للمرة الالف راح اگول:
لتبقين بزواجج بحجة اطفالج
لانه باجر عكبه راح تدفعيهم ثمن اختيارج هذا!
بدون شعور منج يا عمري مو بقصد و وعي!!
خاصه اذا بقى هذا الزواج يشوفج جانبج غير المتشافي بدون ما تشتغلين علي!
راح تبدين تحسين بكره تجاه هذوله الاطفال وتعامليهم بسوء وتتندمين وراها وانتي متدرين ليش!!
اني اكلج ليش! لانه دتحميلهم مسؤولية الالم الي انتي بي!
فيا حبيبتي من تجين تكولين اني باقيه علمودهم ! راح اكلج جذابه ودتضحكين ع روحج (اسفه بس هذا الصدك🥺)!
انتي باقيه لانه مدتعرفين شلون تطلعين! وشنو تسوين! فتخليهم درع تحمين بي نفسج وهذا العجز ! بس الدرع شكد راح يتحمل؟ تاليته ينكسر.
من حقج تحبيهم وتقدميلهم كلشي تكدرين علي! بس كوني واعيه واختاري بوعي واعترفي بشعور العجز الي انتي بي علمود رب العالمين يرتبلج المساعدة❤️

حتى يكون شغلكم ومكان عملكم مريح إلكم لازم تركزون على كم شغلة مهمة وتطبقوها بحسب وضعكم:

1. نظموا وقتكم و وزعوا شغلكم:
   رتبوا جدول يومكم بحيث ما يتراكم عليكم كلشي واعرفوا شلون تقسموا أولوياتكم.
   الشغل اللي يحتاجله طاقة هواي خلوا بأوقات نشاطكم والبسيط خلوا للأوقات الباقية.
2. رتبوا البيئة:
   سوا جو مريح بمكان الشغل مالتكم. إذا تشتغلون بمكتب رتبوا المكان بحيث تحسوا مريح ومُلهم. ممكن شوية نباتات، لوحة،ترتيب، أو حتى تغيير بسيط يخلي المكان مرتب وطاقته حلوة.
3. لتحملون نفسكم هوايه مسؤوليات:
   إذا انتوا شايلين الشغل كله بلشوا تحاولون تتفاضون ويا باقي الزملاء. إذا أكو مجال لتقليل الضغط لا تترددون ابد.
4. سوّا مسافات صحية:
   لتحاولون تكونون قريبين كلش من الناس اللي يسببون الكم مشاكل أو شحنات سلبية. خلوا المسافة الصح وتعلموا تگولون “لا” للشغل الزايد.
5. اخذوا فترات استراحة:
   حتى لو شوية دقايق كل ساعة اطلعوا تمشوا بالممر او الغرفة أو اشربوا شي . فترات الاستراحة القصيرة تساعدكم تجدد نشاطكم بدل ما تستهلكون نفسكم بالكامل.
6. تواصلوا صح:
   احجوا بصراحة وشفافية واحترام ويا زملائكم ومسؤوليكم. واذا اكو شي زاعجكم هم احجوا وبلغوا بس بلباقة. واطلبوا المساعدة إذا تحتاجوها.
7. سوا هدفكم من الشغل واضح:
   فكروا شنو تريدون من شغلكم. هل هو مصدر دخل بس؟ لو فرصة تطوير؟ خلي عندكم هدف يخليكم مرتاحين وتكدرون تكملون بالشغل.
8. مكافآت بسيطة:
   كلما تخلصون مهمة أو تكملون يوم صعب دلّلوا نفسكم بشي يحفزكم حتى لو أكلة تحبوها أو ممكن استراحة أطول.

ولتنسون التوازن هو السر! لا تضغطون على نفسكم ولا تهملون. ودائماً ذكروا نفسكم ليش بديتوا و وين تريدون توصلون؟.

