شوط كربلائي الامام السجاد ع يروي لجده علي ع
—————
يجدي عمري كله اونين بديت اول مصيبه بنار
من خيمه اركض الخيمه أصيح دخيل حامي الجار

——————
اجيت اليوم اشكيلك ضلم الصار بالميدان
خيل اعله الغريب اتدوس صدره الشايل القرآن
مارحمو ابد بحسين راسه امهشم إبعمدان

اركض واجمع اعضامه
اصيحن تاهت ايتامه
عدونه الحقق احلامه

يكص براسه ويگلهم اشمرو شعدكم امن احجار
——————

اكلك حركو خيمنه تدري اشلون فرينه
اركض من لهيب النار واباوع طاحت سكينه
رجعت اسحبها وانه إعليل تعثرنه وتجوينه

حرنه بهايه محنتنه
نركض تجوي جمرتنه
هيمة هواي عطشتنه

تعبنه امن الركض والخيل ماكالو علينه اشصار _______
علي يا جدي احضرني يحاضر شدة الملهوف
نسوان الشرف ضلت تركض فازعة من الخوف
شفت زينب خدر الله اسيرة وراح منها الشوف

حگها الشافت اللوعه
سمعت طگت ظلوعه
الدمعه عليها ممنوعه

صفت كلما تصيح حسين عليها انظر فزع يندار
———————
صار گبالي منظر مر يجدي وعمري ماشفته
اختي رقية تتوسل تصيح الماي ماضگته
عساني ميت ولااشوف دمعها ينزل بسكته

بس عدها دمع ويسيل
شردت من صهيل الخيل
توگف مره مره تميل

رفعت ايد للكافل ما تدري بأدي گصار
——————
شحجيلك يجدي هواي طف حسين ماينگال
اذا اكلك على السبعين دمهم غرگ الچتال
عمي صاحب الغيره صار اعله الشريعه اوصال

كبرني المصاب ادهور
شيبني ظهر عاشور
كاع الله كلها انحور

واشكي الحاله ماتخلص دمعي بكربله مدرار
——————-
امـير سـتار الشبـلي

يلا يشيعة نكوم للصادق انصار
خل نرفع الرايات ونعظم الصار
———-
سادس امام اليوم ودعنه مهظوم
جامع علوم الكون تاليها مسموم
ذنب الجناه لحسين خلصها مالوم

شدو العزيمة اليوم واخلوها الاديار
————
ياشيعة جعفر طاح بدياره نيران
صار بمصابه اليوم للخيمة عنوان
مافزعو يطفون ولد الگبل چان

من احترگ صيوان عماته بالنار
———-
عالهامة هلو تراب خسفوها الاصدور
صادق علوم الدين يستاهل انحور
قامع سقيفة يموت جي حارب الجور

نصرة امام الدين واجب يالاحرار
————-
لارض البقيع انروح ونعلي رايات
بيها البناء مكتوب بأولها الابيات
كلمن يريد يزور يرفعها الاصوات

نبني البقيع نريد وصلوها الاخبار
————-
حتماً نزور بيوم والمهدي حاضر
يوكف يحي بصوت اهلاً يزاير
يهل دمعة عالمهدوم وينادي حاير

جعفر يجدي اليوم اذرفها مدرار
————-
تذكر خيام حسين وافرار الاعيال
موقف يهد الحيل ماذيها الاجيال
عاد الحرگ هاليوم عالصادق ومال

حملي الثگل عاشور ثگلها تكرار
—————
للزهرة فكرك راح وامدافع الباب
هذا الفعل ميشوم واذكرت الامصاب
دار العلم وصلوه وتشابه اسباب

هم الحرك معيود بس فرقه بسمار
—————
تتشابه الاحداث ومصابك إيزيد
منعو علي الادموع ضل شابچ الايد
گيد السلاسل ذاك هم گاعد اوحيد

نفس الألم عاناه بس فرق الادوار
———-
امـير سـتار الشبـلي

لحن (نار بدليلي تسعر ماتنطفي يالاكبر)للزهراء (ع)
———————————-
نار اعله بابي شبت
وجفوفي بيها اتجوت

وفوك الحرك دفعوها
ودموعي دم نزلوها

وجفوفي بيها اتجوت
—————
بويه شحصل بغيابك والجره يهد كل الحيل
احجيلك انه المقتل
يوم الغمضت عينك بويه ونزلت الكبرك
خطط عمر لليحصل
كال النسل ينهي الزوم بأيام فاتحتك گال
غير الگطع مااقبل

