«Meni qarg‘ishing urdi», dedi erkak.
«Men sizni qarg‘amaganman», dedi ayol...
Erkak jim qoldi.
Angladi,
Demak, uni Xudo urgan.
Shunday ayolni tashlab ketgani uchun
Xudo urgan!..

Usmon Azim

Endi kunlar qaromi, gulqiz?
Tunlar motamsaromi, gulqiz?
Chala bismil qolgan bu yurak
Yongay tamug‘ aromi, gulqiz?

Sevgi nima? Dardmidi, gulqiz?
Oshiq azal fardmidi, gulqiz?
Chivinchalik nozik bu jonga
Tog‘day vido shartmidi, gulqiz?

Osmon to‘la abrmi, gulqiz?
Abrmi yo jabrmi, gulqiz?
Maxlasimga qilma e’timod,
Mening sabrim sabrmi, gulqiz?

Bo‘zlab qolgan tevaman, gulqiz,
Mujarrad bir bevaman, gulqiz.
Ketsang, ket-u, ammo unutma:
Seni jondan...
                   ...bilasan, gulqiz!

Ketib nima qilasan, gulqiz?..

©Alisher Sabriy

Yo‘llaringga

“Yo‘llaringga chim bosib, ketkizgani qo‘ymayman”

(Xalq qo‘shig‘idan)

Bu hayotning o‘yinida
Yutqizgani qo‘ymayman.
Qo‘llaringni birovga
Tutqizgani qo‘ymayman.
Yo‘llaringga chim bosib,
Ketkizgani qo‘ymayman.

Maysa bilan avrasam,
To‘xtar edi shaksiz ot.
Ulovingga kuch bergan
Uch yuz o‘ttiz sakkiz ot –
Yo‘llaringga mum bosib,
Ketkizgani qo‘ymayman.

Dunyolarni yoqarman,
Sovisang bora-bora.
Agar o‘zandan toshsang,
Agar bo‘lsang Sardoba,
Yo‘llaringga qum bosib,
Ketkizgani qo‘ymayman.

To‘saman yo‘llaringni,
Yo‘lga ishqiboz bo‘lsang.
Gulga ishqiboz bo‘lsang,
Bolga ishqiboz bo‘lsang,
Yo‘llaringga xum bosib,
Ketkizgani qo‘ymayman.

Gar otlansang safarga,
Safargamas xatarga.
Chegaradan qaytargum
Men zo‘ravon davlatday.
Yo‘llaringga sim bosib,
Ketkizgani qo‘ymayman.

Yolg‘on! G‘urur bermas yo‘l.
Bular kelmas qo‘limdan.
Bir so‘z kelmas tilimga.
Bir so‘z kelmas tilimga.
Men bag‘rimga jim bosib,
Ketkizgani qo‘ymayman.

Kumush Abdusalomova

Endi farqi yo'qdir, qishloq yo shahar,
Barida yashamoq birday azobdir.
Hayot ummoniga qancha sho'ng'imay,
Baribir chiqadi biror tasodif
Va yodga soladi kulgularingni,
Yig'ilaringniyu, tuyg'ularingni,
Mushukday muloyim uyqularingni,
Arazing, nozlaring, erkaligingni,
Meni uxlatmagan sergapligingni,
Qahraton qishlarda sovuqni sezmay
Birgalashib yurgan yo'llarimizni,
Issiq yozlarda ham qo'yvorilmagan
Birga terlab ketgan qo'llarimizni,
Deraza yonida oyga termulib
Yo'llardan ham uzun yozishganimiz,
Suvning yoqasida belingdan quchib
Titrab, es - hushlardan ozishganimiz,
Eshik oldigacha kuzatib borib
Keyin darrov qaytib chaqirganlarim,
Keyin... har narsadan bahona topib
Urushganlarimu, baqirganlarim,
Tilingdan ko'nglimga sanchilgan tikan,
Qo'limdan yuzingga tushgan tarsaki,
Va'dalar, qasamlar buzilgan kunlar,
Va bundan bu yog'i bari qalbaki,
Soxta izhorlaru, soxta afuslar,
Yolg'onlar, aldovlar, o'yinlar turfa,
O'ylab uyqulardan kechilgan tunlar,
Mutlaq isbotlari topilgan shubha,
Yorlikka tanlangan yangi odamlar,
Xuddiki o'tmishda hech narsa yo’qday,
Ikki yoqqa ketgan keskin qadamlar,
Va bari tugadi, qo'yildi nuqta.
Ulfatlar, ichkilik, sarhush kechalar,
Yangi hamrohlarni ko'rdi ko'chalar,
Kitoblar o'qildi necha - nechalab,
Xayollar surildi yangi mavzuda,
Qarorlar qilindi hayotga doir.
O'rganib ham qoldi yurak qayg'uga,
Tuyula boshladi barchasi oddiy.
Bir kun o'tmay qolar bir qultum ham may,
Yana o'tmish bilan qolaman yolg'iz,
Hayot ummoniga qancha sho'ng'imay,
Baribir chiqadi biror tasodif
Va yodga soladi...

Ilhom Salimov
@alvon_hislar

Kunlar sag'ir
Tunlar sag'ir
Qon yutmoqda qancha bag'ir
"Zamon shu-da",- dema axir
Azal- azal kimlar omon-
Omondadir bilmaysanmi?
Kimlar och-u, kimlar chanqoq,
Qonmoqlikka qòrqmaysanmi?