المرأة اللي تجذب رجل منتقد بشكل مستمر عادةً عندها أنماط نفسية أو عاطفية تحتاج تنتبهلها وتصلحها لأن العلاقات اللي نستقطبها تكون مرآة للجوانب غير الواعية بينا.
فأنتقاده المستمر الها هو ممكن رسالة الها بسبب

1. شعورها بعدم الكفاية:
   إذا المرأة عندها شعور داخلي بأنها “مو كافية” أو محتاجة تجتهد ڪلش هوايه حتى تكون مستحقة للحب والتقدير! هذا الشعور يجذب رجل ينتقدها باستمرار لأنه يعزز هالإحساس. كأن العلاقة صارت انعكاس لعدم رضاها عن نفسها فأكيد هو مراح يرضى عليها 😅.!

2. الخوف من الوحدة:

بعض النساء تستمر ويا رجل منتقد لأنها تخاف من فقدان العلاقة و البقاء وحدها. هالخوف ممكن يخليها تتحمل اي شي اهم شي متبقى وحدها 🤦🏻‍♀️.

1. الأفكار المزروعة من الطفولة:
   إذا نشأت المرأة ببيئة مليانة نقد ممكن تشوف هالسلوك طبيعي وتنجذب لشركاء يكررون نفس النمط لأن اللاوعي يشعر بالأمان ب الشيء المألوف.

2. الرغبة بالتغيير أو الإصلاح:

بعض النساء يصير عدهم ميل لإنقاذ الآخرين أو إصلاحهم فهي تجذب رجال منتقدين على أمل أنه تغيره وتصلحة بالمستقبل 🙊.

وعموماً وبكل اختصار

حتى تجذب علاقات أحسن المرأة تحتاج تصلح صورتها الداخلية عن نفسها و ترفض كل سلوك يستهلكها عاطفيًا وتتعلم ترسم حدود واضحة. ولمن تبي تقدر نفسها وتعيش بثقة بشكل طبيعي رح تستقطب علاقات متوازنة وصحية اكثر.
هسه كتبيلي فهمتي الانعكاس الي بعلاقتج لو بعدج؟ وكتبيلي شنو نوع الرجال الي تردين اوضح احتماليته بالانعكاس بالمحتوى القادم

“تمرين بسيط يهدي أعصابك وقت الشد والتوتر اثناء اليوم🌿**”

إذا حسيت يومك كلش مزدحم واعصابك تعبت جرب هالتمرين السريع:
1. أول شي نسوي نفس عميق والي هو عبارة عن شهيق من الانف لمدة 4 ثواني تقريباً ونكتم النفس 4 ثواني وبعدها زفير بهدوء من الفم لمدة 6 ثواني. سويها 3 مرات.
2. غـمّض عيونك وحاول تتخيل منظر تحبه مثل بحر أو مكان هادىء او شخص عزيز او هدف متحقق. وركز على كل التفاصيل الصوت واللون وحتى الريحة إذا تگدر.
3. حرك جسمك شوي
مد إيدك ل فوگ كأنما د تسحب طاقتك من السماء ونزلها شوي شوي. هذا التمرين ينطيك شعور بالراحة والطاقة بنفس الوقت.

هسه جربوها وبعدين تعالوا كتبولي اذا حسيتوا بفرق!

