يابو صالح يابو صالح
*1*
جمرة افراكك منو يطفيها
نار مشتعله وهوه يعليها
بروحي تسعر للصبح تدريها
يابو صالح يابو صالح
2
يمته بجفوفك ترف الرايه
والبقيع انروحله مشايه
نصرتك يا سيدي أجمل غايه
يابو صالح يابو صالح
3
ماي رش اعله الجمر من جودك
وطفي جمرات الحزن بوجودك
يمته اسمع قد ظهر موعودك
يابو صالح يابو صالح
4
والله تعبان انه من غيابك
يمته اوكف سيدي اعله اعتابك
ادري حيل بلوعتك ومصابك
يابو صالح يابو صالح
5
انه كل جمعه وعلي ادعيلك
الله كون الكربله يشد حيلك
ليش يا نور الله طول ليلك؟
يابو صالح يابو صالح
6
فتره كل غايب يرد لعياله
محد امطول مثل هالحاله
المثلك ملاكَه ودمع يحلاله
يابو صالح يابو صالح
7***
لحضه ما غايب ابد عن بالي
شلون كلي تغيب وانته الغالي
صورتك كل لحظه تتراولي
يابو صالح يابو صالح

خادم الحسين عليه السلام
كرار عبد الحسن المحمداوي

شمس ما يسجنونك تبقه تنشاف
هو ه المثلك بطاموره ينعاف
الجبيره بروحه علته ... طبيب جروحه انته
هوه المثلك بطاموره ينعاف
**(١)****
اركض ركضة المكَتول ابنه اكباله واتعثر
رايد كوه اوصلك عله فراكك بعد مكَدر
جبيره اعليه من تكوم تتلكاني واتعذر
اروحن فدوه لترابك يا مولاي ابن جعفر

صحره الروح واعرف شوفتك ماي
بس يمك تصير العافيه هواي
الذرف يمك دمعته ... طبيب جروحه انته
هوه المثلك بطاموره ينعاف
**(٢)****
من اجيلك سيدي ارتاح وتزيل اهموم البصدري
غيرك ما كو واحد راح يلزم بالشدد ضهري
جدك حيدر الكرار يكضي الصعبه انه ادري
من اضحيلك ولا خسران الك من فدوه كل عمري

يغالي وكلشي ما يغله اعله غالين
تريد العين فدوه الدمعه والعين
بجفك جرحي رفته ... طبيب جروحه انته
هوه المثلك بطاموره ينعاف
*3***
ما حاضر الك بالموت بعيده اعليه فاتحتك
وما شايف شنو اللي صار بس سامع شنو قصتك
من سجن السجن مولاي جفوف الطاغي جايبتك
من كَيد السلاسل حيل كامت تنزف اركَبتك

جرحك جرح عاشر يبن الاكرام
يكلبك محترك جن حركة خيام
صمودك كعبه طفته ... طبيب جروحه انته
هوه المثلك بطاموره ينعاف
*4**
انه العايش جرح واحزان غيرك كلشي ماعندي
عاشت قصتك وياي من اهد طامورة السندي
وبقى جرح الحزن لليوم ابد ما طايب يندي
ثارك ينوخذ مولاي بزود القائم المهدي

السجن صاير مناره شوف العيون
بغروره وكبريائه اندفن هارون
بعد ربنه وحكمته ... طبيب جروحه انته
هوه المثلك بطاموره ينعاف
*5**
العمر حسبة رقم ويروح اليموت يصير بس ذكره
اكو الينسي وعاش هواي ولا جن عايش بعمره
ولكن انته يا مولاي احس بأنفاسك من أقره
اجيك انه شكثر مهموم وأطيب من ادخل الحضره

يالمشرّف الكَاع بهل المنارات
يالبصحنك مشبعها الحمامات
الحمام بعينه شفته ... طبيب جروحه انته
هوه المثلك بطاموره ينعاف

