#لمولاتي_الغريبه_زينب_ع

لسان حال مولاي السجاد ( عليه السلام ) وهو يوصف حال مولاتي زينب ( عليها السلام ) في آخر لحظاتها .

على فراش الموت زينب تلتفت وتريد اهلها
حالها يبجي يوادم هسه هاي شلون احلها
ياهو اجيبه من التحبهم يوگف يوَگف دمعها
ياهو اجيبه وما مگطع حتى بس خوية يكلها

اه زينب ،، اه زينب
اه زينب ،، اه زينب

===========================

تنازع وتنظرلي ساعه بوجهي تتأمل تلمحه
حسين ابوي التعباها وتعباها هواي جرحه
هذا حال الماله اخوه ساعه الفرگه تذبحه
بكلشي يتخيل صورهم وهيه تتخيل برمحه

اه زينب ،، اه زينب
اه زينب ،، اه زينب

===========================

گطعت الضِنّه ودمعها دمعه دمعه گام ينشف
وبردت إچفوف الحنينه وبيها بس الباري اعرف
وماتت ام عون اعله اديه وبالي يركض گام للطف
جنها تركض راحت الهم حتى بالموته ركض طف

اه زينب ،، اه زينب
اه زينب ،، اه زينب

===========================

هسه اگولن فدوه عمّه لو اگولن فدوه يمّه
فدوه كلهن وانتي كلهن فدوه بس احجيلي كلمه
راح اموتن غالي غالي بيدي جندوب انا اطمّه
بيدي أدفن بالأحبهم وين البگلبي أضمّه

اه زينب ،، اه زينب
اه زينب ،، اه زينب

===========================

شيعتها وظهري محني وَحدي ومالي گرابه
نزلتها بنص كبرها ضلمه ذكرني بخرابه
وصحت بويه حسين احظر انت والصاحت يبابه
هايه زينب هل اجتكم وخلَّص الشام وعذابه

اه زينب ،، اه زينب
اه زينب ،، اه زينب

===========================

تمت
الخادم حسن الكريماوي ✍🏻

نزلة لمولاتي ام الاقمار ام البنين "ع"

دخيلج يالخدمتي بغيره واحساس
دخيلج يم بخت يارافعه الراس
على النيات الله ينطي عبده
على حب زينب الله انطاج عباس

-

يمالج كُفؤٌ يصير إلّا حيدر
غيرج يا مره لعباس تكدر

ام الوفاء .. ام البنين
ام الوفاء .. ام البنين

___

يقاموس الوفاء بحب الحسين
يالمخلفه زلم بالحومه رزنين
اذا غاروا سويه يعله الصياح
يجيش اقروا الحمد ع الروح مرتين

-

يالمخلفه زلم تاريخ الرجال
فرّو كربله فرة المحچال

ام الوفاء .. ام البنين
ام الوفاء .. ام البنين

___

خِدَمتي بنيه صدقت فوك الهواي
وحبيتي الحسين بگلب وبراي
اذا يعطش تجينه وماي ع الراس
لذلك ربنه خلاج ام ابو الماي

-

كلشي يم خدمتج صفر معدود
ام الجود انتي وام ابو الجود

ام الوفاء .. ام البنين
ام الوفاء .. ام البنين

___

خدمتج باقيه والاثر موجود
ومن احجي لكلامي كون اكو شهود
نروح لكربله نشوف المشاهد
كل واحد بصفحه انشوف الزنود

-

بنتك ياحُزام مخلفه الحزام
لظهر حسين لو دارت الايام

ام الوفاء .. ام البنين
ام الوفاء .. ام البنين

___

كلمات
الخادم حسن الكريماوي ✍🏻

خليني اخدم صدك ؛ ماريد اعيش بوهم ؛ خلي جروحك تعيش ؛ بگلبي ويزيد الالم

خليني دمعة يتيم ؛ بطاري الحوافر اطيح ؛ لو گالوا اخيول اجت ؛ تسحك جسد بس ذبيح

ياحزني الما املّه ولا فد يوم امل
ياتعبي البي راحة گلبي والعقل
تعبني وي اضعونك علعلني بحبل

-

حسين اه .. حسين اه
حسين اه .. حسين اه
___________
عُذراً حبيبي حُسَين ؛ عبرن جروحك الالف ؛ وبذنبي ازيد الجروح ؛ لينلي گلبي الصلف

ذنبي لجروحك ملح ؛ كلساع الجمك وَ ارد ؛ جا يمته روحي تتوب ؛ خايف ارد وانطرد

يالما خالق منك ربي اي شبه
لاتطردني امروتك وين انطي الوجه
ملگاك ايرد روحي وكل ملگه مَلِه

