الشاعر ابو سلام الجابري
معرفي للتواصل خدام الحسين عليه السلام
@Asassw
قناة احمد علي على تيليجرام ( شروحات تقنية ، تطبيقات ، أفلام ومسلسلات ، خلفيات ، و المزيد )
Last updated 4 months, 4 weeks ago
يرمز تيليجرام إلى الحريّة والخصوصيّة ويحوي العديد من المزايا سهلة الاستخدام.
Last updated 6 months ago
- بوت الإعلانات: ? @FEFBOT -
- هناك طرق يجب ان تسلكها بمفردك لا اصدقاء، لا عائلة، ولا حتى شريك، فقط انت.
My Tragedy Lies With Those Things That Happen in One Second And Remain
- @NNEEN // ?: للأعلانات المدفوعة -
Last updated 6 months, 3 weeks ago
رمضــان هل بس ماكو الحباب
ومصــــــابهم بيه اعظم مصاب
الدنيه لحــــــــــضه بساع ودور
والبيــــت اشوفه تكول مهجور
راحو هــــــــــــلي ونامو بلكبور
وعتب بعد شيســــــوي العتاب
دارت الدنيــــــــــه وهاي اليام
وشــــكد فرق عن كعدت العام
ياوسفه هســــــــه وصرنه ايتام
وبكل مســــــــــــيه ندور اجواب
الميت بعــــــــــد لا ماضن يعود
بوكت الفطــــــور الباب مسدود
نعيد تره بــــــــــــهدومنه السود
وخلي الگلب بمــــــصابه ينعاب
گلبي وذكر كعــــــــــــدتكم وياي
وهسه الحــــــــزن ليمرد جلاي
بهــــــــــداي اون كل يوم بهداي
وحزني الگــتلني بــهاي السباب
اذكر گبــــــــــــــــل نكعد سويه
وهــــــــــــسه بحزن محد اليه
بوكت الســــــــــحور افرك بديه
بحســــرات اكولن حدر التراب
ابو سلام الجابري
الشــيعه بمولد المهدي .يفرحون
ياسر. الزمــــان. ونور. العيون
اليوم الشــــــــــيعه فرحانه بوليها
تحــــــــــــــسب بثواني يمر عليها
قبطان الســــــــفينه اليسري بيها
وي طلته البئــــهيه وهمه ينجون
اليوم تشــــوفها معيده وسعيده
بكل عام الفــــــرح واجب تعيده
هذا هــــــــــلاله وابن الصميده
وجكليت الفــــــرح لجله يطشون
يم حســــــــين راحو والفرح صار
ونور الــــــــــــيوم بين من القمار
لا يبقه حــــــــــزن لا يبقه محتار
وهوسات وقــــصائد يمه يقرون
يامــــــحله الفرح وحلاه الاماني
نزف اليــــــــــوم كالوها التهاني
للمــــــــــوعود وبهل يوم اجاني
وحلاه ايامهــــــــــم وياه يعيشون
احلاه ايامهــــــم من طشو الياس
وگبله حسين اجانه وجانه عباس
وهذا اليوم هــــوه اليرفع الراس
وخل اهل الحــقد خلهم يموتون
ابو سلام الجابري
ياهلا بشعبان… بيامه الفرح يكثر
محير العدوان…. بيامه الفرح يكثر
يبدي بولاده
سيد الساده
يفرح گلبنه
وهاي السعاده
احلا التهاني
هاي الاماني
انزفهه واليوم
الشعبان اتاني
شهر ونوار جابها
حسين امامي ظواها
الدنيه وكلها هزها
الفرح يكثر
حسين امنور هلاله
وكل الكون غناله
وباجر يثبت افعاله
شبل حيدر
الثاني عباس
والريشه عراس
من زغره مهيوب
وتشهدله هلناس
حزام الحسين
عشك الموالين
يانور العيون
بحبه مجانين
انولد عباس والينه
وبي تحله امانينه
سر الدنيه حامينه
الفرح يكثر
زينب بسمه فرحانه
تكول اليوم ظوانه
هذا السند وخوانه
المشكر
للسجاد العياد
يمنور البلاد
هل النور ونصيح
ياسيد المجاد
هل وفرحنه
وننسه حزنه
الشبل الحسين
كلنه حضرنه
اجه السجاد بسجوده
الفرحه اليوم مريوده
يحيي الدنيا وبجوده
