كوم يا عباس انه زينب تره
امدلله جنت وصفيت اميسره

كوم يا كافالي زينب باليسر
واليتامه شما بجت جف تنسطر
ويضرب ابسوطه الشمر من كل كتر
وانت يا صانديد جثه اموذره

راسك ابجف الحقود اعله الرمح
اشما يزجرونه الك ينزف جرح
آنه كبلك خويه يا ريت انذبح
ولا اشوفن جثتك متطبره

يالجنت تزعل إذا مسني الهوه
بجمرة الخيمه تره جفي انجوه
والشمر يحدي يشيل اللوه
والعايله بعدك صفت متحيره

يابو فاضل فدوه رد عوف النهر
بشوفتك خل يرتوي خويه النظر
ريت السهم صوبني كبلك يالكمر
ريت عميه ولا اشوفك عالثره

خويه شحجيلك بعد عاللي سده
جثت حسينك بقت متوسده
وسحكو اضلوعه تره بخيل العده
امن الكفه بسيفه الشمر حز منحره

خويه من عدهم ابد محد سلم
حتى عبد الله الطفل صابه السهم
عاليتامه والنسه حركو خيم
العايله بالصحره خويه امطشره

باقر الافرجي

للقاسم عليه السلام

يفدوه الجماله
بدر وبكماله
اعله طوله وخياله.....سلامات

هذا ياهو للي طلع...بدر بالخيمه سطع
كلشي بالدنيا ركع...الكشخته ولطوله

الشمس صايبها الخجل....ابطلعته كلشي انذهل
بـدر وجـها وكتـمل....كلها بي مذهوله

سل سيفه وللحومه جاسم هالنزل
جن حيدر صولاته وعليهم حمل
والعسكر بفنونه وحملاته انذهل

جميل ابقتاله
نجم ويتلاله
اعله طوله وخياله.....سلامات

هيبه ما بين الزلم...وجهه يسطع جن نجم
وامه نادت والنعم....امن الحسن ووليده

كلشي لجله مستعد....جنه حيدر من يهد
اليوصله لا مايرد... إله راسه ابأيده

طبلهم يم سيفه هالموت استقر
ودكلهم بالحومه ناقوس الخطر
اشجعهم كص راسه وداه السقر

يكلشي حلاله
وجميل ابخصاله
اعله طوله وخياله.....سلامات

هله بتربات الحسن...حيد متهمه المحن
حرب عالباطل علن....جنه سورة زلزله

طلع زلزلها الارض...شيخ وبكيفه الفرض
الزلم كضتها ركض....يفر بيهم كربله

متحزم ومسيطر هو اعله الامر
ما ردن لا والله إلا ومنتصر
والعمي وعيونه منذور العمر

والعمر حلاله
ناذره العياله
اعله طوله وخياله.....سلامات

طلع بعيونه الزعل...الجيش مرعوب وسأل
هذا جاسم لو زحل...نزل لينه وغاضب

الجيش شافه ونبهر... هذا جاسم لو كمر
اليوم ماكو اي مفر...الحسن جنه يحارب

ما واحد من عدهم قاوم ظربته
وتصدر بالساحه وتمشي چلمته
يتبختر عالعسكر هيبه ابمشيته

يمحله فعاله
يحسن الدلاله
اعله طوله وخياله.....سلامات

صاح والعكسر جفل...اليوم اسويكم وصل
ابزود جدي الفحل...عزم حيدر بيه

عمي فدوه الناظره...العرس عفته الخاطره
وروحي لجله حاظره...المهم يرضه اعليه

فدوه العمي اسنيني وتباها ابهايه
يستاهل روحي المشه الكون ابرايه
آنه اول عريس الحنه امن دمايه

يأكبر رساله
ولدهر بجاله
اعله طوله وخياله.....سلامات

تمت باقر الافرجي

الخدمة

خدمته علي نعمه خدمته
رحمته تضل خيمه رحمته
==================
احنه ابكل سنه وعام
انجدد عهد خدام
نرفع راية حسين
ونذكر حرك الخيام
موسم خدمه ونشد
بسم الزهره الحزام
يرتب هذا مجلس
ذاك ايعين لطام

