يا أهل الدار شخبار ظلع الزهره
بالتسبيحات دمعات سالت حمره
من صلت سمعينه ... ونات وهل جينه
يا أهل الدار
............
انا جبرائيل و الاملاك كلها
جينه نتطمن على الدار وأهلها
شلونه وضع ام الحسن نسأل بعلها
وعلي كلي لا تزيد اوجاعي خلها

وضع ام حسين مو زين كال وصحنه
يا فاطم اه ويلاه اشما سبحنه
بهل منزل سمعينه ... ونات وهل جينه
يا أهل الدار
........................
وماي نهر الكوثر بهاي المسيه
لونه فجأه اتغير احمر شل قضيه
وحين سألينه العلي شفنه الرزيه
شفنا ذاك الي سطر عين الزجيه

منبع هل نور مسطور بجف مأجوره
مو بس دمعات وآيات طاحت سورة
من طاحت سمعينه … ونات وهل جينه
يا أهل الدار
……………………
بالقنوت امنندعت بأن الي بيهه
امنل سياط امورمات اثنين اديهه
وحزنت الجنه وحملت العرش ليهه
اشما دعت اه ظلعي تطلع وي حجيهه

اشما كالت اه والله إنون وياهه
امنل نفس تلوع لظلوع صعب ادواهه
من قنتت سمعينه ... ونات وهل جينه
يا أهل الدار
…………………..
سجدة وبان الزراك الي بوجنها
وبجن حتى الحور لمن صعد ونها
ولطمن اعله اوجوهن من شاهدنها
والجحيم استعر من ورم جفنها

ملك النيران غضبان من الجاني
ورتبله مكان لفلان هوَ والثاني
من سجدة سمعينه … ونات وهل جينه
يا أهل الدار
………………….
يعينك الله يا علي بهاي المصيبه
صعبه ندري الواحد يفارك حبيبه
روحك بلا فاطمة تصبح غريبه
وشيطيب الجرح من تدفن طبيبه

باجر بس نوح ومجروح تكضي اسنينك
ودمعك مسفوح وتروح نومت عينك
من كلبك سمعينه … ونات وهل جينه
يا أهل الدار
………………….
خادم الزهراء ع علي عبود الغنامي

عظم الله لنا ولكم الأجر

اوصيتي الك كبل الهجر …  ياعلي  سلاحك  صبر 
لو شفت خد منسطر  …  للزجيه
…………… .. . ..
ياعلي  لاتسل  سيفك  حتى  لو  طبو  الدار 
وحتى لو عصرو يحيدر فاطمه اباب وجدار
وراحو  يكيدون   جفك   وبحمايل  ذو الفقار
وانته  ياحبل  اليكيدك  لون  منطيك   القرار 

لون كيدوك بحبل  …  لجل دين الله احتمل
وحتى لو رد النذل …  للزجيه 
………………………..
لون حركو باب دارك  لون شتموهه البتول 
لا تظل مذهول منهم كلشي يطلع من هذول 
وشخص رايح يحجي عني وانا اجل واكرم رسول 
من اكول انطوني اكتب النبي  يهجر يكول 

من هذول اهل الغدر …  تنظلم  راح اشكثر 
وظلع عمداً ينكسر … للزجيه 
………………………..
الأمه من بعدي  تظلمك ياعلي  الا  القليل 
وينغصب حقك يحيدر ويتحرف كل دليل 
ورايح اتشوف الوديعه تنسطر والدم يسل 
لكن  اصبر عالتشوفه الصبر لله  جميل 

أمر من رب السمه  … صبر ياحامي الحمه
وأمتي تصبح  ظالمه … للزجيه 
………………………….
اعليكم اتظيك الوسيعه ياعلي لمن اروح 
ابكثر ما جنت انا احبكم بيكم اتصيرالجروح 
وكلها ترتد ياوصيي وبحقدها الكم تبوح 
وحتى بتي اعليه  راحو ما يخلوها تنوح

كلها  ترتد امتي … وتمشي عكس اوصيتي 
ومايراعو امحبتي  … للزجيه 
………………………….
كلها ظدك راح توكف ياعلي أصاحب الحقد 
من غدا تبدي المصايب وانته من هسه استعد 
راح  تفكد  اعز  ناسك  من  بعد  هذا  الفكد
وحين تحفر لحدي  بيدك  للوديعه احفر  لحد