خادم الامام الكاظم عليه السلام
كرار عبد الحسن المحمداوي

من كربله.. ضل الجرح
ينزف ألم.. حد الصبح
بعد حسين بعد حسين
ماظل امل بعد حسين
*1****
حسره بيه.. من عذابي
المن احجي جروح كلبي وياهو يسمع
كون اخوتي.. هسه يمي
وأنه منهم كل مسيه شوف اشبع

من الهواشم.. خل تشبع العين
من الكفلني.. والغالي حسين

يحله التعب.. يحله السهر
بين اخوتي.. اوي الكمر
يشفي جروح يشفي جروح.. ملكه الاهل يشفي جروح
*2×****
غربه كلها.. ديره وحشه
وأنه وحدي وي وأدم أهل ديره
روحي تعبة.. من حجيهم
كلهم ايكلولي ارحلي ماكو غيره

اسمع حجيهم.. يوميه يحجون
لبيوت اهلها.. خل ترحل ام عون

يعني ارحلي.. من أرضنا
مالج أهل.. يم كاعنا
بيه شلون بيه شلون هذا الأمر بيه شلون
**3****
دمعي سايل .. على الرسايل
وأنه يوميه إدز مرسال شاهد
اشكي حالي.. بكل رساله
لخوتي أهل الحميه بيد واحد

من حكي ياناس.. اعتب عليهم
منتظره يلفون.. مشتاكه ليهم

يكضي بحزن.. ليلي اليمر
وأنه انتظر.. بكلبي الجمر
صار هواي صار هواي.. ماجو هلي صار هواي
*4*
الواعدوني.. ما اجوني
الكالو بسرعه نجي طول سفرهم
حيره حيره .. والمصيبه
ليلي خلص بالمتانه وانتظرهم

وي جرت الأنفاس.. اشتم هواهم
ويمته يردون.. واسمع نداهم

كسرة عضم.. كلبي انكسر
من البجي.. ماظل نظر
تعمه العين تعمه العين لجل المشوا تعمه العين
*5**
ليش نعشي.. الوحده يمشي؟
وماكو جنازه التشيعني ابواجي
جرح ينزف.. بيش اضمده
وين اخوتي البيهم اتلوك الخواجي

وين اهلي بالموت.. محد اجاني
منتظره الحسين.. بس لا نساني

وحدي بلحد .. وحشه اندفن
دم ودمع.. يبجي الجفن
ماكو اعزاز ماكو اعزاز وكت الدفن ما كو اعزاز

خادم الحسين عليه السلام
كرار عبد الحسن المحمداوي

حزن الكلب صار وبده من الزهره
من الدفع وكسر الظلع والعصره
لوعات هواي
صارت دنياي
عجيبه عجيبه
*1***
عمر وايامي كلها أحزان .. ولاشفته الفرح مره
زغيره وضيمي ما خلصان .. واحس بهمي شكبره

اخ شكد جبيره همومي ما تنقاس
كلب لونه الشعر صار ابيض اعله الراس
بعدني زغيره منها وشيبت ياناس

بهمي ابد محد عرف واحزاني
ام الحزن دهري كتب عنواني
معروفه بهاي
صارت دنياي
عجيبه عجيبه
*2*
يروح الشوف من عينك .. إذا غالي مشه ومارد
الكضيت ايامك انته اوياه .. الصبح عالموت يتوعد

شكثر صعبه اذا منك عزيزك راح
تضل تنعه بحياتك لحضه ما ترتاح
ويضل دوم الحزن ما ظن ابد ينزاح

روحك تظل تنعى وتون كل مغرب
وانته بحزن ليلك يمر متعذب
ماعندك رأي
صارت دنياي
عجيبه .. عجيبه
*3*
حزن والروح كلها تموت .. تشوف الغاليه ترحل
عزيزه امي اعز مني .. اظمها بروحي اذا تقبل

عليه الموت اذا يقبل اروح ابساع
ابدال امي ادفن روحي حدر الكاع
اشريها بثمن من عمري لو تنباع

