شهادة المولى القاسم ابن الامام الكاظم عليهم السلام

غربت هالعمر .. تـاخـذني الحـزن عمتي
ياضيم اليسر .. مـا فارگـني كـل وكـتي

دمـعـة عـيني تـتبده
تكتل عيشة الوحده

...................

كـل هـذا العـمـر عـشتـه بـغربـه وديـره مـاعــنـدي
وانـه ابـن الاطـيـاب اشلون تـالـيها عـشـت وحدي
صـرت سـگـاي بـالـديــره و سلـطـان الخلـگ جدي
عشت غربة خوات احسين ودمعي يسولف بخدي

غـريـبه صفنتي .. وغريبه الـگـاع مـو گـاعـي
جبـيره غربتـي .. ودموعي الوحشتي متاعي

غربتي مو حجي ومُده
تـكتل عـيشة الـوحــده

.......................

الـيسئـلونـه على اسـمـه يـگـوله وايـوگف ابطوله
بــس انـه الـذي عني يـسـئل اســمـي مــا گــوله
يـاهــو مـثلي عـايشها يـخفي اسـمه عـله الحوله
انـه مـن بـنـي هـاشـم و مـا احـجـيها مـعـقـوله

عشت ابلا اسم .. بس روحي التعرف اسمي
حيلي ينـهدم .. وجـووه الساده مـــو يمــي

الضايع اسمه شيرده
تكتل عيشة الوحده

....................

الـغـربـه الاحـنـه عـشـناهـا مـامـرت عـلــى الوادم
جـنـها الـغـربـه مـكـتـوبـة بـس اعـلـه بني هاشم
صعبه انه ابسلف سگاي وابوي اعله الخلگ حاكم
وانـه ابـن الـسمـه والـگـاع وتـالـيـها اضــل هــايم

جـدي الــمـرتـضى .. وسگاي اصبحت كلفه
واخو گلبي الرضا .. بروحي اشگد اله لهفه

مشتاگ الـدفو زنده
تكتل عيشة الوحده

...................

امشـي بـصف نهر واحـجي وي ماي الشرب عتبه
مـايـك يـانـهـر عـالـگـاع كلـهـا اتـضوگ من عذبه
لـيـش احسين يـوم الـذاب مـن كـثر الضمه گلبه
مـارحـت وتـعـنـيتـه ومــن گـطـراتــك اتـشـــربه

لازم يـــانــهـر .. انت التمشي لخيامه
مسكور الظهر .. يـمك طـايح احزامه

ضامي ويحلف بجده
تكتل عيشة الوحده

..................

ابـنيـتي اتـرد الـي تـبـجـي كـل عـصريه مـهظومه
يسـمـوها الـخـلـگ بـنت الـ غريب الضايعه اعلومه
واذكر غربة اخت احسين الطلعت تبجي بالحومه
هـم صـاحـو عـليها اخت الـ غريب السلبو اهدومه

ويلي بكربله .. زيـنـب عـمـتـي بــجـوها
ابن امها عالفله .. حته اهدومه سلبوها

هاي الحيره والشده
تكتل عيشة الوحده

**ابو حميدة الشويلي

اللهم عجل لوليك المنتقم الفرج**

يا مولاي يا قاسم العطاء دخيلك

من يا باب اسولف بيك
غريب وقصتك تهضم
عجيبه شلون متغرب
بوطن للمثلي ضل يكرم

يا ربيب اهل السمه أمرك عجيب
المثل قدرك وسفه يتسمه الغريب
وحدك تقيم العزاء وتصب دموع
ودمعه دمعه تكتلك لجسم السليب

گلبي بعتبتك نادة
ولگلبي انطي أمراده
امرادي دمعة عيني
وغربه لغريب السادة

بجيني كربلاء
يا قاسم العطاء
____
الگضه من عمري اعرفنه
ولكن اجهَل القادم
لذالك راح اشد گلبي
واشمره بعتبة القاسم

بزودك وزود اهلك اسنيني مشن
الحلوه والمره على حبكم گضن
الفاتن اعرفهن ولكن بيه خوف
يا بلية امحضر المثلي الزمن

