قبله للأحرار يالكاظم صرت
بالسجن والقيد يوم اتحررت
.............؛
تاخذ الاحرار من سجنك عبر
يا امير الصبر من مثلك صبر
قدوة الأحرار تبقى بكل دهر
للظلم والجور ما يوم اخضعت

انت موسى الكاظم وانت الرشيد
يالصمودك كسر قضبان الحديد
يا ملك مسجون والساجن عبيد
سنين مسجون وفلا يوم جزعت

ما جزعت السجن لا ثكل القيود
صرت كل ليله تزيد من السجود
مع الخالق انت وفيت الوعود
واروع الأمثال موسى سطرت

سطرت اروع مصاديق الوفه
الك من حسين بطفوفه صفه
صاح لاجل الدين عالدنيا العفه
وانت لأجل الدين عمرك رخصت

رخصتها سنين عمرك والحياة
وما ردت فد يوم من ربك نجاة
كل بشر مسجون يحمل امنيات
من السجن يطلع وانت ما ردت

بينك وبين البشر ماكو قياس
تريد من ربك من الدنيا الخلاص
من محمد عندك وحيدر اساس
زاهد وما يوم لأجلك فكرت

انت لأهل الجور اكبر رافضي
يحكمك هارون لا ما ترتضي
هاي دنيا والها حد وتنكضي
وبالحشر تتجازه عن ما قدمت
..........................؛
علي فرحان التميمي

اللاهي ان جان ما نخدم ابو اليمه
ما نستاهل نعيش وهوه نشمه
.......................................؛
لأجل حسين ناذر فكري وقلمي
ومن غيره فلا معنى ابد لأسمي
حب حسين يمشي بروحي ودمي
وابيات الشعر ما تحله بس لأسمه

اسمك من اسمعه تنزل الدمعه
شما احضر عزاء وناعيك ينعه
اصرخ يا حسين وصوتي اتسمعه
وهذا الصوت ليوم المحشر تضمه

بالمحشر شفيعي من الزغر ادري
ما بطل عزاءك لا لطم صدري
رادود الحزن يقره وشعل جمري
ونيشان الصدر عندي اجل بصمه

بصمات الحزن ما تنمحي وتزيل
عن دربك محاله ننحرف ونميل
اظل احزن عليك واضرب بزنجيل
وضهري للفواطم يوفي برسمه

رسمي عليك ثابت يبقى بأيامه
شما ادكن يبو السجاد عالهامه
ما ارتاح الا بضربة القامه
ويا جرح اليضاهي جرحك ودمه

جرحك بالكلب يمرد وابد ميهود
خلاني العمر كله بثيابي السود
عهد يحسين لمصابك اظل رادود
ومن كلبي ولساني تطلع الجلمه

تطلع من ضميري يا شبل كرار
شما ننصب مواكب تخدم الزوار
نتباهى بخدمتك يا ابو الأحرار
يا اعظم سفينه بخدمتك رحمه

كل خادم الك يحسين يتوزر
ويتمنه يخدمك لو بعد اكثر
شما يخدم الك ممنون يتشكر
لوما خدمتك ما شفنه هالنعمه
..................................؛
علي فرحان التميمي

سالم ترجعلي تمنيتك
اربع ولدي وما وفيتك

.....................................؛
ما وفيتك يبن الهادي
وحدك بالطف يوم تنادي
تمنيت احضر وي اولادي
بنص دلالي جا ضميتك
..................................؛
ما وفيتك يا بن حيدر
ميه اولادي ويا ريت اكثر
نحمي ضلوعك ما تتكسر
ولا واحد يعطش من بيتك
..................................؛

ما وفيتك يبن الزهره
من طاحوا ولدي اعله الغبره
يحسين وبكليبي الحسره
يوم العاشر ما حضريتك
..................................؛
ما وفيتك انت وزينب
بت حيدر ظلت تتعذب
خيام بلا وليان وتلهب
يا ضامي ومن دمي رويتك
.......................................؛
وصيت الاولاد الأربع
دمعة زينب لا لا توكع
ولا عبدالله يظل يتلوع
عباس الساقي سميتك
......................................؛
يا عباس الجود بجتفك
وذوالفقار بقبضة جفك
ابني وما خاب الي يكلفك
وافيني بكد ما ربيتك
......................................؛
علي فرحان التميمي