كل السقيفه كالت
فاطم علينه عالت

بنت النبي طگوها
ودموعي دم نزلوها

وجفوفي بيها اتجوت
————
بويه الهجوم اعله الدار والحطب اجوام اچوام
مايخلص إبعَد شهور
وهواي فرسان وخيل كامت تحوم اعله الباب
الجره جنه ابعاشور
ارماح العده لحد الغيم كلش صعب هالمنظر
ماتنحمل من اتدور

واهل السيوف التمو
كلهم علي وماحسبو

بنت النبي ايأذوها
ودموعي دم نزلوها

وجفوفي بيها اتجوت
——————
اندفع بابي وصحت يامعظم امصاب اليوم
بيتك وسف هجموها
بيت الله إله حرمة شلون تدخلها زمرة اشرار
وسفه الكفر داسوها
طك الضلع والبسمار خله الدمه فوك الگاع
وعيوني هم سطروها

انعمت بويه عيناي
دمي نزل خف الماي

صاحو بعد روعوها
ودموعي دم نزلوها

وجفوفي بيها اتجوت
——————-
فاطم انه الخلف الباب بنت النبي المختار
واسمع وإن يحجيها
طاح الضنه وهمي طال بالعصمة ثالث ولدي
بس العده ثاريها
كل همهم المحسن مات وامه شرط هم تموت
هاي الخطط ادريها

لولا المضى بوصيتك
محد يگرب بيتك

هاي العدة تانوها
ودموعي دم نزلوها

واجفوفي بيها اتجوت
————————

راح انتظر مهدي الكون ياخذ حگي ومربع
مايترك الثار ادري
حگي انه ووليدي المحسن صريع الدفعه
ويعلم عمر قدري
يصلب ابو بكر العاق ويحقق عدل صلبه
يبني المناره لگبري

ينصب عدل بظهوره
ويملي الارض من نوره

والعِده هم يدعوها
ودموعي دم نزلوها

واجفوفي بيها اتجوت

——————-
امـير سـتار الشبـلي

للإمام الحسن المظلوم عليه السلام
————-
ياضليمة المرت بأول إمام
ينسكي بسم المنيه ياحرام
————-
ياامام الرحمة ياسيد البشر
تجرع السم ونعيش بلا سقر
رحمة الله للأرض ناوي السفر

والعجيب شلون تُرمى بالسهام
————-
ماكو من قبلك حصل ياسيدي
جاهدت والجلمة منك تبتدي
حيل غيرت البشر عل معتدي

وانوه ليك اعله القتل ابن اللإئام
—————-
المر عليك امن الظلم كلش صعب
ياجنازة تمشي واعليها الضرب
هاي عادة الماجرت حتى بحرب

لااهل سلمو عليك ولاعمام
——————
ظلم ياابو محمد السم تجرعه
يالمرجف الدنيا واسمك قارعه
رحت وانصاب الحسين بفاجعه

وين عنه بكربله رادك حُزام
—————-
وين عنه بظهر عاشر ياشجاع
لون حاضر ماتلمك والله كاع
يااسد وتهابك اجموع السباع

بالشجاعه والكرم انت الهمام
—————-
هل اجينه نواسي بنتك ياغريب
العذر لله وهم الك هذا النصيب
بلكي تقبل هالدمع ويه النحيب

وانت ماتتجازى يانسل الكرام
—————
جينه ننخه بلكت نعمر البقيع
نبني گبه للحسن ذاك الصريع
نعلي رايه ويعتني ليها الجميع

رايه بيها نكتب اعليك السلام
————
امـير سـتار الشبـلي

يادمعي مايوكف على حسيني
من دم يصب والذبح ماذيني

مصيبة بالصار وجرى علينه
اتخيل الكوم الاجت لينه
——————————
اريد احجي سوالف طف
المُعرف عندي يتعرف
الثكيل من السحك شو خف ابوي

وگفتي بيها طحت هواي
ضحكو وسفه تالي اعداي
وانه ابن العطش للماي ابوي

حرااام بيوم العاشر واگع
سهاااام ظل بروحه ينازع
خيااااام طاحت كلها تباوع

ياهو الحمل مثله الالم هذا
كل همه لايطلع خدر ساده

كلش عزيز الخدر ياذينه
اتخيل الكوم الاجت لينه
————————————
من خلص ظهر عاشور
رحت وظهري ظل مكسور
عفته لوحده بس مجبور اصيح

اودعك والجرح يقهر
جدي ياعلي احضر
و الكادتني ياحيدر اصيح

مصاااااب هذا حسينك طايح
عذااااااب اليوم اقصدلك نايح
خضاااااب شيبه بدمه السايح

بنص الغرب وتشمتو وسفه
انه وخواتي بالسلف كلفه

الكوفة مارحمت ابد بينه
اتخيل الكوم الاجت لينه
———————————-
من الكوفه لإرض الشام
باتت بالصحاري ايتام
گعدة اعله الهزيله انام قهر