امي اذا باجر ترد اتعهد
أنذر نذر وسط الكبر اتوسد
واجروحي وياي
صارت دنياي
عجيبه عجيبه
4*
العشك ويه العزيزه الام .. البشر ما اظن يفهمونه
خطيه الفاكد امه يحير.. وتبين العازه بعيونه

شحلات امك ويترسلك عطرها البيت
ومن ذاكه الصبح تشتمها لو رديت
من ماتت تموت اوياها اتمنيت

الفاكد وطن مثل ام حسن يتحسر
بكلبه الحزن وي العمر ظل يكبر
*5*
جنت اول نفس بالروح .. اشتمه نفس امي
عكب مافاركتها انه .. ظل وياي بس همي

بعدها احزاني ماتخلص اوياي اتبات
من الباب ذاكه الحركت الخيمات
شفت كل المصايب ذيجه والاهات

يوم النزف دم فاطمه اتخيلته
زمرة قتل طفهم بده اتحلمته
نضرات الماي
صار دنياي
عجيبه .. عجيبه

خادم الحسين عليه السلام
كرار عبد الحسن المحمداوي

على الزهره.. كبر نوحي
شيخلص نوحي ما ادري
هدم حيلي.. وضعف عزمي
وخلص هالليله ياصبري
*1***
انه ادري كلشي يخلص
وادري روحي يظل حزنها
عيني رمده من البواجي
يسولف الليل ابجفنها

جنت كل يوم اسولف واكعد وياها
الزهره كبالي جانت تحجي محلاها
الزمن وسفه اجه ومن يمي اخذاها

دمع عيني.. على الوجنه
بده يجري وحفر خدي
الم بيه.. بكبر روحي
وجرح ما بطل ايندي
وخلص هالليله ياصبري
*2***
وكلبي صاير مثل مؤكد
حظنه نار وكله حركه
راح امان العمر مني
راحت الغمرتني ملكه

كمت كل ليله احن ودمعتي بعيني
خلاف ام الحسن ياهو اليسليني
الهوى بلايه الزجيه حيل ياذيني

خلص وكتي.. على الراحت
بجي ودموعي ما جفت
سهر عيني.. وبجي بليلي
واحسها الدنيا ما كفت
وخلص هالليله ياصبري
*3**
طعم ما بيه كمت احسن
هوه اليجبل من اشمه
جانت أجمل كلشي عندي
واجمل من اشتمها نسمه

بعد ما ظل اليه الحيل واتحمل
اشيل الزهره فوك اجتافي واتئمل
جف دمعي عليها والجفن وشل

طفل جنى.. اون واشهك
بجي ومناشغ بكلبي
اعينوني.. صحت ليهم
بعد ما ينوصف تعبي
وخلص هاليله ياعمري
*4****
كمت افكر انه هذا
علي الحيد شصار بيه
شحال زينب دون امها
من تمرها المغربيه

مثل ماشافت امها الغاليه الزهره
النذل والباب حيل ظلوعها تكسره
تشوف حسين باجر ينذبح نخره

ولا واحد.. يظل يمها
كمر يم النهر طايح
تصيح الحك.. يبو الغيره
ولا يسمع نده الصايح
وخلص هالليله ياصبري
*5***
راح اسولف شنهو يجري
ويه زينب عكب اهلها
الكبل جانوا ظل عليها
وكلها تحرس يم خيمها

هاي ام الخدر يوم هدعش طلعت
بدون اخوتها بالميدان من ظلت
وحيده ابينهم والكوم تتشمت

شكثر صاحت.. شكثر طاحت
ولا واحد فزع ليها
بعد ما ظل.. سند الها
بعد ما راح واليها
وخلص هاليله ياصبري

خادم الحسين عليه السلام
كرار عبد الحسن المحمداوي

يابو صالح خل ترف الرايه
الشيعه كلها هالاجت مشايه
*1***
ها يبن حيدر تحزم شيعتك هاي الاجت
رايه من آخر محطه على المواكب رفرفت
كلها منتظره ضهورك على الضريح تعاهدت
زغار وكبار النصرتك كلها حيل اتحزمت

