( الشخصية النرجسية )
اضطراب يصيب الرجال اكثر من النساء ويؤدي الى زيادة التقدير للذات وقلة التعاطف مع الآخرين وغالباً ما يكون عايش دور الضحية او دور البطل
دور الضحية : دائما يكره حياته ويريد الناس تتعاطف ويا
دور البطل : هو انو يتباهة بانجازاته واحياناً ما تكون وهمية
وميتقبل الانتقاد لانو يشوف نفسة بمكانه اعلى من الأخرين ودائما يتجنب الأنتقاد بشتى الطرق

اعراضه : شعور بالتمييز انو اني شخص استاهل اكثر واحسن من غيري وانو هو ميشبه الأخرين خلب انطيكم مثل عن النرجسي ، مثلا شايفين حقل بي ورد ابيض ، النرجسي هو الوردة الحمراء الوحيدة الي بالحقل واذا ما كان كذلك حيصبغ نفسة بالاوهام
يريد الناس تمدحه وتميزه بدون انجاز ملموس واغلب الأشياء الي بحياة النرجسي حتكون وهمية كشخصية عظيمة وهمية لتمييز نفسه عن الآخرين وحتشوفو دائماً هو الشخص المثالي الشخص الي يدور على شريك حياته بالمواصفات الي هو مصطنعها لنفسه
، راح يحاولون دائماً يكونون مركز الحديث ويريدون الناس تحجي عنهم ويحاولون يقللون من قيمة الأخرين، ويحاول دائماً يبين نفسه لطيف وأسلوبه حلو بس الواقع هو العكس، مراح يجذبون بس على للآخرين، راح يجذبون على نفسهم حتى يحسسون نفسهم بالأمان ويصدگون انو هم عدهم انجازات

سؤالنا هنا : ليش اصلاً تصير شخصيتهم هكذا ؟ ربما يكون السبب من الطفوله او من الأهل او ربما المدح الزائد او الذم الزائد بالطفوله ، او تكون عوامل وراثيه ومتعلم على هالشي ، بعض الناس يشوف هالشي ايجابي ولكن هو العكس لان راح تتراكم حقائق الواقع بسبب الرفض الدائم للواقع والعيش بالخيال وبالكذب وراح يوصل لمرحلة الأنهيار الكامل لاحقاً

الشخص النرجسي دائما يروح للأشخاص الفاشلين بحياتهم حتى يتلاعب بهذا الانسان ويحسسه انو هو احسن منه ويحتقره دائماً ، ابتعد عند الشخص النرجسي ابتعاد تام ولتخلي فكرة انو تدخل بحياته حتى تصلحه لان مراح تگدر بسبب انو هو ميحبك هو يحب نفسه هو يريد اهتمامك يريد يحسس نفسه بالأمان بدون ميحسسك بالأمان يريد الجنه لنفسه فقط وبسبب كذبه راح تتعلقون بي لان راح تشوفون الغلاف الخارجي الي صابغه بالانجازات والاوهام المزيفة وحتتعلقون بي اكثر لان حيشوفكم انو هو أعلى منكم ، كل علاقة بيها مشاكل ولكن الشخص النرجسي اذا سويت مشكلة ويا راح يلجأ للصمت العقابي يطلعك الغلطان دائما حتى اذا هو الغلطان يگلك بسببك لان انت خليتني أغلط وبسبب دور الضحية حتتعلق بي وتتقيد وتخاف انو يتكرر هالتصرف والمشكلة

شلون ننهي علاقتنا بـ شخص نرجسي ،
بالحالات العادية تگدر تنفصل عنه بشكل طبيعي اذا كان يرفض الواقع
ومن تطلع من حياته راح تخسر هواي اشياء لان انت عشت ويا بنفس الاوهام لازم تبدي من جديد راح تتعرض لمشاكل راح تتمنى انو يساعدك بس لازم ندرك انو هالشي مجرد وقت حتى اذا شخص عرض عليكم علاقة حتخافون انو ترجعون لنفس الدوامة حتى اذا كان ويه شخص طبيعي، لازم تتداركون هالشي لان مثل ما گلنا مجرد وقت، لازم تتخطون وتحاولون متصيرون نفس شخصيته لازم تلتفتون لحياتكم الشخصية