بالماضي راحم بيه
يا سيد الحنية
ارحملي باقي سنيني
وتمم خدمتي اعليه

يا رحمه السماء
يا قاسم العطاء
__
يا قاسم جنت ساكت
وفعلك صرح بأسمك
سكتّ الساني لا يحجي
من يخدم خيم عمك

الحچي لاهل الحچي ما بي صدك
والبچي لاهل البچي هذا العشك
لا افرط حبي بالگال وگلت
كون اعيش بنارك وسكته أحترگ

جفوف الگمر من طاحن
بسكتتهن شكد صاحن
گضن عمرهن خدمة
وسر العشگ ما باحن

الگال وگلت بلاء
يا قاسم العطاء
____
من طبع السگاية البيك
صب بيه أدب من جون
اسگي الروح يا قاسم
ودليني على اليبجون

يالخذت من عمك الكافل طبع
اسگي روحي بأسم ابوفاضل دمع
أذني سدها اعللبشر بس ياحسين
بأذني يا قاسم اريدن تنسمع

غيرني من تسگيني
حب وادب خل ديني
هوسة وضياع العالم
بأهل الصدك دليني

دليني عالبكاء
يا قاسم العطاء

وفاة القاسم ابن الامام الكاظم. ع
++++++
الغريب اتجرحه كلمة اهلك امنين
ابن الكاظم انه وجدي الاحسين
جرحه عايش اوياي
ابثوابه وزعت ماي..
جدي لحسين
+++++++++++++
غريب اذكر هلك وينه الوصلهم
اعيوني بالمنيه احتاجت الهم
مثلرالوادموالتحتاج اهلهم
شسوي وعني اهلي ابعاد كلهم

جزاك الله يشيخ اهواي ممنون
صيح ابنيتي خل تغمضلي لعيون
اموت واحيه بهداي
بثوابه وزعت ماي
جدي لحسين
+++++++++++
اجه وكته الحچي الما بيك حيله
اجرحك بالحقيقه والثجيله
انه العمته مشت رحله طويله
مسبيه وعله ظهور الهزيله

سيد انه اخبرك واهلي سادات
الغربه مو جديده وشفنه لوعات
ورثنه احسينه ابهاي
بثوابه وزعت ماي
جدي لحسين
+++++++++++++
عندي بس وصيه اسمعها عمي
امانه ابنيتي عندك بيها همه
اذا حانت وفاتي وهيه يمي
لاتحضني واتموت اعله جسمي

للحج لو خذتها وراحت وياك
من عطره اتعرفها دارنه هناك
الدموع اثارها هواي
بثوابه وزعت ماي
جدي لحسين
++++++++++
تعالي ابنيتي اجت ساعت منيتي
اودعچ وارد اوصيچ ابوصيتي
باچر للمدينه لو مشيتي
يعلويه او وگفتي اباب بيتي

على كيفچ يبنتي ابدگت الباب
گلب امي ايعرفها دگت احباب
القاسم تعتقد جاي
بثوابه وزعت ماي
جدي لحسين
++++++++++++
ابعينچ من تصد امي ابحزنها
اتحضنچ حيل تشتم عطر ابنها
شعره ابثوبها اتأكديلي منها
من راسي چنت اغفه ابحضنها

ابزغري دللتني هالحبيبه
موتي بغربه لوتدري المصيبه

حنان البيها منواي
بثوابه وزعت ماي
جدي لحسين
+++++++++++++
جوابچ لمّي من تسأل عليه
الها بختصار احجي القضيه
العزيز ابغربه وا فته المنيه
الچ وصاني يا يُمه بوصيه

مات ابنچ ييمه وگال من. مات
جدي حسين كثريله الثوابه
المصابه طال مبچاي
بثوابه وزعت ماي
جدي لحسين

ثائر الربيعي

شمعت البيت ... طفت طفت طفت
وانه العيون ... عمت عمت عمت
الفاكد امه كل حياته ...  قهر
موحشه سنينه المماته .. قهر ... هذا حالي
......
الماتت امه ميت بمعنى الشعور
ظلمه تصبح دنيته ومابيهه نور
عمره يخلص نوح ما بين الكبور
بين ماي وشمعه ودموع وبخور

