ضربوني واجيتك يا ضوه العين
شتموني وصحت وينك يالحسين
متني من الضرب باد. خويه يبو السجاد
@@@@@@@@@@@@@@@@@
من مهرك اجه وصاح الضليمه
اشتعلن علينه خيمه خيمه
يتيمه اتچلب بچف اليتيمه
حاله من الرعب كلش أليمه
زينب والعدو ما خله قيمه
صعبه هايه يا خويه وهضيمه

محتاره شطفي اشتعلت النار
وبالهيمه شفت يا خويه الزغار
اطفي بيها ما فاد خويه يبو السجاد

مصدومه بقت بنتك رقيه
الخيمه تحترك ما تدري هيه
مچلبه النار بيها يا رزيه
زغيره وابد ما تحمل اذيه
لزمتها وعاينت دم ابديه
مبيوگه تراچيها خطيه

من ذاناتها دم سايل هواي
الزمها وتكلي عمه بهداي
ما رحموها الاحقاد خويه يبو السجاد

من أربع جهات تحيطني ارجاس
ما بيها رحم يحسين هالناس
بالسوط انضرب ومدنگه الراس
ما يجرح متن بل يجرح احساس
مختنگه صفت يا خويه الأنفاس
عگبك يا عيوني وعگب عباس

تاليها أضل بالطف غريبه
زينب تنضرب والله عجيبه
بيدي احبال ونگاد. خويه يبو السجاد

اتعثر كمت لمن اجيتك
دورت اشكثر الا لگيتك
مطشر على الغبره باوعيتك
بهاي الحاله خويه اشكد نعيتك
المن بيك بس ما جمعيتك
شلمن وانه كلك ضيّعيتك

كل جزء بكتر والراس مگطوع
برجلين الخيول مچلبه اضلوع
موقف بيه ينعاد خويه يبو السجاد

اون يمك وجاني الشمر عناي
ضربني بسوطه خويه اورم اكفاي
يكلي عكب اخوَتج انه حداي
ديلا كومي زينب لسبي وياي
اهو شامت وقصده دمع عيناي
يشوفه يطيح حتى يشمت هواي

يمك يبو اليمه والشمر عال
يكلي لا حسينج لاكو كفال
هنانه الاخو يراد. خويه يبو السجاد

عالهزله اصعدت وعيوني تجري
واحس من الهظم مكسور ضهري
عكبك فقط الله بحالي يدري
َوسف بيد الشمر صار انه أمري
على اعيالك بقت عيني يذخري
والله اليحفضه يحسين خدري

هذا اخر َوداع واحنه ماشين
الله وياك يا خويه يالحسين
امشي وي بني ازياد خويه يبو السجاد

السماح السماح يا ابا عبد الله
السماح السماح يا ابا عبدالله
&&&&&&&&&&&&&&&&&&&&&
عايش بلذات هالدنيا الكصيره
بشر ما مهتم ولا يعرف مصيره
مذنب وعمره خلص ياهو اليجيره
وابد ما يعرف عدوه من اميره

بغير ابو الأحرار ياهو ضل مولاه

كل** سنه يلفي محرم عاليخدمون
وهو لا لطام اسمه ولا هو مجنون
ما عرف يعشگ امامه وياليعشگون
الما بچت لحسين شله بيها العيون

كون يردد دوم مصابه ما ينساه

ويه ابو الأحرار كلنه مقصرين
بس عشرة ايام نلطم ع الحسين
كوه بالكوه ننزل دمعة العين
بالأسم كلمن يكول مسودنيين

تارس الدلال بس رياء والله
*'*'
الماله وي حسين عشره ولا خدامه
خله يقراها على روحه السلامه
هذا جاهل ما عرف بحسين امامه
وين يروح من الزجيه بالقيامه

هذا ام حسين ابد ما تدناه
**شنو يحب الما يحب حسين يا ناس
هذا لا عنده ضمير ولا اكو احساس
هذا ما شارب ابد من ماي عباس
البيه وفه وغيره ومحنه ويرفع الراس

بعمره ما صايح واه حسيناه واه
*'
المذنب ويه حسين خله يراجع امره
وخل يحط بعقله عن عاشور فكره
مو فقط عبرِه يريد حسين عبرٓه
يدلي بالتايه طريق حسين گمره

اليبقه وي حسين حسين يبقه وياه

بسم الله الرحمن الرحيم
اللهم صل على محمد وال محمد
قصائد محرم الحرام لهذه السنه 1446
ونسألكم الدعاء

راح حيدر وانتهت أيامه. ضلت تون على الباب ايتامه

راح حيدر وابتدت قصة حزن
وضلت ايتامه على فراكه تون
من الإسلام انهدم ثاني ركن
وشنهو نفع الشجره لو مات الغصن

والاسلام ينوح لجل إسلامه ضلت تون على الباب ايتامه
&&&&&&&&&&&&&&&&&&&&&
حيره بعيون اليتامى جبيره
وبرحيله ياهو الها الحيره
هو احن اب هو صاحب غيره
يسوه بكلوب اليتامى ديره

واليتيم يرد علي من أحلامه. ضلت تون على الباب ايتامه
&&&&&&&&&&&&&&&&&&&&&
هسه حسوا باليتم واللوعه
خلة الوالد تره موجوعه
ياهو يمسح لليتيم ادموعه
لو برد ياهو اليدفي اضلوعه

