قصائد السبي

خويه عباس..وين سيفك وينه
خويه عباس..انهض وحامينه
خويه عباس..السوط لاح اسكينه..الحگ النه
....
ها يخويه يابو فاضل اسمع الصوت
باچر بسوگ الاجانب زينب اتفوت
اختك وتسمعني ابچي الدمعه بسكوت
وشكثر متمنيه روحي عگبك تموت

گوم ليه..يالوفي وحاچيني
گوم ليه..امسحها دمعة عيني
گوم ليه..خويه وعدك وينه..الحگ النه
.........
حضّروا ناگه هزيله ورادوا اركب
وگوه صعدني العليل ومدمعه صب
يالعفت اختك وحيده ابغربه تنحب
ما خفت انت عليها تموت زينب

تدري موتي..آنه من ما اشوفك
تدري موتي..بيوم روحي تعوفك
تدري موتي..بغربه يا والينه..الحگ النه
......
خويه ارخصني مشينه وعينك تشوف
وبيدك اوميلي ولو ما عندك اچفوف
شسوت بجسمك يبو فاضل هالاسيوف
كعبه واعليك الرماح المحربه اتطوف

حيل اعذرك..وانت هم تعذرني
حيل اعذرك..ما تجي وتحضرني
حيل اعذرك..وانت ما ناسينه ..الحگ النه
......
خويه باحبال ال اميه چتفتنه
وعينك تشوف السياط الورمتنه
شكثر بدروب السبي يالغالي متنه
وعگب عينك تدري اهل الشر سبتنه

وانسبينه..تدري هاي اخبارنه
وانسبينه..عگب ذيچ ديارنه
وانسبينه..والغرب تحدينه....الحگ النه
.......
شكثر من حبل الزجر عالگاع طحنه
لحّك النه يابو فاضل صوت صحنه
شلون محنه الصرنه بيها شلون محنه
ناس ما ترحم يخويه وياها رحنه

بيمن انلوذ ..يالگمر يالغالي
بيمن انلوذ..وانت راسك عالي
بيمن نلوذ..واليسر تالينه...الحگ النه
......
خادم الحسين عليه السلام
حسام ناجي الحلي

قصيدة ايام السبي على طور قصيدة (يا اهل العالم) الملا محمد الجنامي

نيران الغربه.. وعين ..الشامت.. كل صوب وكتر
آ خ شچم ساعه ..اباب.. الساعه.. زينب تنتظر
بغربه تاليها...بقت.بقت.بقت
يا ويلي اعليها... .بقت.بقت.بقت...زينب تنتظر
.....
ليل وخرابه..طف ومصابه..مرّتها واجروح السبي صعبه ورهيبه
بنت الاطايب..تسكن خرايب..تطيح السمه فوگ الارض لا مو عجيبه
عگب العشيره ... تمشي اسيره..دروب السبي وجمر الهجر يسعر لهيبه
يستقبلوها...يشتمون ابوها..شصار ابگلبها وهيه وحّدها غريبه

يا ليل اليگضي هموم ..تدوم ..اعله الشافت هظم
كونك ما تخلص حته.. بسكته.. المدمعها تضم
واجروح البيها ...بقت.بقت.بقت
يا ويلي اعليها... .بقت.بقت.بقت...زينب تنتظر
......
ذيچ الاميره..صارت اسيره...وبولية اجناب ومشت ديره بعيده
عين الشماته..ذبحت بناته...لحسين اخوها وهي بالغربه وحيده
تنادي الكفلها..خل يفزعلها...وتدري بحميته وغيرته ابن الصميده
قدم ادينه..وما ضمها عينه...ولو عنده ايد ابن الفحل هم ينطي ايده

عباس الغالي ..چفوفه..وروحه..للحره فده
بالطف تذبحه..تهضمه ..الكلمه...حسينك وحّدّه
واخته يدريها....بقت.بقت.بقت
يا ويلي اعليها... .بقت.بقت.بقت...زينب تنتظر
......
آ يا صبرها..شضل ابعمرها...ماتت سبي ونار الخيم تچوي ابگلبها
الليل ابضلامه..تحمي اليتامى...مساهر جفنها وهم نست همها وتعبها
تشگي ألمها..ومحد رحمها..عدها عليل وإلمن تسولف غربها
فوگ الهزيله...تمشي العقيله..وتتنطر اخوتها ومدامعها تصبها