فكد الاعزاز ... صعب صعب صعب
يترك العين ... تصب تصب تصب
دمعه عالخد يبقى جاري ... عمر
المثلي فاكد بيه داري ... عمر

......
ابلاية ام الدار مهجورة تصير
لا تشوف الفرح لا يدخلها خير
الكعده وي امي اشلاحهه اعله الحصير
تسوه هذا الكون وافلاكه التدير

امي ياناس ... شمس شمس شمس
ضاوية الكون ... احس احس احس
كلشي ليل اصبح بعدهه ... سهر
وانه واحد من ولدهه ... سهر
......
لا تلومه الماتت امه يعيش نوح
جرح فكد الام اشد كل الجروح
الراحت امه كلشي وياهه يروح
بس جسد عايش يضل ابلايه روح

بس نفس بي ... يضل يضل يضل
منتظر يوم ...  أجل . أجل . أجل
عايش الموت بعذابه ... جمر
الدافن امه بالترابه ... جمر

.......
البيده دافن امه يعرف شنهو اكول
يحس بية  من اسولف عالبتول
حسين انه ابن علي وجدي الرسول
موتت امي اذتني اشد من الخيول

موتت امي  .... اشد اشد اشد
من سحكتي ... بعد بعد بعد
اضلوعي كلهن يم ضلعهه ... كسر
ودمعي نازل وي دمعهه ... كسر
......
الامه عدله خل يضل يرعاها دوم
أيحبهه من يكعد ايحبها من يكوم
هالنصيحه مني اخذهه يالخدوم
بس حنان امك ينسيك الهموم

منهه هيهات ... يصح يصح يصح
يمها الانهار ... تشح تشح تشح
يا حلات الكعده يمها ... تسر
البين اديه امه يضمها ... تسر

.......
رضا الباري من رضاء الوالدين
الامه ما ترضى عليه ما عنده دين
عيش لمك موت لمك يالحنين
الجنه تحت اقدامهه كال الامين

رحمت الله .. الك الك الك
هي امك ... هلك هلك هلك
عبد صير الهه بحياتك ... ذكر
بيها مقبوله صلاتك ... ذكر
.......
الكلمات
موسى الخادم

مدد يا ابو فاضل

معروفه الغيره الشيعيه
من عندك يبن البدويه
ماخوذه الروح الحربيه
من روحك يالروحك تچوي

البارد يحتر من يتذكر
چفك ذاك الطاح الاسمر
طبع الحبك عالشر يزئر
نار بگلبه اعله الشر تدوي

.
منك اتعلمنه فن اسمه القتال
واليگابلنه مصيره للزوال
زلم والساحات تشهد للرجال
.
.
.
.

نلوي اذراعه الشال اذارعه
والضدك ما يبقى بگاعه
كل ذاك الجيش وأتباعه
لا جو ولا كاع اتلمه

نحفر راسه الحطنه برأسه
والمذهب انتم حراسه
أنصار حسين احنا وناسه
نسحگ بطن اللبوه بظلمه

خل يطبعون العرب طول السنين
ويانه جف حيدر علي الحبل المتين
همه عدهم اسلحه وعدنا الحسين
.
.
.
.
العادانا نفوت بعينه
ريحاً صرصر من هدينه
والزهراء احتاروا بينه
هزيناهم هز الرايه

ما ملينه وملانه الشر
راويناهم يوم المحشر
جفك انطه الضوء الأخضر
وبنصهم دگينه الثايه

غيرة الشيعه وعلي كلها أفزعت
وحاله من حال الحجر ذاك السكت
الصِمت هاليوم جده هم صِمت

.
.
.
.
كالو آلاف التهوانه
گلنه العباس احنا ويانه
خيبر واجنوده وحيطانه
نقلعها بيا حيدر كلها

ضربت مرحب رجعناها
واخيام العز ثبتناها
ارض المحتل هزيناها
وين التوجعهم نندلها

ما نساوم عالقضيه من زمان
احنا من انطگ نحطها بالمچان
وادم اتعيش برعب والنا الامان

.
.
.