يا بو صالح خل ترف الرايه
الشيعه كلها هالاجت مشايه
*2***
انته ياحيد المراجل عالزلم جدك عبر
بالحرب سيف المجرب كاسر خشوم البشر
يمته تطلب ثار جدك ها يبن فارس مظر
شحت الغيره بكصصهم وسفه والدين بخطر

يابو صالح خل ترف الرايه
الشيعه كلها هالاجت مشايه
*3**
وصلت الحره العقيله يم مشارف كربله
كلها صاحت للهواشم ياهلا وميت هلا
ردت من الشام عمتك بالهموم محمله
بس حرم وايتام ظلت بيها تدري العايله

يابو صالح خل ترف الرايه
الشيعه كلها هالاجت مشايه
**4****
ساوموها عالمجالس شيعتك هل نادتك
تظهر براية محمد شيعه كلها انتظرتك
انزل بمكه الحبيبه خل ترفرف رايتك
وتاخذ بثار الزجيه والضرب خد عمتك

يابو صالح خل ترف الرايه
الشيعه كلها هالاجت مشايه
*5***
بسيفك الفقار افزع هدم اصنام الكفر
مثل جدك ذاكه حيدر من كسر قيد الصبر
احنه ندري وعن قناعه انته باجر منتصر
من يشوفونك بمهدي كلها جدامك تفر

يابو صالح خل ترف الرايه
الشيعه كلها هالاجت مشايه

خادم الحسين عليه
كرار عبد الحسن المحمداوي

رسمة موعد بدموع العين
منتظره يرد ليها حسين
يرد ليها شكثر كالت
حسين وللضعن تانت
رسمة موعد بدموع العين
**1*
يوم الشافت ضعن الحره
مابيه حسين ابن الزهره
انحنت
ما سئلت عن أهل الغيره
عباس وكل اهل الديره
انحنت

جان الناعي يعدد بيهم لم عباس
لمن سمعت ظلت تطلم فوك الراس
ما يرجع الحسين الغالي عدها احساس

لمن سمعت شنهو الصار
من الموقف كامت تنهار
عجيبه من الأمر مالت
حسين وللضعن تانت
رسمة موعد بدموع العين
**2**
كللها الكافل عباس
كلتله حسين اغله الناس
وبجت
كللها حسينج مذبوح
جن طلعت من عدها الروح
وبجت

الله يساعد كلبج كلها اعله العطشان
ظل حسينج نايم وسفه اعله التربان
خيل التسحك فوك حسينج بالميدان

ماعده افراش ومنحور
نايم عالكاع ومكسور
الخياله اعليه جالت
حسين وللضعن تانت
رسمة موعد بدموع العين
**3*
ام عباس تكله انه اسمع
دليني حسين وخل ارجع
ورد
ما أكدر لفراكه اتحمل
يوميه انتظره واتئمل
ورد

تانيته اشكد يرجع ليه هناك الراح
كلبي يعورني من الفركه وما مرتاح
خلصت ايامي بلا موعد كلها صياح

بين ضلوعي وصحت هناك
ارجع يالغالي اترجاك
الحناجر خرت وطاحت
حسين وللضعن تانت
رسمة موعد بدموع العين
*4***
شيصبرني شلون ارتاح
وانه حسيني من يدي راح
شبعد
ما يرجع ميت هيهات
فوك خدودي دموعي تبات
شبعد

ليليه ايمر بعيوني اشكد مثل الطيف
كل مااصحه باخر نومه انظر سيف
مذبوح انظر طلعت روحه مو بالكيف

كوه يطلعها الذباح
مات حسين ومامرتاح
دماه اعله الأرض سالت
حسين وللضعن تانت
رسمة موعد بدموع العين
*5'
تتهنه شلون ام عبدالله
وحسين الغايب وجه الله
انقتل
من سمعت زينب مسبيه
وجفوف الكافل مرميه
انقتل