عشكته حرف اسمه عشكته
رحمته تضل خيمه رحمته
==================
امحرم هل اعلينه
خل انحظر ادينه
وكل الوكت لحسين
بالدنيا اشعلينه
بس حسين الاول
يستاهل بجينه
يامحله المجالس
بسمه لو حجينه

نظرته مثل نسمه نظرته
رحمته تضل خيمه رحمته
==================
محرم لينه قادم
خادم وصه خادم
لا تنسه المجالس
ابقه بيها هايم
نظل ابدرب الحسين
حزن نحيي المئاتم
ابد ما ننسه عاشور
لحد طلعة القائم

طلعته مثل نجمه طلعته
رحمته تضل خيمه رحمته
==================
يخادم هذا شهره
ثوب الخدمه حظره
ونصبها العزيه
بكلبك خلي جمره
هنياله التوفق
وحصل منه نظره
دك حيل اعله صدرك
وذكر كطع نحره

نذرته العمر يمه نذرته
رحمته تضل خيمه رحمته
==================
يخادم صفي كلبك
وكله حسين احبك
سلمٌ لمن سالم
وضد العلن حربك
بس حسين يسوه
حزنك تره وتعبك
صيح ابحسره مولاي
خليني اعله ادربك

حظرته الكلب حلمه حظرته
رحمته تضل خيمه رحمته
==================
اسمع لايمي زين
ليش الطم وهل عين
صرت آنه اجمل انسان
عاش ابخير الحسين
دربه اشلون اعوفه
وهو بركبتي دين
ضحه كلشي لله
واحد ماله اثنين

عظمته تضل قمه عظمته
رحمته تضل خيمه رحمته
==================
باقر الافرجي

شور

يمحبوبي اشكبر حظي وعشكتك
بدمع حبي عله ارموشي رسمتك
عليك الزهره خليني بخدمتك

يا محله طعم حبك
عيشني بتعب دربك
يالمحلي سنيني

بيدك سلمت روحي
وتحله بسمك اجروحي
حبك هو ديني

حسين

كلبي صرت مفتاحه
وتعبك احس بي راحه
خليني دوم ابابك

يمك اهشم بصدري
اتمنه يخلص عمري
بسجدة عشك بعتابك

حسين آه حسين آه

خليني اعيشن دوم وياك ابجرح
عيشني لجمة راسك الفوك الرمح
وشوفة اخيك عالنهر من منطرح

ولحظة حركة خيامك
وبالبر فرت ايتامك
من الخيل هجت

روحي بجمره الجمها
جثتك محد ايلمها
ابلايه افياي ظلت

حسين

ذوقني جمر احزانك
من باليسر احبابك
وكل الخيم مستعره

لمصابك افدي اعيوني
ومن عابس آنه اجنوني
ومنك اريد النظره

حسين آه حسين آه

ظايع آنه وخدمتك هيه الوطن
تحت خيمة مجلسك يحله السكن
يا آماني من متاهات الزمن

بدمعات وخجل جيتك
خليني اعله تربيتك
وين انطي الوجه وين

كل عمري مشه بخيرك
لا تتركني يم غيرك
ادخيلك سيدي حسين

حسين

ارزقني منك فطره
ابجي بصدك وبحسره
يالما ترد الفقره

متهمني هاي الوادم
بس كون اصيرن خادم
وعليك انوح ابعبره

حسين آه حسين آه

كلبي طير ابحظرتك مكسور جنحه
كون دوم ابمجلسك ملجوم جرحه
يمن بالطف ظهرة ابحله للوحه

