НЕ НАФ

Алдашга устасиз, аврашга уста,
Ғаразли ўйингиз, ишингиз пухта,
Куларсиз, не тонгки, кулгулар сохта,
Беш кунлик дунёда ёлғондан не наф!

Ғийбатлар қиласиз ортдан шивирлаб,
Воҳ,   чоҳлар  қазасиз тинмай ғимирлаб,
Ёнингиздан ўтаман этим жимирлаб,
Беш кунлик дунёда ёлғондан не наф!

Йўқ бўлсам йўқламай  қўярсиз мени,
Ишонсам,  кўзларим  ўярсиз мени,
Сезилар, ёлғондан суярсиз мени,
Беш кунлик дунёда ёлғондан не наф!

Бир қўлда гул тутиб, бирида тикан,
Салом ҳам, алик ҳам йўлига экан,
Сохталардан қалбим кўп бор панд еган,
Беш кунлик дунёда ёлғондан не наф!

Тухмат қилиб охир куйганлар қанча,
Оқибат ўз бағрин ўйганлар қанча,
Қилмишин ғўрликка йўйганлар қанча,
Беш кунлик дунёда ёлғондан не наф!

Сўз кетса, ҳақиқат учун курашинг,
Сиз меҳр улашинг, зиё улашинг,
Ғариб кўнгилларига  ишқдан қарашинг,
Беш кунлик дунёда ёлғондан не наф!

✍Санжарбек Сафаров

УНУТОЛМАДИМ...

Ёр, ўзгани қўлин тутсанг ҳам,
Қалбга алам солиб кетсанг ҳам,
Борлигимни сен унутсанг ҳам,
Мен сени ҳеч  унутолмадим!

Ўйга толсам куну тун бедор,
Соғинчдан дил чекканда озор,
Унутишга уриндим кўп бор,
Аммо, сени унутолмадим!

Ҳар нафасда ҳажрингдан куйдим,
Соғинч берган азобдан тўйдим,
Ҳатто, ўзни ўйламай  қўйдим,
Аммо, сени унутолмадим!

Бир дил суйса шунчалар суяр,
Куюк бағрин тилкалаб куяр,
Оғриқларин унутиб қўяр,
Аммо, сени унутолмадим!

✍Санжарбек Сафаров

𝐼𝑌 𝐷𝐼𝐿...

Ассалому алайкум, янги ҳафта янги кун муборак бўлсин азизлар!

⛅️ Aссалому алайкум. Якшанба дам олиш кунингиз мароқли бўлсин азизлар!

Бу йўллар йўллар...

Гуноҳим бўлдими севганим сени,
Ё мени севганинг гуноҳ бўлдими.
Бевафо не сабаб тарк этдинг мени,
Ташлаб кетиб энди кўнглинг тўлдими.

УСТОЗЛАРГА.

Пойингизга тўшай дунёни,
Сиздан олдик илму- зиёни,
Танитдингиз росту   рўёни,
Борингизга шукур устозлар!

Кулиб турсин чеҳрангиз ҳуррам,
Номингизни ардоқлаб ҳар дам,
Билим бирла  яшаймиз беғам,
Борингизга шукур устозлар!

Сиз-ла обод ҳар кун,  ҳар  оним,
Маърифатда моҳир боғбоним.
Ёруғ кунга элтган инсоним,
Борингизга шукур устозлар!

Қалб мулкингиз меҳр-у, шавқатда,
Фидокорсиз илм-у, ибратда.
Эл ичида бўлинг ҳурматда,
Борингизга шукур устозлар!

✍САНЖАРБЕК САФАРОВ