كلها ضدك تنجمع … وانته كلبك منفجع 
وصوت نوحك يرتفع …  للزجيه 
………………………………
الخادم علي عبود  الغنامي

شوط كربلائي

زينب ويا ابو الاكبر شلون اموادع الليلة 
هذا اخر لقاء يحسين وكلمن راح يمشيله 
……………..
بس هل ليله خويه وياي باجر ما اشوفنك 
ودري بلا دفن يحسين راح امشي واعوفنك
من صدرك يبو السجاد عدي اوصيه اشمنك 
كرب خل اوفي الدين تكله ودمعها اتسيله 
………………..
 من صدره تشم حسين وتنده يمه يالزهره 
هذا الدين رد الدين واعرف انتي منتظره
قبلته بمجان البيه يطبرونه اثنعش يطبره
وتكله اوصيت امك هاي وحسين انهدم حيله 
……………………..
يخويه زدتي الأحزان والاوجاع زدتيها 
من ناديتي يا زهراء  والأمنه  ذكرتيها 
اذكرت ذاك الزمان بيوم ازغار ونلعب اعليها 
ونتعب بالعب ونام  واتغطينه بالشيله 
…………………..
باجر منهو الي يغطيك ومنهو منل ثرا يشيلك 
ماكو أم  يبو السجاد  لا عودك  اليتجيلك 
و يمنعوني خاف اعداك اذا جيت ارد افييلك 
يمفييلي  ذاك اليوم وبحسرات تحجيله
…………………….
ويكللها يزينب هذا اليوم الصرتي من أجله 
وغيرج ماكو بالنسوان هل موقف مره تحمله 
باجر فوك صدري هناه الشمر رايح يحط رجله 
وزينب سمعت الأحداث صاحت خويه واويله 
………………..
وكالتله الرجس معقول يسحك صدرك الطاهر 
عسى شوفي انطفى ولا شوف يابن امي صبح باجر 
شعده العاشر امن آوجاع خويه شضاملي العاشر 
وكاللها الخيول هنآك بسنابك جسمي اتشيله 
…………………..
تسحك جسمي خويه الخيل وانتن بالعرا تطلعن 
وصوت اضلوعي من الدوس كلجن رايح تسمعن 
ورأسي اعله الرمح ينشال واذا شفتنه  تنفجعن 
ومن سكنه تحاجي الراس العدا يمنعوهه تشكيله 
………………
يحسين السوالف هاي نبي وما ظنه يحملها 
شلون أكدر لهاذ الضيم واحمل هالشدد كلها 
تريد اتحمل الي  يصير  و الثوره  اكملها
خل ايدك على الدلال خويه ويصمد ادعيله 
……………………
الخادم علي عبود الغنامي 

اعدات النشر بسبب أخطاء املائيه إلى بعض القصائد

يمته مشايه انتعنه … وللبقيع نروح كلنه
والمواكب مر يزاير تهتف النه
…………..
تظهر ويصبح حقيقه البل احلام انشوفه
الغرقد بأيدك تشيده ونمشي كلنا انطوفه 
والفته بهدم المراقد والحسن منعوفه 
انطلعه من قصره ونجيبه مكيدات اجفوفه

وانته التطلع الظالم  … الكسر ظلع امك يقائم
وحنا غير الثار يا مهدينه شلنه
…………….
شيعتك مولاي نطلع كلنا الك مشايه 
والف مبروك النا جيتك نكتب بكل الرايه 
وتملي الصحراء مواكب الكم الوفايه 
وبالبقيع نسوي مجلس للحسين اقرايه 

وانته التقيم المراسم … وللحسن نقرا اعله جاسم 
يمته يتحقق حلمنا يا املنه
……………..
يمته يتحقق حلمنا والبقيع انزوره
ونلكا گبر الحسن شامخ والتضد مقهوره 
والمضيف بصف ضريحه وعامر بمأثوره
والدلال تفور ترجع والسفر منشوره 

وانته تتلكانه باجر … اهلاً اتفضل يزاير 
يمته وبصحن الحسن تجمع شملنه
………………
والوسائل كلها تنقل هل خبر وتذيعه
بالبقيع منل اليحبه المهدي ياخذ بيعه
وكلها خلفك من تصلي مو فقط بس شيعه 
وفدك يرجع خيرها الكم تأمر بتوزيعه

