خمسه وثلاثين عام وبالسجن
عمري خلص ونه وآهات وحزن
عالغريبه نوحي....... ماتهمني روحي
خمسه وتلاثين عام وبالسجن
=================

خمسه وثلاثين عام ودمعي ماناشف يهل
حتى سجاني تعجب كال بسك ماتمل
هاي طاموره خطيره وسجنك ابدا مو سهل
گتله كله يهون لاكن صعبه زينب عالهزل

عمري لليل وحگي لو نوحن وون
والسجين الهله كل ساعه يحن
صعبه ياجروحي...... ماتهمني روحي

=================

انه شنهي وصبر زينب نقطه اصرله ابحر
عيونهه شافت مصايب ذبح وچفوف ونحر
هيه بس ممشاهه كافي من المخيم للنهر
تعادل اسنين العشتهه شوغه وحده اعله الگمر

مخدرت عباس اميره مدلله
وصارت الدنيا ويه زينب مايله
‏اتهدمت صروحي ...... ماتهمني روحي

================
عاده عد العرب جانت الحرمه ميمسهه الهوه
ليش چا زينب تنادي السوط لمنوني چوه
الغيره عد الناس ماتت من وگع حامي الوه
حرگو الخيمه عليهه وفرهدو حته الظوه

شلون مانوح اعله زينب ونتحب
بعينها شافت خيمهه من تشب
دمعتي الها توحي ...... ماتهمني روحي

=================

موش سم الموتاني ولاسجن منه متت
متت من غربتهه زينب وظيمهه لمن شفت
حرمه واخوته ضحايه وراس اخوهه بالطشت
ساعد الله گلب زينب انه ماشفت اسمعت

شلون لو عايش هذيج الفاجعه
جا صرت اول ضحايه الواقعه
هذا كل طموحي .....ماتهمني روحي

===============

انه شيعه هواي اجنتي وشيعتهه جنازتي
وهيه بين الغرب ظلت من يشيع عمتي
مصيبتچ ياعمه كلفه وهينه هايه حالتي
انه ياعمه امن اذكرج تهون كلهه مصيبتي

ياهظيمه بت علي وبت النبي
تشوفها الناس وتطر درب السبي
ياهو گلها روحي...... ماتهمتي روحي

==================

يالله
حسين هادي الزيدي

ياابا عبد الله ياابا عبد الله
_
سيدي دكو قطعتي خادم احسين الشهيد
ودري متقصر حبيبي وابد ماتخلف وعيد
سيدي عينك عليه تدري عن اهلي بعيد
كبري غربه وحيل ضلمه سيدي وتعرف شريد
____
ياابا عبد الله ياابا عبد لله   يا ابا عبد لله

ادري ينسوني الاحبهم ونته ابدا مانسيت
سيدي بجاهك اريدا تحاجي منكر لو اجيت
يكلي جاوبني علعمرك بيش خلصته وبجيت
كتله خلصته بمجالس سيدي الطم    بقيت

__ ياابا عبد الله ياابا عبد الله  يااباعبدلله           

سيدي طبعك  تسامح وتحظر الطاح بعسر
بدنيتي لامانسيتك   حشى  تنساني    بكبر
حسين خليني علبالك تدري شماتي   شكثر
افتح   العقده  بلساني  بيوم  دفنوني  ابشبر
*____

سيدي  احيت العزيه  بيوم   ممنوع   الكلام
انه اصيح بعالي صوتي حسين الك مني  السلام
جنت ماادري  بزماني ولوكت   شنهي   الظام
وابد   مااخرني   عنكم  لابرد  حتى     ظلام
_

سيدي اذكرني بمحرم من تجي كل الخدم
جنت واكف علطريق بجفي شايلك علم
وقره لطميه التحبه بحسره احجيه والم
اه يحسين ومصابه المنه تارس كلبي دم
____

سيد*ي بداعت رقيه الجوه رجليه الجمر
حيل وحشه شلون بيه ولا اخو البيه اليمر
       حبابي كل الي    الاودهم   جفو عني  بلا عذر
سيدي سلمتك امري ولله سلمت الامر

حسين هادي الزيدي

مني الدمع سال...... . طال البعد طال
لشوكت تبقه بغيبتك ...... والهجر عذب عمتك
طال البعد طال
----------------

طالت يمهدي غيبتك والناس مارحموني
انه العقيله ام الخدر ذاك الحچي يسمعوني
يمته تجي الگبري بعد خاف العده يسبوني
فتوى انطي عمه الشيعتك يم أخوتي يودوني