لوحة حب الآهيه
بدم وخيمه مرويه
كلشي الربك انطيت

كال حسين كتله ابشر
هاك اطفالي والخنصر
وبكل غالي ضحيت

حسين

يالماكو مثلك محبوب
يم بابه متضل اذنوب
فدوه الك ايامي

حتى الهوه يحتاچك
شد روحي يم شباچك
يالخدمتك احلامي

حسين آه حسين آه

سيدي لجلك فقط تحله المدامع
دوم خليني اعيشن بالمواجع
يمن طاري اسمك ايطهر المسامع

يامحله الحچي بأسمك
لا تبعدني من يمك
جيت ابحاجتي هاي

يالبس انته تفهمني
خليني اعله كد حزني
لترجعني مولاي

حسين

عيشني بس بالدمعة
ذوبني مثل الشمعة
يم خيمتك خليني

يالما فهمنه سرك
تحييني شمة كبرك
يالمستحيل اتردني

حسين آه حسين آه

تمت والحمد لله

باقر الافرجي

اطلب حاجتي منك يبو اليمه
توفقني اعله دربك امشي والخدمة
====================
اجيتك سيدي واطلب طلب منك
لا تحرمني عطفك وبتعد عنك
بدموع الخجل بحساسي اكلمنك
ادري ما ترد واحد يبو الرحمه
====================
شلي ابدنيتي لو ما طعم حبك
يطشرني الوكت ويلمني بس دربك
رحمه اعله اليحبك نزلك ربك
ابسمه كلبي يشع حبك مثل نجمه
====================
اهيم ابعالم اجروحك وخط شعري
عله اجروح العطش شفتك نهر يجري
اول چلمتي بسمك بده عمري
الحمد لله اعله حبك يا ولي النعمه
====================
الوذن بيك لو جارت علي دنياي
يالبكل شده حاظر سيدي وياي
عجيبه شلون تعطش ياحياة الماي
يمن فوك العرش نور ارسم رسمه
====================
الوذ ابحظرتك لو جارت ايامي
اصيرن خادمك يا سيدي احلامي
يمن ابلا رضاتك ينفي اسلامي
مسلم ما اصيرن لو نفيت اسمه
====================
انه شلي ابحياتي وانته ما بيها
وعيني الما بجتلك الله يعميها
وروحي الما تهيم ابحبك افنيها
يمن بالساني اسمك احله كل چلمه
====================
تم باقر الافرجي

خادم خادم خادم...هنياله اليتسمه
خادم خادم خادم...كوم وشد الهمه
====================
اخدم بخلاص وهمه
الزهره اتحب هاي اللمه
وتتفاخر بيكم

