Katta maʼnolarni oʻzida jamlagan surat ekan...

Birlari yurtga Islomning nimaligini bildirgan, olib kelgan boʻlsalar, yana birlari ana shu yurt odamlariga bu islomning asl mohiyatini anglatgan, anglatayotgan Rasulullohning ﷺ merosxoʻrlari...

@abdullohozod

Ushbu muborak oy haqida eng taʼsirli taʼriflardan biri ekan...

@abdullohozod

Suhbatlarni eshitib, xayolimga kelgan oʻylar

«Arbaʼin Navaviyya» tanlovining navbatdagi bosqichiga tayyorgarlik koʻrish davomida suhbatlarni yana bir marta eshitib chiqishga imkon paydo boʻlyapti, alhamdulillah.

Har safar suhbatlarni qayta eshitganimda ancha yangiliklar, manfaatlar olaman. Dinning asl mohiyatini yana bir bor anglagan boʻlaman.

Bu suhbatlarni birinchi marta 2 yil oldin eshitgan edim. Suhbatlarni eshitgunimcha hamma qatori men ham islom haqida umuman boshqa fikrda edim. Namoz oʻqish, roʻza tutish, ehson qilish, yana shu kabi birlamchi amallar dinni tashkil qiladi, deb oʻylardim.

Ustozning aynan «Arbaʼin Navaviyya» suhbatlarini eshitganimdan keyin esa men oʻylab yurgan, din shu deb yurgan fikrlarim oʻz-oʻzidan puchga chiqdi. Islom aslida umuman boshqa narsa ekan. Ulkan neʼmat ekan.

Har kim ustozning suhbatlaridan kelib chiqib, dinga amal qilsa, barchamiz istaydigan narsa — dunyoning oʻzida azizlikka erishish, oxiratda ham maqomi yuqori boʻlishini tushundim.

Biz-ku umrimizning qaysidir maʼnoda yarmini yashab oʻtganimizda bu haqiqatni tushundik. Ammo har birimizning farzandlarimiz, jiyanlarimiz bor. Ular aqlini tanigandan boshlab ustozning bu suhbatlarini eshitsa, dinning asl mohiyatni anglasa, juda katta gʻalabani qoʻlga kiritar ekanmiz.

Bejiz ustoz bir suhbatlarida: «Agar amal qilinadigan boʻlsa, «Arbaʼin»ning oʻzi saodatimizga yetadi», demagan ekanlar.

Ilohim, farzandlarimizga ustozning suhbatlarini tushunadigan fahm, anglaydigan qalb, uni hayotiga tatbiq qiladigan iroda nasib qilsin.

Gaplarimni yaxshiroq tushunish uchun «Arbaʼin Navaviyya» suhbatlaridan istalgan birini yaxshilab tinglab koʻring. Suhbatlardagi deyarli hamma hadisni avval eshitgan, ammo u hadisdan nima qasd qilinganini katta ehtimol bilan tushunmagan boʻlasiz. Xuddi men kabi. Men hozir 13-suhbatni eshityapman. Siz ham shuni tinglab koʻring.

@abdullohozod

Bir kun davomida eng ko'p qaysi ismni aytasiz?

Men Husayn ismini. Har bir aytilganda yoki ustozni, yoki chaqaloqni nazarda tutaman. Tilimizdan Husayn degan ismni aytishni, uni aytganda qalbimizda yaxshilik, xursandchilik ifori ufurib turishini nasib qilgan O'ziga shukr.

@abdullohozod

Baxt

Kuni kecha Toshkentga tasavvuf boʻyicha yetuk olimlardan shayxlardan biri keldi. Bu shayx Husaynxon ustozga ustoz ekanlar.

Bugun ertalab shayx nashriyotga keldilar. Doʻkonni, bosmaxonani aylanishdi. Oxirda majlislar zalida qisqa suhbat oʻtkazildi. Ustoz ham keldilar.

Tadbir tugab, hamma peshinga harakat qilishga tushishdi. Men ham ustozga yaqin joyda, biror hojatlari boʻlsa, labbay deyman deb turibman. Shunday boʻldi, shayxning qayerda ekanliklarini soʻradilar. Peshinga tahoratni yangilashga kirdilar, desam, «Biz ham yangilab olsak boʻladimi?» dedilar. Albatta, deb yoʻl boshladim.