واناطر انه وي ليلي
وادعي بس يرد حيلي
اساهر ليلي ب الويلي قهر

صيااااح براسي الليل وجرحه
نيااااااح يبدي من اذكر ذبحه
رماااااح كلها تناطر صبحه

شو طولت ليل شعجب هسه
من قصرت بالعاشر اشأنسه

وين الحبيب الماخسر دينه
اتخيل الكوم الاجت لينه
—————————————
لسه بگلبي اجر حسرة
خرجت بالفله مره
كلفه بنص غرب حره يناااس

طلعت والخلگ تنظر
صحاري الغربه ماتستر
حداي الدرب يسطر ينااااس

صحاااااار تحدي بزينب غربه
نااااااار تجوي بعمتي صعبه
وقاااااار كلها تريد تسلبه

صعبه وعلي صاحو علينه اسره
خدر الله يسبونه ونطر صحره

تراب الفله غير معانينه
اتخيل الكوم الاجت لينه
———————————
بقصر يا وسفة طبينه
الشماته بنظرة تاذينه
الزلم اشرت عله سكينه وبكاء

گالو جارية النه
وردنه الطفلة تخدمنه
صحنه نريدَ كافلنه وبكاء

عناااااء من اقصور الظالم
دماااااء شربت منه الوادم
عداااااء كلها تريد اتهاجم

اخ الطشت من رفعو إغطاهم
نياط الكلب تتكطع إوياهم

ورقية ماتت الحگ سكينه
اتخيل الكوم الاجت لينه
—————————-
امـير سـتار الشبـلي

فائـزي للإمام السجـاد عليه السلام
—————-
موتني الحسين ادموعي بالعين
———-
انه الجرعت بغربتي سم المنيه
ياهلي ياهو الفزع شاف البديه
سوط الزجر لسه وعلي هايج عليه
لسه الالم ماينسي بذيج المسيه

اللهُ المعين ادموعي بالعين
—————
لوعاتي بيه من السبي ماتقبل تروح
شنسى الظهر ياشيعه لو ذنيچ الاجروح
اه العطش ماينسي ماينسي النوح
درب السبي كلش وعر ومشيب الروح

من الصواوين ادموعي بالعين
—————-
ميت انه امن العطش ماشارب الماي
من فركة الراح بهظم سموني بحشاي
اتلوع او أندب يرب تعبتني دنياي
مارحمو بحالي ابد كلهم تره اعداي

انطي الوجه وين ادموعي بالعين
—————-
اي عمري بالطف انتهى من هجمو الكوم
اذكر خواتي والگلب بي تسعر اهموم
واذكر رقيه بالخيم محترگه و اتحوم
من الركض حتى الوجه متغير ارسوم

وياها الاونين ادموعي بالعين
——————
بالغربه خلصت العمر واحسب الموتي
ميت انه من كربله وفرگت اخوتي
هسه انتظر يحضر علي يسمع نخوتي
من لوعة السم بالجبد بحتلي صوتي

مثل المساكين ادموعي بالعين
—————
امـير سـتار الشبـلي

اساسية للسيدة رقية عليها السلام
——————-

آنه ذيج العاشت اعله امتون ابوها
ومن بعد لحضات مسبيه لگوها

ويني وين اليسر طفله يظربني الشمر
رقيه اني
—————
ابدي أول كلمه اسمي بدفتر الفرحه نشطب
وابتدت صفحه جديده وبالشطر خدي نظرب
عمري خمس سنين طفله وصارن عليه غضب
اخذو اللعبات مني وللخيم صارن حطب

خلصت كل عمري بالطف ياهظيمه
المثلي هسه تعيش فرحه مو يتيمه

اركض بذاك الظهر طفلة يضربني الشمر
رقيه اني
—————
اركض ومرعوبه اصرخ ليش ماخذني اللهيب
هذا ابويه حسين ابعد ياشمر أمرك غريب
عوف نحره واخذ نحري يبس گلبي من النحيب
لاتشيل الراس نزله بده برموشي المشيب

شلون الوحن عالرمح راسك العالي
بس احرك ايدي صاحولي تعالي

حتى بإحجار إنشمر طفلة يضربني الشمر
رقيه اني
—————
طفه عيني الطف يويلي شكثر مهمومه واصيح
شكد تمنيت بحياتي انسى جلمة بت ذبيح
هيه گوه عليه اخلص عمري بگليبي الجريح
من طحت بالطف لهسه شكو گومه وياها اطيح