هواي الحچي انگال.... ميسرك الحال.
وآنه ارتجيها جيتك ...... والهجر عذب عمتك
----------------

جانو يفرحوني شكثر شيعة علي خطاري
ولو شفت زاير بالصحن انسه الجرح واعباري
منعوها هسه ازيارتي وبس الخطر بخباري
گربت وفاتي ومنيتي تگصدني وي زواري

وتحيي الزيارات ..... بصحني اليجي يبات
واتزورني وي شيعتك ...... والهجر عذب عمتك
------------------
انه العقيه الحايره من الضلع لرض الشام
الكسر اجناحي النهر والما رعتني الايام
كتبو تسافر عالگبر اليدعون الاسلام
وين آنه عمه والسفر شمخليه بيه الآلام

لو يمي عباس........ چا سكت الناس
كل لحضه انطر رايتك ...... والهجر عذب عمتك

----------------

يالمهدي شحچيلك بعد عمتك سجن مسجونه
ارقيه غريبه ابلا حمه بين الغرب مدفونه
واليگصدلهه معتني ذوله العده يذبوحونه
من شيعتك خالي الصحن والصحن تجري اعيونه

لو هم جبل مال....... من ثگل الاهوال
منتظره تبقه ارقيتك ...... والهجر عذب عمتك
------------------

تدريني من حرگ الخيم الهسىه الرماد ابعيني
ومن اذكر ايام السبي گلبي ترى ياذيني
يالمهدي شوغات اشكثر عشت بهذيچ اسنيني
فراگ اخوتي وتل الهظم هذا الذي حانيني

ادري انته مهظوم........ من كثر الهموم
ليك اشتكي من فرگتك ...... والهجر عذب عمتك

-

يازينب
ثواب هذا القصيده الى امي وابي ومن ليس لهم ذاكر
حسين هادي الزيدي ------------------

راح ابوي ... ياهو الي يعوض حنانه
راح ابوي..... بس بقت صوره ابمكانه
سافر وحيرتنه حيره. ..... راح خيمتنه الجبيره.
راح ابوي

---------------
راح ابو الملگه الحنين الياغلاته
چان اذا شافانه يضحك وشحلاته
الگاع ابد متشيله لو مرن بناته
چنه مرتاحين نتغطه ابعباته

بهيده راح ..... حتى ماكلفنه ابونه
بهيده راح ..... مو ابو چنه اخونه
شگد حنين وكله غيره... راح خيمتنه الجبيره
---------------

راح ابو حچي اللذيذ المانمله
يعرف البگلوبنه ابلا ما نگله
شگد حنين او دمعه عالغربه يهله
مثل خبزه يشور الباطل يذله

شگد حنين...... . يفرح شگد باليجونه
شگد حنين...... يعزب ابدمعة عيونه
وجهه ابد لامايديره راح خيمتنه الجبيره
---------------

ليش النحبه يروح ابساع منه
ويبقه بس ذكره جميله نحچي عنه
چان شمعه ابيتنه وجامع شملنه
والله لو ميتين بويه وياك كلنه

الفرگه موت..... و هيه مو هينه علينه
الفرگه موت.... بس على امر الله شبدينه
الينضلم هوه اليجيره… راح خيمتنه الجبيره
-----------------

اتخيل ابنص الگبر دافنها روحك
بلا شعور يفزز الميتين نوحك
صعبه كلش بيدك اتغطي جروحك
هوه موبس حيلك انهد كل طموحك

شگد بچيت...... هايل اترابك بديه
شگد بچيت...... يالعفتنه بلا تچيه
ياعطر عمري وعبيره… راح خيمتنه الجبيره

------------------
بويه هاي ابنيتك الشلتلي حالي
تگول يتراوالي ظل دوم اعله بالي
وهيه شيصبر گلبها على الغوالي
راح ابوي وعل وجن دمعي يلالي

من مشيت ..... ظلت الدمعه جريه
من مشيت. ..... ياهو يتفگد رقيه
تگول چنت انه اميره... راح خيمتنه الچبيره

حسين هادي الزيدي

حر الشمس والسوط اذانه
من التعب فد نوب ذبلانه
ياخويه ياخويه يبو فاظل

-------------

الموجود اخوها هيبه هيبتهه
وهيه الاخت تتنخه بخوتهه
والراح اخوها صعبه حالتهه
متحيره حزنانه ابمصيبتهه