علاج الشخص النرجسي :
شگد ما ذمينا لازم ندرك انو هو شخص مضطرب وغالباً انو الموضوع مو بأيده لازم نتعاطف وياهم وندليهم عالطريق الصح ، صح احنه مو مسؤولين عن حياته وعن اضطرابه بس لازم نساعدة قدر المستطاع ، لازم نخلي يتقبل الواقع والمحيط الي عايش بي ولازم يتعامل بشكل جيد مع الأشخاص الي بمحيطه مثلا اذا كانت احد كذباته انو عندي سيارة نحاول نخلي يكول بعتها يعني مو نخلي يروح يگول للناس اني جذاب نخلي يتعامل بشكل صحيح مع الاوهام الي غلف بيها نفسه ويتقبل ذاته بشكل صح ?.

- أمك من تتمرض تاخذها لطبيب لو طبيبة ؟
- أختك من تريد تضرب ابرة تاخذها لممرض لو ممرضة ؟
- من تريد تتزوج زوجتك زوجتك تروح لأم صالون لو لأبو صالون ؟
- من تريد تاخذ اطفالك للروضة الي يهتم بيهم رجل او مرأة ؟
- مرتك من تريد تخيط ملابسها تاخذها لخياط لو خياطة !
- اختك وامك من تروح للمكان مقدس يفتشها رجال لو مرأة !

اذا كل هالشغلات الي يسووهن النسوان فغصبا ما عليك تقبل بعمل المرأة واذا ما تؤمن بعمل المرأة خلي عرضك بيد الزلم

ماخذين نظرة على البنات كأنه كل البنات مليونيرات ، منو ضحك عليكم وكاللكم انو البنات عايشات بنعيم وحياتهم عبارة عن ونسة ومكياج وسيارات وطلعات ، انتم تدرون اكو بنات لحد هسة محرومات من أبسط حقوقهن البديهية ، انتو تدرون اكو شي اسمة ظاهرة " تأنيث الفقر " تعني ارتفاع نسبة الفقر عند النساء مقارنة بالرجال بسبب تفكيركم الزفت مال ( المرأة ما تحتاج شغل وفقط الرجال من حقه يشتغل ) معقولة لهدرجة الإنسان يصير غبي ودماغه يتوقف ، زين انتو لما تكولون للنساء كعدو بالبيت ولا تشتغلون لان احنا أولى بالشغل منكم هم بمرور الوقت تستغربون او تنصدمون بعدين لما تشوفوهن يبيعن جسمهن للدعارة بسبب الفقر والاحتياج ملاحظة حتى لا احد يفهمني غلط اني مجاي اتعامل ويا هالنساء كـ " مجرمات " لا بالعكس اطالب بحقهن ، تره اغلب الي يرحن للدعارة يسون هلاشياء بسبب الفقر عاد اذا انتو من صدك مجتمع محافط ومتدين لا تعترضون على عمل النساء ومشاركتهن بالمهن والوظائف المحترمة الي تعتمد على الكفاءة والتخصص

اني مو لوكي ولا اتعاطف ويا البنات

بس ماشفت بيوم من الايام بنت نشرت ع الشباب وكتبت هيج ، دتشوفون كمية التخلف والجهل وطريقة الكلام ؟ حاليا احنه بـ 2023 وبعدنا مستمرين نشوف هيج عقليات متخلفة الى متى ! الى متى هالنماذج يتدخلون بأشياء متخصهم الى متى هالنماذج يعرضون عنصريتهم وحقدهم وكرههم بشكل علني على السوشل ميديا وكأنه شيء عادي وطبيعي جداً ! بكل بساطة يحجون بمواقع التواصل ومخلين صورهم ، ماكو قانون يعاقبهم لو اكو قانون جان انطاهم درس وجرة أذن حتى ميتكلمون ع البشر هيج ويحترمون نفسهم وينشرون محتوى هادف ومفيد وغير عدواني ، تتنمرون ع شخص بس لأن ما يناسب معاييركم الي محد مهتم الها !

