مالي غيرك من زمان
من متاهه الدنيا تأخذني لمتاهه
وحبك إنطاني الأمان 
من چنت طين ابرشح غيرة إديك
انعجن طيني
ومن صرت إنسان عاشرتك اهلال
اشما أذكرك ينفتح شباچ عيني
اتغزل إبمخلص جمال العصمة كلها
ومن ضواك آخذ حنان
مالي غيرك من زمان
الحال نظره
العشگ نظره
الدمعه نظره
أمن أوّل احچاية دخيلك على الفطره
غيرتني
وبيه فز خادم إيعرفك والقديم انطاك عمره
الدنيا خبصه
يا إمامي وانه ما اريد اشتبه
وأظل غافي ولحد ما أموت أنتبه
إنته بيدك إمتحنّي
وإنت الاتساعدني أعبر الامتحان
مالي غيرك من زمان
آنه ممنونيتي اخدمك
عبد وايكحل اعيوني اتراب جدمك
الك ليّن گلبي حتى
اعيوني تبقى اعله الدرب
وعهد بلسان وگلب
ما أخون إجفوفك الترست متاعي
خير لمن مسني ضـَر
وإبحضورك وابغيابك سيدي احميلك ظهر
ويه غلمانك احسبني وكلي طاعه وامتنان 
مالي غيرك من زمان
طيف سيّر على اعيوني ..  وانكسر فوگاي ظل
ومدلي چفك حتى ما أرجع أزل
ولون ما استحق المس چفك اشمرلي حبل
وإنتم اتحسبونه خادم
حتى الايفوت اعله مجلسكم وصدفه
شال بوش إلاستكان ،، مالي غيرك من زمان
ياغريب
أسأله اتدور ابضميري
سيدي اشكد صار عمرك
وين گاضيها يبعد أهلي بعد ماراح خدرك
الشيب هم خضب لحيتك
وبيك شمسوي الهضم يل باقي حزنك
وكل حزن بالدنيا فان
مالي غيرك من زمان
ياغريب ليمتى تبقى إتدخن امتونك زعل
وشايل ابصدرك خيام
العطش ماخلاك تگدر ،،  إتشوف ماي
وما تصيح ،،  يها العالم چان عبد الله رضيع
ماسگوه ولد الحرام 
يها العالم ،، مات جدي ابوكت ماصح بيه چفن
ابوكت بيه هانت على الله الدنيا من راح الضعن
ابوكت بيه عالوا علينا وبيه تأجّل الانتقام
يها العالم ،، العتبه لاحت للعدو
والبقت هيه وفواطمها بلا رايه وأخو
إتشوف كل الدنيا شام
وكلمن إيعرف الضعن وايشوفه صاح
وين هسه ،، و وين چان
مالي غيرك من زمان
ياغريب
الغربه تندلك وتبقى إتعيل بيك
بيش اواسيك وعشيره اتفرهدت من بين اديك
الغربه تندلك وتندل كل هلك شوغة النار
وبقى رأسك فوگ رمح الإنتظار
وراس جدك فوگ زان ،،
مالي غيرك من زمان
وتبقى هم ما إلها غيرك
من زمان

اللهم عجل وقرب وسهل فرج
مولاي المنتقم الغريب

يغرة هاشم ويا يوم    على اجروحك يهب بارح
ابوك العسكري مسموم    وإنت امن الوطن نازح

يغرة هاشم الله ايعين  
گلبك والبگى ابراسك
أبوك ابمثل هذا اليوم
يموت ويجرح احساسك
مدري الوكت مو وكتك
مدري الناس مو ناسك
يمتى اهنا نجي انواسيك  ونبوس ايديك وانصافح

ترد لهنا صدگ واتصير
وعزاء العسكري اتنصبه
ونگلك خاتمة الأحزان
ولو فگد الأبو صعبه
سلّمك الله يامولاي
خلصت رحلة الغربه
يگولون البچي عاميك ،، وصوتك يالولي رايح