بين عمي وبين ابويه ريته كبري
حتى من اشتاك انسى ذاك ظهري

عمري راح وي الخدر طفلة يضربني الشمر
رقيه اني
————
الحبل شيله هاي اديه قبلاها ابن النبي
باوع لطولي وتشاهد عمري مو مالت سبي
اعتب اعله الوكت وسفه بت نبي يطگها اجنبي
باد كل حيلي وزغيره وجهي من لون العبي

راح اشكي ال الله منكم هالاذية
سطر عيني وربط جدمي وي إديه

صاح اوديج القصر طفلة يضربني الشمر
رقيه اني
————
بالقصر عبالي لعبه صحتو فتحي عيونج
شفت راس إمغطه يهمس بويه ليضربونج
اكشفت عن الراس اباوع گلي بويه شلونج
خلصت اهنانه حياتي صاح ياخيعونج

متي بويه وخلص كلشي ظل نياحي
بعد صوتج بأذني اسمع كل صباحي

انه ظهري منكسر طفلة يضربني الشمر
رقيه اني
————
اميـر سـتار الشبـلي

إشبعد تاخذ من إعزازي /طف الكون
دفع وإسياط منعدهن /طفه الكون
يريت من الجرى ارجع /طفل كون

ولاجدامي اشوفنك رميه

لسان حال الامام السجاد ع

نزال للانصار
———————-
حسين اليوم نصبلك دمنه
هيج امن الزهرة اتعلمنه

يحسين يحسين
——————
شدينه ظهر بظهر كلنه نعاهد
اخر شهيد يطيح هو القائد
والشيخ وي حسين هم يجاهد
واحد يگل للثاني يلا ستاعد

شحده اليوصل يم خيامك
كل احنه انجاهد گدامك

يحسين يحسين
—————————
عدنه شعار الموت لا للذله
هذا الحسين الراد خل يوصله
درب الخنوع حسين مايندله
كل اليموت احذاه ثق يتعله

وياك الموت شمحلاته
يضحك للجنه بدمعاته

يحسين يحسين
————————-
يفرح زهير وجون وكت الصيده
صاحو وصوت صار ارعيده
ربع الحسين الموت كلنه نريده
اليوم خيركم يشاگف بيده

الشيخ البيهم ذب خاجيته
ومن الخوف اخفاها الحيته

يحسين يحسين
—————
شيبتنا لو مرة يأشر بالعين
معناها مشتاك لملاحم صفين
يتعثرون كباله كل العدلين
يرجع شباب وينسى عمر التسعين

مغوار الشايب مايوگع
كل ساعه يحوم ومايشبع

يحسين يحسين
———————
عابس تونس بالحرب وارعبهم
نظرة عيونه اهواي طيح منهم
هالعادة من الخوف صارت عدهم
يشمر بسيفة وارتعش قائدهم

صار إمشرادهم بالحومه
خيرهم خاتل بهدومه

يحسين يحسين
————————-
امـير سـتار الشبـلي

الامام السجاد يروي الطف للزهراء(عليهما السلام)
—————-
يزهراء مقتل حسين احجليج
—————
يمة الرماح اتزاحمت جدامي
شفت الفزع من انگلب عالضامي
صوت السيوف يهز ركن لخيامي
مابيه حيل اركض عليها اجدامي

يزهراء من الطفوف اشكيلج
————
زينب ييمه ابلا فكر من كامت
وكفت على باب الخيام وهامت
اتگلي يعمه الحگ علي مادامت
گلبي لجمني وعيني دم من سالت

يزهراء ردت الصبر وابديلچ
————-
شوية واجه وحده المهر بس خالي
منها اعرفت راح الحسين الغالي
گوة گمت واتعثرت بخيالي
باوع عليه من طحت يبرالي

يزهراء بدموعي راح اوريلج
—————-
من القفى شفت انذبح وينازع
اشرلي بيده عالخيم ويباوع
منه افهمت عن العيال إدافع
ويگلي عينك عالخدر لاسامع

يزهراء داسو عليه اوليدچ
————
زينب ييمه نشغت ابركضتها
من الخيم للتل عمر كبرتها
صاحت حسين الحگ دمه صبتها
شبچت بديها من الخطر ضمتها

يزهراء منظر يهدم حيلچ
————-
هجمو علينه من وكع والينه
حركو خيمنه والظهر ماذينه
شفت الشمر يركض يطگ سكينه
هامت حرمنه وللركض مابينه

يزهراء بعده الحجي ماشيلچ
—————
يمه العده التمو عليه بالحومه
تاه الفكر من هوسو بهدومه
خيل الاجت خربت كل ارسومه
صاح وسكت اي گلت هاي النومه

يزهراء جرح الولي ياذيلچ
—————
امـير سـتار الشبـلي