شايفين الجاي الحار من يصبوا بالاستكان دائما يبقى فد فراغ شوية ليفوك ، هذا شكد ما شوية مقارنة بالباقي بس هو اللي يخليك تلزم الكلاص بدون متنجوي ، وهو اللي يخليك تاخذة من مكان لمكان بدون ميوكع وبدون متحترك ايدك ،، تقريبا حياتنة هيج مثل هذا الاستكان متروسة موت وكئابة وحزن ووضع مو زين بس اكو هاي الشوية اللي مخليتنة نعيش ، اصدقائنا ، اهلنا ، شغفنة بالاشياء اللي نحبهه وهواي شغلات لخ . هاي الاشياء اللي تخلينة نتأقلم ومن خلالها بس نكدر نحافظ على صحتنة النفسية وعزمنة اللي ديروح بلاش . هذا الشوية خلنتمسك بي ونحافظ علية اكثر .. لان كلما قل حننجوي اكثر ومحنعرف نعيش ابد?.

عيد أضحى مبارك
وكُل عام وأنتم بخير كل عام وقلوبكم تنبض حب وفرح كل عام والطمأنينة والسلام يطوق أرواحكم دامت ايامكم كلها اعياد تقبل الله منا ومنكم وجعلنا من ينظر اليهم الرحمن الرحيم فيقول “اذهبوا مغفور لكم” وعيدكم مبارك ♥️.

- خلي نفضفض شوي ونحجي بموضوع مهم الي هو موضوع المنشورات .
هواي ولد يجون بالخاص ويسألون انت ليش تدعم البنات وانت دائما مع البنت وليش منشوراتك اكثر شي ع بنات ؟
لا قناتي تمثل الكل تمثل الرجل وتمثل المرأة ومنشوراتي تمثل الفئة الأنثوية لكن بنفس الوقت تسلط الضوة على الرجل والتغيير الحاصل على شخصيته بهاذا الوقت
ومنشوراتي ابد مو ضد الرجل ولا عندي اي عداء اتجاهم لكن انتقد فئات معينة شوهت صوره الرجال بعين المرأة ومنهم " الخائن . المتطفل . الفاضح .
الرجال الواعي هو شريكنا وهو بداية كل شي اتمنى وصلت هلفكرة ♥️.

متزوجة ، مطلقة ، ارملة
ستظلين امرأة
لم يزدها الزواج كرامة…
لن ينقصها الطلاق أنوثة…
لن تخجل إن اصابتها العنوسة…
(الرجل أنت تكملين حياته كما هو يكمل حياتك)
وهو أيضا يحتاجك .. وليس انت فقط من تحتاجينه…
وانظري في ذلك لعضمة الله…
إن سيدتنا مريم أنجبت نبياً بدون أن يمسها رجل…
فهل سمعتي عن رجل أنجب طفلاً بدون إمرأة..؟
فكلاكما يكمل بعضهما البعض…
أكرمك وبك فلا تستحقري نفسك يا سيدتي?.