وكتبولي بالتعليقات شنو اكثر شي يريح اعصابكم اذا مريتوا بيوم مزدحم؟**

**أكيد التوازن بين العمل والحياة مهم حتى تحافظون على صحتكم النفسية والجسدية وتحققون النجاح بكل الجوانب.
هذني بعض النقاط اللي ممكن تفيدكم:
1. حددوا أولوياتكم: اسألوا نفسكم شنو الأمور الأهم بحياتكم؟ الشغل؟العائلة؟الأصدقاء؟ لو نفسكم؟ وبناءاً على هالشي قسّموا وقتكم بشكل يناسب أولوياتكم.
2. وقت العمل هو للعمل فقط: من تشتغلون ركّزوا على شغلكم بس. يعني لا نستخدم التلفون ولا نسولف ويا احد ولا نتحرك من مكانه الا لشي ضروري وهيج راح نكمل بوقت اسرع ونگدر نسوي كلشي نريده.
3. وقت خاص: يومياً خصصوا وقت تسوون بي شي تحبوا مثل الرياضة،القراءة،التأمل، أو حتى بس گعدة هادئة. ولتستهينون بهذا الوقت لان صدقاً هو “طاقتكم”.
4. تعلموا تگولون “لا”: لتخلون الكل يفرضون عليكم التزامات إضافية سواء بالعمل أو بالحياة! حدودكم هي اللي تخليكم تسيطرون على وقتكم.
5. خططوا يومكم: اكتبوا جدول بسيط للأعمال اللي لازم تسووها وخلوا بي فترات استراحة ووقت للعائلة. لا تخلوا كله شغل!
6. شاركوا العائلة بخططكم: خلّوا عائلتكم يعرفون شنو أهدافكم بالعمل وشلون توازنون وقتكم وياهم حتى يحسون بأهميتهم بحياتكم.
7. النوم الكافي: لا تسهرون وتضيعون نومكم على حساب الشغل أو أي شي ثاني.
النوم مهم حتى تشتغلون بشكل أفضل وتبقون نشيطين.
8. راجعوا وضعكم باستمرار: كل فترة اسألوا نفسكم “هل أني متوازن؟” وإذا حسّيتوا أكو خلل عدّلوا على جدولكم وشوفوا شلون ممكن تحلّوا.

نصيحة أخيرة والاهم صراحة: التوازن مو معناها تقسمون وقتكم بالنص بين العمل والحياة! هالشي مستحيل ! التوازن معناه تعرفون شلون تستثمرون وقتكم بكل جزء (الحياة+العمل) حتى تبقون مرتاحين.**

**دير بالكم!
تره العلاقات مو لعبة ولا هي تجربة وتعدي!
العلاقات شي مهم بحياتنا سواء كانت مع شريك أصدقاء أو حتى أهل او زملاء عمل. إذا ما عرفنا شلون نديرها صح ممكن نتحول من ناس مرتاحين وسعيدين إلى ناس تعبانين ومضغوطين ومستنزفين!.

زين فاطمه بداخل اي علاقة محتاجين ندير بالنا من شنو بالضبط؟
اوووه كومه اشياء صراحة بس هسه اشارك وياكم كم نقطه:
1. من الأنانية والايجو:
العلاقة مو بس (اني اريد او اني احتاج) العلاقة هي “إحنا” نشتغل سوا ونتعاون. إذا شفت نفسك تفكر بس بنفسك، لازم تعيد النظر.
2. من الإهمال والتكبر:
العلاقة مثل النبات إذا ما سقيته راح يذبل. الاهتمام ولو بأبسط الأشياء هو اللي يخلق الفرق بين علاقة صحية وعلاقة مدمرة وطبعا الاهتمام بالعلاقه يجي من بعد اهتمام الشخص بنفسه! لان مستحيل نگدر ننطي شي ما عدنا!.
3. من الكلام الجارح:
الكلام سلاح! مرات نجرح ناس نحبهم بس بكلمة واحنا ما ندري. فكررا قبل لا تحجون لان اللي ينكسر بالقلب مرات ما يتصلح.!
4.استجداء الاهتمام والحب:
شنو الحل؟
نحب نفسنا ونهتم بيها ونشافيها ونطورها! لان اهم علاقة هي علاقتنا ويا ذواتنا! اذا احنا منحب نفسنا منحترمها منقدرها ومنثمنها مستحيل راح يجي شخص ينطيني هالاشياء! كل الناس تنطيني من الي عندي 🥹

وتذكروا العلاقة الصحية تره تستحق التعب والاجتهاد والسعي ❤️**