‏"ليت السنافي ليا صكت عليه الكروب ،
‏يلقى مثل مالقى موسى ف وادي طوى.

‏مقولة ان ماطاعك الوقت طيعه 
‏ماهي تطوعنا ولا حنا مطعين .

‏مافيه أجودي الا له اصحاب ولْه اعدا
‏تجيه العلوم سنود و تروح منتحيه

‏و أبو زيد لو بنته تمر العرب جردا
‏طبيعي تجي وتروح ماهيب مستحيه

‏قالوا وقف الترميز فالشعر قلت ، هدا
‏بقى كلمةٍ في تالي السطر منمحيه

‏أبو لحيةٍ سمحا وأبو لحيةٍ جردا
‏غدو في عجاجة واحدٍ مامعه لحيه.

القلوب البيض من صكّات بقعاء ماتغير
‏ما تجيب الا البياض الي تعودّ به لاهلها

‏لو خذلها الي كلامه زين ، وذراعه قصيّر
‏اعرف ان الي يعلم الغيب كله ماخذلها

‏حافظ المعروف يبلغ فيه معروف صغيّر
‏وناكر المعروف لو تمدله ، يمناك اكلها .

‏اعقد العزم لاضاقت عليك الحلول
‏يفتح الله عليك ويبدل الحال حال

‏ساعة الصبر تفتح محكمات القفول
‏وساعة الضيق تفرج والليالي طوال.

‏إن شئت غامر ترى بعض المغامر سداد
‏ الحاجه اللي تبي .. ماهي بجمـع وكسر

‏أضربّها عرض غيب ، وعاد الأقـدار عـاد
‏ مايقطـع الفـرجـه ، الا كل قلـبٍ جسِـر

‏والله كفيـلٍ على رزقـك .. ورزق العـبـاد
‏اللي لك بتاخذه ، واللي مايكتب عسِـر.

الّي سمع يونس وهو في بطن حوت
‏ما هو بناسيني وأنا أشمَّ الهواء.