احلفك ياهوه من توصل احبابي
بلغهم سلامي وانقل عتابي
................................؛
يا ريح التروح الكربلاء هناك
من عندي امانه تاخذ اترجاك
مكسور الكلب يا ريح اخذه وياك
وارميه بضعنهم اهلي غيابي

احبابي المشوا ما بيه فركاهم
ما قبلوا اروح لكربله وياهم
يا ريح وبقيت الهج بطرواهم
اناديهم بقيت وما اجه جوابي

يا ريح التروح اخبرهم بحالي
ظليت بوحشتي وما الي والي
خيال حسين كل لحظه يتراوالي
مرعوبه افزن من يدك بابي

يا ريح الحياة بلا اهل صعبه
هم طفله وعليله وحايره بغربه
هجر حسين خله بالكلب حربه
بفراكه فجعني وغمك صوابي

كل طفله ابوها يعتبر خيمه
يسليها بوجوده ويكتم بضيمه
يا ريح وابوي السافر لهيمه
وخلاني وحيده وتايه حسابي

حسبت بسفرهم ينتهي ويعود
وترد الليالي الحلوه ليه ردود
لو رجعوا دربهم الا فرشه ورود
واختمها بسعاده صفحة كتابي

بلغهم يريح بحالتي وهمي
لا يمي ابوي ولا اخو وامي
شما طال الغياب واحرك بدمي
وجسمي من الهجر كل حيل ما ظل بي

مالومه وهجرهم زاد بيه الهم
هم يرد وكتنه والشمل يلتم
واشوفنهم اخوتي ويه ولد العم
بقيت احلم يريح وحلمي جذابي
....................................؛
علي فرحان التميمي ..

يحسين اسمع صوت انصارك
....................................؛

يالحيرت الكون بطفك
كل العالم صار بصفك
كلوب الناس بقبضة جفك
سر واحد هذا من اسرارك
..............................؛
يالبيك اسرار من الخمسه
حبك واجب يحسين امسى
كل واحد يفديك بنفسه
ويفوز بنعمة انوارك
.....................................؛
انصارك وحضرنه طفوفك
ما نقبل يحسين نعوفك
حاير بين الجيش نشوفك
تلكانه يمينك ويسارك
....................................؛
والينه ومصدر عزتنه
ومرتفعه لاجلك غيرتنه
فرحنه واقبل نصرتنه
وخلينه بصفحة اخبارك
...................................؛
لهذا اليوم شكد تانينه
وانرخص دمنه لوالينه
ابشر ابشر يابو سكينه
دروع نصير ونحمي اسوارك
.....................................؛
بوجود الأنصار جنودك
فنه اليوصل يم حدودك
والزود البينه من زودك
وبدمنه نطفيلك نارك
......................................؛
علي فرحان التميمي

يم الوفه يم الوفه
كلج حنان وعاطفه
بحسين وصيتي .. بأربعه ضحيتي
يم البنين ... يم البنين
..................................؛
حقها اتنومس بيج وتسولف الناس
يالصرتي للأيثار والوفه مقياس
تخلدتي بالتاريخ تاج اعله كل راس
يتباهى امه انتي ابنج العباس

يالطاهره يالطاهره
مثلج فلا نلكه مره
بالطف تمنيتي ... بأربعه ضحيتي
يم البنين ... يم البنين
......................................؛
لكربله ما جيتي وصارت علامه
ورب العرش منطيج اعظم كرامه
حيرتي كل الناس يم النشامه
كل حاجه تكضيها اليوم القيامه

باب المراد باب المراد
تكصد الج كل العباد
لكل محب وكفيتي ... باربعه ضحيتي
يم البنين ... يم البنين
....................................؛
وصيتي بس بحسين وبزينب اخته
وما ردتي عبدالله تلهب جبدته
كل بطل من ولدج تنطي مهمته
تشجعينه وتوصي يوكف وكفته

اعظم مثال اعظم مثال
يا شامخه مثل الجبال
بولدج تفديتي ... بأربعه ضحيتي
يم البنين يم البنين
...................................؛
سولفتي وي عباس اجمل سوالف
كلتيله يوليدي يابو المواقف
رباك ابو الحسنين وبأسمه حالف
ولأمر ابو السجاد لا لا تخالف