بذاك الوكت كون انته ويانه
من التعب فد نوب ذبلانه
----------------

دار الزمن ياخويه واشسوه
من رحت خويه راحت الخوه
وهيه الاخت بخوتهه تتقوه
خمسين عمري وانه اتلوه

من اوصلت محد تلگانه
من التعب فد نوب ذبلانه
-----------------

انه العقيله الكل يعرفوني
بنظرت حقد لمن يلاگوني
هذا اليسبني وسوطه بمتوني
وذاك التضحكه دمعة عيوني

اختك يكافل بقت عطشانه
من التعب فد نوب ذبلانه

----------------

عگبك يخويه الوكت دولبني
من داهيه الدولاب شو ذبني
الراح والرد شامت يسبني
هذا الحزن لامايفارگني

ظربوني خويه وحيل تعبانه
من التعب فد نوب ذبلانه

----------------

مشتاكه الك وعيوني ملهوفه
شلون الگمر بعيوني ماشوفه
هذا الكفلني مگطعه جفوفه
تدري ابحبل بچفوفي مجتوفه

محد اجانه وماي روانه
من التعب فد نوب ذبلانه

--------------

انه أختك المحد سمع صوتي
ياهو اليشيل اجنازتي ابموتي
راح الگمر جيبولي تابوتي
نظرات زرعو من بعد خوتي

شله بحياته الراحت اخوانه
من التعب فدنوب ذبلانه

حسين الزيدي ----------------

رسول الله ص يوصي امير المومنين ع
بالصبر على مصيبة الزهراء ع
--------------------
تموت الزجيه او دمها عالتراب
  وتصبح يحيدر دنيتك عذاب
انته الامير على الصبر .. شد حيلك او لا تنكسر
سلام .. سلام
-------------------------
صح جفك الخيبر قلع .. والشافك اكبالك وكع
تتگيد ابذاك  الوجع       .. تطيح
اهل الحقد بيهم طبع .. لاذمه عدهم لا شرع
باجر يكسرون الظلع   ..  تطيح
على خد يسطروها تره .. دين الله يمك منبره
ياحيدر اصبر عالجره  .. تطيح

حتى السمه علنت ترى الحداد
انحب يحيدر ولبس السواد 
كسر الگلب ماينجبر   ..  شد حيلك او الاتنكسر
سلام .. سلام
-----------------------------
باب او عله الحايط هوه .. عالزهره ونطبگن سوه
مختنگه واتدور هوه   ..  تصيح
ريتها دخان انملت .. اعليها الچفوف اتطاولت
ياعلي الزهره اتالمت      .. تصيح
ضلوع الزچيه مكسره .. ومحسنها اصد دمه جره
او وردة حياتي  محيره      . تصيح

خلي ابن عمي مني هالرجاء
لا ارفع ايدي واگلب السماء
اگلبها عاليها حدر     .. شد حيلك او لاتنكسر
سلام .. سلام
------------------------
لمن اموتن ياعلي . . مو بلوه رايح تبتلي
ولاواحد ايضل من هلي  .. حرام
امر الله هذا الكاتبه .. وعين الله هيه اتراقبه
الجامع حطب وي صاحبه     ..حرام
لا رحمه عنده ولا يحن ..جاب الحطب يصرخ وان
الزهره گالوله تون          ..   حرام

باچر يحيدر دمعتك تسيل
وظهرك مثل هذا الكمر يميل
كلبك صبح مثل الجمر    شد حيلك ولا تنكسر
سلام .. سلام
------------------------

واليندبك تحظر اله . وتفظله اعظم مشكله
والزهره عندي مدلله    .. تنوح
جرحك إعلام ايظلله .. صعبه ترى هل مرحله
خلگك ياحيدر طوله    .. تنوح
ياحيدر اي هذا الصدگ .. چفوف التسبح تنحرگ
ويه الباب عمرك ينطبگ   .. تنوح

يمك ياحيدر يبقه هل قرار
وانه ادري كلبك على الزجيه نار

صبرك عله كل اليمر   .. شد حيلك او لاتنكسر
سلام .. سلام
------------------------
باجر يحيدر شيعتك … كلها تصير ابخدمتك
يرفعون باجر رايتك     ..امير

الحاضر يبلغ غايبك . يالصابر الله يعوظك
ياهو الي منهم يوصلك    . .. امير
هذا الحقد ظل للازل ..يغارون منك لااقل
والحبك ابنعشه انحمل  .. امير
هاي العصابه العلنت الولاء
باجر اموت أو تنصب العداء
اي وحق خدها المنسطر   .. شد حيلت او لاتنكسر
سلام سلام
--------------------------

الخادم
حسين الزيدي

فدوه اللعباس هاي عيونه
دمنه شيعي وابد ميغيرونه
القتل النه عاده .... نعشگ الشهاده
....................

