كلما دا يمشيّ الوقتَ يكبر بداخليّ مفهوم انُ البيت مو بس مكان تگعد بيّ بگد ما هو مساحةَ أمان روحانيّ الك ،ملجأك من الخوف والحضن الي يحتويّ مشاكلك ومشاعرك وهمومك وضحكتك ،الضحكة الحقيقية التي تطلع من الگلب وانت بنص اهلك ولمن تتعاركون على مسلسل أو على الأكل او شغلة تضيع ،وأعتقد انُ من سنوات طويلة بسبب ركضة الأيام فقدت هالمشاعر كلها لكن قبل شوي لمن صافنة على لمتنّا والسوالف دَمعتْ وما اجى بالي غير ياربّ لو الي نصيب شي يوم ويكون عندي بيت فخلي ينمليّ بنفس هالحُب ونفس الوضوح ..لان كلما دا اكبر اتأكد انُ شي يورثه الإنسان بحياته غير العائلة وفعلًا "أرثَ المرءْ عائلتهَ "فالحمدلله ياربّ على نعمة بيوتنا الدافية المتروسةَ حُب ولَهفةَ وأمانْ ♥️

علمنيّ أحبّ اكثر ياربّ بعفويتيّ وهالگلب ما يكره مثلما تربيتَ وكبرت ،علمنيّ انُ شما حتكون الظروف أبقى حنينةَ ومخليةَ مخافتك بين عيوني وانُ لو مهما صار وقستَ عليهّ الأيام رحمتك باقيةَ ولطفك جبير ومو ضروري انجبر من اول وگعة بگد ضرورةَ شون أتحمل واصبرَ لحد ما تنسينيّ شلونْ وگعت وشنو حسيتَ ،علمنيّ يارب كل هذا وأكثر لانكّ نورَ لبصيرتيَ ويقينّ كافي حتى أكمل الطريق .

لان مو بهل سهولة
تعزَ على الإنسان مشاعرهَ والذكريات وكل كلمة تنگال حتى لو شكَ بمصداقية هاي الأشياء كلها فراحَ يبقى متمسكَ لا ارادياً بشعور ما
شعور غريب يحسسّهُ انُ بعد اكو أمل وعليه يعيشَ .

كلما دا يمشي الوقت دا أحس نفسي أصغر مو بالعمر وأنما بكمية الاهتمام الي جنت سابقاً أنطيها للمواقف الي حواليه ولليّ يحاول يضوجني ودا أحس هل شي يشكل فرقَ بنفسيتي وبالتالي صرت أعرف لأي كلام ممكن اركز ولأي كلام اسمع وامشي وهل درس يمكن تعلمته متأخر بس سبحان الله شگد أثره جبير عليه فأي ممكن اكو أشياء تنطيها النا الحياة بوقت ما متوقعيه إلا أنهُ المُناسب حتماً النا .✨?

گلبَ راضيَ، هادئ ،مُبهتج ومَمتنْ .?

بكل مرة جنت اقرأ بيها عن النجاح والحُب والأشخاص الي يحجون عن العوض ورا الخسارة والراحة بعد الألم والدروس الي يطلعون بيها من بعد كل تجربة اگول زين واني !شوكت يجي اليوم الي احجي قصتي واگول اي اني المُخرج واني البطلة الي تگول لنفسها برافو حاولتي ونجحتي !وما انكر خسرت هواي ،شعور ،طرق ،ليالي ،أماكن ،لحظات دافية ويمكن حتى بأيام معينة وصلت مرحلة اخسر بيها نفسي بس رغم كل هذا جان اكو شي يخليني أعيد التفكير حتى أعرف بأن كل الراح مو خسارة ولا ضمن مفهومها وحتى المشاعر الي راحت هي جانت دفع بلاء عني مثلما يگولون وأن تأذيت ومن سنة تقريباً كلما ارجع للكاميرا الي وثقت كل شي خلف الكواليس الگاني كتبت قصة طويلة تستأهل تُقرأ وأستاهل أبوس گلبي لان بقى شجاع وگدر يكملها ..فأي يمكن كل القصص الي نحلم تكون النا يجي يوم ونصير احنا كَتابها ومُخرجيها وأبطالها بس بطريقتنا وبالوقت المًناسب الي كاتبة الله لدرجةَ يخلينا نگول معقولة اني دا أعيش العوض الي حلمت بي !✨?

??
يا هلا يا هلا بيكم ببيتي الصغيرون
شو عندي فضول أعرف مين دتعرفون القناة؟

بهاي الفترة عشت هواي مشاعر متضاربة أغلبها وغالبية الوقت دتروح بالنوم بس كل يوم حرفياً ألگه مسجات من صديقاتي، من أهلي الي اني بنصهم، من بنات هنا على قناة بيها كومة كلام حُب ودافي، كلام يخليني أحس نفسي شگد محظوظة وشگد اكو ناس تستاهل أبقى قوية علمودهم وعلمود نفسي وكل الي دا أذكر روحي بي بهل أيام هو أنُ عديتي الاصعب يا سوجي فمن غير المستحيل ما تعدينَ هاي هم وصدقاً كل كلمة انحجتلي خلال هذا الوقت خلتني مؤمنة إيمان تام بأن فتراتنا الصعبة حتسهل وتهون مشاعرها الما حلوة لمن يكون حوالينا ناس حنينة وتذكرنا شگد احنا نستاهل الزين وما يسوه نزعل على شي لاكثر مما يستحق فأي يا اصدقاء هذا تذكير صغيروني حتى نعيد النظر بدوائر علاقاتنا ونعيد المُسميات هماتين. ?✨♥

تدرون هل أيام ابد مو ماشية وياي عدل بس مع ذلك دا اگول الحمدلله ع كل شي وأحد الاشياء الي أكتشفت أنها تخفف عني التفكير والقلق هي غسل الاشجار والبارحة لمن جنت دا انظف وكفت وبقيت ارش كل الحديقة بالميّ بحيث اخذت ربع ساعة أو اكثر مني والشي الوحيد الجان شاغل بالي…

قبل سنة من هالوقت جانت مجرد محاولة وخطوة كلُش صغيرونة وغامضة اليوم انجاز وبنص نجاحات ما تنعد فأي مصير كل الخطوات الصغيرة الجانت بعيدة أنجازات چبيرة نفتخر بيها وأفتخر بيج يا سوجي. ✨??