يالفاضله يالفاضله
مو بالبقيع ابكربله
للزهره وفيتي ... بأربعه ضحيتي
يم البنين يم البنين
.....................................؛
لمن اجه الناعي بين وفائج
نصبتي بس لحسين مجلس عزائج
يحسين يوليدي اصبح ندائج
للزهره والكرار واضح ولائج

يم الفخر يم الفخر
عطرج نشم يم النهر
بكربله بصميتي ... بأربعه ضحيتي
يم البنين يم البنين
..................................؛
علي فرحان التميمي

وحدي وعليله بغربتي تخلوني
ما بطل النوح وتسيل اعيوني
صعبه من اظل بلا اهل ... اتعذب وما ظل امل
ما بطل النوح وتسيل عيوني
.................................؛
ما يسوه العمر دونك يبو اليمه
يا نور الحياة اشيحمل الظلمه
بحضنك وبحنانك دوم متعلمه
يفراك الأبو ما ينحمل همه

صبح ومسه يمك واشوف عيونك
محلاها من تحملني فوك امتونك
بيه الهجر شوف شعمل ... اتعذب وما ظل امل
ما بطل النوح وتسيل عيوني
........................................؛
تغطيني بحنانك لو غفت عيني
واتباها العزيزه من تسميني
بوجودك زهيه جانت سنيني
وبديار الألم تالي تخليني

بعدك فلا تسوه يبويه دياري
يلي تركت بالكلب تسعر ناري
وجسمي على فراكك ذبل .. اتعذب وما ظل امل
ما بطل النوح وتسيل عيوني
.......................................؛
بحجابي وعباتي وروح فرحانه
منتظره تكلي روحي ويانه
ما اكدر اكول عليك زعلانه
لعيونك يبويه هواي عطشانه

ما اخلف برايك يبن هادينه
طاعه وصبر واجب تصير اعلينه
بس كلبي هجرك ما حمل .. اتعذب وما ظل امل
ما بطل النوح وتسيل عيوني
.....................................؛
لو بيدي يبويه اتبع ضعونك
وكل ساعه اكلك والدي شلونك
يا عزي ودلالي الظاع من دونك
شيصبر الكلب ماشوفن عيونك

جثه بقيت وروحي تمشي وياكم
طول الدرب يا والدي وتبراكم
ما يحمل فراكك جبل .. اتعذب وما ظل امل
ما بطل النوح وتسيل عيوني
....................................؛
يالماخذ حياتي هم الك رده
انا ادري اليسافر يرجع بمده
اتمسى بغيابك واصبح بشده
محروك الكلب بجفاك شيبرده

شو طالت السفره وابد ما جوني
بحالي المشوا ما سألوا ونشدوني
وانا العليله بلا اهل .. اتعذب وما ظل امل
ما بطل النوح وتسيل عيوني
.....................................؛
ما يبطل بجاي وسلوتي الدمعه
بعيوني بجفاكم ضاكت الوسعه
راح اجمل شمل يحسين شيرجعه
جا شنهي العمر دونك بعد نفعه

يوم اليمر اكبر سنه بلياكم
مرعوبه افز من نومي ما الكاكم
جانون الفراك اشتعل .. اتعذب وما ظل امل
ما بطل النوح وتسيل عيوني
......................................؛
علي فرحان التميمي

يتمت احبابك والله مر اغيابك يا صدرنه
....................................؛
يالزرعت بروحنه اجمل حلم
ما لكينه مثلك بكل الزلم
ياابو الليثين منك والنعم
انت بحر الجود تتفايض علم
والله حلوه سنينك ياغيور الدينك يا صدرنه
..............................؛
خلصينه وياك اجمل مرحله
جان كبلك هالوطن محد اله
بخوف وبحرمان عشنه وبهذله
بين هالشيبات شفنه المرجله
شكد جبيره احلامك هم تعود ايامك ياصدرنه
.........................................؛
ننتظر جمعاتك بشوك وشغف
بوجه طاغي الكون بس صوتك هتف
رجعت هيبة المذهب والنجف
نعمتك ما دامت النه للأسف
نعمتك ما دامت الفرحه بعدك غابت ياصدرنه
........................................؛
ما يفيد العمر دونك يا صدر
كل محب يفديك روحه والعمر
يوم فكدك نار شبت بالصدر
حيف يا مولاي ضماك الكبر
بكل كلب مولانه كوفه والحنانه ياصدرنه
.........................................؛
ما نسينه ايامك وذاك العشك
كل موالي بحبك كليبه يدك
احنه عن الصدر حاشه نفترك
صارت النكبات من بعدك رشك
بعدك اتأذينه هواي يا والينه يا صدرنه
.........................................؛
علي فرحان التميمي

