​​​​Osmon narvoniga osdim iltijo,
Bulutlar saslanib, yog'ildi yomg'ir.
Shitirlar ichida mehribon Xudo,
So'zlarni joyladi, qalbimga, og'ir.

Shamollar hasaddan esdi isyonkor,
Xazonlar boshini uzdi daraxtdan.
So'zlarni asirlab baxtlandim bekor,
Baxtni yozmoqlikka mudom karaxtman.

Kuzaki tuyg'ular qarg'ishlaridan,
Yasadim bir varoq xazon qasida.
Qorong'u xonamning tirqishlaridan,
Mo'ralab boqardi bitta aqida.

Tag'in isyon qildi daydi shamollar,
Istagi Xudoning nazarin yulish.
Menga hayot berar oppoq xayollar,
Meni o'ldiradi bu holga kulish.

So'zlarni o'zimdan quvmoq yo'lini,
Quyilgan kunidan izlab tolganman.
Qaytarolmay qurg'ur qalbim qo'lini,
So'zlarni Xudodan tilab olganman.

Balki, shamollar ham yomonlikkamas,
Yetkazar so'zlarni egalariga.
Baribir so'zlarim berolmayman, bas!
Boshqa she'r yozmagin deganlariga.

Osmon narvoniga osdim iltijo,
Bulutlar tarqadi, yuvildi yerlar.
So'zlarni quyaver qalbimga, illo,
Meni tushunadi faqat shu she'rlar...

*© Boxodirov Izzatillo*
#BI14

sentabr 2024

- @dil_intiq

​​Yo'l
(baxt izlab)

Faromush bog'larda sarson ruhimiz
xokandozda bandi sevgimiz xoki
musicha kuyidek o'ksik "uh"imiz
bir kelmaydi baxtlar tirikmiz, toki –
mahshargacha bo'lmas – qayta uchrashuv
dard – hayyo-huyt xaydar orzularimiz
baxtni tutsak balki, bo'lardik shov-shuv
baxt so'ziga mushtoq tashna labimiz...
g'alamis ayriliq qiqirlab bizga
to'zim tilamaydi, ulfati shayton
ular uchun bir bor aytaylik birga
o'z olovlarida kuysinlar shu on.

Oy tomon uchirgan xayollarimiz
kutib olar yorqin hirovul bulut
osmondan xat-xabar, quloqlarimiz –
deydilar: xabarni hoziroq unut.
Osmon xabari zax, mudhish hodisa:
"Siz birga bo'lmaysiz qiyomatda ham
urinmang sevgingiz baribir bekor
bekor bo'laverar ming marttada ham".

Biz ming bir marttaga yo'lga chiqamiz
faromush bog'larda yolg'izlik sasi
xazonlar biz bilan, kuzak ichra biz –
tashlab ketganimiz – bahor nafasi...

*© Boxodirov Izzatillo*
#BI14

- @ch_k_t iyun 2024

​​Hayot dengizida

(bugun 26yoshni qarshi olgan Abduvoris Alijonovga)

Kuz keldi.
Langarni torting jarlikdan.
Anduhdan yasalgan kemaga mining!
Bolaligi o'tgan ul ko'chalarga,
qaytgisi kelyapti, bechora, uning.
Xazonlar qoplagan dunyo ustini
yorib borar mana g'ussali nayza...
Yillarning sonini eslata ko'rmang,
mana bu kapalak,
mana qo'y – maysa.
Ammo kapitan – U.
Bo'ysunmoq darkor.
Oldinga odimlash istaydi kema
Qarilik yelkanga o'rnashib olgan
Kapitan aytadi: ellik ham erta.
Yo'nalish burilar kelajak tomon
Otishma boshlanar duel singari
26 yil... Kapitan omon –
So'zlarin o'qlaydi suv parilari...

*© Boxodirov Izzatillo*
#BI14

- @dil_intiq

Onasoy bag'rida

Sharqiroq Onasoy qoyatoshida
varoq yo'q,
she'r yozsam, qalamdir toshlar
men shoir bo'laman Pushkin yoshida
ungacha shig'irim oldinga boshlar.

Nimadan boshlashni o'ylamay sira
tayoqcha chizaman qoyatosh o'yib.
Shoirlik – yuqimli, ulkan silsila
ilhomni yutaman qalbimni tuyib.

Oq bosh burgutlarning qulochi kabi
o-ochilib samoni egallar ruhim.
Erkinlik – shoirning ijod maktabi
qoyatosh bag'rida o'ynar anduhim.

Quyosh ham o'zini ig'ritib ufqqa
shafaqdan so'zlarni menga yuborar.
Ukkilar g'uvlashi shomlarga sabab
tepamda burgutlar bolasin boqar.

Soy ustida so'niq marjon yulduzlar
tizilib olgancha oyni quchadi.
Qoyatoshga tushar atalgan nurlar
yonarqurt hamnafas nur-la uchadi.

Qon hidi payqagan shoqol galasi
qoyamni chaynashga tashlanar birdan
qarshi zarb beradi bo'ri to'dasi
so'zlarni angladim shu lahza chindan.

Bo'rilar to'dasi o'quvchilardek
indamay kuzatar qoyatoshimni
bir xatoga meni g'ajiydigandek –
uvlab chiqararlar mening yoshimni.

