Aziz hamkasblar, qadrli talabalar!

Barchangizni kirib kelayotgan 2025-yil bilan samimiy qutlayman!
Yakunlanayotgan 2024-yil Alisher Navoiy nomidagi Toshkent davlat oʻzbek tili va adabiyoti universiteti uchun sermahsul va esda qolarli bo‘ldi. Bu yil universitetimiz yuksak marralarni zabt etib, xalqaro miqyosdagi eʼtirof va milliy darajadagi yutuqlarga erishdi.

Universitetimiz ilk bor Times Higher Education (THE) Impact reytingida gender notengligiga barham berish yo‘nalishida dunyoning eng kuchli 10 ta universiteti qatoridan joy oldi. Bu nafaqat universitetimiz, balki mamlakatimiz uchun ham ulkan g‘urur bagʻishlaydi. Ushbu yutuq jamiyatimizda tenglik va adolatni targ‘ib etishga qaratilgan saʼy-harakatlarimizning amaliy ifodasidir.
Yil davomida bizning fidoyi talabalarimiz o‘z mehnatlari va izlanishlari bilan ham yuksak natijalarga erishdilar. Jumladan, yana besh nafar talabamiz Prezident va boshqa nufuzli davlat stipendiyalari sovrindorlari bo‘lishga muyassar bo‘ldilar. Bu esa yoshlarimizning salohiyati va kelajakda ulkan muvaffaqiyatlarga erishishiga bo‘lgan ishonchimizni yanada oshiradi.
Ta’lim va ilm-fan sohasidagi faoliyatimizda ham samarali ishlar amalga oshirildi. Universitetimizda taʼlim yo‘nalishlari va magistratura mutaxassisliklari soni ortib, pedagogik jamoamizning ilmiy salohiyati mustahkamlanishda davom etmoqda. “Oʻzbek maktabi” loyihasi doirasida xorijliklarga oʻzbek tili va madaniyatini o‘rgatish bo‘yicha olib borilayotgan ishlar xalqaro miqyosda o‘z eʼtirofini topmoqda. Bu yil “Xorijliklar uchun oʻzbek tili” bo‘yicha yangi darsliklarining yangi nashrlari tayyorlanib, aprobatsiyadan oʻtkazildi.
Prezidentimiz Shavkat Mirziyoyev rahnamoligida ta’lim tizimida amalga oshirilayotgan islohotlarda faol ishtirok etish biz uchun nafaqat sharaf, balki masʼuliyatdir. Davlatimiz rahbari tomonidan ilgari surilgan g‘oyalar va vazifalar yangi yilda oldimizga yanada ulkan maqsadlar qo‘yishni talab etadi.
Ishonchim komilki, 2025-yilda ham universitetimiz xalqaro va milliy miqyosda o‘z mavqeini mustahkamlab, yuksak marralarni zabt etishda davom etadi. Barcha yutuqlarimiz – fidoyi jamoamiz, mehnatsevar va intiluvchan talabalarimizning mehnat samarasidir.
Yangi yil sizga va oilalaringizga sihat-salomatlik, baxt, omad va tinchlik olib kelsin. Kelayotgan yil barchamiz uchun barakali, sermazmun va yutuqlarga boy bo‘lsin!

Hurmat bilan,
Shuhrat Sirojiddinov
Alisher Navoiy nomidagi Toshkent davlat oʻzbek tili va adabiyoti universiteti rektori, filologiya fanlari doktori, akademik.