-

حسين اه .. حسين اه
حسين اه .. حسين اه
___________
الزمني لو تيهت ؛ ما الحگه لو جدمي زَل ؛ بخنصر يمينك اريد ؛ تدعيلي خادم اضَل

إعرضلي وكت الغلط ؛ خربلي درب الذنب ؛ واعرض دروبك علَي ؛ سويني فعلاً محب

دليني اعله جروحك وين ارد انجرح
يـ الما سالم راسك حتى اعله الرمح
رمحك يچوي وجسمك رشوه بالملح

-

حسين اه .. حسين اه
حسين اه .. حسين اه
___________
اكسرلي غصن الذنب ؛ يالمنكسرلك ظهر ؛ عيشني ركضه وعطش ؛ بديني يم النهر

عيشني راس برمح ؛ ينظر عياله بفله ؛ غربه وعطاشه وركض ؛ ركضوها كل كربله

خليني وي اضعونك بالهيمه انسبي
وي السجاد اركض اطفي بالعبي
واعثر بين الخيل واكضيها حَبي

-

حسين اه .. حسين اه
حسين اه .. حسين اه ___________
كلمات
الخادم حسن الكريماوي ✍🏻

#شور
قصيدة : مثل لون العَضد
لسان حال مولاي الحسين (عليه السلام) بفقد مولاتي الزهراء (عليها السلام)

يايمه ابنج .. واريدج
رجعيلي ابوسن .. ايدج
ما احمل البعد

صعبه عَلَيْ .. ييمه
وجهج كبر .. يضمه
يمج اجي وارد

يمج اجي وارد .. بلكي الله عينج تنفتح
كلبي انمرد مرد .. اعليج انشلع ياكبر جرح
مثل لون العَضد .. باجر شفافي وانذبح

باجر عطش يمه
والكلفه والهضمه
زينب غريبه بنص اجانب

واليكسر الخاطر
ركضتهه بالعاشر
تعثر اخيتي وانا اراقب

===============

دار الوكت .. علامه ؟
وصرنه صدك .. يتامه
يتامه وبزغر

وميته ييمه .. زغيره
هسه لون .. جبيره
مو كدرج الكبر

مو كدرج الكبر .. يالرحتي ميته من وكت
اعليج الدمع عمر .. دمعي ودمع زينب الاخت
وابونه منكسر .. حتى علي يكول اتيمت

اتيتم ابو الايتام
ويانه ضل مينام
نفرش عباتج نبجي سويه

ردنه الهلا بصوتج
ماردنه تابوتج
ولوني شحب من هالرزيه

===============

كلفه الرزايا .. باجر
بضلعي تكص .. خناجر
زينبنه حايره

شما تلتفت .. مصيبه
ينادوها يا .. غريبه
غريبه هالمره

غريبه هالمره .. ينادوها جي ما الهه احد
بالهيمه حايره .. لا من اخو ولا من ولد
دنياهه دايره .. تطب بقصر هاي الاشد

الما طالع الهه ضل
بسوك وسبي تدخل
يلاكوها بحجار وشتايم

يايمه يهظمني
تشاكف حجر عني
وبيها الحبل راسم علايم

===============

كلمات
الخادم حسن الكريماوي ✍️?

واويلاه .. عالزهره وبزرهه
واويلاه .. عالزهره وبزرهه

===============

علويه ما كالوا ابد عصروهه بس عصرة موت
ومن شدة الرفسه الضلع طك وطلع منه الصوت
مثل الخشب من ينكسر هيج الصدى اتخيل اه
كالوله للجاني ام حسن كلهم وإن خل اتموت

اليوم الضلع نكسره
خلف الجذع نعصره
ميهمنه حتلو مره .. عصروها

بين الرفَس والضُرَب
جاويهه ذاك الحطب
دم ودمع سوه صب .. كسروها

____

واويلاه .. عالزهره وبزرهه
واويلاه .. عالزهره وبزرهه

===============

بالمحسن البسمار اجه وبراسه نابت ويلاه
خر منذبح فوك الارض متخضب ابطوله ادماه
وهيه المصيبه انسحك من الهجموا اعله ام حسين
وبكل حقد ويلي العده مرتين داسوا فوكاه

تنظر بزرهه نزف
بالرفسه صدره انخسف
صاحت ييمه وسف .. يايمه

حيل الزجيه برد
صاحت ييمه الولد
حضرته حضني مهد .. يايمه

____

واويلاه .. عالزهره وبزرهه
واويلاه .. عالزهره وبزرهه

===============

مو بس كسر مو بس ذبح مو بس رفس اسمع هاي
ردوا على ام زينب تره وبالسوط ضربوهه هواي
وصاحت يبويه الحك الي الحك تره هواي الصار
باكوا حلالك بالعلن وباجر يبوكون الماي