ياهو ليحسب بعد بطعامه. ضلت تون على الباب ايتامه
&&&&&&&&&&&&&&&&&&&&&&
والعقيله گابلتهم بالبچي
تنحب وماضل بعد ينفع حچي
بعد النه هايجي لو ما يجي
تنوح وعله حسين ضلت تنتچي

حسين زادت من بجيها آلأمه ضلت تون على الباب ايتامه
&&&&&&&&&&&&&&&&&&&&&&&
ما نريده العيد بعد الوالد
بالفرح شيسوي بلا الفاكد
بالكلوب الحزن ضل متصاعد
ياوسف منه حرمنه الحاقد

ما كمل حيدر علي اصيامه ضلت تون على الباب ايتامه

اربع بنين وياك وديت. والمهم سالم ترد للبيت
يا ضي عيناي يا كل الراي

اطمن قلبك وقلبي وبنيني الاربعه تدري الك فدوه
يمن كلشي الك يسوه وفه ونخوه اريدنهم إلى الخوه
تروح وقلبي يلجمني يبعد الاربعه وبعدك شنو اليسوه
احس كل خطوه تمشيها احس موتك بده يكرب الك خطوه

بضعنك مشيت من المدينه وبعدك بقت روحي حزينه
لو باقي وياي يا كل الراي

ييمه حسين انه ادري فقط بس اربعه بضعنك الك وديت
لجن مابيدي شي يبني ولو بيدي الك روحي يغالي انطيت
يروحلك فده لطولك عزيز الزهره ابن حيدر والك ضحيت
وانه كل غايتي ابولدي يضحون وتضل انت وترد للبيت

احلئ خبر لمن تعودون. ما يحلى شي غيرك بالعيون
يا هاي وهاي. يا كل الراي

وصيتي الهم بشخصك وصية والده وتدري حنينه اعليك
واحس بضلوعي تتكسر تحس بضلوعك الترفه وتعرف البيك
ويريت الخيل تسحكني وتكسر كل عظم بيه ولا تاذيك
والمثلث يفت جبدي ويصير احلئ خبر موتي على ايديك

يا بعد قلبي وكل البتوت يايمه كبلك ريتنه انموت
يا طعم الماي. يا كل الراي

يولدي الاربعه بيكم اصعد الهامه واتباها أمام الناس
يجعفر يمه عبدالله تره انتم تخلوني ارفعه الراس
يعثمان انه اريدنك تضحي لخاطر احسينك لخير أنفاس
ويضحي بعينه واجفوفه انه ابني اريدنه الكمر عباس

يا كافل الحره العقيله يالتكضي الحجايه الثكيله
يبني الوفاي. يا كل الراي

انه المن جبت اربع إذا ما طاحوا اكبالك يماي العين
إذا ما قبلك اسمعها الأخبار التجي منهم خبر مو زين
قسم من عدهم اتبره ولا يتسمه بعد اسمي يأم ابنين
يبعد امك شنو عدنه عشيره هو بس انت يغالي حسين

ياهوه العايش وسط ريه يمه انه بيك وانت بيه
يا لب احشاي. يا كل الراي

ييمه ما ردت شكراً ولا تشكرهم أولادي على المكدور
ينعمة الله جا شخصك وقليله بحقك انقدم ييمه انحور
يغالي كل فضل منك تره البيه انه والاربع الف مشكور
مع اسمك انه وولدي تردد بينه هالوادم بشهر عاشور

نعمه جبيره ومو قليله. من ننذكر وي العقليه
يا نعم ارباي. يا كل الراي

اللهم صل على محمد وال محمد
عظم الله لكم الأجر والثواب ذكره وفاة ام البنين عليها السلام

يمه حضريلي بكربله شفت العذاب
وحدي واتألم واتحمل اشجم مصاب
نزفت اجروحي من ودعوني
وانتظر جيتج والقلب بحزانه ذاب

من المصايب شيبت حتى الرموش
وابنج الغالي سحكت بصدره الوحوش
مو دمع نزفت بل دم عيوني
وانتظر جيتج والقلب بحزانه ذاب

يمه يازينب يمج ودمعي يسيح
وبعيني شفته ابني عالغبره ذبيح
يمه وي ابني ريت اذبحوني
وانتظر جيتج والقلب بحزانه ذاب

يم حسن شفتي شسويت ويانه هالناس
ذبحت احسينج وذبحت الغالي عباس
براعي الكفاله اشكد اجرحوني
وانتظر جيتج والقلب بحزانه ذاب

بنتي العقيله اتحملي هذا اليصير
والمهم يمه والدج يبقه الأمير
يمه ليألمج لو شتموني
وانتظر جيتج والقلب بحزانه ذاب

تالي يا يمه امشي عالنوگ الهزيل
وأصبح كفيله من بعد عين الكفيل
بسم ابو فاضل اشكد ذكروني
وانتظر جيتج والقلب بحزانه ذاب

يم المصايب هايه مكتوبه عليج
تمشي أسيره والحبل يجرح بديج
وبضرب متنج جن اضربرني
وانتظر جيتج والقلب بحزانه ذاب

قصيده ع لحن يمه ذكريني
حوار بين مولاتي فاطمه الزهراء والسيده زينب عليهما السلام