سلام لگلبك المهضوم
وعلى حسراته وإجروحه
من صغرك تشوف اشلون
أبوك اينازع ابروحه
غريب وماله أخو ينعاه
ولا أم تگعد اتنوحه
من عدها وعشت لليوم.    متغرب يبو صالح

مصابك يشبه السجاد
يوم العاشر ابعاشور
شفت گتال ابوك اهنا
لكن بالصبر مأمور
غبت وإنت اعله هذا الحال
ابگلب متوجر ومكسور
تبچي ادموم وايماسيك.     جرح الثأر وايصابح

اتشيع والدك مولاي
وبيدك غسلت جسمه
ثلث تيام ظل مطروح
بالبر نعش أبو اليمه
وإنت اتصيح ياجداه
ومره اتصيح ياعمه
امبضع جسم أبو السجاد.   واتراب الأرض مالح

آنه أم اليتامه الركضو اويه الخيل
ضاعو مدري وين وهدمولي الحيل
راحو مايردون
اكطع ونتي اشلون

عندي أولاد مفگودين  
أم وحكي لو ونيت 
اجيت لكربله بيهم
وهسه لوحدي رديت
حن گلبي لمعانيهم
لسوالفهم بعد حنيت
الأم ابلا ولدها تموت
ويتهدم عليها البيت
الليل اكظيه مناحه وافرك إيد بأيد
فرگتهم چبيره وحاشى گلبي ايهيد
اعاين بس بالعيون
اكطع ونتي اشلون

آنه أم اليتامه آنه
وشيبني ظهر عاشر
من هجمت علينه الخيل
ماظل عالخيم ساتر
ضاعت كل يتامانه
بين النار والحافر
بس اولادي مدري لوين
راحو والگلب شاجر
وكت المغربيه انعى ابرفيع الصوت
اولادي اتاخرو والدنيا غربه وموت
ابيا مسكن يباتون
اكطع ونتي اشلون

ظل ابخاطري ياناس
ولو مره أرد احاچيهم
يبس گلبي وأنا اتنشد
صارت وين أراضيهم
أريد آخذهم ابحضني
وبيدي امسح بواجيهم
حتى اثياب ماظلت
أشمن بيها وابچيهم
خيمه اتناوشت خيمه ابهذيج النار
ماظل شيء علينه إمن الأهل تذكار
اتانيهم يرجعون
اكطع ونتي اشلون

هلبت ساعه وايردون
اعاين للدرب واسأل
ابهاي الهيمه ياهاي الناس
وين ايروح الامدلل
الجبير أبها الدروب يضيع
أبو اسنين أربعه  اشيندل
ترعبهم وحوش الليل
حگي إمن الونين اذبل
انثگلت جم عقيله ابطيحة المذبوح
واعيون أمهات انرمدت من النوح
آه ياغربة أم عون
اكطع ونتي اشلون

يمه وچلمة اليمه
تهد حيلي امن اگولنها
امسلمتكم بدين ألله
ماكو أرحم بعد منها
ابمصيبه عمكم المذبوح
لأخته ابدمعي اعاونها
عشيره وراحت ابنص يوم
منو ايشيل الحمل عنها
راحو كل اهلها امسلب ومابين
مذبوح وكفيل امگطع الجفين
والمجروح الامتون
اكطع ونتي اشلون

گلبي إعليك ملچوم
نايم مو وكت نوم
يبني للكبر والشيب ردتك
ما أدري السهم يندل رگبتك

اشبيدي اعله الوعد يمدلل وتدري
العطش والخوف بالطف يبّسن صدري
هذا الوكت ما بيه رحمه عالرضعان
أخذ اعيوني وإگعد يابعد عمري
ماظل ماي موجود
ولا رد صاحب الجود
فز من نومتك مو هذا وكتك
ما أدري السهم يندل رگبتك

فز خل احچي وياك وتناغيني
صدگ مابيك تحجي من عمت عيني
صوت الله اعله كلمن منع عني الماي
اليندل ماي يحصل خل يدليني
حرام اشرب بعد ماي
وانته إگبال عيناي
اشما تبلع ارياگ اتموت شفتك
ما أدري السهم يندل رگبتك