بالدمعه التچوي..طاحت ...صاحت...وين اهل الحمه
خل تفزع ليه..اطفالي..ايتامي..ذابحها الضمه
بولية سابيها...بقت.بقت.بقت
يا ويلي اعليها... .بقت.بقت.بقت...زينب تنتظر
......
ناس السبوها..شگد وگفوها..باب المدينه تأخروا ما دخلوها
عمدا فعلهم ..حضروا طبلهم..بعيد وفرح زينب سبيه استقبلوها
الزيّد حزنها .. سمعت باذنها..دخلوا الخوارج عالامير وچّتفوها
وذاك السلبها..يحرگ گلبها...بسوطه ضربها ورد ضحك يم راس اخوها

تلهب جمرات..الحرگه..وفرگه..لمن شافته
راس حسين ايهل ..دمه..ودمعه..زينب عرفته
مچتوفه اديها ...بقت.بقت.بقت
يا ويلي اعليها... .بقت.بقت.بقت...زينب تنتظر
......
وين اليصلهم..وينادي حيهم..حيهم يهل زينب مشت وابلا عشيره
عگب الكفاله..بنت الرساله..تصعد هزل حيف شكثر صعبه وچبيره
من اهل المحنّه..شگد إتمنّه..لو بس اثر يوصلها من ذيچ الحصيره
يوصلوها ليها..وتبچي عليها..وهلبت تحصل منها لو قطعه زغيره

من الحصير..اتمنت..رادت..ينقلها الزمن
اللمت اوصال.. الغالي ..الوالي..والبيها اندفن
ولو وصلت ليها...بقت.بقت.بقت
يا ويلي اعليها... .بقت.بقت.بقت...زينب تنتظر
......
خادم الحسين
حسام ناجي الحلي

لسان حال الحسين يوم العاشر

الله ويّاچ يزينب الله ويّاچ
شلون أنساچ يخويه شلون انساچ
........
الله ويّاچ ابدمع ودعيني
يا عزيزه گلبي يا ضي عيني
انتي تدرين شكثر تآذيني
من اشوف اعيونچ تحاچيني

راسي مذبوح واشوفچ راسي مذبوح
عيونچ تنوح عليه عيونچ تنوح
.........
چنچ تگليلي لا تنساني
وهالكلام يزيد نار احزاني
انتي زينب يا نبض شريانه
واحله كلمه تنلفض بالساني

لا تضنين اعوفچ لا تضنين
انتي بالعين مكانچ انتي بالعين
.......
لا تضنيني ينسمة فاطمه
عنچ يشاغلني يا خويه الضمه
صح يزينب جسمي متخضب دمه
لچن روحي اعليچ حيل امهدمه

صدك مذبوح يخويه صدك مذبوح
اعليچ ينوح دليلي اعليچ ينوح
........
شكثر تعصر گلبي يالحره اشكثر
وانتي ما ترضين گلبي ينعصر
لا تگليلي اروحن لليسر
هاي اعظم من وگعتي من المهر

لا تگولين اروحن لا تگولين
شگد تهدمينه حيلي شگد تهدمين
.......
بالصبر شدي الگلب يا بت علي
واسأل الله ألم گلبچ ينجلي
شگد هضمني الگال اختك تنولي
بسبب هاي الكلمه ونّي يعتلي

وانه مطروح انوحن وانه مطروح
اسمع تروح أخيتك اسمع تروح
.......
خادم الحسين
حسام ناجي الحلي

قصيدة ليلة الوحشه لهذا العام من محرم 1446هـ
وهذه القصيده للسنه الثانيه تكتب على طور (اصبر ينعش القدر)للرادود كرار ابو غنيم

عذبني ليل اهدعش ...خويه
يذبح ونين العطش...خويه
هاك اشرب ماي العين...بس اگعدلي يحسين
يذبح ونين العطش...خويه
.......
عن ليل اهدعش اشكيلك شويه
اصعب ليل هذا الي سده اعليه
يخويه ادريها ونْتك ليش مخفيه
اخوتك عالثره اجساد مرميه

هالليله نار الهجر...تلهب
الله يشمس الظهر ...تلهب
دليني اجروحك وين......بس اگعدلي يحسين
يذبح ونين العطش...خويه
.......
اول ما بدت هالليله يبن امي
اجيتك واعثر بأحزاني وابهمي
لگيتك عالثره متگطع ومدمي
وگلت يچفوفي بأوصال الگلب لمّي

گلبي احسه وگع...بيدي
وجسمك يخويه انجمع ...بيدي
اجمع والحيل يلين...بس اگعدلي يحسين
يذبح ونين العطش...خويه
.......
اجيتك وآنه حيلي ابطيحتك مهدوم
وابضلع امي حلفتك اليه تگوم
ما معلومه يبن الزهره ما معلوم
عله ساعه واروح ميسره ويالگوم

