​Kitoblar bilan bogʻliq ba'zi odatlarim bor:

1.Odatda qattiq muqovali kitoblarni sotib olishni yaxshi koʻraman. Muqovasi qattiq boʻlsa, sifati ham yaxshi boʻladi koʻp hollarda.

1. Mutolaa qilishdan oldin necha betligini koʻraman. Men uchun bu qiziq nimagadir.

2. Oʻqiyotgan vaqtimda muqovasi qattiqmi yoki yumshoq jild tutib oʻqiyman.Bu kitobni asrash uchun zarur deb hisoblayman.Oʻqib boʻlib javonga joylayotganimda jildni olib tashlayman, albatta.

3. Kitobdagi yaxshi fikrlarni, iqtiboslarni tagiga qora qalam bilan chizib oʻqishni yaxshi koʻraman. Chizganda ham chizgʻich bilan tekislab chizishga harakat qilaman. Pala-partishlik yoqmaydi.

4. Maʼlum bir sahifada oʻqishni toʻxtatsam,hech qachon kitobni bir chetini buklamayman. Chizgʻich turadi oʻsha betida. Umuman olganda, koʻpincha qaysi joyida qolganim yodimdan koʻtarilmaydi)

5. Kitobni oʻqib tugatgach, fikrlarimni tezroq yozib qoʻyishni yoqtiraman. Lekin odatda,bunga vaqt, imkon boʻlmay qoladi. Baʼzida 3-4 kunlab yoza olmayman.

6. Koʻpchilik qahva va shirinliklar bilan kitob oʻqishni afzal koʻradi. Menga esa kitob bilan birga yolgʻizlik boʻlsa bas. Hech kim xalaqit bermasa, qanday soz!

7. Avvallari kutubxonadan ham kitob olib oʻqib ketaverardim. Hozir oʻqigan kitoblarim oʻzim bilan qolishini, kitob javonimda turishini, qachon istasam,qayta olib oʻqishni xohlayman.

8. Kitob oʻqish baʼzida uyquni keltiradi deyishadi. Bu rost. Juda charchoq bosgan vaqtlarda men ham uxlab qolaman. Ammo tonggacha uxlamay oʻqib chiqqan vaqtlarim ham boʻlgan.

9. Kimgadir oʻqishi uchun kitobimni berib turishni unchalik xush koʻrmayman.

10. Koʻpchilik kitobxonlar javonida oʻqilmagan kitoblari koʻpligini, baribir sotib olaverishini aytadi. Menda esa unaqa emas. Deyarli oʻqilmagan kitob qolmagan. Yangilariga ehtiyoj katta.

11. Sovgʻa uchun kitoblar sotib olishni yaxshi koʻraman. Garchi menga hech kim kitob sovgʻa qilmasa ham)

12. Oʻqish tezligim unchalik ham yuqori emas. Vaqtim va imkonim yetarli boʻlmaydi doim ham.Ilgari 1-2 kunda oʻrtacha kitobni tugatardim. Hozir xohlasam ham unday qila olmayman.

13. Koʻpchilik kitobxonlar avtobusda, metroda bemalol oʻqib ketaveradi. Men shovqinda oʻqishni yoqtirmayman. Faqatgina, uzundan uzoq navbat kutgan vaqtlarim poliklinikada oʻqishim mumkin.

14. Poytaxtdan uzoqroq boʻlganim sabab koʻp yaxshi asarlardan bebahra qolaman. Ko'p hollarda kitob sotuvchisiga buyurtma berib sotib olaman. U ham buyurtma bergan hamma kitoblarimni topib kelolmaydi.

Xullas, shunaqa. Sizda-chi kitoblar bilan bogʻliq qanday odatlar yoki xotiralar bor?

@biroz_adabiyot

Adabiyot bo‘lmasa, millatning ko‘ngli va ruhi o‘ladi, eng yomoni, haqiqat hissi so‘nadi. Hamma qorin uchun g‘imirlab, mayda muvaffaqiyatlar bilan ovunib yuradigan bir to‘da, olomonga aylanadi.
Ibrohim Haqqul

@biroz_adabiyot

​Asosiy kir insonning ichida boʻladi. Qolgan barcha kirlarni yuvsa ketadi. Faqat bir kirni toza suv bilan yuvib ketkazib boʻlmaydi,bu qalblarni kemiruvchi nafrat va o'ta mutaassiblik kiri, yuragingni faqat ishq poklay oladi.
Elif Shafaq – "Ishqqa oid qirq qoida"

Turkiya va AQSh yozuvchisi sifatida tanilgan Elif Shafaqning ushbu asari kitobxonlar orasida anchagina mashhur. Roman "Asar ichida asar" shaklida boʻlib, birida Ella Rubinshteyn va uning oilasi haqida hikoya qilinsa,ikkinchisida Jaloliddin Rumiy va Shams Tabriziyning tanishuvi, soʻfiylik gʻoyalari haqida soʻz boradi. Yozuvchining yutugʻi shundaki,u oʻz asarida Sharq va gʻarbga, oʻtmishga va hozirga oid motivlarning birlashtira olgan. "Shirin shakkoklik"da Sharqqa xos, Ellaning hayotidagi voqealar Gʻarbga xos. Ammo Sharqmi yoki Gʻarb buning unchalik katta ahamiyati yoʻq. Insonlar ruhiyatida sodir boʻladigan jarayonlar, oʻzgarishlar dunyodagi barcha insonlarga tegishli.