الدمعه التنزل تحسبها
ودكت صدرك تكتبها
ولدي اتناديكم

البالمجلس وزع مايه
ولشايل بيده الرايه
الزهره اتحييكم

وهيه اتسجل بسمه...كوم وشد الهمه

عيش ويحسين ابروحك
وخل تنزف لجله اجروحك
وآه اعله امصابه

بالخدمه اثبت إيمانك
وذرف دمعه اويه احزانك
واسجد يم بابه

بس هو اليسوه انحبه
هنياله الباقي بدربه
اتسجل بكتابه

حب حسين النعمه...كوم وشد الهمه

شمحلات الحب بالفطره
ويستاهل ابن الزهره
اتضحيله اسنينك

لا تبخل هل دمعاتك
واسي حسين ابجمراتك
لا تخفي ونينك

اشمحلاتك لمن تحظر
لابس اسود تتحسر
وتبجي اعله حسينك

لحسين انطي الكلمه... كوم وشد الهمه

لا تملي الدنيا اعيونك
خادم لو ميسمونك
الدنيا ومفنيه

لتهمك كل هالوادم
لحسين اتسجل خادم
راعي الحنيه

هنياله اليخلص عمره
بالمجلس لو بالحظره
يا محله النيه

تحله ابذكره النسمه...كوم وشد الهمه

الدنيا وكل اللي بيها
بس حسيني محليها
شتفيد الوادم

حسين الواحد فوك الكل
منمل من عنده ولنچل
كلبك بي هايم

حسين اسمه ابداخل نبضك
وشكد مبخوت وحضك
تتسجل خادم

المجلس اكبر رحمه....كوم وشد الهمه

كوم الطم وهمل دمعه
حسين اليستاهل فزعه
ضحالك روحه

من تحظر هذا المأتم
وتذكر زينب تتألم
وتذكرها اجروحه

دوم اتذكر ايامه
وطفاله وحرك اخيامه
وجثته المطروحه

لجلك ضحه ابدمه...كوم وشد الهمه

تم باقر الافرجي

طبرو رأس القرآن...وهتز عرش الرحمان
من هول المصيبة
ولشيبه الخظيبة

هالليله جبرائيل...ناده بدموع اتسيل
طبرو تره القرآن...والزبر والإنجيل

دم السماء اتفور...حيدر علي مطبور
وهتزت الأكوان...ظلمة اعتدت عالنور

تنزف دمه الآيات...حيدر جريح ايبات
يمه اليتامه اتصيح...ترجع بالسلامات

تنزل أملاك اصفوف...تنحب عليك اطوف
والقلم ويه اللوح....دمع ابحزن مذروف

سورة نوح ولقمان...تنحب ويه الدخان
من هول المصيبة
ولشيبه الخظيبة

بلا ونه وبلا صوت...ينزف بقه اللاهوت
سيد العوالم طاح...جسمه صفه بتابوت

ناده العرش بالآه...طبرو ولي الله
جم نبي وجم مرسول...هالخبر قد آذاه

يا سيد الامكان...كلشي بده حزنان
لجلك يبو الحسنين...يبجي بقه الاذان

تبجي صلاة الليل...وفرض الفجر بالويل
يجبي كتاب الله...والعلم والتأويل

تنحب سورة فاطر...والصاد اويه الغافر
من هول المصيبة
ولشيبه الخظيبة

اعلن حداده الكون... والأنبياء يبجون
وي زينب الحوراء...قلب الدهر محزون

ايتامه حزنانين..يم بابه ملتمين
بعدك يبو الايتام...ننطي الوجه لاوين

حتى الإنس والجان...والعرش والاركان
بعدك يتامه انعيش...نادو يبو الاوطان

مسجدك والمحراب...نادو يداحي الباب
ايتامك احنه انصير...لو رحت يا ابو تراب

جم كوكب ينحب صار...ويندب بسم الكرار
من هول المصيبة
ولشيبه الخظيبة

خيبر الك تشهد...يا وارث محمد
ياسوة التوحيد...ما يشبهك احد

بالونه والحسرات...تبجيلك النجمات
ويه الحسن وحسين...حزنانه المجرات

نصبت عزه الافلاك...يابا الحسن تنعاك
سابع سمه تبجيك...بالعبره تتنخاك

يا مرعب الشجعان...يافارس الميدان
ابوقت الصلى طبروك...وهتزت الأركان

وجبرائيل الكبر...ابدمه اتخظب حيدر
من هول المصيبة
ولشيبه الخظيبة

بسيفك نصرت الدين...تشهد حرب صفين
بسيف الشرك والجور...راسك صفه نصين

تبجي السمه السبعه...ضلت الك تنعه
والفلك من ايدور...ابيا علي والدمعه

حيدر وكع مجروح...ينعه القلم واللوح