ساعه واعوف العمر...يمك
يچْتفْني حبل اليسر...يمك
عنك باچر ماشين...بس اگعدلي يحسين
يذبح ونين العطش...خويه
.......
عرفتك من ونينك يا بعد اختك
انت حسين يالما لحضه فاركتك
تعثرت ابجثث ويلادي والحكتك
لچن بآخر نفس يبن امي ودعتك

بآخر نفس هالمسه...شفتك
ومن العطش يابسه... شفتك
أسْمَع بس صوت اونين...بس اگعدلي يحسين
يذبح ونين العطش...خويه
.......
دليني يخويه يا جرح اكثر
وجّر بالگلب نار الحزن وجّر
حسّيت ابدليلك يالوفي أشّر
مره اعله بو فاضل مره عالاكبر

مره نظر للخيم...گلبك
واشكد تحمل ألم...گلبك
ما ترحم نار البين...بس اگعدلي يحسين
يذبح ونين العطش...خويه
.......
جيت اترخّصك وبروحي اضمّنّك
باچر لليسر راح ارتحل عنّك
ولان طبعك غيور وحيل اعرفنّك
خلص ليل اهدعش بس ما خلص ونّك

ونّك ولا ينگطع ...صوته
وكسر الضلع ينسمع...صوته
وابجسمك شمخلين...بس اگعدلي يحسين
يذبح ونين العطش...خويه
.......
خادم الحسين
حسام ناجي الحلي

ميمر... تطبير

فاض الصبر.. حد العمر
حي على... فرض الطبر
مو هالسنه من العام... محضر الكفن والقامه
........
مو هالسنه محضر اموري من العام
لجل الحسين اني واخوتي الخدام
نقسم لبو اليمه دمه تسيل الهام

فدوه اله... كل المله
هالمنذبح... ما اجمله
معشوگي واجمل معشوگ وشمحله هاي ايامه
.........
محلاهن ايام العمر لو صارن
بخدمة ابو التسعه الطهر يندارن
اجمل شعور جروحي من يتجارن

يجرن دمه.. لجل الضمه
اطلب رضه من فاطمه
يا بختي كون الزهراء هي التضمد الهامه
........
هنيالي لو ام الحسن تحضرني
ويوم القيامه بهالوضع تنضرني
غير الزچيه ياهو اليعبرني

درب الخلق... من العلق
شعره الدرب لا بل ادق
فوگ السراط الي يفوت البالخدمه اقوه اجدامه
.........
تثبتني دوم اعله السراط الخدمه
زنجيلي والتطبير اكبر نعمه
محسود يم فاطمه اليكتب اسمه

من الذهب... اسمه نكتب
بهذه الدرب شفت العجب
تاجر فقير بهالكون يتمنه من خدامه
........
شفت العجب والحگ اسولف عنه
للخدمه كل هاي الخلگ تتمنه
عدها طريق حسين هو الجنه

احلى بعد... من الشهد
لجله تره كلشي نوجد
محترگه بس يا هل الناس تفيي الاكوان اخيامه
.........
خادم الحسين
حسام ناجي الحلي

استشهاد الامام الصادق عليه السلام

صادق الدين.. يا امام المذهب ومحيي البراهين
صادق الدين.. اليوم باوداعك تهل اجروح الحسين
شتذكر يا مصيبه.. يالعمتك غريبه... صادق الدين
......
يا سادس وحي القرآن والعصمه
يا نور السماء النوّر العتمه
يمن گلبك جروح العاشر اتهضمه
رحت وشچم جرح لحسينك اتلچمه

ما ضن يطيب... يبو الكاظم ذاك جرحك ما ضن يطيب
ما ضن يطيب... الخلّه حتى براحة ايدك ينبت الشيب
جرح ابلا طبيبه... يالعمتك غريبه... صادق الدين
.........
عنك سولِفَت يالصادق الايام
خدّك عالتراب اتوسده من اتنام
وبتراب ودمع بيدك تعَفْر الهام
عسى اتواسي الغريبة الي انسبت للشام

من تذكره... يوم الحسين وتهلْ ادموع حمره
من تذكره... شلون خيل العده داسنّه اعله صدره
والجثه سليبه... يالعمتك غريبه... صادق الدين
.........
عسنها انشلت ايده البالحقد سمّك
وملعونه العصابه الزيّدت همّك
يالبآخر نفس والسم جره ابدمك
وتبچي اعله الزچيه فاطمه امك