Bir qora chumoli, biy, chayon bilan
qoyaga chiziqlar chizar nishidan.
"Oshiq kapalakning so'nggi parvozi"
men davom etaman dilning ishidan.

Sevgi deb qoyaga o'yib yozaman
hayvonlar sevgisi otashdir tabiy.
Odamlar – xiyonat...
Buni bilaman
hayvonlar vafosi – chindir haqiqiy.

Qoyatosh bag'rini to'ldirdim so'zga
tun yakun topdi, quyosh ko'rindi.
Bir onda vujudlar aylandi ko'zga
she'r bitgach ichimda to'fonlar tindi.

Endi yo'llar ayro hisning yo'lidan
hayvonlar o'lja deb menga suqlanar
siyoh olgan edim bo'ri qonidan
endi-chi bo'rilar qonimni so'rar.

Uzib ketadilar kekirdagimni
g'o'shtimda balqiydi eng shirin hislar.
Cho'qiydi burgutlar oq yuragimni
va inga tashiydi, dil bag'ri yig'lab.

Umidi so'nmagan ochiq ko'zimni
chaynaydi chumoli, biylar, chayonlar.
Kapalak o'qimas yozgan so'zimni
shoqollar kir og'zin yuvadi qondan.

O'laksalar sanar, qovurg'alarim
jigarim yaydoqda yotadi qaqshab
o'pkami o'padi yonarqurtlarim
xuddiki, ketaman qaytadan yashab.

Soy suvi bug'lanib ruhimni birga
bulutga qo'shadi, charsillab chaqmoq
Onasoy alvido aytmadim sizga
chala she'r qoldirdim men telba, ahmoq.

Iltijo qilganman poyonligimni
keltirdim doimo yakunga tavba.
Samo asragaydir shoir dilimni
ilohiy tavallo sen meni asra...

Bo'rilar buyruqqa bosh egib, ojiz
qaytadi sarsona murdam ustiga.
Shoqollar qochadi qoldirmayin iz –
Rahmonning rahmi bor ezgu do'stiga.

Kapalak o'pkamni o'par bir umr,
Oq bosh burgutlardan o'laksa cho'chir.
Jigarim Onasoy namlantiradi
bitmagan qoyashe'r sen meni kechir.

Kovlaydi bo'rilar panjalari nur
keng qilib kovlashar qabrboshimni
ichiga qamalar oppoq libos shuur
tosh qilib qo'yarlar qoyatoshimni.

O'pkamni gullatar rangsiz kapalak
Oq bosh burgutlardir – ruhim parvozi
Shoirlar o'lar deb bo'lmagin halak
Sharqiroq Onasoy – shoir ovozi.

*© Boxodirov Izzatillo*
#BI14

- @dil_intiq iyun 2024

So'ngshe'r

Dimog'da yallig'li dorilar isi
oq libos ayollar – kelinchak emas
qo'limga qarasam giyohlar izi
burnimda moslama – o'yinchoq emas
qo'riqlar bir mahzun, mushtipar ayol
deraza qushlardan balandroq yerga
qochishga urinib kishanni yechsam
ko'kragim to'ladi, taxir, ko'k terga
va qalam tutadi shiftdan o'rgimchak
yopinchiqqa to'rdan to'qiyman, jilo
yotoq g'irchillaydi misli halinchak
so'nggi she'rni quygin qalbimga, illo
tebranib, terlanib, o'lar holimda
sevgi deb yozaman, yashashni sevib
azroil o'tirar mening yonimda
she'rimga raqs etar, farishta kelib
chilyosin o'qilar qo'shni xonada
ingranib yotadi yonda sherigim
yozgim kelaverar meni yanada
tushunib turibman, so'nggi she'rligin
sen deya jar solsam, deraza birdan
qarsillab ochilar, parda oralab
matoga tomchigan hislarim dildan
so'ngshe'rim o'rgimchak oladi yodlab
vasiyat deb nomla, deydi azroil
o'rgimchak qizil to'r, qusar, men uchun
farishta peshonam silaydi mayin
meni kuzatishga shaylanar, o-chun
yopingan oqlikka qip-qizil to'rdan
sog'inchni bitaman, ohga tuslanib
deraza qarsillab, yopilar birdan
kalamush ko'ksimni tashlaydi g'ajib
ulgurib olayin, o'lmasdan tezroq
senga qarz she'rim bor, jonim, bilaman
o'rgimchak ko'ksimni asraydi, biroq
azroil yonida so-kin ketaman
qarz she'rimni olib yaldo kechasi
o'rgimchak xonangni boradi topib
devorga to'qiydi to'rni sog'inchdan
o'qib bo'lgach uni, tashla supurib
men esa bu holga bulutdan qarab
taskin topajakman ruhim-la birga
so'ngshe'rni kechirgin qonimdan emas
qoldirib ketganman qip-qizil to'rga
yig'lama,
qarz she'rim davom etgusi
har tongda uyg'onib, samoga sen boq:
bulutga yozaman sog'inchni,
qo'shib –
quyosh nurlaridan yo'llayman titroq
hozircha alvido, xayr marvarid
bir boshimga kelgan o'limni tutdim
men uchun yashagin shodon, baxtlanib,
so'ngshe'rni sog'inching nomiga bitdim!

*© Boxodirov Izzatillo*
#BI14

- @ch_k_t iyun 2024