لبفدك حصت الفقره … وبثواب امي الزهره
ولعنة الله اعلى السلبها وياك گلنه
……………… 
وتنملي قسطاً وعدلاً لمن اتحل بيها 
وابنيت اهل الضلاله ويا الارض تمحيها 
والابيوت الاذنَ  ربك  تُرفع  اتعليها 
وتجي الگبر امك وكبته من ذهب تبنيها

وگبته راح اتصير جنهه … شمس تضوي الدنيا منهه 
وحنا من انطب تحتها يفك حزنه
……………….
خادم اهل البيت ع علي عبود الغنامي 

اذا جاءَ النصرُ والفتحُ البمين
يعني من ندخل بقيعك آمنين
ويالثار المذبوح انخط على الوانه … وبالبقيع احنه انطوف وانته ويانه
ادخلوها آمنين
……………….
هاي امنيت العشاك كون اتزور مولاهه
الحسن واعله ضريح اطوف ياهل لحظه محلاهه
وتروح الشيعه للسجاد وانته اتروح وياهه
ويم الكال اه يالشام اه يحسين نقراهه

نقرا اه يحسين ونمصابه وننوح
ومن ابو الباقر لبو الصادق نروح
انته أملنا مولاي وهذا رجوانه ... بالبقيع احنه انطوف وانته ويانه
ادخلوها آمنين
…………………..
ونكصد حظرة الباقر وكلنا انطب حدر فيه
ونقراله اعله هظم السوك والطبوهه مسيبه
ومنطول قرايه هناك نقرا بحظرته شويه
لأن حاظر وشاف الصار من أوله التاليه

شاف عماته اطلعن من الخيام
ورادن يسلمن لجن ماضل سلام
ولو نظل يمه انوح انهيج أحزانه … وبالبقيع احنه انطوف وانته ويانه
ادخلوها آمنين
…………………….
ونروح انوبه للصادق ونحجيله المأذياته
من حركوعليه الدار وركض طلعن ابنياته
وتّذكر بالطفوف شلون وسط النار عماته
وركظتهن ابين الكوم هيه المنهه وناته

اشما يغمض اعيونه نار وخيل شاف
وصوت سكنه اتصيح انه منل نار اخاف
وبلكن بهل دمعات انطفي نيرانه … وبالبقيع احنه انطوف وانته ويانه
ادخلوها آمنين
………………….
ونروح انوب ننعى حسين يم الفكده اذاهه
اعني ام الكمر عباس الما ناحت على اظناهه
ونقرا هناك يالميمون ونبدي بهل عزه وياهه
ويهل يثرب نصيح بصوت ما خاب الي يخناهه

ونادي مولاي بظريح ام البنين
يهل يثرب يالثارات الحسين
والطغا اعلينه اليوم ننهي طغيانه … وبالبقيع احنا نطوف وانته ويانه
ادخلوها آمنين
…………………….
واخر شي واهم مطلوب ولحظه الكل تتانيها
الامك فاطمه الزهراء مناره وكبه تبنيها
وتجيك الشيعه من كل صوب وزحف لمن تطب ليها
واسماء المدن مولاي بسمها الكل نسميها

والجوامع لمن العاشر يدور
وي حسينياتنا اتظل تقرا شور
واحنا ظعنه بفركاك يمته تلكانه … وبالبقيع احنه انطوف وانته ويانه
ادخلوها آمنين
………………………
خادم الامام الحسين ع علي عبود الغنامي

الماعنده ابو شلون من يلفي عيده 
يعايدمن هناه  ويقبل  ايده 
يشعر ولا بي شي حلو … عيد  المفاركله  ابو 
من يلفي عيده
…………..
بغير والد … الله شاهد … بلا عطر يبقى النزل
تعيش غربه … بدنيا صعبه … راح الي شيل الحمل 
اذا تفكد ابوك تضل ترا تعاني 
وتشعر وانته بين اهلك ويحيداني 
وتودع الفرحه وتكلها الفي يحزاني 
وتحس جنت بوطن صرت بوطن ثاني 