يرحل قائد يطلع قائد
تفزع ميه بموت الواحد
يا عباس وانت الشاهد
ما نرجع الا انصفيها

عدنا الميت حيٌ يرزق
بلكي الله انموت ونتوفق
وندرك هذا الفتح الاصدق
لحسين الروح انوديها

المعركه البيها زلمكم تنحسم
علمتنا الفعل مقياس الزلم
اليگطع اجفوفه لَدِينه اكبر شهم

الشاعر عبدالله الشويلي
@AbdullahAlshwaily

**چيمو بيبنانهه أو لامن فزع
غوشت وبعينهه شحيح الدمع

غوشت والشوف بالدم اندثر
هوت والبسمار فج ضلع وعبر
عثرت اولاباب فك طوله وستر
موش خيط وينعگد كسر الضلع

كسر عود انكسر ضلع ام الحسن
موش حنطه الضلع جاليش نطحن
بوب ساده عيونهه اولا سلهمن
كثر طيح دمومها الحايط يشع

يشع دمهه وحوشه عليهه هفت
مثل جفي الطوس بالباب انجفت
زمرة بليس عله باب الله لفت
استسبع البطيف ماصاير سبع

صار موت وچيل دم ومستحه
وعنبر المحسن خليفه تفلحه
غيم ضلع الزهره ماساعه صحه
وليل خوف وغفله ريج الينبلع

ريج يابس وبنفس نار انجوى
المطر كبل الكاع يبس بالهوى
رماد تنور الحكم كلبه حوى
اولا خليفه العكب حيدر ينجرع

اولا خليفه يكوم من يعثر جدم
بطون عفنه وكشخت بفي الهدم
ينجوي اليسكت اليوكف ينثلم
ناس موته الحشم اولاينسمع

ضمت الاخ وتلوت ونتچت
تلچم من تبچي ريت اولابچت
حجه دم لطفل فاطم ماحجت
ريت نحر الكتل فاطم ينگطع

صفاء ثابت الغزالي**

(( #من_أجلها **))
……………………………………………………………

مِن أجلِها .. الريحُ و الضوءُ أنخلق
مِن أجلِها .. دامَ النهارُ و الغسق
صلّت بحارُ الماءِ .. شكراً إلى الزهراءِ
يا فاطمه .. يا فاطمه

……………………………………………………………

ناداها جبار السمه
كلشي انخلق يا فاطمه . لخاطر عيونج
تفاحه و اتراب البشر
هاي الشمس هذا الگمر . يطفن بدونج

كل جبل بالكون انخلق . چي هامتج مرتفعه
ابكد احرف اسم ام الحسن . صارت كواكب سبعه
اول ضوه يم العرش . ضوت عباتج شمعه

قبلَ القمر .. قبلَ الصباحِ والفجر
قبلَ القمر .. منكِ الضياءُ ينتشر
يا مركزَ الاضواءِ . شكراً الى الزهراءِ
يا فاطمه .. يا فاطمه

……………………………………………………………

فاطم ومو بس عالنسه
اعله الزلم متريّسه . عالكل أميره
كل نبي ما ينجح تره
الا ابدعاء الطاهره . بالهم تجيره

نيران و ابوسط اللهب . ابراهيم ناده الزهره
ابفضل ام حسن نار اصبحت . بلون الثلج مو حمره
عصّات موسه المعجزه . ابفاطم تظل منتصره

يا مريمُ .. هزي بجدعِ النخلةِ
يا مريمُ .. و للبتولِ فأنصتي
من ألفُكِ للياءِ .. شكراً الى الزهراءِ
يا فاطمه .. يا فاطمه

……………………………………………………………

سبحتها مو خيط و خرز
الكون بيديها انفرز .  بأصبع تديره
سبحتها خضره امعطره
بيها الكواكب دايره . كلش زغيره

الشاهود تعتبره الشمس . وكل خرزه تنعد كوكب
تبدي الفصول الاربعه . بيد ام حسن تترتب
الارض چن حبة ذره . مقبوضه بيد ام زبنب

لولا هيَ .. ما طارَ طيرٌ و أرتفع
لولا هيَ .. لا ليلُ بالبدرِ أجتمع
لا صوتَ للظلماءِ .. شكراً الى الزهراءِ
يا فاطمه .. يا فاطمه