Hurmatli hamkasblar, aziz talabalar!Barchangizni 21-oktabr - Oʻzbek tili kuni bilan chin qalbimdan muborakbod etaman. Tilimizning sofligi, boyligi va borligi millatimizning bebaho milliy iftixoridir. Tarixga nazar tashlasak, tilimizda xalqimizning asrlar osha yashab kelayotgan qadriyatlari, urf-odatlari va ruhiyati oʻz ifodasini topganini koʻramiz.  Yangi Oʻzbekiston qurilishida amalga  oshirayotgan islohotlarimizning asosiy yoʻnalishlaridan biri ona tilimizni rivojlantirishga qaratilgan. Hozirgi globallashuv davrida har bir millat oʻzligini saqlab qolishga, ajdodlari tomonidan qoldirilgan milliy qadriyatlarni, jumladan, ona tilini koʻz qorachigʻidek asrab-avaylashga va ularni keyingi avlodlarga munosib meros sifatida qoldirishga astoydil urinmoqda. Dunyoda oʻz maqsad va vazifasiga koʻra noyob boʻlgan Alisher Navoiy nomidagi Toshkent davlat oʻzbek tili va adabiyoti universitetining tashkil etilishi ham davlatimizning  shu yoʻnalishdagi ezgu amaliy ishlaridan biridir.
Universitetimiz oʻz strategik maqsadlari va missiyasiga sodiq  qolgan holda  mamlakatimiz va xorijda oʻzbek tili va adabiyotini oʻrganish va oʻrgatish, til va adabiyotimizning xalqaro miqyosdagi obroʻ-eʼtiborini oshirish, uni targʻib va tashviq qilish borasida muntazam rejali ishlarni amalga oshirib kelmoqda. Bu ishlarni davom ettirishda jamoamizga kuch-quvvat tilayman!
Bugungi bayram barchamizga muborak boʻlsin!
Shuhrat Sirojiddinov
Alisher Navoiy nomidagi ToshDOʻTAU rektori, akademik

Aziz hamkasblar,  zahmatkash ustozlar, ziyolilar!
Sizni umumxalq bayrami – O‘qituvchi va murabbiylar kuni bilan samimiy tabriklab, o‘zimning yuksak hurmat-ehtiromim va ezgu tilaklarimni izhor etishdan baxtiyorman. Universitetimizning har bir professor-o‘qituvchisi o‘z kasbining,  o‘z ilm sohasining yetuk mutaxassisi ekanligini O’zbekiston va jahonda qayd etayotgan ko‘rsatkichlarimiz dalillab turibdi.  Bularning barchasi sizning tinimsiz mehnatingiz,  izlanishlaringiz samarasidir.  Muhtaram Prezidentimizning kuni kecha o‘qituvchi va murabbiylar bilan bo‘lib o‘tgan uchrashuvida ko‘plab dolzarb masalalar muhokama qilindi. Yurtboshimiz ustoz va murabbiylarni maqom jihatdan mamlakatimizda eng oliy darajaga ko‘tarish davlat siyosati sifatida qaralashini alohida ta'kidlaganlari barchamizning shijoatimizga shijoat qo‘shdi. Shu boisdan barchamiz “Yangi O‘zbekiston – ma’rifiy jamiyat” degan olijanob g‘oya atrofida birlashib, jonajon O‘zbekistonimiz ravnaqi uchun hissa qo‘shmog‘imiz lozim.
Davlatimiz, jamiyatimiz Siz – Ustozlarning Vatanimiz taraqqiyotiga qo‘shayotgan katta hissangizni, mas’uliyatli faoliyatingizni yuksak baholaydi va qadrlaydi. Fursatdan foydalanib, Sizga sihat-salomatlik, oilangizga baxt-u saodat, ezgu ishlaringizda yangi muvaffaqiyatlar tilaymiz!
Barchangizga bayram muborak bo'lsin,  azizlar!

Shuhrat Sirojiddinov
Alisher Navoiy nomidagi ToshDO‘TAU rektori, akademik.

Ёшлар қалбида ватанпарварлик туйғусини кучайтиришда спортчи мураббийларимиз ва ҳарбийларимиз ҳам фаол бўлишлари зарурлиги таъкидланди.

Бугун замоннинг ўзи ҳар биримиздан она юрт ҳимоячиси, ватанпарвар бўлишни талаб этмоқда.

Бунда айниқса мард ва жасур сержант ва офицерлар, ҳарбий чақириққа тайёрлаш фани ўқитувчилари ўрнак бўлишлари керак.

Ҳозир мактабларда қарийб 10 минг нафар ана шундай ўқитувчилар фаолият кўрсатмоқда. Афсуски, уларнинг аксариятида ҳарбий соҳадаги замонавий билим ва кўникмалар, улар учун иш шароити талаб даражасида эмаслиги қайд этилди.

Энди мана шу ўқитувчилар Мудофаа вазири томонидан захирадаги ҳарбий хизматчилар таркиби орасидан тайинланиши белгиланди.

Facebook|Instagram|X