Ishqqa oid qoidalar aslida bundan ancha ilgari tasavvuf ahli tomonidan aytib boʻlingandi. Yozuvchi faqat chiroyli qilib talqin qilib bergan,ishq mavzusi bugungi kunimiz uchun ham dolzarb masala ekanligini taʼkidlagan."Shirin shakkoklik"da voqealar har bir qahramon tilidan hikoya qilinadi. Bu esa obrazlarni yanada jonli chiqishiga sabab boʻlgan.

Musofir boʻlmaguncha musulmon boʻlmaysan, degan gap bor. Hammayoq gʻam-g'ussaga to'lib yotgan dunyoni kezishdan ne naf, deyishingiz mumkin. Biroq safar davomida inson yaxshi-yu yomonni koʻradi,gohida quvonchga toʻlsa, gohida ogʻir sinovlarga duch keladi. Hayotning oq-qorasi oʻshanda koʻproq bilinadi. Shu bilan birga majoziy safar yolgʻizlikni yuzaga keltiradi. Inson botiniga koʻproq nazar tashlashda ana oʻsha yolgʻizlik yordam beradi. Shams Tabriziy va Aziz shunday safarga chiqqan darveshlar edi.

Shams Tabriziy va Rumiy orasida uchinchi bir kishiga joy qoldirmaydigan nimadir bor edi. Ular ikki koʻzgu bir-birini aks ettirgandagi cheksizlik nima ekanligini tushunib yetishdi.Tasavvur qiling,ruhi ruhingizga yaqin,sizni hammadan koʻra koʻproq anglay oladigan kimdir boʻlsa qanday baxt!

Romanda men eng yoqtirgan qahramon – Shams Tabriziy. Men Rumiyni yaxshi koʻraman. Shamsni esa koʻproq yaxshi koʻraman.Hayot mushkulotlari va Xudodan begonalashuv tufayli azob chekayotgan tilanchi, fohisha, ichkilikbozni boshqa kishilar hattoki odam safiga qo'shmasdi. Lekin Shams oʻsha nochorlarga ham eʼtibor qaratdi. Hamma odamlar yomon koʻradigan, nafratlanadigan ichkilikboz Sulaymonga ogʻir ahvolida yordam qoʻlini cho'zgach, Sulaymonning fikrlari tubdan oʻzgardi. Men Xudo borligini va U meni yaxshi koʻrishini angladim,deydi u Shams bilan suhbatlashganidan soʻng.Tabriziy har insonda butun bir koinot yashiringanligini yaxshi anglardi.Rumiyni aslzodalardan,oʻz muxlislari va izdoshlaridan ajratib olib, oddiy odamlarga yaqinlashtirdi.Chamanzorda faqat ochilib yotgan anvoyi gullarga emas,tikanli o'simliklarga ham eʼtibor berish lozim. Shifobaxsh dorilar aynan shulardan tayyorlanadi axir.

Hamma insonlar ham qalbini ishq uchun ocha olmaydi. Oʻtmishda ham,bugungi kunimizda ham dinlararo nifoqlar, madaniyatlararo kelishmovchiliklar eng dolzarb,eng chigal masala boʻlib qolmoqda. Bunda odamlarga faqatgina ishq tuygʻusi yordamga keladi. Ishqni izlash, dunyoda muhabbat bilan yashash insonning tashqarisini ham, ichkarisini ham oʻzgartiradi, poklaydi.

Mukammal, benuqson va beayb Xudoni sevish juda oson. Ammo qisqa umr kechiruvchi o'z birodaringni barcha nuqson va kamchiliklari bilan sevmoq mushkul. Inson sevishga qobil zot ekani esingizda bo'lsin. Sevgisiz hikmat yo'qdir. Esingizda bo'lsinki, agar biz Xudoning yaratmishlarni seva olmasak, Xudoni ham chinakamiga seva olmaymiz va bila olmaymiz.

@biroz_adabiyot

MUHABBAT

Tig’mi? O’tmi?
Yo og’uli taft?
Yoki alam, mungli o’rtanish?

Yo’q, u dard,
Shunday bir dardkim,
Ko’zimga kaft,
Labga bolam ismidek — tanish.

Marina Svetayeva

@biroz_adabiyot

Insoniyat muammolarining juda koʻpi oʻzaro bir-birlarini tushunmasliklaridan kelib chiqadi. Soʻzlarni toʻgʻridan toʻgri qabullab boʻlmaydi. Ishq mintaqasiga kirilganida tilni qoʻllab boʻlmaydi. Ishq tuygʻusini soʻzlar bilan qamrab olib boʻlmaydi,uni so'zsizlikda ifodalash mumkin,xolos.
"Ishqqa oid qirq qoida"

@biroz_adabiyot

Kel, yulduzlar to‘shalgan yo‘ldan
Yetaklasin bizni muhabbat.
Gʻamlaringni chiqar ko‘ngildan,
Shod kunlarni eslaylik faqat.
Sayr etaylik, kel, birga, erkam,
Rozi ketsin bizdan umrbod —
Shodlik uchun yaralgan olam,
Sevmoq uchun berilgan hayot.

Erkin Vohidov

@biroz_adabiyot

Soʻz haqiqatning soyasi va parchasidir. Modomiki,soya oʻziga tortar ekan,u holda haqiqat yanada yaxshiroq jazb etadi. Soʻz bahonadir. Bir insonni boshqa bir insonga tortgan narsa soʻz emas, balki ikkalovida mavjud boʻlgan ruhiy birlikdan bir parchadir.

Jaloliddin Rumiy
"Ichindagi ichindadur"

@biroz_adabiyot