قصيده في رجوع السبايا

الله اعليك مر بينه يحادي البل
مر بحسين نشچيله الهظم والذل

ذل او هظم نشچيله او فرگه البين
دلّاها العليل او يهل دمع العين
يگلها الدار هاذي او ذاك گبر احسين
ذيـچ اگبور أُخوتچ والأصحاب الكل

كل الفخر بس اِلها او صبر ماصار
طبّت كربله والگلب يجدح نار
تهجي الدار وين أهلچ غدو يادار
دلّيـنـي ابيا وادي ابيا مـنـزل

ابيا منزل ابيا وادي غدو عنّـچ
خنتي الضيف ما هاذ الرجه منّچ
عن احسين عن عبّاس أنشدنّچ
يو عن علي اوجاسم والعيون اتهل

تهل اعيونها او صاحت يبواليمّه
هوت مغشي عليها الگبره اتشمّه
يا صل المرابي اليكتل ابسمّه
چيف العدو يعدي المچمنك ياصل

ياصل اليصلها او للجبيل ايصيب
يا ظل العشيره او للكلافه اهديب
يا گصور المشبل والمشبله ابشيب
چيف اتكر ثعالبها عله المشبل

يلمشبل هظم هظمي هظم كلّي
ياعيني دمع من دم بعد هلّي
يا سِلّم اويا سم او سگم سلّي
چيف اسلمت ياسم ياسگم ياسل

ياسـل ياصلـيل اتلگّه العـيله
چلثوم او رباب او سكنه او ليله
يا منها اويا وادي اليكت سيله
يامگصد اويا مرباع للممحل

ياروض المحل عزمي البيكم قل
ياتاج الرياسه المنكم اتـفصّـل
ياميمر اويا مر او شري او حنضل
برياگ الخصم والخاصمك منچل

يلچايد خصيمك روحي أفديلك
يبن أُمّي شگلّك شفت شحچيلك
مهظومات مظلومات نشچيلك
خواتك بالسبي من منزل المنزل

من منزل المنزل ما نشيل الراس
چي ينوخذ غلبك وانته أبوالنوماس
تعال او شوف من شافت گبر عبّاس
مرّه اتگوم مرّه توگع او تعول

معوله اشحالها والجيد يتلوّه
تگلّه انصاف منّك هاي المروّه
ياعبّاس ما هاذي صفت خوّه
واليطّي عهد يوفي يبوفاضل

يبوفاضل چفاله اشلون تنساها
ياعبّاس زينـب خاب رجـواها
ياســردال عايـلـتك تـلگّاها
يا مهوال يلعند اللقـه مِهـول

يلمهول عجب دمكم يروح اضياع يامطوس اويا ملبس اويا روّاع
ياشم الرواسي المشرف اعله الگاع
چي ظَمَّتك ياشَم ياجبل يذبُل

يذبُل ياثجيل الوزن ذروه اوچن
كل عزمي يبوفاضل اوخاب الظن
انته الما يطخ راسك ولا تذعن
هان اعليك نهب العز اونهب الحِل

نهب الحِل اوحلي اوحلل مسلوبات
شفنه او غيرهن كلفات مختلفات
مـسـبيّات للكـوفه او للـشامات
او رچبتنه عله الهزّل وهي ابلا ظل

لا ظل او علينه أعظم مصيبتنه
من فتنه عسى للشام لا فتنه
دگ اطبول واتـغنّي تـلگّـتنه
كل جمهور نتعدّه او عليه نجبل

نجـبل والـغـنه والـدگ تلگّانه
واليطّي العهد يوفي العهد شانه
احنه ابّين ثكله اوبين ولهانه
وأهل الشام فرحانه النسه اتهلهل

كلها امهلهله ماگول ناس اوناس
ياعبّاس بيها ايزيد شارب چاس
ياعبّاس حط الطشت بيه الراس
هاذ الباس والهظم الذي يكتل

والهظمه من أصل يثرب ابيا شوفه
والينشد شگول امگطّعه اچفوفه
عندي اعيال تدري اشلون مكلوفه
اشلون أصنع يبوفاضل او حملي انجل

_________________________

?المرحوم شيخ عبدالامير الفتلاوي
@alfatlavi

في رثاء السيده فاطمة الزهراء عليه السلام

يحامي الجار تتحمّل هظم ضدها
هجـوم الگـوم للـدار او تشاهدها

تشاهد نار شبّوها اعله باب الدار
ذلّه او عار اگـلّك وانـتـه الـكرّار
والزهره ابصدرها ينـبت البسمار
وانته الجندلت مرحب وبن ودها

