريبه .. ياغريبه .. ياغريبه

ضحكة الشامت مثل رمي السهام
صارت عليج بوكت حرك الخيام
يا نهار الصار بالطف الظلام
شلون زينب جفنج بليله ينام

دمعج يا لون .. ينراد عيون
يا غريبه .. ياغريبه .. ياغريبه

تمت
احمد الخفاجي

‏مقطع صوتي من احمد الخفاجي

انه خادم. وانذر عمري الفاطمه
وبالمجالس تنزل دموعي من دمه
المئاتم نعمه وآية من السمه
سال سال سال دمعي
نوح نوح نوح طبعي

انه عندي  المهم ترضه  الزهره عني  بهل الخدامه
ومو مهمه  الشهره عندي  ولاني مهتم  للملامه

انطي ضهرك للملامه شما تسولف بيك
بشر ما عاجبه كلشي شترجه ترضه عليك
الخلص عمره بس يلومك كلشي ماينطيك

عوف كلشي  وارخص  دمعك لم حسن
دمعه وحده  الها   اغله من الثمن
الدنيه تخلص  وانت رايح بس جفن
شراح شراح شراح تدعي

يسيل دمعي للزجيه والضلعها والصفعها
والهضمني العصرها والسطرها والدفعها

بالحطب هجمو عليها ولاذت من النار
دفعو الباب بضلعها يكسر المسمار
مجتف بحبل الوصيه ويلي حامي الجار

ياهضيمه ضلعج فاطم ينكسر
وانتي آيه وسوره وقرآن الفجر
بت محمد بالباب صعبه تنعصر
ويل ويل ويل وضعي

حكي ابجي  بكلب محروك  طول عمري على المصيبه
قلب حيدر  بهاليالي  مايبطل  من نحيبه

يبجي من دم الفكدها ويكضي نوح اليل
القالع البيبان بيده منه راح الحيل
كام يتوجه على صبره والدموع تسيل

جفنه ذايب  بعدج  تنزل دمعته
لزم ضهره بدفج  صارت رجعته
كل الاملاك بالنوح حيدر سمعته
صاح  صاح  صاح اسمعي

برض ضلعها النفس كامت تجره كوه من المها
على الحايط اثر صوره كل حزنها بنزف دمها

عصرت الباب على فاطم بيها شهكت موت
بطيحته على الكاع محسن يمه صاح بصوت
اشفت من دنياي حته اتمدد بتابوت

بعصرت الباب محسن منهم ماسلم

بهيده صوته وناده يمه من ألم
بكسر الضلوع والهم كل ضلعه انهشم

راح راح. راح ضلعي

علي اليله بلحضه وحده منه راحت كل حياته
بنعش فاطم وعينه تجري وألم جرحه من الشماته

علي فارك كل حياته ويجري دمع النوح
من الدفن مكسور ضهره راجع بلا روح
رد ابو اليمه يكابر وقلبه كله اجروح

يمشي كوه وحيله تبده على الكبر
يجري دمعه وانطر كلبه المنكسر
هذا حاله عكبج شيخلص العمر
آه آه آه انعي

تمت
احمد الخفاجي

‏مقطع صوتي من احمد الخفاجي

كل مجلس على الزهره
بدمعه الحسين يحضره
يبجي وينادي بحسره
يافاطمة المظلومه

حسين كل مأتم يجي متحزم حزام
ويفتر ابين المجالس كل الايام
رغم صدره المنكسر ويانه لطام
وتنزف بكثر اللطم اثار السهام
يلطم يناس بلوعه
خله ايده فوك ضلوعه
للزهره حمره دموعه
يافاطمة المظلومه

عظم اجرك نادوا خل يسمع صداها
للعرش خل توصل اليرضه لرضاها
امصاب محسن ياخلك كاسر كفاها
تبجي يم الباب ابو اليمه لكاها
حاضر عزانه اليله
شمسوي جرح بحيله
كسر الضلع يبجيله
يافاطمة المظلومه

المجلس اعلى الزهره ابو ايمه يحضره
والمصيبه النفس بالكوه يجره
حسين اجه بلا راس والدم فوك نحره
يلطم ومتهشمه ويلي عضام صدره
كاتلته حيل الحركه
وريته بهظم مختنكه
ضاع النفس بالشهكه
يافاطمه المضلومه

والله ياناس شعظمها دمعة العين
منك بقاروره ياخذ بيها الحسين
دمعه وحده اعلى الزجيه بالبراهين
تنطفي بيها جهنم والبراكين
بمجلسها صوت الونه
ونجاوب السألنه
يعني كبل للجنه
يافاطمه المضلومه

حسين يسمع باللطم آهات صدرك
يأشر بجفه الحبيب يسجل اجرك
يالنذرت سنينك بهالخدمه عمرك
شترجه منها وعالي يم حسين قدرك
كلشي الحبيب انطانه
برتبة ملك سوانه
اليله ينادي ويانه
يافاطمة المظلومه

نزلت املاك السمه وياكم يلطمون
رادوا مراد وخذوا من دمع العيون
مدوا الجنحان بالمنبر يمسحون
شهالكرامه البي وللمجلس يحضرون
الكسر ضلع يلجمها
صوت السمه يكلمها
يعني شعظم مأتمها
يافاطمة المظلومه

تمت
احمد الخفاجي

‏مقطع صوتي من احمد الخفاجي

دفنت سنيني والعشره
واموت بحزني الف مره
يويلي بليل الاحزان ..صرت لروحي دفان

اعاين عالنعش وعيوني هماله
بكلب مكسور حال الفاركج حاله
من عرجه الكلب بيده الهجر شاله
مدري انعى على روحي مدري انعاله
انه الذاك الدفن روحه
غريب بصحرة جروحه
وعليه الهجر ماهان ..صرت لروحي دفان

مشيت بليل والدمعه بطرف عيني
حسره تجيبني وحسره توديني
دفنتج باللحد يازهرة سنيني
ارد شلون گلبي ما يخليني
ميته بعيني ما جنها
سنيني وياها دافنها
وارد بكان ماكان .. صرت لروحي دفان

تره الفارك عزيز يعاشر الدمعه
ويتخوصر لحد ما ينكسر ضلعه
مثل الماي من يتبده شيرجعه
ليش الميت يسمع وانت متسمعه
اريد اشكيلج البيه
احسها عيوني معميه
واتوجه على حيطان .. صرت لروحي دفان

وكفت گبال كبرج والدموع تسيل
بظهر مكسور اجيت ومني راح الحيل
يم حسين راوتني الليالي الويل
وحتى الليل هم شطوله صار الليل
علي الماتنشف دموعه
عليج مكسره ضلوعه
دمعي بخدي نيشان .. صرت لروحي دفان

ارد محني الظهر واتوجه بالحسره
انه المكطوع كلبه بشوغة العبره
وي ضلعج احسها ضلوعي منكسره
انه اول بشر خلص دفن عمره
ليش اليدفن اعزازه
يرد بروحه جنازه
بيده القلع بيبان .. صرت لروحي دفان

شيخلص العمر والمدمع يلالي
وارد للدار من ام الحسن خالي
شيصبرني واشوفن زينب گبالي
تنشدني عليج وينشده بالي
يبويه تكلي وين امي
وانه بثكل الجبل همي
نار بكلبي بركان .. صرت لروحي دفان

تمت
احمد الخفاجي

الى الحسين || الملا حازم الكعبي ||#زيارة_الاربعين_1446
https://youtube.com/watch?v=4EGLSUM39PU&si=pfmXKnT9YV4WZvk7