باجر جبير الخطر
باجر ضمه ودم نحر
عالغالي يغله النهر .. عالغالي

مو بس ضلع ينكسر
باجر عشيره وخدر
مشتت شملهه الضهر .. عالغالي

____

واويلاه .. عالزهره وبزرهه
واويلاه .. عالزهره وبزرهه

===============

الكل خيره من جف النبي وسفه عليه جفه يطول
بجدام محسن منسحك وحسين باجر بخيول
وزينب عله النوك الهزل باجر غريبه احا
للشام لو طب الضعن يستقبلونه بطبول

زينب تحب الستر
عدهه اغله من البزر
مالايك الهه اليسر .. ياويلي

من الضرب والحبل
جم طفله ميته وطفل
وجماله فوك الهزل .. ياويلي

____

واويلاه .. عالزهره وبزرهه
واويلاه .. عالزهره وبزرهه

===============

كلمات
الخادم حسن الكريماوي ✍️?.

قصيدة لسان حال مولاتي العليله تخاطب مولاي الحسين ( عليه السلام ) محرم 1446

مرض .. فراكك يالولي
مرض .. هد حيلي وعلي
مرض .. يبويه انت تعرف
مرض .. عليله ابلا هلي

كَسر .. اشوف بروحتك
كَسر .. وتضيع خوّتك
كَسر .. على ذاك النهر
كَسر .. العدو يستسهلك

احس .. توكف عالنهر
تصيح .. تره ظهر انكسر
يخوي

بعَمَد .. تنطك هامته
وترد .. تطيح خيمته
يبوي

زينب تكلك اجبني
خويه شعجب محني
جفك طبع ع الظهر
جا وينه كافل ضعني
_

حلم .. يرد ذاك الضعن
حلم .. يرد راسك لأن
حلم .. يرد المنذبح
حلم .. العزيزه بلا وطن

تضيع .. عمتي اعله الهزل
تضيع .. ويتغير شكل
تضيع .. رقيه ابنيتك
تضيع .. جم طفله وطفل

هضم .. راسك عالرمح
تشوف .. اختك كل صبح
سبي

رِجَف .. من الخوف الطفل
رمح .. يمشي وي الهزل
سبي

واصل رمح لهاتك
ماكو نغّار لخواتك
ضيعة صدر بالحوافر
بالهيمه ضاعن بناتك
_

كون .. ما ميت عدل
كون .. ما ينلف حبل
كون .. على جفوف الخدر
كون .. ولا سوك وهزل

موت .. عالهزله السبي
موت .. واليحدي اجنبي
موت .. اذا مو جف اخو
موت .. تترب عبي

صعب .. على زينب تره
سبي .. وتروح ميسره
حرام

اه .. يويلي اعله الخدر
شام .. مايرحم ستر
حرام

زينب تحب سترها
عدها اغله من بزرها
زينب مره ام عبايه
ركّضها تالي دهرها

__

موت .. حَل لمن رحت
موت .. يبويه شكد ردت
موت .. الموته المن صدك
موت .. على ذاك الطشت

اه .. ردت وي طفلتك
اه .. اقبل جبهتك
اه .. واصب دمعي نهر
اه .. وابلل شفّتك

العدو .. كلبه مايحس
حيل .. بثناياك ايغرس
عصاه

صَبر .. كلب ام الخدر
عجيب .. من ذاك الظهر
اه

مابيها توكف كوه
كسرتها كسرة خوه
لديرة غرب خذوها
خوَّتها جانو تَجوه
__

كلمات
الخادم حسن الكريماوي ✍️?

#قصائد_محرم_الحرام_1446_هـ
نزلة لمولاتي العقيلة زينب (عليها السلام)

زينب صوت حيدر ..
خل تلزم لسنها وتخنس الكوفه
خل الزلم تحذر ..
تجتف شكو زلمه العود مجتوفه
حيدر بنته حيدر ..
خلت شكو حيد الوانه مخطوفه

__

رادو ذلهه بس مادرو يا ناس
ماتنذل مره المربيه عباس

يادخيل ام عون = يادخيل ام عون
يادخيل ام عون = يادخيل ام عون

==========================

وكفت نص قصرهم ..
كلام الله حجيها وياهو اليردهه
واحتارو بأمرهم ..
ذو الفقار كل حرفين من عدهه
وانبلعت لسنهم ..
حيدر بيها يحجي وياهو اليضدهه