الفرح يكثر
زاهد راكع وساجد
مثله مايصح واحد
من زغره وهو العابد
وفخر حيدر
**
وللمهدي هليوم
امنوره النجوم
بجيت ولينه
هالفرح مرسوم
مهدينه اجانه
حامل لوانه
بمنتصف شعبان
نور سمانه
َمهدينه بزغ نوره
وبيه الناس مسروره
فرحانه المعموره
وورد تنثر
الطير يغرد وفرحان
ومحتفلة الانس والجان
اسمه للعدل. عنوان
بدره ازهر
محله جماله
نوره يتلاله
لو طلع فجره
تسود العداله
المهدي املنه
بجيته احتفلنه
للقمه هاليوم
بسمه وصلنه
المهدي عيد ميلاده
علينه هلت اعياده
بمولد خاتم. الساده
الكون انسر
كلها اتبارك الليله
وورد وياس تهديله
الشيعة كلها تدعيله
بعجل يظهر
ابو سلام الجابري
يالتحت جنحج غفه ابراحة الحمام
يمه غطيني. ابعباتج . ارد انام
اه يم كلب الحنين
اهواي عذبني الونين
يمه غطيني. ابعباتج. ارد. أنام
♾️♾️♾️♾️♾️♾️♾️
زهرة يمه استقبليني جيت الج بعد العذاب
ياحزن ياضيم اسولف يافجيعة ويامصاب
كل حلم بالدنيا رايح وأصبح بلحظة سراب
وكلبي من كثر المصايب والألم يالحره شاب
اهواي تعبني الزمان
ومابقالي ولا مكان
مادريتي شلون حركوها الخيام
يمه غطيني. ابعباتج . ارد. أنام
-------***
يمه شوفي متوني زركه اشتكيلج يلبتول
نفس قصتج هيج قصتي بيوم فاركتي الرسول
الفرق يايمه وحدي وراكضه بين الخيول
بحبل شدوهن اديه وحايره خلافج شكول
عمري خلصته بدمع
ضلوع صارن موضلع
جيتج بگلبي اثر من السهام
يمه غطيني بعباتج ارد انام
------**-
يمه حسراتي جثيره وماتهود كون انوح
شرد اسولفلج عليهن خزنن بيه الجروح
ياهي مثلي تودع اخوهاا للذبح وتكله روح
تشوفه ظامي الماي كربه وجفه مايكدر يلوح
مات اخوها گبالها
هيج بنتج حالها
وامشي مسبيه صرت ويه الائام
يمه غطيني بعباتج ارد انام
----
هواي عذبني سبيهم ليلة يايمه طويل
ماكو حارس كلها غربه ونمشي من دون الكفيل
محد يرد اليسبنه ومحد يحاجي اليعيل
بس حرم ظلينه للهم حار ويانه العليل
حيره حاير بلزغار
ولاكو خيمه ولاكو دار
واني ادور ليلي كله عل اليتام
يمه غطيني بعباتج ارد انام
-----**-
جيتج بهم الخرابه وحسرتي وذاك الحزن
حتئ ابموتي غريبه بغربه يايمه اندفن
عشت عمري كله حسره للمنيه وانه اون
خلاف عينج محد النه ومحد علينه يحن
هذا حالي ابدونج
يمه بعد عيونج
ودري يمه هذا ياذيج الكلام
يمه غطيني بعباتج ارد انام
ابو سلام الجابري
شنهو ذنبي .خلصت ليلي بدمعتي
شنهو ذنبي
عفيه أصبري.. توسلت روحي بجفاهم.. عفيه أصبري
عمري مو مال انتضار
نار تاكل بيه نار--شنهو ذنبي
-------------
انه لوعاتي جثيره وزايد عليها الهجر
يبدي وني المغربيه لحد ميطر الفجر
التمت هواي السوالف حيل تعبت الفكر
صرت اخلي الصوج بيه الروحي دورت العذر
الروحي مااملك قرار
الصار بيه وهذا صار
شنهو ذنبي
----------&*
الذنب كالولي عليله والدرب كلش طويل
تتعب البعد المسافه اطيح والناكه تميل
كلت اخلي جفوف اديه طباگ وي جف العليل
ماأتعب احد انه واكتفي بعمي الكفيل
عمي كافل هل ظعون
كلشي وياكم يهون… .شنهو ذنبي
*+-**+--
شكد صعب يوم العليله تخلصه بااه وتنوح
ومن تظل وحيده تبجي بدمع تشفه الجروح
عمي فدوه اكدر اسافر وانه وياكم اروح
ولا اظل هيج بعذابي ميته وانه البيه روح
خذوني انام اعله التراب
ولا اظل الهل العذاب ..