دلوني اعله درب الماي راح اطلع
بعد ما بيه أشوف اوليدي يتگطع
يهل بيدك الماي الله يحرمك كون
الحرب للزلم ليش اتعطّش الرضّع
الطف قانونه مگلوب
زلمه الطفل محسوب
ابحظك يل ذبحت وابني وبختك
ما أدري السهم يندل رگبتك

يهل نايم ادروب الماي سدوها
فز يبني الخيم ساعه ويحرگوها
أركض لو اشيلك وي هجوم الخيل
لو أهيمن ابعمتك وين ودوها
أنا اتمنيت لضماك
اخذيني الموت وياك
قسمتي العطش يوليدي وقسمتك
ما أدري السهم يندل رگبتك

روحي ،، ذابت يالولد بفراگك
روحي ،، اتحن لوجهك وتشتاگك
گلبي ابغيابك ،، تمحن وابتله
وذّبل شبابك ،، عطش حر كربله

من طلعت أمن الخيم ،، حيلي يوليدي انهدم ،، والسفر چنه طويل
اعيوني تبرى وانتظر ،، ومن تميل اعله المهر ،، گلبي وي طولك يميل
إبني واريده وابقى اندعليله
امّن يجيب المضطر دليله ،، ويكشف الهم الثجيل
عليك ولا بطل وني
ولا جنت آنه اتوقّع
رجعتك للخيم تالي
إلي ايجيبونك امگطّع
اوليدي ،، نوم الترب ما يحلالك
اوليدي ،، طايح والعطش كتالك
تشرح عذابك ،، دمعتي السايله
وذّبل شبابك ،، عطش حر كربله

آنه أم حكي انكسر ،، المثلي لازم تنعذر ،، لو متت ويه الولد
والبس أسود وانفجع ،، وابچي والطم عالضلع ،، فاجدة وگلبي انمرد
واحد واتانيه يكبر واشوفه
وحدر الوطيه تاليها اعوفه ،، شبچي واتحمل بعد
يناس اوليدي وانه أمه
إلي جابوه جسد مدمي
ويفرفح گلبي لو أضمه
اشحلاة النومة يالنشمي
نايم ،، فوگ الثره و لاوي جيده
نايم ،، إشكد حاچيته وما هز ايده
انعى لمصابك ،، وابوك اينوح إله
وذّبل شبابك ،، عطش حر كربله

نومتك فوگ الترب ،، بيه كسرت چم گلب ،، وذبحت الحلم الچبير
چم حلم بيه انذبح ،، وباب الأحزان انفتح ،، وانهدم بيت الأمير
ما أطلعه للناس إلا إيتبرگع
تالي إبني ياناس ضامي ايتگطّع  ،، ويبقى نايم عالهجير
دعيت ايردلي تاليها
رجعلي بالدمه سابح
رجع يوسف لابوه سالم
وأنا إبني ابكربله رايح
ويلي ،، جابوه للخيام امحنّه
ويلي ،، هذا أبني علي ما چنه
دمك خضابك ،، يبن سيد المله
وذّبل شبابك ،، عطش حر كربله

إشگد نحت وإشگد بچيت ،، اترد إلي إشكد اندعيت ،، وهذا حال المبتلي
وزّعت بالطف ثواب ،، واگعدت فوگ التراب ،، وانتظر ترجع إلي
طشتنه الأيام بالغاضريه
إنت اعله الاتراب وأنه سبيه ،،ومرمي عفتك ياعلي
الدهر  للكوفه ودانه
ابدرب ماممشي مشونه
واخوك امسنسل اويانه
وينزفن متنه واعيونه
دامي ،، من السلسله البچفوفه
دامي ،، من باب الخيم للكوفه
هتكو حجابك ،، وضعونك بالفلا
وذّبل شبابك ،، عطش حر كربله