……………………………………………………………

اعبايتها من الله الصنع
جبريل خيطها ابسنع . حس جنحه بيها
شيلتها من أعلى العرش
اعليها اسم فاطم منّقش . مقري عليها

متوهم اللي يعتقد . عدها الخدم بس فضه
ألاف حوريه و مَلك  . بالبيت طوله وعرضه
وآلااف صعدت عالسطح . مامش مچان ابأرضه

قسمٌ طلب .. يا ربَنا يا ذا العلا
قسمٌ طلب .. نخدمُ بنتَ المصطفى
نادوا على استحياءِ . شكراً إلى الزهراءِ
يا فاطمه .. يا فاطمه

……………………………………………………………

سلطانه الرحمه اصبحت
عل الي اضربوها ما دعت . والعذبوها
حملت عصر ذاك الجذع
وبسمار محسن والضلع . لخاطر ابوها

لو داعيه اعليهم تره . اطيح السمه اعل الغبره
يتبخر الماي و يجف . لا يظل طير و شجره
وينادي جبريل ابغضب . ياهو المزعل الزهره

كلُ البشر .. لم يبقى في الارضِ أحد
كلُ البشر .. لا يومُنا هذا انوجد
لسنا من الاحياءِ .. شكراً الى الزهراءِ
يا فاطمه .. يا فاطمه

……………………………………………………………

عن عائشه تروي الخبر
للظلمه ابد مامش اثر . لو فاطم اهنا
كل النسه اتخيّط سوه
من فاطمه ناخذ ضوه . خرم ابره شفناه

امن السوگ حيدر مشتره . فانوس لا من شمعه
شيسوي بيهن يشتري . و بالبيت تضوي البضعه
نفس الضوه ليل وصبح . البيت ثابت وضعه

معنى اسمُها .. زهراءُ يزهرُ نورها
معنى أسمُها .. زهرةُ الباري ربُها
في جنةِ العلياءِ .. شكراً إلى الزهراءِ
يا فاطمه .. يا فاطمه

……………………………………………………………
✍️ ( سيد خضر الزاملي )**

يافاطمه يافاطمه
،،،،،،،،،،،،،،،،،،،،،،،،،،،،،،،،،،،،،،،،،،
شخليتي بيـه بطيحتـچ هاي
اگعــــد وگومن كاض مگفاي
يم بيتي گلبي عليـچ ممرود
سويها لله وگـــــــومي وياي
،،
گومــي ياعزي ودلالي گومي گلبي عليج راح
علي اذا مــو انتي يمه بعــــــد ليمت يستراح
،،
چا هاي تاليها المحنه
تخلينه وترحيــن عنه
،،،،،،،،،،،،،،،،،،،،،،،،،،،،،،،،،،،،،،،،،،
شيكضله گلبه الگلبه محتام
ماعنده غيـــــر يخلي وينام
چاغير كــــون بنومه يرتاح
كـــل ماينام تگعده الاحلام
،،
انه ماتعبان انه انه اصــــــلآ ارد امــــــــــوت
انه من گـــــــد المتانه ريجي ابلعه ومايفوت
،،
كومــي ياشلعان گلبي
گومي مو تيهت دربي
،،،،،،،،،،،،،،،،،،،،،،،،،،،،،،،،،،،،،،،،،،
من گلبي رحتي الحـدر التراب
وخليتي گلبي اعليــــچ عطاب
يالزهره هجرج عافيـــــه يريد
وعافيتي اخذها الضلع والباب
،،
علي التنخاه الوادم علي بالگــــــــــوه يگوم
اعليچ ما ساكتله ساعـــه علي مانايمله يوم
،،
علي يالزهــره تعــــذب
علي ليـــل انهار ينحب
،،،،،،،،،،،،،،،،،،،،،،،،،،،،،،،،،،،،،،،،،،،،
ياحيلي ماضــل حيل بجفاچ
كـــــــــل الأحبهن ماتن وياچ
سويلي چاره الروحي لاموت
الكلشي انه گادر الـــه فرگاچ
،،
حيل ماضل للبواچي والبواچي تريــــد حيل
صبح مامر اعله عيني كلشي صار بعيني ليل
،،
انتي رحتي وراح كلشي
وگمــت باليادوب امشي
،،،،،،،،،،،،،،،،،،،،،،،،،،،،،،،،،،،،،،،،،،،،،
انكسار ابالحسن ع
،، مصطفئ الصالحي،،