شنهو ذنبي
*&*&&****
صار وحشه البيت كله وظلمه ماضل بي ضوه
ويختلف كلشي بجفاكم وگام يخنكني الهوه
انتو جنتو السلوئ اليه العلتي وانتو الدوه
هسه حتئ الراس شيب جفني من دمعي نجوه
اكضي ليلي بس انوح
بدمعي داويت الجروح
شنهو ذنبي
*&--------
بكل مسيه انطر وتاني بلكت يمرني خبر
ورجع مئيسه واعاني وحيل كاتلني القهر
الواقع العشته بحياتي ادري مامنه مفر
ال بلحزن عاشت غريبه شنهو ينفعها السهر
بغربه ميته لا محال
بعد ماظل كل دلال
شنهو ذنبي
ابو سلام الجابري
بعيد درب الشــــــام ويتعب السبي
رگدت علــــــــــــه متونه حتئ العبي
اكضــــــــــــي ليل نهار وانه مگبعه
وريت وي حســــــين مت بمصرعه
ولا اعيــــــشن طول عمري ملوعه
ولا اكول الــــــــــيوم محد ظل الي
ريت ميتــــــه وياك خويه وانسحگ
ولا اشوف خــــــــيامنه من تحترك
صعــــــــبه مو بلهون رايح. نفترك
ونحرم منك يشــــــــمعة كل هلي
سولفت بدمــــــوع عيني وحسرتي
من شفــــت علگاع مذبوحه خوتي
بدلوها بهــــــــــــــزله راحت ناكتي
عاد كلت النــــــــــوب زينب تنولي
هذا حال الــــــحايره وماعده اهل
تريد حل الروحــــــها وماتلكه حل
بين مچتوف بحــــــــبل بين نچتل
وعل مصايــــــب روحي گلت دللي
بهل درب شفنه المصايب والعذاب
وبلخرابه شــــلون نمنه عله التراب
مذبحه وضلــــت ورانه تون شباب
وهمي بعــــــد اليوم ابد ماينجلي
ابو سلام الجابري
قصيدة لفقد ام البنين عليها السلام
امكم بلدمع خلص. عمرها
بوكت الموت شو محد حضرها
➖➖➖➖➖➖
غريبه من بعد ولدي اربعتهم
وي حسين راحو ضيعتهم
تمنت عيني لو لحظة شفتهم
گبل الموت يمي و ودعتهم
ولا تحتار ياروحي. بامرها
➖➖➖➖➖➖➖➖
لون لحظات ليه أولادي يلفون
وكبل لاغمض عيوني يحضرون
وعد راسي العديلة كون يقرون
وعليه بحسره ينعون ويلطمون
وروحي بجيته الكافل يسرها
➖➖➖➖➖➖➖
الكافل كون يمي تهون الالام
وريت حسين يمشي بنعشي جدام
وعليه تحزمو ولدي بهل حزام
ولا ظل هيج گلبي مترس سهام
لو يمي غفت عيني بگبرها
➖➖➖➖➖➖➖➖
لو يمي الولد. يرتاح. كلبي
واكل لعيوني هيدي ولا تصبي
شريدن والحنان اليوم كربي
واكول أولادي ماضيعوا تعبي
وجازوا امهم وذاكه. سهرها
➖➖➖➖➖➖➖➖➖
شلون بحالها الماتت غريبه
وهايه فاجعتها اكبر مصيبه
تكول منين الي الكافل اجيبه
يحفرلي اللحد وسمع نحيبه
البين خلافكم وسفه وغدرها
➖➖➖➖➖➖➖➖
ابو سلام الجابري
قصيدة لوفاة ام البنين
عيونها ام عباس للطف شابحه
حان اجلها من يسوي الفاتحه
➖➖➖?➖➖➖
حان اجلها وتنطر الراحو سوه
تكول جانو همه للريه الهوه
خلافهم ماطيب ماينفع دوه
اليوم احس ملجوم ياگلبي نجوه
بعيد عني وخل تنوح النايحه
*--------------
عيونها ام عباس صوب الطف تصد
تحسب الحظات ياويلي وتعد
أتريد ليها ابهل مسه اترد الولد
وابو فاضل يحفر. بجفه اللحد
ويمسح الدمعات ذيجه. الجارحه
-------------
تريد عباس اليوسعلها الگبر
من مشه وللموت ظلت تنتظر
يشوف امه شلون ومخلصه العمر
اخلافه بلوعات وتلاوي الصبر
تخطي خطوه تكوم ردت طايحه
--------------*-
تكول ماظل حيل من طالح العلم
حيلي وي عباس من راح نهدم