لو والدك شال تشيل المحنه 
وليلك ترا يصير ونه اعله ونه 
يا ناس غير الون شكو … عيد المفاركله ابو 
من يلفي عيده 
…………………
فت دليلي … وهدم حيلي … والدي من ارتحل 
وكتله تاني … زينب اني … والدمع أحمر نزل
صحت بويه علي ليش اكطعت بيه 
بعد منهو  اليجيني  وينشد اعليه 
ذليله بدون أبوهه اتعيش الابنيه 
البيت بلايا  ابو  ما بيه  حنيه 

بيت الي مابيه والد اشوفه
مكدر بالأحزان والهم يطوفه
وغير الحزن عنده منو … عيد المفاركله ابو 
من يلفي عيده 
……………….
سبل جفه … وصحت وسفه … جنها خلصت عشرتك 
الحسن يمي … وزاد همي  … من يون الونتك 
وصحت جنت امن اطب دارك اشمحلاها
بوجودك  والحنان يحوم  فوكاها
ومن تسمعني جنت تصيح يحماها
اجت زينب  يبو  فاضل تلكاها 

اتلكاني عباس بس ما سمعتك 
بزينب هلا تصيح رد اعله بنتك
يضل للحزن كلبه دلو … عيد المفاركله ابو 
من يلفي عيده 
……………………
الابو خيمه … ربي ديمه … اليمه ابوه خل يندعي 
يطيل عمره … بطول صبره … ولا يطول مدمعي
ترا كسرت لبو ما تجبر بسرعه 
الابو يحني الظهر واظلوعك السبعه 
اسألو الراح ابوه شوفو شني وضعه 
يضل شمعه ويعيش اشما نزل دمعه 

الما عنده ابو يعيش وايامه مره 
ومن يمشي معروف هم حاني ظهره 
هم وكدر مابيه صحو … عيد المفاركله ابو 
من يلفي عيده 
………………….
حسين اجاني … وكابلاني … وكلي خويه اتحضري 
اتلكي حزنج … وهيئي ونج … وعاليجيج اتصبري 
فكد عودج كسر لكن جرح بعده 
الحسن يا زينب بسم ينمرد جبده 
وانه قصتي امن اسولف حيلج اتهده 
والجف  اليكفلج   تنبتر  زنده 

وتحسر وصاح والله جبيره
تكله أشكو وكال تمشين أسيره 
 وغير لدمع ماله لهو … عيد المفاركله ابو 
من يلفي عيده 
…………………… 
خادم أمير المؤمنين علي ع  علي عبود الغنامي 

الليله مولد حجة الله المنتظر
الليله خل يغيب كلوله الكمر
يا هلا ومية هلا الكل خل تصيح
من نصف شعبان نبعث هل خبر
يا مهدي يامولاي
………………
الليله نبعث هل خبر للعالمين
نعلك اشموع ونطش الياسمين
وبالتهاني يعلى صوت العاشكين
مبارك بمولد سليل الطاهرين

والي ما يفرك بهل ليله خسر
الليله مولد حجة الله المنتظر
يا مهدي يامولاي
………………
يرتفع صوت الفرح من هل مكان
المولد الحب والتسامح والأمان
الليله فرحه وعمت بكل الأكوان
فرحه يعجز عن وصفها ابلغ اللسان

وما توصفها القصايد والصور
الليله مولد حجة الله المنتظر
يا مهدي يامولاي
………………
مولد النور الذي يهدي الأنام
الأسمه يجلي الجور وغل والظلام
ولو سأل سائل منو هذا الهمام
انكله مهدينه الامام ابن الامام

والي ميحبنا نكله اشبع قهر
الليله مولد حجة الله المنتظر
يا مهدي يامولاي
………………
مولد اليملي الأرض حب وسرور
ويهدم ابيده ابنيت اهل الفجور
صاحب الرايه العلى اهل البغي اتثور
القائم ابن الحسن مهدينه الغيور

والي مثله يلوك اله الحب والسهر
الليله مولد حجة الله المنتظر
يا مهدي يامولاي
………………..
الليله ماكو نوم افرحوا للصباح
مولد اليستاهل الحب والأفراح
وجن نداء من طيبه للعشاك صاح
انسو كل احزانكم وانسو الجراح

وخلي صوتك يوصل السيد البشر
الليله مولد حجة الله المنتظر
يا مهدي يا مولاي
……………………..
خادم صاحب الزمان عج علي عبود الغنامي