كلشي بده حزنان...يبجي وعليك ينوح

يم بابك الايتام...ملتمه يالظرغام
بالحسره والآهات..والدمعة والآلام

يم بابك منتظره...ايتامك ولفقره
من هول المصيبة
ولشيبه الخظيبة

تمت باقر الافرجي

٢شهر رمضان
12/3

يالتمشي بدرب العشك...حب حيدر هو الصدك
اليرضي الله

يالتبحث عن حبك...بكل خطوه افهم دربك
ما تلكاه بس حيدر هو الداخل كلبك

اشويه اصفن وتأمل..تلكاه هو الأول
عالفطره بوصافه تلكاه هو الاجمل

حاظر هو وماضي...بيوم المحشر قاضي
لا تهتم وبحبه ربك عنك راضي

اسمه يداوي المجروح...نسمه ايمر اعله الروح
الما عنده صك حبه بالمحشر وين يروح

ثابت ضل اعله الوعد...لا تترك حيدر ابد
اليرضي الله

الكون بجفه يكلبه...انشقت لجله الكعبه
لا تحتار بس انخاه تنحل يمه الصعبه

من يمر طاري اسمه...نور ايضوي العتمه
يم بابه لو ينخاه ايفتح حتى الاعمه

بيده ايسير الافلاك...تمشي بأمره الاملاك
لا تنساه وبقه وياه بالمحشر ما ينساك

حيدر كاف التكوين...نتمسك بي كل حين
عالكرسي مكتوبه حيدر يعسوب الدين

اصل الحكمه وكل علم...والمات بحبه سلم
اليرضي الله

حيدر داحي البيبان... وناصر دين الرحمان
وبأسمه جم آية اتذكره بنص القرآن

ناذر سيفه الطه..وطه بي يتباها
جيوش الشر بذو الفقار هو اللي رداها

حيدر هو المبهم...طلسم وبنص طلسم
منعرفه واليعرف بس الله والخاتم

هو الآية الكبره...خسران اللي ينكره
والينه الماحبه يضل هناك ابحسره

تسطع من نوره الشمس...ايحبه الجن ويه الانس
اليرضي الله

عروة الله الوثقى...بحبه المؤمن يرقه
والجنه مشروطه بتوقيعه اعله الورقه

بأسمه اتسولف خيبر...عالكل هو اتصدر
ابطن الحوت يتنخاه يونس بأسمه وكبر

حيدر نازل نعمة...ومظهر هم للرحمة
يتوسل للباري تقرب آدم بسمه

هو الحجة اعله الناس...ويوكف يمه المقياس
من عطره يتعطر عطر العنبر والياس

حيدر باء البسلمه...الاول والتالي إله
اليرضي الله

كلشي ومنه اتعلم....قرآن ويتكلم
بكل الكون والموجود حيدر هو الاعلم

الله منزل علمه...الحيدر منطي الحكمه
ابلايه احجاب لا مكتوب لو راد الله يكلمه

من الهادي الصوره...نفس الطول ونوره
للمختار حيدر جان احزام يمثل دوره

حيدر هو القائد...التاريخ اعظم شاهد
منبايع بس هو وما نقبل اي اواحد

بالذر منطينه العهد...بس حبه النه السند
اليرضي الله

تم باقر الافرجي

22.2/204

لا تمشي ابطريق اعوج
ويكودك هوه اللذه
تفرح ابليس بس افهم عليك المهدي يتأذه
اشما تمشي ابطريق اعوج
سهم محسوبه الملذه

ترضاها اعله جرحه جن ملح تلتم
عكس عن من تصير اعله الجرح بلسم

بخلاقك الزينه
اكشخ قبل لا تكشخ ابملبس
مثل الشذره كون تعيش
وابلا شذره يصبح ميت المحبس

الدينا جن كهف مظلم
وتسمع بس صريخ اشباح
وانته اتريد بي ترتاح
بس ابكلبك اتخلي حب المنتظر مصباح

دنك راسك اتواضع ولا تشعر ابد بالذل
ابراسه يرفع السنبل اذا فارغ
عكس عن ذاك المحمل

اذا فتحت الك ذرعانها الدنيا
لا تنصت ابد الها
واذا تغريك صد وجهك
واحب العتره كللها

ابسجل المنتظر خليك
دومك طيب السمعه
وتبع بس طريق حسين
يعرف قيمة الدمعه
اتبع بس اليثمنوك
بعين الما عرفها
ترخص السلعه
وعمرك لا تهدره كل
وقت محسوب
وابد لتصير
مثل ذاك الاكبال الريح حاول يشعل الشمعه

وعمرك
لا اتخلصه
ابغير درب حسين
العمر مره
ابد لا ما يصير اثنين

اللهم عجل لوليك الفرج

باقر الافرجي

1.1.2024