Biri- og'ang, biri - ining,
Biri-tomir, biri-joning,
Ularning-da, ham seningda
Qizil erur axir qoning.
Tinmayursan gunohi-yu,
Ayblarini aytib uning.
Xudoyimning yaratig'i
Mukammaldur anglaysanmi?
Azal naqqosh bitigidan
Ayb topishga qo'rqmaysanmi?

Derlar dunyo zo'rnikidir,
Yo bo'lmasa zarnikidir.
Yo'q, xatodir,
Dunyo azal
Nomus bilan ornikidir.
Zo'r bo'lsang-da oxir bir kun
Zo'ring ketib tinmaysanmi?
Bu dunyoning ne'matlarin,
Jabrlarin tortmaysanmi?

Uying qolar, yering qolar,
Hatto yozgan she'ring qolar.
O'g'il qizing qoladurlar,
Yurting qolar, eling qolar.
O'zing bilan qolsa bir kun
Xudosi bor diling qolar.
Bu dunyoga diling sotib
O'lsang afsus tortmaysanmi?
Yer ostida bitta o'zing
Qolar bo'lsang qo'rqmaysanmi?

Ehtimol bu so'nggi nafas,
So'nggi kiprik qoqishingdir.
Nima qilsang qilavergin
Bari sening xohishingdir.
Nima qilma shu osmondan,
O'tib ketish imkoni yo'q.
Nafsing o'pqon bo'lsin yerni
Yutib ketish imkoni yo'q.
Kel, shu eski dunyosiga
Mehr yuqtir, sevgi yuqtir.
Sen oshiq bo'l qolganlari
Bo'laverar o'zi taqdir.

Odamzotning farishtaga,
Aylanmog'i muhabbatdan.
Bir ayolning vujudida,
Ulg'aymog'i muhabbatdan.
Bu dunyoda sen-u men yo'q
Muhabbatsan!
Muhabbatman!
Muhabbatsiz ketar bo'lsang
Qiyomatdan qo'rqmaysanmi?
Qiymatga qadar faqat,
Sevmaysanmi, sevmaysanmi?
Muhabbatsiz o'tar bo'lsang,
Qo'rqmaysanmi, qo'rqmaysanmi?

ISYON VA ITOAT

Tig‘ ustida yurdirib, tomosho qilar Tangrim,
Cho‘g‘ ustida turdirib, tomosho qilar Tangrim.
Toshqinda bir kemadek nochor ketib borarman,
Men hech narsa bilmayman, barini bilar Tangrim.

Oldga yursam xatar bor, ortga yursam xatar bor,
Har lahza, har safaru, har tun, har sahar bor.
Bir chumoli misoli don uchun chiqqan edim,
Donni ne qiladiyu, meni ne qilar Tangrim.

Haqsizlik uchun yondim, shavq uchun isyon qildim.
Haqqimni ber dedimu Haq uchun isyon qildim.
Boshimni har yon urdim, bosh yorilgach angladim,
Poyiga qo‘ysamgina boshimni silar Tangrim.

Sabrim yetarmi bilmam, sabrimni sinayversa,
Har bir sinaganida suyagim sinaversa,
Sinib-sinib oxiri o‘zing butla deb borsam,
Suyagimni un qilib, elakda elar Tangrim.

Mayli ne bo‘lsa hamki, yorug‘ yuz bilan yetay,
Dil to‘la mehr bilan, yoshli ko‘z bilan yetay,
Yuragimni to‘ldirar bitta taskin bor faqat,
Men Tangrimga borarman, men tomon kelar Tangrim.

Guljamol Asqarova

Xalqimga

Tangriga shakim yoʻq, bori qaygʻum — san,
Qiyomat qoʻpsa-yu avom zij boʻlsa,
Adolat boʻlmasa jim koʻnasan-u
Toʻpolon qilasan tiqilinch boʻlsa.

Muhammad QODIR

@Fikrimcha_shu

Musofir

Qishloqda
sahardan to kechga dovur
onam shosupada ko‘rpacha qovir.
Yig‘lab ham oladi:
“Bolam... musofir...
O‘risga ketgan” deb.

G‘animlar har qanday pastlikka qodir,
baridan do‘stlarning dashnomi og‘ir.
Kuldilar:
“Muhabbat balosi oxir
boshiga yetgan” deb.
Oqshom oyga boqib, surdingmi xayol?
Ey, qizlardek lobar, ma’suma ayol.
Ko‘ngilsiz turmushga ko‘nding ehtimol:
“Taqdir shu ekan” deb.

Men bunda o‘zimni qarg‘ab yuribman,
sovuq nafaslarda yaxlab yuribman.
Qo‘ynimda maktubing saqlab yuribman
barmog‘ing tekkan deb.

Jamoliddin Badalov

*...Va yana yig‘ladim( koshki arzisang)
Demak, hali toshga aylanganim yo‘q...
Yupanch-da kutmadim, yelka tutmading,
Men seni Xudoga qayraganim yo‘q!

Qo‘rqma, jazolamas, joning olmaydi!
Yashasang, ko‘rgaysan mo‘jizalarni!
Tangri shafqat qilar ki nomardlarga,
Mardlar yig‘latmaydi ojizalarni...*

Shahrizoda Botirova