ابن ودها صرعته اومذهب الأحزاب
اومرحب يوم جندلته اودحيت الباب
چي بالباب تندب فاطمه اولا ذاب
يامــنـدوب يـمّـك ما تــراددها

يامندوب سيّدة النسه والحور
تسمع صوتها اومنها الضلع مكسور
عندك سيف آيه شبه نفخ الصور
ليش ألهاك صبرك ماتناشدها

چي ماناشدتها اوخذت منّه حيف
چي ياگصوره او صابر يصل الصيف
چي تنگاد ياحيــدر اِبّـند السيف
وانته أبطال يوم الكون گايدها

گايد چم بطل ورديت مرحبها
ابوجودك والبتول الغصص تشربها
لوله اتشيل معصبها اودعت ربها
چان الآرض من حدها انفنه الحدها

من حدها لحدها انفنت انس اوجن
چي تصبر عله الذل ياعلي اوتذعن
يحيدر هاكثر صبرك تره المحسن سگط وتعالج الزهره اوتوسّدها

هاذ الثار ظل عار اوهله غيّاب
ماتسمع الندبه ابكل وكت وعتاب
ناسي الطف يبوصالح اويوم الباب
چيف اتنام والبيض ابمغامـدها

مدفونه ابمغامـدها اومصديه ازمان
او دمّ أهلك هَدر واحنه العليها أحزان
چتل احسين مروان اوبني سفيان
بالشامات زي عيد اوطرب عدها

عدهم عيد والشامت گضه أشما راد
وانته اشلون متهنّي ابشراب اوزاد
مـروان اوبنـي سـفيان وآل ازياد
بالمجلـس حـرايـركـم تـهـدّدها

تـهـدّدها العدو يهجر ابعالي حس
مع ديوان أُميّـه للسبع يخلس
هيّـن من مثل زينب تطب مجلس
مغضي اوهالهظيمه اشلون زاهدها

?المرحوم شيخ عبدالامير الفتلاوي
@alfatlavi

في مسير الشام

صدّت للغري الميمر نحلها
تگلّه فزعتك هاذه محلها
_____________________________
يبويه اتگول زينب لو مشت خاف
يبويه طولها بالليل ينشاف
يبويه اميسّره هاذ امن الإنصاف
او مجالس كل بني أُميّـه تصلها
_____________________________
يبويه ياهظم طبّت الكوفه
يبويه اشلون كل مجلس نطوفه
يزيد ايشوفنه اشلون اونشوفه
يبويه اشلون هالهظمه انحملها
_____________________________
تغيث النادبك ميمر يـسامـي
لكل البلبحر والـبر تحامــي
الحرم شلها اوشلي اوشلهم ايتامي
مهي بحماك يامندوب شلها
__________________________
جا مرد النخاك انته و حضرته
وهو باقصه الدير بويه و نصرته
ابسيفك من عدو كافر اظهرته
او بناتك باليسر ماتظهر الها
__________________________
اصوّت ياعلي والصوت وافاك
أذبّن معصبي كل ساع وأنخاك
أذبها نادبك لو گال بحماك
تگلّه النادبك مأمون خلها
__________________________
الدفن سلمان تحضر بالمداين
او نخلّي هالچنت بالطف رهاين
تعدّت محنتي كل المحاين
گلبها اولا بعد يصدر مثلها
__________________________
يبويه ايهون الك للشام ماشين
اوظل احسين ماتگعديبو احسين
يبويه العايله أيتام او نساوين
يبويه اوي الغرب من يرحم الها
__________________________
يبويه العابد السجّاد بالقيد
يبويه امچتّف و للشام البعيد
يبويه من تشوفه عمته اتهيد
يبويه من تگع من يرچّب الها
__________________________
تندب ياهلي الحلوين مُـرّين
تندب ياهلي وهلي بعيدين
تندب ياهلي وهلي بعد وين
تندب ياهلي اويا بعد أهلها
__________________________
صاحن ياهلي النسوان كلهن
صاحن ياهلي اويا بعد أهلهن
الحادي طوّح اوگوطرت بلهن
عله حنهن تحن و بچت بلها
__________________________
كل الآه والـويـلـي عـليـهـن
غربه والغـرب غرّبـت بيـهـن
مدري عين زينب تصد ليهن
مدري يم علي مدري الجملها
__________________________
ابكل أقطارها ومصار والبيد
طافو بيهن الطيبات شتفيد
نوح الطير عدها أطوار تغريد
حمام الدوح ما ناوح مثلها
__________________________
كل ما تجبل اعله ابلاد معلوم
يودّون الهلـه لازم اومـلـزوم
تطب ليكم سبايه الخارجي اليوم
تلگّوها ابطرب عدكم محلها
__________________________
نزلو گاع عيب ابجدم تنداس
شبه الجير يغلي اشلون ينگاس
الفخرصبرالعليل امچشّف الراس
ابونينه الصخرة الصـمّه يفـلها
__________________________
منـها تـسـتظل ابـظلّة النـوگ
منها من يتيم ابحبل مشبوگ
يراوح بالجدم ويلوج ويفوگ
اومنها من صريم الشجر ظلها
__________________________
العصر من رَكّبو جملة الـعيله
اجـه للـراس راعـيه يشـيـله
يصد لن حملته صارت ثجيله
نده والتـمّت الحـرّاس كلـها
__________________________
اجو ليه أربعين الزوم بيهم
اوخطّو بالجنايه كل اديهم
ثبت والأمر هاذ أشكل اعليهم
گالو للعليل اشعـندك الـها
__________________________
صد الراس أبوه اوعرف معناه
عله تالي الظعينه ايشوف منواه
گال اتـفگّدو اعـياله اويتاماه
فگدو لن يتيمه اهناك ولـها
__________________________
جابوها الحرس گوّه الظعنها
يتيمه من بنات احسين لنها
تصيح اويلعب السوط ابمتنها
يبويه ويه من يـرحم جـهلها
__________________________
?المرحوم شيخ عبدالامير الفتلاوي
قناة الشاعر المرحوم شيخ عبدالامير الفتلاوي