ابجي بس دموع عيني التبجي دم
من سمعت حسين صابه جم سهم
وشمر ثنه عله صدره وذابحه
-------------**
وكون مثله وانه اضل بلا دفن
ما وفيت ويه بعمري وبس اون
فراكه موهين وعوضنه بحزن
حسين گبل الموت هم فاكد ابن
ويدري زينب علهزيله ورايحه
ابو سلام الجابري
اليله وحشه ياحرم بنت النبي
اليله تشبه من ليالي البسبي
اليله وحشه ومحد بمحرابها
وخاف توصل والكفر يم بابها
بعيد عنها وفاركوها احبابها
والله يستر خاف زينب تنولي
خاف يرجع حرمله وسوط الشمر
وخاف يجاسر عليها وللكبر
يوصل الظالم صعب هذا الامر
شلون شده وهاي ندعي وتنجلي
شده عدنه وخاف ينمس الظريح
وحيده زينب المن تنادي وتصيح
نخاف كبتها يهل وادم تطيح
شلون لو كالت بعد محد الي
ياهو يفزع للعقيله البل غرب
بعيد صارت وابعد علينه الدرب
بعد ماظن نوصل نزور ونطب
نكلهه وسفه اليوم ونتي تحملي
اتحملي الجمات ونتي بغربتج
وخلي عينج خل تفيض بدمعتج
لا بعد بشام محد ظل الج
بهل مصيبه گلوبنه بهم تنملي
ابو سلام الجابري
يايمه زينــــب نادي الحسين
ساعه وتغمض عنكم العين
خليني اروي بشوفه
لو بيدي ابد ماعوفه
ناديلي حسين وحسن جاي
هل ساعه كعدو كلكم احذاي
خلوني اروي شوف. عيناي
انتم سلوتي وانتم. ادواي
خلوهه تروه عيوني
گبل الدفن خلوني
ياخذني عنكم حتمن والبين
يايمه زينب نادي الحسين
♾️♾️♾️♾️♾️♾️♾️
التمو يمي وسولفو وياي
دموعكم تمرد تره جلاي
تزودوني بلوه فوك بلواي
عوفو الدمع خلصانه دنياي
عوفو البجي وحاجوني
وامشوا اذا دفنوني
ونوب كثرو خلافي الونين
يايمه زينب نادي الحسين
♾️♾️♾️♾️♾️♾️♾️
مسحو الدمع بس نظرو اليه
وياكم تره بس هل مسيه
باجر اروح وماكو جيه
تراب اللحد ينرد عليه
باجر تغمض عيني
تراب اللحد ياذيني
خلصت ايامي وكل السنين
يايمه زينب نادي الحسين
♾️♾️♾️♾️♾️♾️♾️
ناديلي اخوتج يمه ابساع
ماظل وكت ويحين الوداع
مني العمر يايمه هالضاع
وباجر تضمني عنكم الكاع
مبيوكه يمه أحلامي
وبس الكدر كدامي.
ودلالي يمه انجسم نصين
يايمه زينب نادي الحسين
♾️♾️♾️♾️♾️♾️♾️
هايج دليلي وزايد الخوف
ومن الحزن بعيوني ماشوف
وطيف المنايا اعليه ايطوف
وانظر زماني سن السيوف
سنن اسيوفه اعليكم
بكأس الألم يرويكم
وباجر عزيه المن تنصبين
يايمه زينب نادي الحسين
♾️♾️♾️♾️♾️♾️♾️
من اوجوهكم خل اروي العيون
صعب البعد والفركة متهون
من بعدي يمه بيكم. شلون
شجم فاجعة ولوعة تعيشون
الدهر لو شن غاره
زينب تظل محتاره
وتحتار تنطيه الوجه وين
يايمه زينب نادي الحسين
ابو سلام الجابري
قناة احمد علي على تيليجرام ( شروحات تقنية ، تطبيقات ، أفلام ومسلسلات ، خلفيات ، و المزيد )
Last updated 4 months, 4 weeks ago
يرمز تيليجرام إلى الحريّة والخصوصيّة ويحوي العديد من المزايا سهلة الاستخدام.
Last updated 6 months ago
- بوت الإعلانات: ? @FEFBOT -
- هناك طرق يجب ان تسلكها بمفردك لا اصدقاء، لا عائلة، ولا حتى شريك، فقط انت.
My Tragedy Lies With Those Things That Happen in One Second And Remain
- @NNEEN // ?: للأعلانات المدفوعة -
Last updated 6 months, 3 weeks ago