بصراحة ما اعرف كم جريمة تحرش وكم جريمة اغتصاب لازم تصير يلا المجتمع العراقي يبدي يقتنع بأنه اكو خلل بتفكيره ديساعد على حدوث هذه الجرائم
صار ضروري نراجع ثقافتنا المجتمعية و معتقداتنا عن العلاقة بين الرجل والمرأة و الطريقة اللي دنربي بيها كلا الجنسين لان هذولة بالذات هم اساس كل المشكلة
هم اللي ديجهزون أرضية خصبة للمتحرشين والمغتصبين وهم اللي كاعد يمهدون السبيل امام ارتكاب جرائم العنف الجنسي
يعني خلي انطيكم مثال يوضح الفكرة :
تخيلو ولد و بنات بعدهم صغار ومو كلش واعين على الدنيا كاعدين وية عائلتهم بكعدة عائلية وفجأة صار حچي عن موضوع التحرش و سمعو الكاعدين من كلا الجنسين من عمتهم مثلاً انه الضحية تتحمل مسؤولية التحرش الجنسي و انه
"هي لو محتشمة وثگيلة فـ محد راح يتجرأ يتحرش بيها بس هن يتصلخن و ينطن مجال للولد و بعدين يبچن لمن احد يتحرش بيهن"
زين برأيكم الولد و البنات اللي ديسمعون هيج حچي مسموم مراح يتأثرون ابد ؟
لا اكيد راح يتأثرون
الولد اللي سمعو هالحچي نسبة كلش چبيرة من عدهم راح يعتبر هالكلام ضوء أخضر لممارسة التحرش الجنسي مستقبلاً وحتى إذا هو ما طلع متحرش بعدين فراح يبرر للمتحرش ويدافع عنه لانه من خلال الحچي اللي سمعه من اهله و محيطه العائلي هو افتهم بأنه هو ما يتحمل اي ذنب لان الذنب كله حيوگع برأس الضحية
والبنات اللي سمعن هالحچي كلهن بلا استثناء اجتهن رسالة تهديد غير مباشرة مفادها :" عزيزتي البنية... أما بعد
اذا ما تلبسين حسب اللبس اللي اني اشوفه
'محتشم و اوكي'
و اذا ما يكون سلوكچ مطابق للسلوك اللي اني اشوفه
'سلوك بنية ثگيلة و بت عوائل'
فراح اتحرش بيچ و اعتدي على جسدچ و اطيح حظچ و بالنهاية اذب كل اللوم براسچ و اطلعچ انتي الغلطانة لان شخص آخر انتهك جسدچ"! الطريقة اللي ديرسم بيها مجتمعنا العلاقة بين الرجل والمرأة هي طريقة كلش غلط لان دترسخ فكرة انه عادي يتم قمع المرأة و إطلاق العنان لغرائز الرجل و هالنظرة تكون احد اسباب انتشار جرائم التحرش والاغتصاب بحق النساء عاد لمن نجي نريد نحارب التحرش والاغتصاب فلازم نركز على عدة أمور من ضمنها النظرة للمرأة و الطريقة اللي جاي تنرسم بيها حدود و شكل العلاقة بين الجنسين
وبالنهاية ، لمن نقلع الجذور الفاسدة ونقضي عليها ونستبدلها بمفاهيم و افكار صحيحة فكلشي راح يبدي يتغير بالتدريج ?.

- وبنهاية هذا اليوم احب اكتبلكم فد شي بسيط ، من تمر بفد شي صعب او أيام صعبة مو ضروري تكول ما اتحمل بعد ومعندي طاقة تذكر قول رب العالمين ( لا يكلف الله نفسا الا وسعها ) وتذكر غيرك بهذا الوقت ديعيش بوقت صعب ، غيرك توفاله شخص او فقد احد من اهله ، غيرك عايش بالشارع بهذا البرد ، وكل شخص ممكن تكون اله قصة حزينة ، حاولوا تغيرون واقعكم لا تبقون بنفس المكان ، ولتخلون الظروف حجة ، دائما حاولوا ترتقون بنفسكم لان نفسكم الها حق عليكم وامانة عدكم ، صفنو شوي وفكرو بوجودكم بالحياة مفيد واله اثر لو لا ، الله سبحان وتعالى منعم عليك بأشياء ما تحس بقيمتها الا من تفقدها فـ لا تستهين بحياتك كول الحمدلله دائما غيرك ضروفة أصعب ?.