غدر الزمان بحيدر مأذينه
راح الصلاته وما رجع والينه
لهامته المطبوره .. الكون نحجب نوره
راح الصلاته وما رجع والينه
....................................؛
عادة الكرار جانت كل فجر يرفع اذانه
يملي كل الكوفه صوته وتشعر الناس بحنانه
يعود من تخلص صلاته ويترس البيت بأمانه

خلصت صلاته وما رجع من الخوف دلالي وكع
لن ساعه والكون انفجع لمن الناعي اجانه

دين الله مطبور وحزين كتابه
مطبور ابونه حيدر بمحرابه
والحاله مخطوره ... الكون نحجب نوره
راح الصلاته وما رجع والينه
..........................................؛
من وصل ناعي المصيبه كمت اشوف الدنيا سوده
علي لو راح من ادينه يروح عزنه و شيعوده
علي خيمتنه الجبيره وخيرنه كله بجهوده

حيدر ذخرنه والسند هو الزعيم المعتمد
يا بيت يبقى بلا عمد يطيح بيتي بلا وجوده

انت املنه والسند يا حيدر
وبعدك شملنه لو رحت يطشر
الدين نهدم سوره ... الكون نحجب نوره
راح الصلاته وما رجع والينه
........................................؛
يا علي مصابك هضمنه ولوع كلوب اليتامه
يا ابو الحسنين بعدك الليل يحرم ما ننامه
جم شهر رمضان صمنه وعلي ما تمم صيامه

ايتامك ابابك اجو يا حيدر ولجلك بجو
ايتام بغيابك صفو شبعتهم ابتسامه
والفقره بعدك يا بشر ينظرها
بس انت يا حيدر جنت تذكرها
و تنوح معذوره .. الكون نحجب نوره
راح الصلاته وما رجع والينه
......................................؛
بعدك نظل بمتاها والمصايب تعتنينه
ريتك تشوف النشوفه والزمن من شد علينه
كل يوم شده يا علي تفنن الشر بعدانه

بعدك يسمون الحسن وجبده يتوذر بالصحن
وبكربله انشوف المحن من بعد حامل لوانه

ريتك تشوف حسين وسط الحومه
مكطوع راسه مسلبين اهدومه
وعياله مذعوره .. الكون نحجب نوره
راح الصلاته وما رجع والينه
.......................................؛
علي فرحان التميمي

اليوم الحسن شع نوره     مشتاكه روحي تزوره
حنيت اله ... حنيت اله
................................؛
اليوم الرسول الهادي عنده بشاره
اول حفيد وبيه كل اسراره
هذا الحسن شعت علينه انواره
وبعيونه دموع الفرح تتجاره 
ما تنوصف فرحتنه        عيد الحسن بهجتنه
حنيت اله   ... حنيت اله
........................................؛
اول سبط للهادي جاب افراحه
وخله النفوس امريضه ومرتاحه
خامس عشر رمضان حزني زاحه
ورد السعاده اتفتح بقداحه
رب البشر سعدانه      وفتح جميع جنانه
حنيت اله   ... حنيت اله
........................................؛
مولود عنوان الكرم هاليله
عامر مضيفه تفوح دلته بهيله
هذا الحسن يا ضيف يله امشيله
بوجهه السمح هو الذي يحيله
مشهوده اله مشهوده     محد وصل يم جوده
حنيت اله   ... حنيت اله
....................................؛
حنيت الك مولاي يمته نزورك
شوكي وهيامي يالحسن يم نورك
انت كتابي وضعت بين اسطورك
صارن هواي ويمته اوفي نذورك
روحي الك ناذرها      يا بن علي انظرها
حنيت اله  .... حنيت اله
........................................؛
علي فرحان التميمي