Офият тиланиб хилхоналардан,
Фарқимиз қолмади девоналардан.

Мумтозлик бобида Биру Бор танҳо,
Воҳ, шерик ясадик бир доналардан.

Ҳумой деб шарафлаб бойўғли зотин,
Ҳақиқат изладик афсоналардан.

Маъшуқни мадҳ этган достонлар қайда?
Юз бурдик бебаҳо дурдоналардан.

Охират хабарин эшитмас мардум,
Қулоқлар батангдир тароналардан.

Ўтай деб ошиқар ҳар дам халойиқ
Тиллодан қуйилган остоналардан.

Эй дўсти азизлар, Сирожиддинни
Топингиз вайрона майхоналардан.

📚Шоирнинг “Мен бир фуқаро!..” китобидан.

@SirojiddinRauf

Зоминтоғ
Заминнинг қозиғи,
Безаги арчалар — яшил дур.
Шу боис, минг йиллик ёзуғи
Ўзгармас: ҳамиша яшилдур.

Чўққидан баландда кун ва ой -
Ярақлар фалакнинг қўш тиғи.
Шарақлар бетиним кумуш сой,
Мардона тириклик қўшиғи.

Қаноти ёйилган булутлар
Тилинмас қайроқи тошларга.
Нигоҳи олмосдай бургутлар
Шайланган шиддату шаштларга...

Ютаман ютоқиб ҳаволар,
Бурқсиган ҳаваслар ўчади.
Орзулар дафъатан ҳаволар,
О, кенглик бағримга кўчади...

Зоминтоғ
Кўнгиллар озиғи!

📚 Сирожиддин РАУФ. “Мен бир фуқаро!..” китобидан.

@SirojiddinRauf

#Алишер_Навоий_таваллудининг_584_йиллиги

МУТОЛААДАН СЎНГ
*Субҳидамда уйғонибман Навоийнинг навосидан,
Сипқорурман мудом энди кўҳи маъни ҳавосидан.

Каҳкашонми эрди матлаб, юлдузлардан ўтдим ҳатлаб,
Юксалибди руҳим, ажаб, Ҳақиқатнинг сафосидан.

Адам дашти, алам тоғи роҳимда дуч келар гоҳи,
Ювилгуси кўнгил доғи ҳазратнинг бир дуосидан.

Париваш домига тушдим, жудо ўлдим эсу ҳушдин,
Вале, зинҳор йўқ илинжим ишқ дардининг шифосидан.

Манам банда бордир хато, қутулмоқлик чин муддао,
Не тонг, алар бўлур адо маърифатнинг зиёсидан.

Ҳама шайх ҳам масиҳнафас, ризо истаб боргим келмас,
Ўзгаси ҳеч даркор эмас улуғ пирнинг ризосидан.

Сирожиддин, гар бенаво ўтсанг оҳинг тинмас асло,
Фано умринг бўлур бақо асл ҳикмат садосидан.*

📚Сирожиддин РАУФ. “Мен бир фуқаро!..” китобидан.

@SirojiddinRauf