Қиш эди. Ўттиз жон совуқ хонада,
Адабиёт дарсин тинглар эдик жим.
Муаллим саволлар берар гоҳида:
“Хамса”ни ким ёзган,
“Жангчи Турсун” ким?

Қўллар кўтарилар басма-басига,
Айтмасанг, кўксингдан чиқиб кетар жон.
Ўттиз овоз янграр қасдма-қасдига,
“Навоий”, “Навоий”, “Ҳамид Олимжон!”

Шундай чанқоқ эдик, дарсдан қолмасдик,
“Паскаль”ни билардик, даҳо “Ньютон”ни.
Аммо баъзи дўстлар топа олмасди,
Дунё картасидан Ўзбекистонни.

Улар кўп панд еди кўз ўнгимизда,
Бош эгиб, бурчакда тик турди мағрур.
Биз эса мақтандик ўз-ўзимизча,
Бунинг-чун жўралар, минг бора узр.

Эслайман, бу эълон “Учинчи “Б”га:
– Эртага ўн сўмдан келтиринг, тамом.
Парта жилдга денглар, кейин “байрам”га,
Яна “краска”га, сўнгра “металлом”.

Ўшанда пулим йўқ, ичим ёнарди,
Назоратчи қистар, қараб рўйхатга.
Адабиёт. Устоз таъриф берарди,
“Тажоҳилул ориф” деган санъатга.

Уйимда қолганди ўша кун овқат,
Қорним оч, сўмкамда нон йўқ егани.
Устоз такрорларди тинмай бу санъат:
“Билиб билмасликка олиш” дегани.

Ёдимдан ўчмайди ҳеч қачон бу ҳол,
Муаллим елкамга аста қўйди қўл.
Ҳеч кимга билдирмай, ҳеч кимга, алҳол,
Чўнтагимга буклаб солди ўн сўм пул.

Ўттиз қора кўзга изза бўлиш, воҳ,
Сездингиз, кўнглимни ёмон ўртарди.
Дўстлар, уриб турган юрагим гувоҳ,
Бир инсон ўксишдан мени қутқарди.

Ўша дарс ҳалиям берар кўп сабоқ,
Қорним оч, сўмкамда нон йўқ егани.
“Тажоҳилул ориф” – эй азиз устоз:
“Билиб билмасликка олиш дегани”.

Гарчи ўзингиз ҳам маошга яшаб,
Баъзан етказолмай бўлгансиз абгор.
Юрмас эдингиз ҳеч тўкинга ўхшаб,
Сизда йўқ эдими болалар, рўзғор?

На эҳсон эди у, на қарз эди у,
Ўйласам, бу ҳолнинг йўқдир жавоби.
Бир мурғак қалбига сажда эди бу,
Бир кўнгил уйининг пинҳон тавофи.

Шеър битди. Мен ҳамон қидириб таскин,
Олис мактабимга йўл оламан жим.
Билмайман, бу юртда устоз шарафин
Билиб, билмасликка олаётган ким?

(c) Бобур Элмуродов

🌹 @LirikaUz

Bu foniy jahonga ko'ngil berganlar

🌹 @LirikaUz

Zamonlar o‘zgarar degan gap yolg‘on,
Eski qilig‘ini qo‘ymas u tashlab.
Har qanday zamonda osh oshab nodon, 
Har qanday zamonda osilar Mashrab.

Dor o‘sha - o‘zgarib turadi arqon,
Kor o‘sha - o‘zgarib turadi arkon.

Isroil SUBHONIY

🌹 @LirikaUz

Шай турибман чиқиб кетишга,
Ижара уй,
Ўгай шаҳардан.
От чоптириб суяги пишган
вужудимни бўлдим заҳарлаб.

Бунда ҳислар ўта бежирим,
Дағал ҳаёт — манфур ақида.
Ёзганларим кўздан кечиринг,
Бари тоғу отлар ҳақида.

Бирор Машраб йўлда учрамас,
Ё бир дайди — чориғи абгор.
Кўнглим худди бадбўй ҳужрадай,
Ноҳақману Ҳаққа талабгор.

"Эгил" дейди кўринган борки,
Ўстирармиш нокасга хизмат.
Ялоқхўрлик муҳташам дорки,
Унга осилмоққа ожизман.

Мутеликка беролмайман дош,
Шунқор руҳим, иймоним қайсар.
Қултойларга эгилгунча бош,
Бўри ёриб ўлганим афзал!

Шай турибман кетишга, аммо,
Ижара уй, шаҳарда айб йўқ.
Кенглик истар, камида само,
Ичимдаги ёввойи махлуқ.

? @LirikaUz

O'ylar edim hayot bizni siylaydi deb,
Biz kuylagan qo'shiqlarni kuylaydi deb.
Bugun bo'm-bo'sh yuragimni siylayapman,
Hayot qanday aytsa shunday kuylayapman.

O'ylar edim: so'nmas mening g'ururlarim,
Ko'ksimdagi hayratlarim, sururlarim,
Bugun qoldim ikki o'tning ozorida,
Yig'layapman g'ururimning mozorida.

O'ylar edim: do'stlarim bor dil chog' etar,
Yo'limdagi chohlarimdan ogoh etar.
Yorab, bugun bu o'yinda o'zib chiqdim,
Do'stim tashlab ketgan chohdan o'zim chiqdim.

O'ylar edim: sevgan yorim tashlab ketmas,
Jonday sevar, ko'zlarimni yoshlab ketmas.
O'ylar edim: men deb unday ado yo'qdir,
Bugun undan sado yo'qdir, sado yo'qdir.

O'ylar edim: tog'dek baland yashayman deb,
Qirchalarga qandoq nazar tashlayman deb.
Tog'dek cho'kdim, nelar larza soldi menga,
Bugun tog'lar, qirdek bo'lib qoldi menga.

Dunyo ekan tog'laringni kir qilguvchi,
Dunyo ekan osmonlaring yer qilguvchi.
Kelishmadim toshi yolg'on savdo bilan,
Ona-bola bo'lolmadim dunyo bilan...

?@LirikaUz

Совуқ тушди, бир хотин хуноб,
Ёқолмасдан печка ўлгурни.
Эри тезроқ пул жўнатганда,
Олар эди ўтин, кўмирни.

Боласига беради дашном:
Дарс тайёрла, қандай боласан?
Уйимизда биттаям шам йўқ,
Свет ўчиб қолса, кўрасан.

Иссиқ кийин, шамоллаб қолма,
Телевизорни ҳозироқ ўчир!..”
Телевизорда “гўзал ҳаёт” деб,
Унвон олган шоир шеър ўқир.

Совуқ тушди, бир хотин хуноб,
Ёқолмасдан печка ўлгурни.
Эри тезроқ пул жўнатганда,
Олар эди ўтин, кўмирни.

Баҳодир Ғулом

? @LirikaUz