@alfatlavi

نعي في العباس عليه السلام

يجيش الكتيبه انهض يجيدوم
يليث الوغه ياصل الحزوم
يضنوة علي الشاعتلك اعلوم
ضمّك ذخر رادك الهليوم
شنهي اوصيّتك اطّوك معلوم
وانه اختك عزيزه الغاليه السوم
__________________________

?المرحوم شيخ عبدالامير الفتلاوي
قناة الشاعر المرحوم شيخ عبدالامير الفتلاوي
@alfatlavi

نعي في العباس عليه السلام

اليوم أهل كوفه تهدم
والجيش والعسكر تلملم
اوگامت رواياها تجسم
ومرادها فرهود الخيم
تتنومس اوبينه اتغَنَم
دنهض يشيّال العلم
ابن والدي البيه ينجلي الهم
خوّاض بحر الموت لازم
بيد العدو ترضه انتسلّم
يحامي الظعينه يا موزّم
__________________________

?المرحوم شيخ عبدالامير الفتلاوي
قناة الشاعر المرحوم شيخ عبدالامير الفتلاوي
@alfatlavi

نعي في العباس عليه السلام

علينه اگبلت خيل اوروايه
او لخيامنه اتعنّت اعنايه
ورجالنه نومـه ضـحايه
وأطفالنه كلـها ضـمايه
والعلگمي ملزوم مايه
دنهض يمن بيك الحمايه
ابن والدي البيك الكفايه
البالسيف مسجيها المنايه
__________________________

?المرحوم شيخ عبدالامير الفتلاوي
قناة الشاعر المرحوم شيخ عبدالامير الفتلاوي
@alfatlavi

نعي في العباس عليه السلام

يبن والدي قلّت الحيله
جليلين والجيمه ثجيله
يزيد احتوت زلمه و خيله
اسم العرب من كل جبيله
او كل واحد ابگلبه غليله
ثجيل الحمل وهله تشيله
يضنوة علي حامي دخيله
يرضيك لن زينب ذليله
__________________________
?المرحوم شيخ عبدالامير الفتلاوي
قناة الشاعر المرحوم شيخ عبدالامير الفتلاوي
@alfatlavi

نعي عن لسان السيده أُمّ البنين

يلوالها اعليمن تنوحين
تگول البچه والنوح لحسين
البيه الكفايه للسلف عين
احنه أُمّهات أولاد حيّين
او عن نوح ابنها فاطمه وين
الها العزه واحنه المعزّين
انه الفاجده لثنين واثنين
محاريب خمسه تمدكل حين
عليهن ترش ابدمعة العين
تمحي أربعة منهم بالإيدين
والخامس اتخلّيه لحسين
__________________________

?المرحوم شيخ عبدالامير الفتلاوي
قناة الشاعر المرحوم شيخ عبدالامير الفتلاوي

@alfatlavi