تذكر الباب... وانت بين ضلوعك اتشب نار المصاب
تذكر الباب... ومدري من يا ضيم گلبك سيدي ذاب
گلبك يا نحيبه... يالعمتك غريبه... صادق الدين
.........
سؤال من القلوب الي اسْكَنِت بيها
الشهاده عادة اهل البيت ندريها
لجن حرگ الخيام وسبي اهاليها
هاي شگد تحمّل گلبك اعليها

تصبر شلون... وانت جمرات الخيم نامت بالعيون
تصبر شلون... وبأذنك الحد موتتك تسمع يشتمون
شهالغصه الرهيبه... يالعمتك غريبه... صادق الدين
.........
رغم الرحمه دربك نهجك اسلوبك
چف اهل الغدر طال وگرب صوبك
حرگوا دارك وهم احترگ ثوبك
واكيد اهنا ذكرت حسين محبوبك

رغم الاحسان... لاچن الضدك ثبت من اصله شيطان
رغم الاحسان... وسط دارك شبّت من اچفوفه نيران
شگد فتره عصيبه....يالعمتك غريبه... صادق الدين
.........
خادم الامام الصادق عليه السلام
حسام ناجي الحلي

#الليالي_الفاطمية طور قصيدة (لون وداع) الرادود كرار ابو غنيم

هاي اول مره ادخل داري وما الگاج
يالرحتي وخذتيها سنيني كلها وياچ
هالدار اخلافج يالزهره
كل لحضه اتذكرني ابذكره.... وما الگاج
.......
دار ابدونچ اختلفت معانيها
واول مره اطبها وانتي موبيها
الحزن خيم يبعد العافيه اعليها
وراحت عافيتنا من تركتيها

هم تدرين ابحالي اخلافچ يلهب نار
ميت بس عايش بالقدره من الصار
ميت بس عايش بالقدره
كل لحضه اتذكرني ابذكره.... وما الگاج
.......
عليچ ادموع عيني يا نظر عيني
ارجعي البيتچ وخل تزهر اسنيني
واذا عن حالي يالزهره تسأليني
عگبچ صارت ادموعي التسليني

ردي الدارچ والاولادچ يم حسين
كلسا واحد يسأل أمنا راحت وين
اسكت بس ابگلبي جمره
كل لحضه اتذكرني ابذكره.... وما الگاج
.......
هم تدرين يا زهرتنه هم تدرين
ولدچ يالزچيه اهواي مهضومين
شيصبر الحسن شيهدّي عين حسين
وزينب عدها امل من گبرج تردين

حتى اني وياهم متأمل بس شلون
وانه ادري الماتوا يالزهره ميعودون
يگولون الكل غايب عذره
كل لحضه اتذكرني ابذكره.... وما الگاج
......
يمّ البيت يا بيت الاطبنّه
وعگبچ يا عُمر هذا الاعيشنّه
تعاي وشوفي گلبي الما سكن ونّه
تعاي وشوفي جفني الما اغمضنّ

يا ليل ايمرني يالبضعه وعيني تنام
وانه مگضّي الليل آلام اتجر آلام
گلبي اخلافچ شنهو ايصبره
كل لحضه اتذكرني ابذكره.... وما الگاج
......
شسولفلچ عگب ما رحتي عني اشصار
عگبچ لا لي ليل ولا نهاري انهار
يعافيتي الگضت بالباب والبسمار
من نيران بابچ گلبي شب ابنار

يا جرح اسنيني العانيته وصعبه ايطيب
يا شمس الله الضوّة بيتي وتالي اتغيب
غيابچ مُر يا طيبه العشره
كل لحضه اتذكرني ابذكره.... وما الگاج
......
خادم الزهراء عليها السلام
حسام ناجي الحلي

موشح.... استشهاد الامام الحسن العسكري

يا أبو المهدي شعظم هالفاجعة
ناحت اعليك السماء السابعه
.....

يا امان الناس يا كهف الامان
مو فقط ذاك الزمان ابكل زمان
يا تَتِمّة (قل هو) بختم الاديان
وحادي عشرة رحمة الله الواسعه
....
گبل التلاثين ما تم لك عُمر
وصوّبك يالعسكري سم الغدر
يا سليل الهادي والعتره الطهر
يوم فگدك چنه يوم الواقعه
....
مو فقط سامره لبستلك سواد
البالسماء السابعه علنت حداد
تراب بابك للشفه هو المراد
وقصة الطاعون حجه ورادعه
.....
جدك الصادق نقل هالمسأله
(لو ذبح لو سم نهايه امسجله)
وكلها هينه بس مصيبة كربله
كل مصايبكم عليها دامعه
.....
انت عندك للي نعشك يحضره
وعندك الي يشيّعك للمگبره
لجن عندك علم بإحسين اشجره
جثّته فوگ الرمال امگطعه
....
واليزيد اجروحك ابسجن الالم
حگه گلبك لو تفطر وانهشم
فوگ عمتك زينب احترگت خيم
والاشد لارض الشماته طالعه
.....
من ظلم ذيچ الطغاة الظلمتك
مو فقط سجنك تره وسم چبدتك
تمنع بكل حقبه عنّه ازيارتك
ما درت هذا الدرب ما نگطعه
.......
خادم الامام العسكري (عليه السلام)
حسام ناجي الحلي