Yoʻlakchadan yurib borar ekanmiz, ustoz xonam qayerda ekanligini soʻradilar. Koʻrinib turgan edi, qoʻlim bilan koʻrsatsam, «Kirsak boʻladimi?» dedilar. Hayajonim yanada kuchayib ketdi. Albatta deb, xonamizga olib kirdim. Ustoz ustlaridagi chakmonni yechdilar, telefonlarini qoʻydilar, koʻzoynaklarini yechdilar-da, tahoratni yangilashga ketdilar…

Kiyimlarni ilishga tahoratxonada imkoniyat, sharoit bor edi. Ustoz buni koʻrdilar. Lekin shunday boʻlsa ham meni yaqin olib, qaysidir maʼnoda ishonch bildirib, xonamizga narsalarini qoʻydilar.. Buni koʻrib, xursand boʻlib, ichimga sigʻmay ketdim.

Har kim uchun baxt har xil oʻlchanadi. Men uchun esa baxt ustoz bilan oʻtkazgan vaqtlar boʻlsa kerak. Juda katta baxt…

Paytdan unumli foydalanib, ustozning chakmolarini kiyib, tabarruk qilib oldim. Zora, ustozning axloqlari bilan axloqlansak…

@abdullohozod

Salavot aytishga targʻib

Kecha Qorasuvdagi (Toshkent viloyati) bir masjidda shom namozini oʻqishim kerak boʻldi. Jamoatga ulgirmaganim uchun alohida oʻqidim. Ular namozni tugatishib, duo qilishdi. Soʻng kichik boʻlsa-da jamoat birgalikda salavot aytishdi.

Men bu tasvirni juda kam koʻrganman. Shaharda kirgan masjidlarimning hech birida namozdan keyin xuddi tilovat kabi salavot aytilmaydi. Yoki men eshitmaganman.

Masjid taʼmirlanayotgani uchun namozlar masjid hududiga kiruvchi, lekin qandaydir orqa tomonda oʻqilyapti ekan. Yaʼni koʻrimsiz joy. Lekin bu yuqoridagi tasvirga putur yetkazmadi, aksincha saodat asrini eslatdi xuddi.

Odamlarning salavot aytishayotganini koʻrib, yaqinlashayotgan Rabiʼul avval oyi yana xayolimga keldi. Bu oyda nafaqat oʻzimiz, balki bolajonlarning ham salavot aytishlariga targʻib qilishimiz kerakligini oʻyladim.

Boshqa din vakillarining rojdestvo, helloven va yana boshqa shu kabi bayramlari bor. Ular oʻsha bayramlarini zoʻr kayfiyatda, avvaldan tayyorlanib, shu bayram kunlari yigʻilib oʻtkazishadi. Hatto kichkina bolalar ham ko’cha-ko’yni kezib yurishadi.

Bizda esa bu narsa yaxshi rivojlanmagan va faqat Ramazon bilan kifoyalangan. Aslida bunday kunlar, bayram qilinishi mumkin boʻlgan sabablar bor yetarlicha. Ana shunday sabablardan biri Rabiʼul avval oyi.

Bu oyning fazilatlari haqida gapirmay, uning bolalar xotirasida qanday esda qolishi mumkinligiga sabab boʻluvchi ishni aytay.

- Bolajonlar musobaqaga haris boʻlishadi. Doʻstlari, oila aʼzolari bilan kim oʻzarga biror oʻyin oʻynashni yaxshi koʻrishadi. Kelayotgan Rabiʼul avval oyida farzandlarimiz boʻlsa, ular bilan, boʻlmasa jiyanlar bilan kim koʻp salavot aytish musobaqasi oʻtkazilsa;
- Musobaqaga qatnashuvchi har bir ishtirokchi har kuni salavot aytib yurishi, kun oxirida telegramdagi oilaviy guruhga hisobotni yozib qoʻyishi, oy oxirida esa hammaning aytgan salavoti hisoblanib, kim gʻolib boʻlsa, unga hadyalar berilishi aytilsa;
- Bolajonlarga oʻrnak boʻlish uchun oʻzimiz ham ularga qoʻshilib, musobaqada qatnashishimiz kerak boʻladi;
- Oy oxirda oʻzimizni magʻlub qilib, ularni gʻolib qilamiz va chiroyli hadya beramiz.

Boʻldi, shu kichkinagina ish bilan bolalarning xotiralarida bu muborak oy doimiy eslab yuriladi, nasib qilsa. Yengil amal bilan ulkan yaxshiliklarga erishamiz.

Bu shunchaki samimiy tavsiya, bolajonlarning salavot aytishlariga bir targʻib. Aslida oʻzim ham bolalar bilan bu kabi musobaqa qilmaganman avval. Bu yilgi Rabiʼul avval oyida birinchi marta sinab koʻraman.

Qaniydi, shu ishlar sabab borib-borib har yilgi Rabiʼul avval oyi xuddi Ramazonni kutgandek kutiladigan boʻlsa, salavot farzandlarimizning tilidan tushmasa, hayoti davomida yoʻlchi yulduzi boʻlsa…

@abdullohozod