من سمعت ناعيهم ينعه ويبجي هواي
طاح اعله الكاع الشايلته وتاه الراي
ما تدري الكافل مذبوح بصف الماي

ردت وتسيل الدمعات
من عرفت عباس المات
جبيره وعالأرض طاحت
حسين وللضعن تانت
رسمة موعد بدموع العين

خادم الحسين عليه السلام
كرار عبد الحسن المحمداوي

لليسئل شصاير علينه
بلا كمر ليش احنه اجينه؟
لوعة مصابي .. تفسر جوابي
بلا كمر ليش احنه اجينه؟
*1***
راح ابدي اسولف قصتي.. واحجي الصار.. من المدينه انه ابدي
من المدينه الكربله.. ليل انهار.. امشي واسولف وحدي
كَوم الكصدناهم عرب... موش أنساب.. عدهم علم من جدي
هاي الخلك كلها تعرف.. دم حسين.. فوك الأرض متبدي

علم عدهم همه باجر
حسين التكطعه البواتر
لوعة مصابي.. تفسر جوابي
بلاكمر ليش احنه اجينه
*2*
لمن مشينه وبالدرب.. كلبي احتار.. من الأمر واسراره
مسلم سفير ومارجع.. ماكو اخبار.. ما طمنتني اخباره
جانت رسايلهم تجي.. كلها انصار.. للفركه جنها بشاره
وهذا الأمر كلش صعب.. بيه أسرار.. ربنه العزيز اختاره

اختلف لمن وصلنه
غربه ما جنه بوطنه
لوعة مصابي.. تبين جوابي
بلا كمر ليش احنه اجينه
**3''
يوم الدخلنه الكربله.. شفت الناس.. ملتمه كلها اعلينه
ماتت ضمايرها اعرفت.. ماكو احساس.. محد اجه يحامينه
ولانكدر نعاود بعد.. شفت حسين.. مايكدر ايرد بينه
ماظل امل غير الصبر.. ماكو امجان.. البيه تستراح سكينه

تحملت كلها المخاطر
ويتعب بمشيه اليسافر
لوعة مصابي.. تبين جوابي
بلا كمر ليش احنه اجينه
*4****
ما راد الحسين الحرب.. كلهم جاي.. رايد صلح ماقبلوا
كلهم تعالوا بلا كفر.. صلحوا الدين.. هم النواصب رفظوا
كلهم اجيت بعيلتي..كلها وياي.. كلهم عليه احتجوا
بين اليريد وياه صلح..مامش راي.. كلهم عليه اختلفوا

بيهم الكال اقتلوهم
وبيهم الكال ارحموهم
لوعة مصابي.. تبين جوابي
بلا كمر ليش احنه اجينه
**5****
لمن طلع فجر الصبح.. اخر يوم.. عاشر محرم هجمت
اخر بشر ظل وحده.. بين الكوم.. كلها وعليه التمت
من العطش جبده انمرد.. ماكو ماي.. حتى الشفاه انفطرت
طلعن مشي ونار ورمل .. ماكو فياي.. حتى الخيام احتركت

وعالرمل تركض رقيه
وطلعت الحره سبيه
لوعة مصابي.. تبين جوابي
بلا كمر ليش احنه اجينه

خادم الحسين عليه السلام
كرار عبد الحسن المحمداوي

ليلة السابع

يصعب عليج شلون
ماي النهر يم عون
وانه كفيلج.. وانه كفيلج
1***
يزينب لو امرتي ألماي اجيبنه
وحد رجلج ذليل الليله اوكفنه
بثواب امج وابوج هنانه اوزعنه
واليعطش نبع من جودي اشربنه

يختي بحياة اصباي
اله اترس انه الماي
وانه كفيلج.. وانه كفيلج
*2***
يمر بيج العطش وانه عدل بيها
الدنيه الي تزعلج والله امحيها
الخوه الما تموت عليج انسيها
ابد مو خوه هاي احنه نسميها

