ТОЛАДЫ КЕЎЛИМ

„Әлипбе“ ден баслап оқыған күнлер,
Билим шыңын гөзлеп шулғыған күнлер,
Бир биреўди көрсек түседи еске,
Көзиме елеслеп өтеди әсте.

Ўақыт өтти, талай оқыўлар питти,
Жасымыз, ойымыз толысып кетти,
Буйра шашымызға ақ араласты,
Бул ақ басымызға тән ақ жарасты.

Оқыған жыллардың алып есесин,
Ислеп жүрмиз елдиң тапсырған исин,
Хызметимиз халыққа жараса жақсы,
Басып өткен жолға қараса жақсы.

Сонда ислеримиз көринсе көзге,
Мийнеткеш адам деп сүйинсе бизге,
Болғаны емес пе, болады бәлким,
Усыларды ойлап толады кеўлим.

1965-жыл
Байнияз Қайыпназаров

(Каналымыз атынан "Жаңа оқыў жылыңыз бенен!" қутлықлап қаламыз.)
Каналымыз силтемеси:
@Bayniyaz_Qayipnazarov

(Б. Қайыпназаровқа)

Жүреги тыңлаған самалдың сестин,
Гүлге ашық болмас оныңдай ҳеш ким,
Сөзлердиң дизбеги мөлдир булақтай,
Келеди тап мийриң қанғанша ишкиң.

Ўатанның сарғайған қәдирлеп шөбин,
Мийримиң кебирге еткендей төгин,
Қосыққа қосты да таслады кетти,
Излесек таппаймыз шайырды бүгин.

Бес күнлик екен дә, әттең-әй бир кем,
Қулата алады таўларды бекем,
Бирақ халқын сүйген қәлби гүл инсан,
Дүньяға қайтадан келер ме екен?

Зульфия Жийемуратова

Каналымыз силтемеси:
@Bayniyaz_Qayipnazarov

Қыял жетсе —
        Ой шыңының,
                  Уша басына,
Илҳам келер — 
        Көзи түссе,
                 Гүл шақасына,
Жағымталлы — 
        Сап ҳаўадай,
                 Ел арасына,
Сөзи тарар,
        Өзи қалар,
                 Байнияз болып.

Байнияз Қайыпназаров

Каналымыз силтемеси:
@Bayniyaz_Qayipnazarov