اه يالمهدي وغلاتك....... شيعتك مسهه الظرر
نقاتل ابابسط وسيله .....عدانه الك جبناها كر
تفننو بالذبح بينه ......وماكو شيعي العدنه فر
احنه تربات ابو اليمه .....شماقسه ويانه الدهر

دمنه حار ابكل حرب صگاره
بينه غيرة من الكفيل وشاره
الربنه هل عباده .... نعشك الشهاده
........................

الفرحو ابطيحت احسينك.... اليوم ردو من جديد
طشو الجكليت ركصو......... طاح نصر الله شهيد
ذوله احفاد السقيفه .........ولد مروان ا ويزيد
ذوله ذيل الكل يهودي ...... عاشو او ماتو عبيد

قاتلوهم بالقلم حتى السان
احنى ماعدنه ابد شيعي جبان
الشيعه كلها قاده .... نعشك الشهاده

.....................
احنه انصارك يمهدي.... كلوبنه كلهه ثبات
وماعشكنه الدنيا احنه..... بذله مانعرف نبات
القدس بينه من تنخت .....شيعتك ركظت حفات
ومايهمنه ارواح ننطي..... ولا كراسي ولا الحيات

ناس تتمنه ظهورك رايحه
ماكو بيت الشيعي مابي نايحه
ياامير الساده. ..... نعشك الشهاده

..................

احنه تربات المجالس...... ندور ادواره الاجر
وبدعاء العهد نلهج ....... سيدي دوم الفجر
گلوبته من البعد خلصت ...كافي يالمهدي الهجر
استشهدو كل النحبهم .... . .خلو ابگلبي كسر

تحالفت كل البشر عالشيعه
واحنه نتنطر يمهدي البيعه
الك هل سياده.... .. نعشك الشهاده

......................

اليوم يالمهدي اشتكيلك....... سيدي من هل زمان
ظاكت الدنيا ابوسعهه.......... الشيعتك ماظل امان
تهجرنيه بحبك احنه .......بهل وطن مامش مجان
وحنه نتنطر قدومك .........سيدي آن الاوان

مانطخ راس وعلي يعرفونه
رافظيه اعداكم ايسمونه
علنو الاباده...... نعشك الشهاده

.

.....................حسين الزيدي

هاي الليله ابني الحيد ليلة حنته وزفته
بس مو للعرس للموت انه اوليدي ماخذته
.................…

صح كلش ترف وزغير ونظرت عينه حساسه
لبسته الدرع والطاس وجدحت غيرته براسه
وزفيته الحرب جسام عمه حسين اجه وباسه
ذاخرته انه هذا اليوم رافع راسي يم ناسه

صح غالي الظنه ولحسين انه اوليدي ذاخرته
بس مو للعرس للموت انه اوليدي ما خذته

.....................

خشنه كلوب هاي الناس ونته كليبك اللين
يالفركاك سل الروح بوجهي فراكك مبين
مااحمل هظم فركاك كلب الوالده حنين
فراكك يمه جاسم موت تدري عليه مو هين

عريس الطفوف اليوم سهام ارماح بايكته
بس مو للعرس للموت انه وليدي ماخذته

.......................

ادريبك حنين هواي يبني وكلش اتحبني
تكبر يبني انه اترجاك وتلمني الكبر سني
ماادري الطفوف اتريد عريس وشمع مني
تاليهه العرس مادام محنه بالدمه يبني

بدموم الطفوف اليوم صارت حنته وشفته
بس مو للعرس للموت انه وليدي ماخذته
..........................

انه امك يجاسم هاي حنت عرسك اكبالي
كل بالي ازفك جان مو للموت يالغالي
يوصية الحسن ياحيد ظلت دمعتي اتلالي
عريس او شهيد اتروح ماجانت ترى ابالي

يالماخذ وياك الروح اخذني وياك جاىيمته
بس مو للعرس للموت انه اوليدي ذاخىته

..........................

ربيتك ييمه سنين اشوفك تكبر ابعيني
ماادري جمر فركاك يمه ابكلبي يجويني
والخيمتنه لو رديت ميته عليك تلكيني
جا شنهي الحياة ابدون وجهك مظلمه سنيني

من كثر الطعن بالسيف انه اوليدي معرفته
بس موللعرس للموت انه وليدي ذاخرته

......................

حسين الزيدي