انتي اغله من الروح.. عتابج علي مسموح
وانه كفيلج.. وانه كفيلج
3
الج يم الخدر زينب اجيب الطف
لاعين التكضني ولايكضني الجف
احسبيه النهر يم بابج امجتف
شتظنين الأمر يختي علي يكلف

كلشي انتي تدرين.. اله اوفي الدين
وانه كفيلج.. وانه كفيلج
*'4*'
لو تبقى الشريعه بكلشي ملزومن
شرط لو اطب عليها امحي الحومه
تعرفينه الكمر يختي مشيعه علومه
من سيفي النواصب كلها ملجومه

كل حمله خليت.. ذكره بوسط بيت
وانه كفيلج.. وانه كفيلج
**5**
جبت عمري الج خادم واظل خادم
علي يختي اخدمج واجب ولازم
اطب ليها الشريعه بجربتي عازم
واجيب ألماي الج غصبن على الوادم

لو صحتي عباس.. خل توكف الناس
وانه كفيلج.. وانه كفيلج

خادم الحسين عليه السلام
كرار عبد الحسن المحمداوي

هلا بشهر الحزن والاه واللوعه
بيه حسين كلش طحنو اظلوعه
نصيح بصوت ونوح.. امام الدمعه مذبوح
هله بشهر الحزن والاه واللوعه
*1****
شهر حزني بده هلاله
اون ودموعي هماله
وبديت اتحضر النوحي
على حسين وعله عياله

احس بروحي صاير كومة صياح
الشهر يسوه التعب ماترضه ترتاح
مشت للطف احسن روحي بالطيف
وشفت مشهد يخوف مال الارماح

شفت نار وخيم محتركه بعيوني
وسمعة الحره ناده ياهلي امتوني
يريت الطيف ميروح.. امام الدمعه مذبوح
هلا بشهر الحزن والاه واللوعه
*2***
بديت انضر دمع زينب
على الوجنات يوم الصب
باول ليله من عاشور
جن شفته الكمر حدب

بأول ليله هل اهلال عاشور
نضرت بعيني شفته شلون مكسور
كمة بروحي اسمع حزن والام
يقره بس كلش حزين يالم الطور

اموت بكل دمع ينزل على الوجنه
من يذكر رضيعه الميت بحضنه
احس بدمعتي اجروح.. امام الدمعه مذبوح
هلا بشهر الحزن والاه واللوعه
*3
كسر كلبي علي الاكبر
شباب وجسمه اموذر
العطش مرد جبد روحه
وعليه حسين يتحسر

شبيه المصطفى نايم على تراب
انكسر كلب الحسين بهذا المصاب
أجمل شاب طايح يم الحسين
صريع وجسمه كله امترس خضاب

يكلب حسين الله يساعد اجروحه
اخوته اكباله كلها الليله مذبوحه
دمهم كله مسفوح.. امام الدمعه مذبوح
هلا بشهر الحزن والاه واللوعه
**4*
الحسين بحضنه عبد الله
توضه بدمه اوصله
بسهم فز وكصر عمره
ومحد كال اله اصمله

بحزن عبد الله مات وما كعد نام
والرباب الما تصدك عيونها اوهام
طفل عطشان يرجع لمه مذبوح
ابد ما صار عدها بيقضه واحلام

كسر كلب الرباب الشافت المنظر
حرمها السهم ذاكه شمت المنحر
بقه بالبال مفضوح.. امام الدمعه مذبوح
هلا بشهر الحزن والاه واللوعه
*5***
تعاين زينب الحره
اخوها حسين عالغبره
داست خيل بضلوعه
وحيد ومنكطع نحره

تصيح الحره حيل وتلطم الراس
دوة نار الخيم وينك يعباس
علينه الكوم وصلت للصواوين
ما مش غيره عدها وتفزع الناس

الخلك منهم اعاين شحت الغيره
وبقت زينب تصيح الحك يبو الغيره
النضر عالحومه مشبوح.. امام الدمعه مذبوح
هلا بشهر الحزن والاه واللوعه

خادم الحسين عليه السلام
كرار عبد الحسن المحمداوي