__

ادخيلك ياعلي امخلف قرائين
راس براس طكت اخت الحسين

يادخيل ام عون = يادخيل ام عون
يادخيل ام عون = يادخيل ام عون

===========================

بسم الله سمت ..
ناصب جهدك وكد كيدك اتكله
شيخ الكفر ذلت ..
بس الكم تلوك وموش الي الذله
هاي شلون رهمت ..
المو خلفت مضيف اشجابه ع الدله

__

همه كُتب زله وهيه عنوان
حق الرد تكفله بسور قرآن

يادخيل ام عون = يادخيل ام عون
يادخيل ام عون = يادخيل ام عون

===========================

اغتاض وكعد يسئل ..
شنو رايج باخوج حسين عطشان
ماشفنه الا الاجمل ..
تكله حسين اخوي برمحه حليان
وضل بروحه يسحل ..
وكال العبي جا هم الهه ميدان ؟!

__

صارت عون اخوها ادخيلها ام عون
خلت زلم امشوربه يرجفون

يادخيل ام عون = يادخيل ام عون
يادخيل ام عون = يادخيل ام عون

==========================

كلمات
الخادم حسن الكريماوي ✍️?

لسان حال الشاعر وكإني بمولاي ألإمام السجاد (عليه السلام) يكلم مولاي ألإمام الحسين (عليه السلام) عنده قدومه لدفنه . ويقول :

محني اجيت ودمعي نَگّع ثوبي
مثل زينب كوم وافزع صوبي
مثل ماينحني الواحد فوك مهد وليده
بويه حَدّب ظهري يا محبوبي

فدوه احجي .. كلمه وحده .. الفظ اسمي
وكلي بويه شلونك واحجيلك

بويه شحجي .. طبه السوگ؟ .. عثره النوگ؟
راسك برمحه بهظم نوميلك

يابويه تعبتني .. يابويه حيرتني

_________

جنت تعب سنينك وركضاتك
يابويه هسه اتعثر بشيباتك
صرت ركض سنيني والحافر سبب
والله مشتاگ  اسمع حجاياتك

تعبتني .. فدوه كلي .. انته ابوي
كونك انته ضلوع ماكو

وينه نحرك .. خل اشمك .. مثل زينب
شمه اخو خليني اشمك

يابويه تعبتني .. يابويه حيرتني

_________

ويلي شمسويه الحوافر هايه
بصدرك تروح وترد عن غايه
رماح مطحونه ويه جسمك بالسحك
صار جسمك إلهن مصلايه

وسفه بويه .. فوك صدرك .. خيول ركضت
وانا صدري سالم ومابيه شي

كون ع السوط .. بويه سهله .. كلشي احمل
كون بس وياي طولك يمشي

يابويه تعبتني .. يابويه حيرتني

_________

عرب مابيهم شيَم لا نخوه
هسه انذلهم علينه اتگوه
شحال لو هسه يكوم وياك اخوك
وذيج لمتنه ترد الحلوه

بويه نلتم .. والشماته .. كلها تسكت
ماكو واحد يفك حلكه ويحجي

(هايه زينب .. مو غريبه) .. يمها عباس
ماكو دخان وسبي وماراح تبجي

يابويه تعبتني .. يابويه حيرتني

_________

كلمات ✍?
الخادم حسن الكريماوي

نزلة لمولاتي ام الاقمار ام البنين "ع"

دخيلج يالخدمتي بغيره واحساس
دخيلج يم بخت يارافعه الراس
على النيات الله ينطي عبده
على حب زينب الله انطاج عباس

-

يمالج كُفؤٌ يصير إلّا حيدر
غيرج يا مره لعباس تكدر

ام الوفاء .. ام البنين
ام الوفاء .. ام البنين

___

يقاموس الوفاء بحب الحسين
يالمخلفه زلم بالحومه رزنين
اذا غاروا سويه يعله الصياح
يجيش اقروا الحمد ع الروح مرتين

-

يالمخلفه زلم تاريخ الرجال
فرّو كربله فرة المحچال

ام الوفاء .. ام البنين
ام الوفاء .. ام البنين

___

خِدَمتي بنيه صدقت فوك الهواي
وحبيتي الحسين بگلب وبراي
اذا يعطش تجينه وماي ع الراس
لذلك ربنه خلاج ام ابو الماي

-

كلشي يم خدمتج صفر معدود
ام الجود انتي وام ابو الجود

ام الوفاء .. ام البنين
ام الوفاء .. ام البنين

___

خدمتج باقيه والاثر موجود
ومن احجي لكلامي كون اكو شهود
نروح لكربله نشوف المشاهد
كل واحد بصفحه انشوف الزنود

-

بنتك ياحُزام مخلفه الحزام
لظهر حسين لو دارت الايام

ام الوفاء .. ام البنين
ام الوفاء .. ام البنين

___

كلمات
الخادم حسن الكريماوي ✍?