السيده زينب عليها السلام
ــــــــــــــــــــــــــــــــــــــــ

دواوين

أنه الما كفَّت احــــزاني   ...  دواوين
ونه البلطف جرح ضيَّع   ...  دواوين
آنه اول  هاشميه اطّب   ...  دواوين

ابــــعمر خمسين   ،   مچتوفات اديه

ــــــــــــــــــــــــــــــــــــــــ

ضلعه

أنه اخت اللـــــــي ثلث تيام   ظل عَ
الرمل ، والخيل داست فوگ   ضـلعه
أنه المسبيه فـــــــــوگ نياگ   ضـلعه

واشد من الـسبي الــــــــــنظرات اليه

ــــــــــــــــــــــــــــــــــــــــ
سيد علي عبدالزهره الناجي

قرابين العشك  صفت بس نفترگ
قضوا وبجنب الفرات     واني مسبيه
    والخيم تحترك
ــــــــــــــــــ

مشت جدمي بدرب    من قضت هالحرب
     كالوا الشام
عفت كل اخوتي           وانه ابجي لحالتي
       بين ضلام
توالني الزجر                ولا ضلي العمر
           قضه بألالام
بعد ذاك الامل             تمنيت الاجل
            رمية اسهام

شباري بروحتي       فقط بس دمعتي
قضوا وبجنب الفرات     واني مسبيه
    والخيم تحترك
ــــــــــــــــــ

سهر بينه الجفن       على گد الحزن
        وي الاهـات
تجتفنه بحبل          نسا ونركب هزل
      والقلب مات
مثل شجره بهوه      وركها من هوه
          بالحرمات
ضربنه ابلا رحم        متن بينه انهدم
         بلا سلامات

ولاجن بت علي      يوسفه ابلا ولي
قضوا وبجنب الفرات     واني مسبيه
    والخيم تحترك

ــــــــــــــــــ
دهر ما ينقبل         وكت صار النذل
       يأمر الناس
اجيبة منين انه       علي راعي الهنه
       رفعه الراس
يمحلاتة الابو            يوكفات الاخو
         وي الانفاس
ابو الاكبر رحل          وي عباس انجتل
      اه يعباس

ولا باقـي عدل          اخوا ما ينحصل
قضوا وبجنب الفرات     واني مسبيه
    والخيم تحترك

ــــــــــــــــــ
وقف حادي الضعن    من استغرق زمن
    مشي الاجدام
انه المستغربه              عباتــي متربه
         مني للهام
دخيل الله الفگد           ولا شغله بعد
          جفني مينام
يجرحج كربله          علي مستعجله
       والهضم حام

سنبال مهجتي     حصدهن دمعتي
قضوا وبجنب الفرات     واني مسبيه
    والخيم تحترك

ــــــــــــــــــ
على الكوفه خطت       جدامي وما رضت
     بين الاقدار
يجل ليلي حزن            وانه ميت اضن
         واذكر الصار
حمل سبع فصُل        على اجتافـي ثقل
     عيب الانضار
ولا يلوگ السبي           على ال النبي
         وسمع الاخبار

يجرح النايبه       يجفني الشيبه
قضوا وبجنب الفرات     واني مسبيه
    والخيم تحترك
ــــــــــــــــــ
على الشام ارحلت      باذيه من اوصلت
       وي العيال
لجن قلبي انجرح        شفت عدهم فرح
     ودمعي همال
لكم عيدٌ اذاً                ولا نعرف لمن
            بكل الاحوال
خوراجنا اجوا             زلمهم ما نجوا
      ياقلب سال

علي سلب القلب      ولا احمل صعب
قضوا وبجنب الفرات     واني مسبيه
    والخيم تحترك

ــــــــــــــــــ
زين العابدين الشمري