استشهاد الامام الحسن العسكري عليه السلام

المهدي بحزن هاليوم... عالوالد المسموم
جروحه اتجدد... ما ضنها تنعد... عالوالد المسموم
........
اليوم الدنيا ظلمه من السده اعليها
ويّه العتره ما تخلص مآسيها
ابچم لوعه ايتجدد حزنه مهديها
ولابوه العسكري دمعاته يجريها

يجري الدمع وينوح.... يوميه عنده اجروح
وجروحه تمتد... ما ضنها تنعد... عالوالد المسموم
.......
يعين الباري گلب المهدي هالليله
فاگد والده والمدمع ايسيله
خلص كل حيله ما ضل بعد من حيله
و بعد ما ضل ابو وهمومه يشكيله

راح الابو عنّه... ضل يجذب الونّه
واحزانه تشتد... ما ضنها تنعد... عالوالد المسموم
.......
بالسم گاضي والد مهدي هالعتره
وبگلبه دوت ما تطفه هالجمره
الفاگد والده اعله الفرگه شيصبره
بالاحزان والهم يگضي كل عمره

يگضي ابدمع والاحزان... واملاهب النيران
متوشح اسود... ما ضنها تنعد... عالوالد المسموم
.......
تشهد چم روايه اواضحه الغايه
گلبه من المآسي امحمل هوايه
حگه للمجالس يعتني اعنايه
ومن قرايه يطلع يگصد قرايه

يعني المجالس هاي... حاضرها هو هواي
يگصدها مگصد.. ما ضنها تنعد... عالوالد المسموم
.......
أمل ويانه يحظر يوسف البضعه
ويشاركنه بعزانه ويذرف الدمعه
وصوت اهل الضماير لابد ايسمعه
ولجلهم يدعي يگرب موعد الجمعه

لجل الذي يحظرون... بالمجلس ويدعون
القائم محمد... ما ضنها تنعد... عالوالد المسموم
......
خادم الامام العسكري (عليه السلام)
حسام ناجي الحلي

قصيدة.... استشهاد الامام الحسن العسكري (عليه السلام)

نور الله نورك... ما ينطفي
وحزن اليزورك... ما ينطفي
يالعسكري المظلوم... بچف الغدر مسموم... يالعسكري
.......
يا نور السمه وما ينطفي نورك
ويا ابو المهدي شامخ للنجم سورك
رغم ما جان يُمنع واحد يزورك
الاقامه الجائره ما قللت دورك

رغم اليعذبك... طول الزمن
عالشيعه گلبك.... طول الزمن
يا گلبك المآلوم... بچف الغدر مسموم... يالعسكري
......
يا حادي عشر حجة إله الكون
يا وارث صفات الهادي والمضمون
بني العباس فدوه الشسعك يروحون
يخسه الگال همّه النورك يحجبون

زمره دعيّه... هالعادتك
تعادي الزچيه... هالعادتك
وباقي الحقد لليوم... بچف الغدر مسموم... يالعسكري
........
بني العباس تذبح كل محب زارك
و بجيوش الظلاله حاصرت دارك
يالتنعه الزچيه ليلك انهارك
والزينب ابد ما هوّدت نارك

عمرك نهيته... حسره و دمع
الزينب گضيته... حسره ودمع
عمرك گضيته اهموم... بچف الغدر مسموم... يالعسكري
........
يا عمر الشباب الگاضي بالغربه
والسم اللعين الچبدك يذوبه
حياة المنتظر عگبك صفت صعبه
والفاگد ابيّه ينشلع گلبه

گلبه ابغيابك... شاف الهجر
المهدي ابمصابك... شاف الهجر
والشكوه للقيوم.... بچف الغدر مسموم... يالعسكري
........
رغم الحاقد الما ينوصف جوره
گبرك صار قبله الوادم اتزوره
باب الحاجه انت واضحه الصوره
كلمن زارك ورد روحه مسروره

كل التگصدك... مستبشره
حاجتها عندك... مستبشره
بصحنك گلبها ايحوم.... بچف الغدر مسموم... يالعسكري
.......
خادم الامام العسكري
حسام ناجي الحلي